காஞ்சிபுரம்

தாம்பரம்:

மேடவாக்கத்தை அடுத்த சித்தலப்பாக்கத்தை சேர்ந்தவர் ஆஷிப் பாஷா (வயது 27). தனியார் நிறுவனத்தில் வேலை பார்த்து வந்தார். நேற்று இரவு அவர் தாம்பரத்தில் இருந்து மோட்டார் சைக்கிளில் வந்தார். காமராஜபுரம், வேளச்சேரி மெயின் ரோட்டில் சிக்னல் அருகே வந்த போது அங்கு நின்ற லாரியை டிரைவர் பின் நோக்கி இயக்கினார்.

அப்போது ஆஷிப் பாஷா வந்த மோட்டார் சைக்கிள் மீது லாரி மோதியது. இதில் பலத்த காயம் அடைந்த அவரை மீட்டு தாம்பரத்தில் உள்ள தனியார் ஆஸ்பத்திரியில் சேர்த்தனர். இன்று காலை ஆஷிப் பாஷா பரிதாபமாக இறந்தார். இது குறித்து குரோம்பேட்டை போக்குவரத்து போலீசார் வழக்குப்பதிவு செய்து லாரி டிரைவர் கண்ணகி நகரை சேர்ந்த குமாரை கைது செய்தனர்.

போரூர்:

விருகம்பாக்கம், காளியம்மன் கோவில் தெரு கூவம் ஆற்றுபாலம் பகுதியில் இன்று காலை பச்சிளம் குழந்தை உடல் மிதந்து வந்தது.

இதனை பார்த்து அதிர்ச்சி அடைந்த அப்பகுதி மக்கள் போலீசுக்கு தகவல் தெரிவித்தனர். கோயம்பேடு போலீசார் குழந்தையின் உடலை கைப்பற்றி விசாரணை நடத்தினர்.

அது ஆண் குழந்தை என்பதும் தொப்புள் கொடியுடன் இருப்பதும் தெரிந்தது. குழந்தை பிறந்த உடனேயே அதனை கூவம் ஆற்றில் வீசி இருக்கலாம் என்று போலீசார் சந்தேகிக்கிறார்கள்.

குழந்தையின் உடல் உப்பிய நிலையில் காணப்பட்டது. எனவே குழந்தை இறந்து 2 நாட்களுக்கு மேல் இருக்கலாம் என்று தெரிகிறது. குழந்தையின் பெற்றோர் யார்? என்று தெரியவில்லை.

கள்ளக்காதலில் பிறந்ததால் கூவம் ஆற்றில் வீசி குழந்தை கொலை செய்யப்பட்டதா? அல்லது குழந்தை இறந்து பிறந்ததால் வீசப்பட்டதா? என்பது குறித்து போலீசார் விசாரணை நடத்தி வருகிறார்கள். #tamilnews

காஞ்சீபுரம்:

சென்னையில் நடந்த புத்தக வெளியீட்டு விழாவில் காஞ்சி சங்கராச்சாரியார் விஜயேந்திரர் கலந்து கொண்டார்.

விழாவில் தமிழ்த்தாய் வாழ்த்து பாடும்போது விஜயேந்திரர் எழுந்து நிற்கவில்லை என்றும் தேசிய கீதத்தின் போது மட்டும் எழுந்து நின்றார் என்றும் சர்ச்சை எழுந்தது. இது தமிழை அவமதிப்பதான செயல் என்று பல்வேறு அமைப்பினர், அரசியல் கட்சியினர் கண்டனம் தெரிவித்து உள்ளனர்.

இது தொடர்பாக சங்கரமடம் அளித்துள்ள விளக்கத்தில் ‘வழக்கமாக விழாக்களின் தொடக்கத்தில் கடவுள் வாழ்த்து பாடும் போது காஞ்சி சங்கராச்சாரியார்கள் ஜெயேந்திரர், விஜயேந்திரர் ஆகியோர் தியானத்தில் இருப்பது வழக்கம்.

இதேபோலத்தான் இந்த விழாவிலும் விஜயேந்திரர் தமிழ்த்தாய் வாழ்த்து பாடும் போது தியானத்தில் இருந்தார். தமிழை அவமதிக்கவில்லை’ என்று தெரிவித்து இருந்தது.

ஆனால் விஜயேந்திரர் மன்னிப்பு கேட்க வேண்டும் என்று கூறி பல்வேறு அமைப்பினர் தமிழகம் முழுவதும் திடீர் போராட்டத்தில் ஈடுபட்டுள்ளனர்.

