காஞ்சிபுரம்

செங்கல்பட்டு:

கடலூரில் இருந்து சென்னைக்கு அரசு பஸ் வந்து கொண்டிருந்தது. அதில் 40 பயணிகள் இருந்தனர். இன்று காலை 7.30 மணிக்கு செங்கல்பட்டை அடுத்த புலிபாக்கம் என்ற இடத்தில் பஸ் வந்து கொண்டிருந்தது. அப்போது எதிரே தாம்பரத்தில் இருந்து மதுராந்தகத்துக்கு லாரி ஒன்று சென்று கொண்டிருந்தது.

குறுக்கே வந்த வாலிபர் ஒருவரின் மோட்டார் சைக்கிளில் மோதாமல் இருக்க லாரியை டிரைவர் திருப்பினார். இதில் எதிரே வந்த அரசு பஸ் மீது லாரி மோதியது. மோதிய வேகத்தில் டிரைவரின் கட்டுப்பாட்டை இழந்த அரசு பஸ் தாறுமாறாக ஓடி சாலையோரம் கவிழ்ந்தது. இதனால் பஸ்சில் இருந்த பயணிகள் அலறினார்கள்.

உடனே அப்பகுதியை சேர்ந்த மக்கள் ஓடிவந்து பஸ்சில் இருந்த பயணிகளை மீட்டனர். இந்த விபத்தில் பஸ் டிரைவர் தேவநாதன், கண்டக்டர் ராதாகிருஷ்ணன், மஞ்சகுப்பத்தை சேர்ந்த தமிழரசன், பாண்டிச்சேரியை சேர்ந்த ராமலிங்கம், அவரது மகன் நரேந்திரன் (12), பெரம்பூர் கண்ணதாசன் நகரைச் சேர்ந்த ஜெயந்தி, அவரது மகள் சந்தியா, மகன் நவீன் உள்பட 15 பேர் படுகாயம் அடைந்தனர். அவர்கள் ஆம்புலன்ஸ் மூலம் செங்கல்பட்டு அரசு ஆஸ்பத்திரியில் சேர்க்கப்பட்டனர். 

விபத்து நடந்ததும் லாரி டிரைவர் தப்பி ஓடி விட்டார். இது குறித்து செங்கல்பட்டு தாலுகா போலீசார் வழக்குப்பதிவு செய்து விசாரணை நடத்தி வருகிறார்கள்.

மாமல்லபுரம்

கல்பாக்கத்தை அடுத்த விட்டிலாபுரம் இருளர் குடியிருப்பை சேர்ந்தவர் வெங்கடேஷ் (வயது23) கூலித்தொழிலாளி. இவருக்கு மனைவியும், 3 வயதில் மகனும் உள்ளனர்.

வெங்கடேசனின் மனைவிக்கும் அதே பகுதியை சேர்ந்த வாலிபர் ஒருவருக்கும் கள்ளத்தொடர்பு ஏற்பட்டது. இதுபற்றி தெரிந்ததும். வெங்கடேசன், மனைவியை கண்டித்தார். எனினும் கள்ளக்காதல் ஜோடி எதையும் கண்டுகொள்ளாமல் சுற்றி வந்தனர்.

இந்த நிலையில் கடந்த சிலநாட்களுக்கு முன்பு வெஙக்டேசனின் மனைவி கள்ளக்காதலனுடன் திடீரென ஓட்டம் பிடித்தார். இதனால் வெங்கடேசன் மனவேதனை அடைந்தார்.

அவரது மனைவி ஓட்டம் பிடித்தது குறித்து உறவினர்களும், அக்கம் பக்கத்தினரும் கேலி பேசி வந்ததாகவும் கூறப்படுகிறது.

இதனால் மனவேதனை அடைந்த வெங்கடேஷ் வி‌ஷம் குடித்து தற்கொலை செய்துகொண்டார். இது குறித்து சதுரங்கப்பட்டினம் போலீசார் வழக்குப்பதிவு செய்து விசாரணை நடத்தி வருகிறார்கள்.

