ஈரோடு

ஈரோடு:

கொங்கு நாடு மக்கள் தேசிய கட்சியின் பொதுச் செயலாளர் ஈஸ்வரன் விடுத்துள்ள அறிக்கையில் கூறியிருப்பதாவது.-

கோவை சூலூரில் குட்கா தயாரிப்பு தொழிற்சாலை அதிகாரிகளால் கண்டுபிடிக்கப்பட்டுள்ளது. தொடர்ந்து தமிழகம் முழுவதும் இப்படிப்பட்ட தொழிற்சாலைகளை கண்டுபிடித்து வெளிக்கொணர தமிழக அரசு துரித நடவடிக்கை எடுக்க வேண்டும்.

குட்கா ஊழல் வழக்கு சிபிஐ விசாரணைக்கு மாற்றப்பட்ட உடன் இந்த குட்கா ஆலை கண்டுபிடிக்கப்பட்டது சந்தேகத்தை எழுப்புகிறது. அரசு அதிகாரிகளுக்கு தெரியாமல் ஒரு தொழிற்சாலை தொடர்ந்து நடத்த முடியாது.

அவ்வளவு பெரிய தொழிற்சாலை தொடர்ந்து நடந்து கொண்டு இருந்திருக்கிறது. அதிகாரிகள் கண்டுக்கொள்ளாமல் இருந்திருக்கிறார்கள். யார் நம்மை கேட்க போகிறார்கள்? என்ற தைரியத்தில் அதிகாரிகள் லஞ்சம் பெற்றுக்கொண்டு அனுமதித்திருக்கலாம்.

சிபிஐ விசாரணைக்கு உத்தரவிட்ட உடன் பயந்து கொண்டு தாங்களே கண்டுபிடிப்பது போல கண்டுபிடித்திருக்கிறார்களோ...? என்ற சந்தேகம் வலுக்கிறது. தமிழகம் முழுவதும் இப்படிப்பட்ட தொழிற்சாலைகள் அரசாங்கத்தில் உள்ள ஒருசிலரின் ஆதரவோடு செயல்பட்டுக் கொண்டிருக்க வாய்ப்பு இருக்கிறது.

இரும்பு கரம் கொண்டு அடக்க வேண்டிய கடமை தமிழக அரசிற்கு இருக்கிறது. தமிழகம் முழுவதும் பரிசோதனையை தீவிரப்படுத்தி குட்கா ஆலைகளை கண்டுபிடிக்க வேண்டும்.

இவ்வாறு அவர் அதில் கூறி உள்ளார். #Eswaran #gutkha

பெருந்துறை:

பெருந்துறை அருகே உள்ள கள்ளியம் புதூரை சேர்ந்தவர் பாக்கியலட்சுமி (வயது 52). இவரது மகன் பிரகாஷ். பிரகாஷ் ஈரோட்டில் ‘‘கார் டெக்கரே‌ஷன்’’ நிறுவனம் நடத்தி வருகிறார். நேற்று ஒரு திருமணத்துக்காக பிரகாஷ் தனது தாயாரை அழைத்து கொண்டு ஸ்கூட்டரில் சின்னத்தாள் கோவில் திருமண மண்டபத்தில் நடந்த திருமண விழாவில் கலந்து கொண்டு வீட்டுக்கு செல்ல மீண்டும் ஸ்கூட்டரில் புறப்பட்டனர்.

கள்ளியம்புதூர் பைபாஸ் ரோட்டில் வந்த போது பின்னால் வந்த ஒரு கார் எதிர் பாராதவிதமாக ஸ்கூட்டர் மீது பலமாக மோதியது.

மோதிய வேகத்தில் ஸ்கூட்டரை 100 அடி தூரம் இழுத்து சென்று ரோட்டோர பள்ளத்தில் இருவரும் தூக்கி வீசப்பட்டனர்.

இந்த விபத்தில் பாக்கியலட்சுமி சம்பவ இடத்திலேயே பரிதாபமாக இறந்தார். அவரது மகன் பிரகாஷ் படுகாயத்துடன் துடித்தார். அவரை மீட்டு ஈரோட்டில் உள்ள தனியார் ஆஸ்பத்திரியில் சேர்த்தனர். அங்கு உயிருக்கு ஆபத்தான நிலையில் அவர் சிகிச்சை பெற்று வருகிறார். இவருக்கு திருமணமாகி 2 மாதத்தில் பெண் குழந்தை உள்ளது. மனைவி பெயர் அருள் செல்வி.