இந்த நிலையில் இன்று மதியம் காஞ்சீபுரம் சாலைத் தெருவில் உள்ள காஞ்சி சங்கரமடத்தை விடுதலை சிறுத்தைகள், பெரியார் திராவிடர் கழகம், மக்கள் மன்றம் அமைப்பை சேர்ந்த பெண்கள் உள்பட சுமார் 100-க்கும் மேற்பட்டோர் முற்றுகையிட்டனர்.

அவர்கள் விஜயேந்திரருக்கு எதிராக கோ‌ஷங்கள் எழுப்பியபடி மடத்துக்கு செல்ல முயன்றனர். இதனால் அங்கு பரபரப்பு ஏற்பட்டது.

போராட்டத்தில் ஈடுபட்டவர்களை டி.எஸ்.பி. முகிலன் தலைமையிலான போலீசார் தடுத்து நிறுத்தினர். இதனால் போலீசாருக்கும் போராட்டக்காரர்களுக்கும் இடையே வாக்குவாதம் ஏற்பட்டு தள்ளுமுள்ளு உருவானது.

இதையடுத்து போராட்டக்காரர்கள் 100 பேரை போலீசார் கைது செய்தனர். தொடர்ந்து சங்கரமடம் முன்பு குவிக்கப்பட்டு உள்ளனர். அவர்கள் சங்கர மடத்துக்கு வரும் பக்தர்களையும் கண்காணித்து வருகிறார்கள்.

இன்று காலை வழக்கம் போல் பக்தர்கள் மடத்துக்குள் சென்று வந்தனர். மடத்தில் ஜெயேந்திரர், விஜயேந்திரர் ஆகியோர் வழக்கமான வழிபாடு மற்றும் பக்தர்களுக்கு ஆசி வழங்கினர்.

சங்கர மடத்தின் முன்பு போலீசார் குவிக்கப்பட்டு உள்ளதால் காஞ்சீபுரம் நகரம் பரபரப்பாக காணப்படுகிறது.

ராமேசுவரம் அக்னி தீர்த்த கடல் அருகே காஞ்சி சங்கர மடத்துக்கு சொந்தமான மடம் உள்ளது. இங்கு இன்று காலை தமிழர் தேசிய முன்னணியை சேர்ந்த இளங்கோ தலைமையில் 11 பேர் விஜயேந்திரரை கண்டித்து கோ‌ஷமிட்டவாறு உள்ளே நுழைந்தனர். அவர்கள் மடத்திற்குள் அமர்ந்து ஆர்ப்பாட்டம் நடத்தினர்.

தமிழ்தாய் வாழ்த்தை அவமதித்த விஜயேந்திரரை கைது செய்ய வேண்டும். அவர் நிபந்தனையின்றி மன்னிப்பு கேட்க வேண்டும் என ஆர்ப்பாட்டத்தில் ஈடுபட்டவர்கள் வலியுறுத்தினர்.

உடனே அங்கு வந்த மடத்தின் மேலாளர் சுந்தர வாத்தியார், பா.ஜனதா கட்சியின் மாவட்ட செயலாளர் முரளிதரன் ஆகியோர் அவர்களிடம் வாக்குவாதத்தில் ஈடுபட்டனர்.

இதுகுறித்து தகவல் அறிந்த ராமேசுவரம் கோவில் போலீசார் சம்பவ இடம் வந்து பேச்சுவார்த்தை நடத்தி ஆர்ப்பாட்டம் நடத்தியவர்களை அங்கிருந்து வெளியேற்றினர்.

தஞ்சை புதிய பஸ் நிலையத்தில் உள்ள பெரியார் சிலைக்கு முன்பு இன்று காலை தமிழ் மாணவர் அமைப்பை சேர்ந்த 20-க்கும் மேற்பட்டோர் வந்தனர். அவர்கள் விஜயேந்திர சுவாமிகளின் உருவ படத்தை எரித்தனர்.

தமிழ்த்தாய் வாழ்த்தை விஜயேந்திரர் அவமதிப்பதை கண்டித்து கோ‌ஷங்கள் எழுப்பினர். #tamilnews

ஆலந்தூர்:

தமிழக பா.ஜனதா கட்சி தலைவர் தமிழிசை சவுந்தரராஜன் சென்னை விமான நிலையத்தில் கூறி இருப்பதாவது:-

பஸ் கட்டண உயர்வை கண்டித்து பா.ஜனதா சார்பில் தமிழகம் முழுவதும் அனைத்து மாவட்டத்திலும் இன்று ஆர்ப்பாட்டம் நடைபெறுகிறது.

