நீங்கள் தேடியது "உறவினர்கள் சாலை மறியல்"

நிலக்கோட்டை:

நிலக்கோட்டை அருகே உள்ள முத்துகாமன் பட்டியைச் சேர்ந்த ஜெயராமன் மகன் ஆனந்தகிருஷ்ணன் (வயது 22). இவர் சம்பவத்தன்று துரைசாமிபுரம் பிரிவு அருகே சென்று கொண்டு இருந்த போது கார் மோதி தூக்கி வீசப்பட்டார். அப்போது பின்னால் வந்த பஸ் அவர் தலையில் ஏறி நசுக்கியதில் சம்பவ இடத்திலேயே உயிரிழந்தார்.

இதனால் அவரது உறவினர்கள் திடீர் சாலை மறியலில் ஈடுபட்டு டாஸ்மாக் கடையை அகற்றுமாறு போராட்டம் நடத்தினர். போலீசார் அவர்களை சமாதானம் செய்து அனுப்பி வைத்தனர்.

ஆனந்தகிருஷ்ணன் உடல் நிலக்கோட்டை அரசு ஆஸ்பத்திரிக்கு பிரேத பரிசோதனைக்காக அனுப்பி வைக்கப்பட்டது. அவரது துக்க நிகழ்ச்சியில் கலந்து கொள்வதற்காக மல்லையாபுரத்தைச் சேர்ந்த கருப்பையா மகன் ராமசாமி (29) வந்தார். அவர் ஆனந்தகிருஷ்ணன் உடலை பார்த்து கதறி அழுது கொண்டு இருந்தபோதே திடீரென மயங்கி விழுந்து உயிரிழந்தார். இதனால் துக்க நிகழ்ச்சியில் பங்கேற்க வந்தவர்கள் மேலும் சோகத்தில் ஆழ்ந்தனர்.

ஒட்டன்சத்திரம்:

ஒட்டன்சத்திரம் திடீர் நகரைச் சேர்ந்தவர் முத்துராஜ் அவரது மகள் மஞ்சுளாதேவி (வயது 18). இவர் திண்டுக்கல் அம்பாதுறையில் உள்ள தனியார் பால்டெக்னிக் கல்லூரியில் படித்து முடித்து விட்டு வீட்டில் இருந்தார்.

சம்பவத்தன்று மதுரைக்கு வேலைக்கான நேர்காணலுக்குச் செல்வதாக வீட்டில் கூறிச் சென்றார். நீண்ட நேரமாகியும் வீட்டிற்கு வராததால் அவரது தாய் மற்றும் உறவினர்கள் தேடிப் பார்த்ததில் அம்மையநாயக்கனூரைச் சேர்ந்த வெள்ளைச்சாமியின் மகன் ஜெயபாண்டியனுடன் மஞ்சுளா தேவி மாயமாகி இருப்பது தெரியவந்து உள்ளது. இதுகுறித்து மஞ்சுளாதேவியின் தாயார் கோமதி ஒட்டன்சத்திரம் போலீஸ் நிலையத்தில் புகார் அளித்தார். 

புகாரின் பேரில் நடவடிக்கை எடுக்காததால் ஆத்திரமடைந்த உறவினர்கள் 100-க்கும் மேற்பட்டோர் ஒட்டன்சத்திரம் போலீஸ் நிலையம் முன்பு திடீர் பஸ் மறியலில் ஈடுபட்டனர். இதனால் திண்டுக்கல் பழனி தேசிய நெடுஞ்சாலையில் சுமார் 1 மணி நேரம் போக்குவரத்து பாதிக்கப்பட்டது. போலீசார் புகாரின் பேரில் உரிய நடவடிக்கை எடுப்பதாக கூறியதால் மறியலில் ஈடுபட்டவர்கள் கலைந்து சென்றனர்.

சேதராப்பட்டு:

வில்லியனூர் அருகே செல்லிப்பட்டு கிராமத்தை சேர்ந்தவர் சக்திவேலு (வயது 44). தனியார் பஸ் டிரைவர். இவர் நேற்று இரவு கடலூர் திருவந்திபுரத்தில் நடந்த உறவினரின் திருமண வரவேற்பு நிகழ்ச்சியில் பங்கேற்க மோட்டார் சைக்கிளில் புறப்பட்டு சென்றார்.