விபத்தில் பலியான பாக்கியலட்சுமி உடல் பெருந்துறை அரசு ஆஸ்பத்திரியில் பிரேத பரிசோதனைக்காக சேர்க்கப்பட்டுள்ளது.

இந்த விபத்து குறித்து பெருந்துறை போலீஸ் இன்ஸ் பெக்டர் சுகவனம் வழக்குப்பதிவு செய்து விசாரணை நடத்தி வருகிறார்.

விபத்தை ஏற்படுத்திய கார் நிற்காமல் சென்று விட்டது. அந்த காரை போலீசார் தேடி வருகிறார்கள். விபத்து நடந்த பகுதியிலும் மேலும் பைபாஸ் ரோட்டில் உள்ள காஞ்சிக்கோவில் ரோடு, பெத்தாம்பாளையம் பைபாஸ் ரோடு, துடுப்பதி பைபாஸ் ரோடு ஆகிய பகுதிகளில் மொத்தம் 3 மேம்பாலங்கள் அமைத்தால் விபத்துகள் அடியோடு தடுத்து நிறுத்தப்படும்.

இதனால் இந்த இடங்களில் உடனடியாக மேம்பாலங்கள் அமைத்து உயிர் பலியை தடுக்க வேண்டும் என முன்னாள் அமைச்சரும் பெருந்துறை தொகுதி எம்.எல்.ஏ.வுமான தோப்பு வெங்கடாச்சலம் மத்திய அரசை கேட்டு கொண்டுள்ளார். திருப்பூர் சத்யபாமா எம்.பி.யும் வலியுறுத்தி உள்ளார்.

மேலும் அந்த பகுதி பொதுமக்களும் கடந்த 5 ஆண்டுகளாக மேம்பாலம் கட்ட கோரிக்கை விடுத்தும் இதுவரை எந்த நட வடிக்கையும் எடுக்க வில்லை. இந்த பைபாஸ் ரோடுகளில் மட்டும் இதுவரை 250 பேர் விபத்துகளில் பலியாகி உள்ளனர். மேலும் 1800 பேர் விபத்தில் படுகாயம் அடைந்துள்ளனர்.

ஆகவே இனியும் காலம் தாழ்த்தாமல் பெருந்துறை பகுதியில் உள்ள பைபாஸ் ரோடுகளில் உடனடியாக மேம்பாலங்கள் அமைக்க வேண்டும் எனவும் பொதுமக்கள் கேட்டு கொண்டுள்ளனர். 

ஈரோடு:

ஈரோடு காந்தி ஜி ரோட்டில் உள்ள ஒரு அடுக்கு மாடியில் 2-வது மாடி கட்டிடத்தில் தனியார் நர்சிங் பயிற்சி நிறுவனம் உள்ளது. இங்கு ஈரோடு, சேலம், திருப்பூர் மாவட்டங்களை சேர்ந்த 30 மாணவிகள் படித்து வருகிறார்கள். முதலாம் ஆண்டில் 14 மாணவிகளும், 2-ம் ஆண்டில் 11 மாணவிகளும், 3-ம் ஆண்டில் 7 மாணவிகளும் படித்து வருகிறார்கள். பயிற்சி நிறுவனத்தின் மேலே உள்ள அறையில் இந்த மாணவிகள் தங்கி உள்ளனர்.

நிறுவனத்தில் 3-ம் ஆண்டு படிக்கும் 7 மாணவிகள் 6 மாதம் பயிற்சி எடுத்து கொண்டு 6 மாதம் பல்வேறு ஆஸ்பத்திரிகளில் வேலையும் பார்த்து வருகிறார்கள். இந்த வேலைக்கான ஊதியத்தை ஆஸ்பத்திரி நிர்வாகம் அந்த தனியார் பயிற்சி நிறுவனத்திடம் கொடுத்து விடுவார்கள்.

ஆனால் இந்த ஊதியத்தை எங்களுக்கு தர மறுக்கிறார்கள் என்று மாணவிகள் புகார் செய்துள்ளனர்.

மேலும் இறுதி தேர்வு எழுத உள்ள மாணவிகளுக்கு ஹால் டிக்கெட் கேட்டால் பதில் சொல்ல மறுக்கிறார்களாம்.