காஞ்சீபுரம்:

காஞ்சீபுரம் காமாட்சியம்மன் கோவிலில் உலக நன்மைக்காக 10 நாட்கள் ஸ்ரீ தசா மகாவித்யா ஹோமம் நடக்கிறது.

9-வது நாளான நேற்று ஸ்ரீ ராஜமதங்கி ஹோமம் நடைபெற்றது. இதில் இந்து மக்கள் கட்சியின் மாநில தலைவர் அர்ஜூன் சம்பத் கலந்து கொண்டு சாமி தரிசனம் செய்தார். பின்னர் அவர் நிருபர்களிடம் கூறியதாவது:-

தமிழ்நாடு ஏதோ இந்தியாவிலே ஒரு தனி நாடு என்பது போன்ற தோற்றத்தை ஒருசில பிரிவினைவாத சக்திகள் உருவாக்கி வருகிறார்கள். அந்த சக்திகள் ஆன்மிக அரசியல் நடத்தும் ரஜினி மீது அவதூறு கற்பிக்க முயற்சிக்கிறார்கள். வெறுப்பு அரசியல் நடத்துகிறார்கள். நிச்சயமாக வரும் தேர்தலில் ஆன்மீக அரசியல் வெற்றி பெறும். ராம ராஜ்ஜியம் உருவாகும்.

காஞ்சீபுரம் அருகே செயல்படும் ஒரு சில அமைப்புகள் ஆன்மீக வாதிகள் மீது தாக்குவது, ஆன்மீக சின்னங்களை அழிப்பது, வன்முறையை தூண்டுவது, தீக்குளிப்பு காரியங்களை செய்ய மாணவர்களை, இளைஞர்களை தூண்டுவதால் உளவுத்துறையும், மத்திய அரசும் கண்காணித்து அதன் நிர்வாகிகள் மீது நடவடிக்கை எடுக்க வேண்டும். அந்த அமைப்புகளை தடை செய்ய வேண்டும்.

பாரதிராஜா, ரஜினிகாந்த் மீது வெறுப்பு பிரச்சாரத்தை செய்கிறார். இன வெறி கொள்கையை பிரச்சாரம் செய்கிறார். இலங்கை தமிழர் பிரச்சினையிலும், காவிரி பிரச்சினையிலும் ரஜினிகாந்த் தமிழகத்திற்கு ஏராளமான நன்மைகளை செய்துள்ளார்.

ஆனால் பாரதிராஜா, சீமான், வைகோ போன்றவர்களால் இப்பிரச்சினைகளில் கேடுதான் வந்துள்ளது. எனவே இப்பிரிவினை வாத இயங்கங்களை மாணவர்கள், இளைஞர்கள் புறக்கணிக்க வேண்டும். ஆன்மீக, தேசிய அரசியலை ஆதரிக்க வேண்டும்.

ரஜினிகாந்த் மீது தனிப்பட்ட முறையில் வெறுப்பு பிரச்சாரம் செய்யும் பாரதி ராஜாவிற்கு கடும் கண்டனத்தை தெரிவித்துக் கொள்கிறேன்.

தமிழகத்தில் சட்டம் ஒழுங்கு திட்டமிட்டு கெடுக்கப்படுகிறது. காவல் துறையை தாக்குவது, டோல் கேட்டை உடைப்பது, மத்திய அரசு அலுவலகங்களை தாக்குவோம், முற்றுகையிடப் போகிறோம் என அறிவிப்பது போன்ற தைரியம் வந்திருப்பது உளவுத்துறையின் இயலாமையை காட்டுகிறது.

உளவுத்துறையையும், காவல் துறையையும் தன் கையில் வைத்துள்ள முதல்-அமைச்சர் தான் இத்தகைய பிரிவினை சக்திகளை இரும்புகரம் கொண்டு ஒடுக்க வேண்டும்.

இவ்வாறு அவர் தெரிவித்தார்.