வில்லியனூர் அருகே உளவாய்க்கால் என்ற இடத்தில் வந்த போது அடையாளம் தெரியாத வாகனம் ஒன்று மோட்டார் சைக்கிள் மீது மோதி விட்டு நிற்காமல் சென்று விட்டது. இதில் சக்திவேலு உடல் நசுங்கி சம்பவ இடத்திலேயே இறந்து போனார்.

இதுபற்றி தகவல் அறிந்ததும் வில்லியனூர் போக்குவரத்து போலீசார் சம்பவ இடத்துக்கு விரைந்து வந்து உடலை கைப்பற்றி பிரேத பரிசோதனைக்காக கதிர்காமம் அரசு மருத்துவ கல்லூரி ஆஸ்பத்திரிக்கு அனுப்பி வைத்தனர்.

மேலும் வழக்குபதிவு செய்து சக்திவேலு மீது மோதிய வாகனம் குறித்து விசாரணை நடத்தினர்.

இதற்கிடையே விபத்தில் சக்திவேலு இறந்து போனதை அறிந்த அவரது உறவினர்கள் நேற்று இரவு உளவாய்க்கால் பகுதிக்கு திரண்டு வந்தனர்.

அவர்கள் சக்திவேலு மீது மோதிய வாகன டிரைவரை கைது செய்ய கோரி சாலை மறியலில் ஈடுபட்டனர். இதையடுத்து வில்லியனூர் போலீசார் மற்றும் போக்குவரத்து போலீசார் அவர்களிடம் சமாதான பேச்சுவார்த்தை நடத்தினர். உடனடியாக வாகன டிரைவரை கண்டுபிடித்து கைது செய்வதாக உறுதி அளித்ததன் பேரில் மறியல் கைவிடப்பட்டது.

இந்த நிலையில் இன்று காலை வரை சக்திவேலு மீது மோதிய வாகனத்தையும், வாகன டிரைவரையும் கைது செய்யாததால் ஆத்திரம் அடைந்த சக்திவேலுவின் உறவினர்கள் மற்றும் செல்லிப்பட்டு கிராம மக்கள் சுமார் 1000-க்கும் மேற்பட்டோர் பத்துக்கண்ணு சந்திப்புக்கு திரண்டு வந்தனர்.

அவர்கள் அங்குள்ள 5 சாலை சந்திப்பிலும் அமர்ந்து சாலை மறியலில் ஈடுபட்டனர். சக்திவேலுவை யாரோ திட்டமிட்டு வாகனத்தை மோதி கொலை செய்து விட்டதாக குற்றம் சாட்டினர். தொடர்ந்து போராட்டத்தில் ஈடுபட்டனர்.

காலை 8.30 மணிக்கு தொடங்கிய இந்த மறியல் போராட்டத்தால் 5 சாலைகளிலும் வாகனங்கள் செல்ல முடியாமல் ஒரு கிலோ மீட்டர் தூரத்துக்கும் மேலாக அணிவகுத்து நின்றன. இதனால் பள்ளி- கல்லூரிகளுக்கு செல்லும் மாணவ- மாணவிகள், அலுவலகம் செல்லும் ஊழியர்கள் பெரிதும் பாதிப்புக்குள்ளாயினர்.

இதுபற்றி தகவல் அறிந்ததும் வில்லியனூர் போலீசாரும், போக்குவரத்து போலீசாரும் சம்பவ இடத்துக்கு விரைந்து வந்து போராட்டத்தில் ஈடுபட்ட பொதுமக்களிடம் பேச்சு வார்த்தை நடத்தினர்.

சக்திவேலு மீது மோதிய வாகனத்தை தேடி வருவதாகவும், விரைவில் வாகன டிரைவரை கண்டுபிடித்து கைது செய்ய நடவடிக்கை எடுத்து வருவதாகவும் உறுதி அளித்தனர்.

மேலும் சாலை மறியல் போராட்டத்தால் மாணவர்கள், அரசு ஊழியர்கள், தனியார் நிறுவன ஊழியர்கள் பாதிக்கப்பட்டுள்ளதை போலீசார் எடுத்து கூறினர். சுமார் 30 நிமிட பேச்சுவார்த்தைக்கு பிறகு கிராம மக்கள் சமாதானம் அடைந்து மறியலை கைவிட்டு கலைந்து சென்றனர்.