இதை கண்டித்து இன்று மாணவிகள் தங்கள் பெற்றோருடன் நர்சிங் நிறுவனத்துக்கு வந்து கடும் வாக்கு வாதத்தில் ஈடுபட்டனர். நர்சிங் மாணவிகளின் இந்த திடீர் வாக்குவாதம்- போராட்டத்தால் பரபரப்பு ஏற்பட்டது.

இது குறித்து 3-ம் ஆண்டு மாணவிகள் நிருபர்களிடம் கூறியதாவது:-

நாங்கள் வெளியே ஆஸ்பத்திரியில் பணி புரியும் ஊதியத்தை கேட்டால் தர மறுக்கிறார்கள். நிறைய விடுப்பு எடுத்துள்ளீர்கள். அதனால் சம்பளத்தை பிடித்தம் செய்து விட்டோம் என்கிறார்கள்.

மேலும் பயிற்சி நிறுவன (பெண்) முதல்வர் அவருக்கு தேவையான வேலைகளையும் செய்ய சொல்கிறார். கை-கால்களை அமுக்க சொல்கிறார். தலை சீவ சொல்கிறார். அவர் சொல்லும் வேலை செய்பவர்களுக்கு சலுகை கொடுக்கிறார். மறுப்பவர்களை பழி வாங்குகிறார். மேலும் பயிற்சிக்கான மார்க்கை குறைத்து விடுவதாக கூறுகிறார்.

இவ்வாறு மாணவிகள் கூறினர். #tamilnews

பெருந்துறை:

ஈரோடு மாவட்டம் பெருந்துறையை அடுத்துள்ள சிப்காட் பகுதியில் தனியார் தோல் தொழிற்சாலை ஒன்று செயல்பட்டு வருகிறது. இந்த நிறுவனத்தில் ஈரோடு ஆர்என் புதூர், மாயபுரம் பகுதியை சேர்ந்த பெருமாள் (50) என்பவர் கூலித்தொழிலாளியாக வேலை பார்த்து வருகிறார்.

இவர் இந்த நிறுவனத்தில் ஜெனரேட்டர் ரூமின் முன்பகுதியில் தலையில் காயமடைந்த நிலையில் மர்மமான முறையில் இறந்து கிடந்தார். இது தொடர்பாக அவரது உடலை பெருந்துறை அரசு மருத்துவமனைக்கு பிரேத பரிசோதனைக்ககாக போலீசார் சேர்த்தனர்.

அங்கு நடந்த பிரேத பரிசோதனையில் அவர் மின்சாரம் தாக்கி இறந்து போனது தெரிய வந்தது. இதனால் பெருமாளின் இறப்புக்கு காரணமான தொழிற்சாலையின் உரிமையாளர் மீது நடவடிக்கை எடுக்க வேண்டியும், பெருமாளின் குடும்பத்தினருக்கு இழப்பீட்டு தொகை வழங்க வேண்டும் எனவும் உறவினர்கள் கூறினர்.

இது தொடர்பாக சென்னிமலை போலீசார் நடத்திய பேச்சு வார்த்தையில் உடன்பாடு ஏற்படவில்லை. இதனால் அவரது உறவினர்கள் பெருந்துறை அரசு மருத்துவமனை அருகில் உள்ள ரவுண்டானா பகுதியில் திடீரென ரோட்டில் அமர்ந்து சாலை மறியல் போராட்டத்தில் ஈடுபட்டனர். போராட்டத்தில் ஈடுபட்டவர்களிடம் பேச்சுவார்த்தை நடத்திய மலையம் பாளையம் போலீஸ் இன்ஸ்பெக்டர் ரவி, தொழிற்சாலை உரிமையாளர் மீது உரிய நடவடிக்கை எடுக்கப்படும் என் உறுதியளித்ததின் பேரில் அனைவரும் போராட்டத்தை கைவிட்டனர்.

இதனால் அந்த பகுதியில் சிறிது நேரம் போக்குவரத்து பாதிக்கப்பட்டது. பரபரப்பான சூழ்நிலை நிலவியது. 

கோபி:

கோபி சிவசண்முகம் வீதியை சேர்ந்தவர் காளிச்சாமி(வயது 32). கூலிதொழிலாளி.