முன்னதாக கோயிலுக்கு வந்த அர்ஜூன் சம்பத்தை கோயில் ஸ்ரீகார்யம் சல்லா விஸ்வநாத சாஸ்திரிகள், நடனம் சாஸ்திரிகள் வர வேற்றனர். #tamilnews #arjunsampath #spiritualrajinikanth

சோழிங்கநல்லூர்:

கொட்டிவாக்கம், ராஜீவ் காந்தி சாலையை சேர்ந்தவர் மாயாண்டி (வயது 73). இவரது மனைவி வள்ளி நாயகி (68). இவர்கள் 3 மாடி கட்டிடத்தில் வசித்து வந்தனர்.

கீழ்தளத்தில் தங்கும் விடுதி உள்ளது. 3-வது தளத்தில் மாயாண்டி மனைவியுடன் தங்கி இருந்தார்.

நேற்று இரவு மாயாண்டியின் வீட்டுக்கு அவரது உறவினர்கள் வந்தனர். அப்போது வீட்டில் உள்ள அறையில் மாயாண்டியும், வள்ளிநாயகியும் ரத்த வெள்ளத்தில் கொலை செய்யப்பட்டு கிடந்தனர்.

உருட்டுக்கட்டையால் தாக்கி அவர்கள் கொலை செய்யப்பட்டு இருப்பது தெரிந்தது. மேலும் வள்ளி நாயகி அணிந்திருந்த 13 பவுன் நகையும் மாயமாகி இருந்தது.

இது குறித்து துரைப்பாக்கம் போலீசுக்கு தகவல் தெரிவிக்கப்பட்டது. போலீசார் 2 பேரின் உடல்களையும் கைப்பற்றி தீவிர விசாரணை நடத்தினர்.

கீழ்தளத்தில் உள்ள தங்கும் விடுதியில் வைக்கப்பட்டு இருந்த கண்காணிப்பு கேமிராக்களை ஆய்வு செய்தனர். அப்போது கொலை நடந்த நேரத்தில் மேல் தளத்தில் உள்ள மாயாண்டி வீட்டிற்கு வாலிபர் ஒருவர் செல்வதும், சிறிது நேரத்தில் அவர் இறங்கி போவதும் பதிவாகி இருந்தது.

இதனை வைத்து போலீசார் துப்பு துலக்கியபோது மாயாண்டியையும், வள்ளி நாயகியையும் கொலை செய்தது டைல்ஸ் ஒட்டும் தொழிலாளியான வட மாநிலத்தை சேர்ந்த ஆலன் என்பது தெரிந்தது. அவரை போலீசார் கைது செய்தனர். அவனிடம் இருந்து 13 பவுன் நகை பறிமுதல் செய்யப்பட்டது.

டைல்ஸ் ஓட்டிய பணிக்கு பேசிய கூலிப்பணம் தராததால் மாயாண்டியை அடித்து கொலை செய்ததாகவும் இதனை தடுக்க முயன்ற அவரது மனைவியையும் அடித்து கொன்றதாகவும் அவர் தெரிவித்துள்ளார்.

கொலைக்கு வேறு ஏதேனும் காரணம் உள்ளதா? கொலைக்கு அவரது நண்பர்கள் யாரேனும் உதவினார்களா? என்பது குறித்தும் போலீசார் விசாரணை நடத்தி வருகிறார்கள்.

மாமல்லபுரம்:

கர்நாடக மாநிலம் பூஜ்நல்லி பகுதியை சேர்ந்த மேல்மருவத்தூர் ஆதிபராசக்தி பக்தர்கள் 40க்கும் மேற்பட்டோர் மாமல்லபுரத்துக்கு நேற்று மாலை சுற்றுலா வந்தனர்.

இவர்கள் கடற்கரை கோவில் அருகே கடலில் குளித்துக் கொண்டிருந்தனர். அப்போது சிறுவர்கள் அபிராம் (வயது14), சதீஷ், தர்‌ஷன் ஆகியோர் ராட்சத அலையில் சிக்கினர்.

இதனை பார்த்து அதிர்ச்சி அடைந்த உடன் வந்தவர்கள் சதீசையும், தர்சனையும் மீட்டனர். அபிராம் மாயமானார் அவரை தேடி வந்தனர்.

இந்த நிலையில் இன்று காலை மாமல்லபுரம் அடுத்த பட்டிபுலம் கடற்கரையில் அபிராம் உடல் பிணமாக கரை ஒதுங்கியது.