நாகப்பட்டினம்

கீழ்வேளூர்:

நாகை மாவட்டம் திருமருகலை அடுத்த அருள்மொழிதேவன் கிராமத்தை சேர்ந்தவர் சரவணன். இவருடைய மகன் சக்தி(வயது 19).

சரக்கு ஆட்டோ டிரைவரான இவர் நேற்று மாலை காரைக்கால் மாவட்டம் விழுதியூரில் இருந்து வேளாங்கண்ணியை நோக்கி சரக்கு ஆட்டோவில் தண்ணீர் கேன்களை ஏற்றிக்கொண்டு நாகை கிழக்கு கடற்கரை சாலை வழியாக வந்து கொண்டிருந்தார்.

நாகூரை அடுத்த தெத்தி அருகே கிழக்கு கடற்கரை சாலையில் வந்தபோது எதிரே சென்ற மோட்டார் சைக்கிளும், சரக்கு ஆட்டோவும் எதிர்பாராதவிதமாக மோதிக்கொண்டன. இதை தொடர்ந்து தாறுமாறாக ஓடிய சரக்கு ஆட்டோ சாலையோரத்தில் கவிழ்ந்தது.

இந்த விபத்தில் மோட்டார் சைக்கிளில் வந்த திருச்சி மேலகல்கண்டார்கோட்டையை சேர்ந்த ஹரிஹரன்(22) மற்றும் அவருடன் உறவினர் தர்மாவளவன் (18) ஆகிய இருவரும் படுகாயம் அடைந்து சம்பவ இடத்திலேயே பரிதாபமாக இறந்தனர். மேலும் சரக்கு ஆட்டோ டிரைவர் சக்தி படுகாயம் அடைந்தார்.

இதுகுறித்து தகவல் அறிந்த நாகூர் போலீசார் சம்பவ இடத்துக்கு விரைந்து வந்து டிரைவர் சக்தியை மீட்டு 108 ஆம்புலன்ஸ் மூலம் நாகை அரசு மருத்துவமனைக்கு சிகிச்சைக்காக அனுப்பி வைத்தனர். பின்னர் அங்கிருந்து அவர் மேல்சிகிச்சைக்காக தஞ்சையில் உள்ள ஒரு தனியார் மருத்துவமனையில் அனுமதிக்கப்பட்டார். அங்கு சிகிச்சை பலனின்றி சக்தியும் இறந்தார்.

இந்த விபத்து குறித்து நாகூர் போலீசார் வழக்குப்பதிவு செய்து விசாரணை நடத்தி வருகின்றனர்.

வேதாரண்யம்:

வேதாரண்யம், கரியாப்பட்டினம் பகுதிகளில் தி.மு.க. மற்றும் கூட்டணி கட்சிகள் பஸ் கட்டண உயர்வை கண்டித்து சாலை மறியல் போராட்டம் நடந்தது.

வேதாரண்யத்தில் முன்னாள் எம்.எல்.ஏ. காமராஜ் தலைமையில் தி.மு.க. நகர செயலாளர் புகழேந்தி, காங்கிரஸ் சார்பில் முன்னாள் பேரூராட்சி தலைவர் சங்கரவடிவேல், நாகை தெற்கு மாவட்ட இளைஞர் காங்கிரஸ் தலைவர் போஸ், மகிளா காங்கிரஸ் செல்வராணி, இந்திய கம்யூனிஸ்டு மாரியப்பன், மார்க்சிஸ்டு கம்யூனிஸ்டு கட்சியினர், விடுதலை சிறுத்தைகள் கட்சியினர்சாலை மறியலில் ஈடுபட்டனர். மறியலில் ஈடுபட்ட அவர்களை போலீசார் கைது செய்தனர்.