இந்த பஸ் கட்டண உயர்வு பொதுமக்களுக்கு பாதிப்பை ஏற்படுத்தி இருக்கிறது. இதனை அரசு திரும்ப பெற வேண்டும்.

போக்குவரத்து துறையே ஊழலால் நிறைந்து இருக்கிறது அதை லாபகரமாக மாற்ற அரசு நடவடிக்கை எடுக்க வேண்டும்.

பா.ஜனதா எப்போதும் தமிழ்நாட்டு மக்களுடன் இருக்கிறது. மத்தியிலும் பெரும்பாலான மாநிலங்களில் பா.ஜனதா ஆட்சியில் இருக்கிறது. அப்படிப்பட்ட அதிகாரத்தில் இருப்பவர்களால்தான் தமிழகத்தில் நல்ல மாற்றத்தை கொண்டு வர முடியும்.

தற்போது பலபேர் மாற்றத்தை கொண்டுவரப் போவதாக கிளம்பி உள்ளனர். சுற்றுப்பயணம் மேற்கொள்ள இருக்கின்றனர். கஜானா குறிக்கோள் இல்லை என்று சொல்லும் ஒருவர் (கமல்) தான் வாழ்நாளில் பாதிநாட்கள் சினிமாவில் நடித்து கஜானாவை நிரப்பி உள்ளார்.

இனி தமிழகம் பரிசோதனை களமாக இருக்காது. திராவிட கட்சிகள் ஊழலால் நிரம்பி இருக்கிறது. பா.ஜனதாவால் மட்டுமே மாற்றத்தை கொண்டு வர முடியும்.

இவ்வாறு அவர் கூறினார். #tamilnews

திருவான்மியூர்:

நீலாங்கரையை அடுத்த கானத்தூர் இந்திரா நகரில் வசித்து வருபவர் ரவி (வயது 25). தனியார் கழிவுநீர் லாரியில் கிளீனராக வேலை பார்த்து வருகிறார். இவரது சொந்த ஊர் திருநெல்வேலி ஆகும்.

இவர் கடந்த வாரம் இரவில் லாரியை கானத்தூரில் உள்ள சினிமா தியேட்டர் எதிரில் நிறுத்திவிட்டு மது குடித்தார். பின்னர் லாரியிலேயே தூங்கினார்.

அப்போது அங்கு வந்த போலீசார் சந்தேகத்தின் பேரில் ரவியை பிடித்து சென்றனர். அதன்பிறகு அவரை விட்டுவிட்டனர்.

இந்த நிலையில் ரவி மீது ரவுடி என்று வழக்குப்பதிவு செய்து அவரை தேடி வந்தனர். ஆனால் அவர் போலீசில் சிக்காமல் இருந்கார்.

இந்த நிலையில் நேற்று மதியம் ரவி வேலை முடிந்து சென்று கானத்தூர் பகுதியில் மது குடித்துக் கொண்டிருந்தார். அப்போது அவரை தேடி போலீசார் சென்றனர். போலீசாரை பார்த்ததும் ரவி ஓடினார். போலீசார் அவரை துரத்தினார்கள்.

இதனால் ரவி மின் கம்பத் தில் ஏறி உயர் அழுத்த மின் கம்பியை பிடித்தார். அவர் மின்சாரம் தாக்கி உடல் கருகிய நிலையில் தூக்கி வீசப்பட்டார். உடனே அவரை கீழ்ப்பாக்கம் அரசு ஆஸ்பத்திரியில் அனுமதித்தனர். அங்கு அவரது நிலை கவலைக்கிடமான நிலையில் உள்ளது. #tamilnews

காஞ்சீபுரம் அருகே உள்ள திருப்புட்குழியில் விஜயராகவ பெருமாள் கோவில் உள்ளது. இந்த கோயிலில் திருப்பணிகள் செய்யப்பட்டு கும்பாபிஷேகம் நடந்தது. 

விழாவிற்கான ஏற்பாடுகளை வேலூர் இந்து சமய அறநிலையத்துறை இணை ஆணையர் பெ.அசோக் குமார், காஞ்சீபுரம் இந்து சமய அறநிலையத்துறை உதவி ஆணையர் க.ரமணி, இந்துசமய அறநிலையத்துறை ஆய்வர் ஜெ.சுரேஷ்குமார், கோயில் செயல் அலுவலர் ந.தியாகராஜன் ஆகியோர் செய்திருந்தனர். இதில் திரளான பக்தர்கள் கலந்து கொண்டனர்.