இவரது மனைவி தனலட்சுமியும், மகன் பிரதாப்பும் கோபி அருகே உள்ள கெட்டிச்செவியூருக்கு சென்றிருந்தனர். அவர்களை கோபிக்கு அழைத்து வருவதற்காக மோட்டார் சைக்கிளில் காளிச்சாமி நேற்று இரவு சென்றார்.

ஓலப்பாளையம் பிரிவு அருகே சென்றபோது நிலை தடுமாறி ஓடிய மோட்டார் சைக்கிள் சாலையோர மைல் கல்லில் மோதியது.

இதில் தூக்கி வீசப்பட்ட காளிச்சாமி படுகாயம் அடைந்தார். அவரை அக்கம் பக்கத்தினர் மீட்டு சிகிச்சைக்காக கோபி அரசு ஆஸ்பத்திரிக்கு கொண்டு சென்றனர்.

ஆனால் செல்லும் வழியிலேயே காளிச்சாமி பரிதாபமாக இறந்தார். இது குறித்து கோபி போலீஸ் இன்ஸ்பெக்டர் பாலமுரளி சுந்தரம் வழக்குப்பதிவு செய்து விசாரணை நடத்தி வருகிறார்.

ஈரோடு:

ஈரோடு ஆசிரியர்காலனி அவ்வையார் வீதியை சேர்ந்தவர் விவேகானந்தன். இவர் பிரபல கொசுவர்த்தி நிறுவனத்தில் பிரதிநிதியாக வேலை செய்து வருகிறார். இவருடைய மனைவி தீபரஞ்சினி (வயது 25). ஈரோட்டில் உள்ள ஒரு தனியார் ஆஸ்பத்திரியில் வேலை செய்து வந்தார். இவர்களுக்கு 3½ வயதில் கனிஷ்கா என்ற மகள் உள்ளாள்.

விவேகானந்தனும், தீபரஞ்சினியும் கல்லூரியில் படிக்கும்போது காதலித்தனர். அவர்களுடைய காதலுக்கு பெற்றோர் எதிர்ப்பு தெரிவித்தனர். அவர்களது எதிர்ப்பையும் மீறி விவேகானந்தனும், தீபரஞ்சினியும் திருமணம் செய்து கொண்டனர். ஆசிரியர் காலனியில் உள்ள அடுக்குமாடி குடியிருப்பின் 2-வது மாடியில் வசித்தனர்.

கடந்த சில மாதங்களாக தீபரஞ்சினியின் நடத்தையில் விவேகானந்தனுக்கு சந்தேகம் ஏற்பட்டது. இதனால் அவர்களுக்கு இடையே அடிக்கடி தகராறு ஏற்பட்டு வந்தது.

இந்த நிலையில் நேற்று இரவு 7 மணி அளவில் தீபரஞ்சினி வீட்டில் சமையல் செய்து கொண்டு இருந்தார். அப்போதும் அவர்களுக்கு இடையே தகராறு ஏற்பட்டது. தீபரஞ்சினியை விவேகானந்தன் தாக்கினார். இதனால் மாடியில் இருந்து தீபரஞ்சினி இறங்கி கீழே வந்தார்.

வீட்டிற்கு வெளியே வீதிக்கு வந்த தீபரஞ்சினியை விவேகானந்தன் தலை, மார்பு, முதுகு உள்ளிட்ட 11 இடங்களில் குத்தினார். இதில் ரத்த வெள்ளத்தில் சம்பவ இடத்திலேயே தீபரஞ்சினி சரிந்து விழுந்தார்.

அவருடைய அலறல் சத்தம் கேட்டு அக்கம்பக்கத்தினர் வந்தனர். அவர்கள் தீபரஞ்சினியை மீட்டு சிகிச்சைக்காக 108 ஆம்புலன்ஸ் மூலம் ஈரோடு அரசு ஆஸ்பத்திரிக்கு அனுப்பி வைத்தனர். அங்கு அவரை பரிசோதித்த டாக்டர்கள் ஏற்கனவே தீபரஞ்சினி இறந்து விட்டதாக தெரிவித்தனர்.

இதுகுறித்து ஈரோடு சூரம்பட்டி போலீசார் வழக்குப்பதிவு செய்து, தீபரஞ்சினியை கொலை செய்துவிட்டு தப்பி ஓடிய விவேகானந்தனை தேடி வந்தனர். இந்த நிலையில் அவர் கைது செய்யப்பட்டார். அவரிடம் தொடர்ந்து விசாரணை நடந்து வருகிறது.