இதுபோல் கரியாப்பட்டினம் கடைத்தெருவில் தி.மு.க கிழக்கு ஒன்றியச் செயலாளர் கவிஞர் மாசி தலைமையில் மறியல் நடந்தது. இதில் 100-க்கும் மேற்பட்டோரை போலீசார் கைது செய்தனர்.

சீர்காழி:

நாகை மாவட்டம் சீர்காழி அருகே வெள்ளப்பள்ளம் கிராமத்தை சேர்ந்தவர் வினோத் என்கிற வெள்ளப் பள்ளம் வினோத் (வயது 35).

இவர் கடந்த 2012-ம் ஆண்டில் பூம்புகார் மேலையூரில் தி.மு.க. பிரமுகர் முத்து ராஜேந்திரனை நாட்டு வெடிகுண்டு வீசி கொலை செய்த வழக்கு, சென்னையில் பிரபல துணிக்கடையில் கொள்ளையடித்த வழக்கு உள்பட பல்வேறு வழக்குகள் உள்ளன. மேலும் நாகை- கடலூர் மாவட்டங்களில் உள்ள போலீஸ் நிலையங்களில் வினோத் மீது கொலை, கொள்ளை உள்ளிட்ட வழக்குகள் இருந்து வந்தன.

இந்த நிலையில் கடந்த சில மாதங்களுக்கு முன்பு ஒரு கொள்ளை வழக்கில் வினோத் ஜாமீன் பெற்றார். அதன்பின்னர் அவர் கோர்ட்டில் அவர் ஆஜராகாமல் தலைமறைவாகி விட்டார். இதனால் அவரை போலீசார் தொடர்ந்து தேடி வந்தனர்.

இந்த நிலையில் சீர்காழியை சேர்ந்த வெற்றிவேல் என்பவர் சிதம்பரத்தில் இருந்து சீர்காழிக்கு நேற்று இரவு தனது மோட்டார் சைக்கிளில் வந்து கொண்டிருந்தார்.

அப்போது கொள்ளிடம் பாலம் வல்லம்படுக்கை என்ற இடத்தில் வந்த போது அங்கு நின்ற ரவுடி வெள்ளப்பள்ளம் வினோத் , மோட்டார் சைக்கிளை மறித்தார். பின்னர் வெற்றிவேலை தாக்கி அவரிடம் இருந்த ரூ.2 ஆயிரம் , மற்றும் மோட்டார் சைக்கிளை பறித்து கொண்டு தப்பினார்.

இதுபற்றிய கொள்ளிடம் போலீசாருக்கு தகவல் கொடுக்கப்பட்டது. அதன்பேரில் கொள்ளிடம் போலீஸ் இன்ஸ்பெக்டர் செல்வம் மற்றும் போலீசார் நாகை- கடலூர் மாவட்ட எல்லையான கொள்ளிடம் பாலத்தில் ரோந்து பணியில் ஈடுபட்டு இருந்தனர். அப்போது அந்த வழியாக மோட்டார் சைக்கிளில் வந்த ரவுடி வெள்ளப்பள்ளம் வினோத், போலீசாரை கண்டதும் தப்பி ஓடினார். இதை கவனித்த போலீசார் அவரை விரட்டி பின்தொடர்ந்தனர்.

இதனால் போலீசாரிடம் இருந்து தப்பிக்க முடியாததால் வினோத், பாலத்தில் இருந்து குதித்தார். ஆற்றில் தண்ணீர் இல்லாததால் கீழே குதித்த வினோத்துக்கு காலில் காயம் ஏற்பட்டது.

இதையடுத்து வினோத்தை போலீசார் சுற்றிவளைத்து பிடித்தனர். போலீசார் அவரிடம் நடத்திய விசாரணையில் தலைமறைவாக இருந்த பிரபல ரவுடி வெள்ளப்பள்ளம் வினோத் என தெரிய வந்தது.

இதையடுத்து அவரை கைது செய்த போலீசார் திருச்சி மத்திய சிறையில் அடைத்தனர்.

சீர்காழி பகுதியில் பிரபல ரவுடி போலீ சாரிடம் பிடிபட்ட சம்பவம் பரபரப்பை ஏற்படுத்தியுள்ளது.

மயிலாடுதுறை:

நாகை மாவட்டம் மயிலாடுதுறை அருகே மணல்மேடு தெற்குகாருகுடி பகுதியை சேர்ந்தவர் கோவிந்தசாமி. இவரது மனைவி அரும்புஅம்மாள் (வயது75). இவர் அந்த பகுதியில் உள்ள ஒரு குடிசை வீட்டில் தனியாக வசித்து வந்தார்.

இந்நிலையில் நேற்று காலை நீண்ட நேரம் ஆகியும் அரும்புஅம்மாள் வீடு திறக்கப்படவில்லை. இதனால் அப்பகுதியில் வசிப்பவர்கள் அவரது வீட்டுக்குள் சென்று பார்த்தனர். அப்போது கழுத்து அறுபட்ட நிலையில் அரும்புஅம்மாள் கொலை செய்யப்பட்டு இறந்து கிடந்தார்.

இதுகுறித்து அப்பகுதியில் உள்ளவர்கள் மணல்மேடு போலீசாருக்கு தகவல் கொடுத்தனர். அதன்பேரில் விரைந்து சென்ற போலீசார் அரும்புஅம்மாள் உடலை மீட்டு பிரேத பரிசோதனைக்காக மயிலாடுதுறை அரசு மருத்துவமனைக்கு அனுப்பி வைத்தனர்.

இது குறித்து மணல்மேடு போலீசார் வழக்கு பதிவு செய்து விசாரணை நடத்தினர். இதில் அரும்பு அம்மாள்அணிந்திருந்த 4 பவுன் நகையை கொள்ளையடிக்க கொலை நடந்து இருப்பது தெரியவந்தது.

வேதாரண்யம்:

நாகை மாவட்டம் வேதாரண்யத்தை அடுத்த மருதூர் வடக்கு, வழியான்செட்டிகட்டளை பகுதியில் ஊராட்சி ஒன்றிய தொடக்கப்பள்ளி உள்ளது. இந்த பள்ளியில் 40-க்கும் மேற்பட்ட மாணவ, மாணவிகள் படித்து வருகின்றனர்.

இங்கு மாணவ-மாணவிகளின் குடிநீர் வசதிக்காக பள்ளி வளாகத்தில் ஆயிரம் லிட்டர் கொள்ளளவு கொண்ட குடிநீர் தொட்டி வைக்கப்பட்டு உள்ளது. இந்த தொட்டியில் கொள்ளிடம் கூட்டு குடிநீர் திட்டத்தில் இருந்து தண்ணீர் நிரப்பப்படுகிறது.

இந்த நிலையில் பள்ளி மாணவர்கள் நேற்று காலை தண்ணீர் குடிப்பதற்காக சென்றனர். அப்போது ஒருவித துர்நாற்றத்துடன், நிறம் மாறிய நிலையில் தண்ணீர் வந்துள்ளது. இதனால் அதிர்ச்சி அடைந்த மாணவர்கள் இதுகுறித்து ஆசிரியர்களிடம் தெரிவித்தனர். பின்னர் ஆசிரியர்கள், கரியாப்பட்டினம் போலீசுக்கு தகவல் தெரிவித்தனர்.

தகவல் கிடைத்ததும் போலீசார் உடனடியாக அந்த பள்ளிக்கு விரைந்து சென்று குடிநீர் தொட்டியை பார்வையிட்டு விசாரணை நடத்தினர்.

போலீசாரின் முதற்கட்ட விசாரணையில் மர்ம கும்பல், குடிநீர் தொட்டியில் வி‌ஷத்தை கலந்து இருப்பது தெரிய வந்தது. உடனடியாக வேதாரண்யத்தில் இருந்து டாக்டர்கள் குழு வரவழைக்கப்பட்டனர். அவர்கள் அந்த குடிநீரை பரிசோதனை செய்தனர்.

இது தொடர்பாக போலீசார் வழக்குப்பதிவு செய்து குடிநீர் தொட்டியில் வி‌ஷத்தை கலந்த மர்ம கும்பலை வலைவீசி தேடி வருகின்றனர்.

பள்ளியில் உள்ள குடிநீர் தொட்டியில் வி‌ஷம் கலந்த சம்பவத்தால் அந்த பகுதியே பரபரப்புக்குள்ளானது. #tamilnews

சீர்காழி:

சீர்காழி அடுத்த கதிராமங்கலம் ஊராட்சி கொண்டத்தூர் கிராமத்தில் 150க்கும் மேற்பட்ட குடும்பத்தினர்கள் வசித்து வருகின்றனர். இப்பகுதி மக்களுக்கு மேல்நிலை நீர்தேக்க தொட்டி மூலம் குடிநீர் வினியோகம் செய்யப்படுகிறது. இந்நிலையில் குடிநீர் தேக்கதொட்டியில் உள்ள மின்மோட்டார் கடந்த ஒரு வாரத்திற்கு மேலாக பழுது ஏற்பட்டு சீரமைக்கப்படாததால் அப்பகுதியில் குடிநீர் தட்டுபாடு நிலவியது.

இதனால் ஆத்திரமடைந்த பொதுமக்கள் சீர்காழி- மயிலாடுதுறை நெடுஞ்சாலையில் திடீர் சாலை மறியலில் ஈடுபட்டனர். தகவல் அறிந்த வைத்தீஸ்வரன் கோவில் இன்ஸ்பெக்டர் சிங்காரவேலு சம்பவ இடத்திற்கு சென்று மறியலில் ஈடுபட்ட பொதுமக்களிடம் பேச்சுவார்த்தை நடத்தியதன்பேரில் மறியல் விலக்கி கொள்ளப்பட்டது. இதனால் அப்பகுதியில் அரைமணி நேரம் போக்கு வரத்து பாதிப்பு ஏற்பட்டது.

நாகை:

திருவாரூர் மாவட்டம் குடவாசல் தாலுகா சேங்காளிபுரம் மெயின்ரோடு பகுதியை சேர்ந்தவர் சுரேஷ் (வயது40). இவர் கடந்த 10 ஆண்டுகளுக்கு முன்பு குடும்பத்தை விட்டு பிரிந்து நாகை மாவட்டம் வேளாங்கண்ணியில் தங்கி அங்குள்ள தனியார் விடுதிகளுக்கு சுற்றுலா பயணிகளை அழைத்து செல்லும் ஏஜெண்டாக இருந்து வந்தார்.

இந்த நிலையில் நேற்று கடற்கரை அருகே உள்ள ஒரு தனியார் விடுதி அறையில் ஓய்வெடுப்பதாக சுரேஷ் கூறிவிட்டு சென்றுள்ளார். நீண்ட நேரமாகியும் அவர் வெளியே வராததால் விடுதி ஊழியர்கள் அந்த அறைக்கு சென்று பார்த்தபோது அறையில் உள்ள மின் விசிறியில் தூக்கில் பிணமாக தொங்கி உள்ளார்.

இதுகுறித்து தகவல் அறிந்த வேளாங்கண்ணி போலீசார் சம்பவ இடத்துக்கு விரைந்து வந்து சுரேசின் உடலை கைப்பற்றி பிரேத பரிசோதனைக்காக நாகை அரசு மருத்துவமனைக்கு அனுப்பி வைத்தனர். மேலும், போலீசார் வழக்குப்பதிவு செய்து சுரேஷ் எதற்காக தற்கொலை செய்து கொண்டார் என்பது குறித்து விசாரணை நடத்தி வருகின்றனர்.