நீங்கள் தேடியது "சர்வதேச யோகா தினம்"

மகாராஷ்டிராவின் சாங்லி மாவட்டத்தை சேர்ந்த தோண்டிராம் போஸ்லே ஒரு பள்ளியின் ஆசிரியராக பணிபுரிகிறார். தோண்டிராமின் மகள் சாதனா 12 ஆம் வகுப்பு படித்து வந்தார். 10 ஆம் வகுப்பு பொதுத் தேர்வுகளில் 92.60 சதவீத மதிப்பெண்கள் பெற்ற இவரை மருத்துவராக்கிவிட வேண்டும் என தந்தை முனைப்பு காட்டி வந்துள்ளார்.

எனவே 12 ஆம் வகுப்போடு மருத்துவப் படிப்புகளுக்கான நீட் இளநிலை தேர்வுக்கும் சாதனா தயாராகி வந்தார். இந்நிலையில் பள்ளியில் நடத்தப்பட்ட நீட் பயிற்சி தேர்வில் அவர் குறைந்த மதிப்பெண் பெற்றதாக தெரிகிறது.

இதனால், தோண்டிராம் மிகவும் கோபமடைந்தார். கடந்த சனிக்கிழமை இரவு மகளை திட்டியுள்ளார். மகள் எதிர்த்துப் பேசியதால் ஆத்திரம் தலைக்கேறிய தோண்டிராம், ஆட்டுக்கல் குழவியின் மரக்கைப்பிடியை எடுத்து தனது மகளை மோசமாக அடித்தார். தாயுடன், சகோதரனும் தடுத்தும் அவர் தாக்குவதை நிறுத்தவில்லை.

பின்னர் எதையும் பொருட்படுத்தாமல் அடுத்தநாள் தனது பள்ளியில் தனது பள்ளியில் நடைபெற்ற சர்வதேச யோகா தின நிகழ்ச்சியில் கலந்து கொண்டார்.

அவர் வீடு திரும்பியபோது, தனது மகள் குளியலறையில் மயக்கமடைந்து கிடப்பதைக் கண்டார். உடனடியாக மருத்துவமனைக்கு சிறுமி கொண்டு செல்லப்பட்டார்.

ஆனால் அவர் ஏற்கனவே இறந்துவிட்டதாக மருத்துவர்கள் உறுதிப்படுத்தினர். காயங்கள் காரணமாகவே அவரது உயிர் பிரிந்ததாக பிரேத பரிசோதனையில் தெரியவந்தது. இதையடுத்து சிறுமியின் தாய் கொடுத்த புகாரின் பேரின் போலீசார் தொண்டிராம் போஸ்லேவை கைது செய்து விசாரித்து வருகின்றனர். 

சர்வதேச யோகா தினத்தை முன்னிட்டு, கோவை ஆதியோகி வளாகத்தில் பாதுகாப்பு படை வீரர்களுக்கு இன்று யோகப் பயிற்சிகள் அளிக்கப்பட்டன.

நாடு முழுவதும் ஈஷா சார்பில் நடைபெற்ற 2500-க்கும் மேற்பட்ட இலவச பயிற்சி வகுப்புகளில், 10,000-க்கும் அதிகமான பாதுகாப்பு படை வீரர் உள்பட மாணவர்கள் மற்றும் பொதுமக்கள் பெருமளவில் ஆர்வமுடன் பங்கேற்றனர். இந்த யோக வகுப்புகள், 11,000-க்கும் மேற்பட்ட யோக வீரா எனும் ஈஷா தன்னார்வலர்களால் நடத்தப்பட்டது.

கோவை ஆதியோகி வளாகத்தில் நடைபெற்ற யோகா தின நிகழ்ச்சியில் வெள்ளலூர் அதிவிரைவு படை வீரர்கள், மதுக்கரை 35-வது ரெஜிமெண்ட் மற்றும் சூலூர் 43-வது ரெஜிமெண்டை சேர்ந்த வீரர்கள் என 200-க்கும் அதிகமானோர் பங்கேற்றனர். அவர்களுக்கு சக்திவாய்ந்த யோகப் பயிற்சிகள் கற்றுத் தரப்பட்டன.

மேலும் சென்னை ஐ ஐ டி (IIT) வளாகம் மற்றும் ஹெச் டி எப் சி வங்கி, ஐ பி எம் (IBM), கோத்ரேஜ் (Godrej) எச்.டி.எஃப்.சி லைஃப் இன்சூரன்ஸ், L&T, மற்றும் எஸ் பேங்க் (Yes Bank) உள்ளிட்ட முன்னணி நிறுவனங்களின் தலைமை அலுவலகங்களிலும் பயிற்சிகள் நடத்தப்பட்டன.

அதே போன்று பெங்களூருவில் உள்ள சத்குரு சன்னிதியில் நடைபெற்ற யோகா தின நிகழ்வில், இந்திய ராணுவம், கடற்படை, விமானப்படை, எல்லை பாதுகாப்பு படை (BSF) மற்றும் தேசிய மாணவர் படை (NCC) ஆகியவற்றைச் சேர்ந்த 5,000-க்கும் மேற்பட்ட பாதுகாப்பு படை வீரர்கள் பங்கேற்றனர். அவர்களுடன் அருகிலுள்ள பள்ளி மற்றும் கல்லூரி மாணவர்கள் உட்பட 1,000-க்கும் மேற்பட்ட பொதுமக்களும் இந்நிகழ்வில் கலந்து கொண்டனர்.

மேலும் சில தனியார் நிறுவனங்கள் ஈஷா அறக்கட்டளையுடன் ஒன்றிணைந்து, தமிழகத்தில் கோவை, திருச்சி, தஞ்சாவூர், கடலூர், பாண்டி, திண்டுக்கல் உள்ளிட்ட 15 இடங்களில் பிரம்மாண்டமான முறையில் யோக நிகழ்ச்சிகளை ஏற்பாடு செய்திருந்தன. இதில் பள்ளி - கல்லூரி மாணவர்கள் மற்றும் பொது மக்கள் பெருமளவில் கலந்து கொண்டனர்.

சத்குருவின் யோகா தின செய்தியில், "யோகா என்பது, கட்டாயமான எண்ணங்களுக்கும் செயல்களுக்கும் அடிமையாகாமல், விழிப்புணர்வுடன் கூடிய தேர்வுகளின் மூலம் ஒரு வாழ்க்கையை உருவாக்கிக் கொள்ளும் சுதந்திரத்தை உங்களுக்கு வழங்கும் ஒரு அமைப்பு. நீங்கள் விழிப்புணர்வு பெற்று, அந்த கட்டாயத் தன்மையைக் கடந்து செல்லும்போது மட்டுமே, உங்கள் உடல் மற்றும் மன நலனை முழுமையாக உங்களால் தீர்மானிக்க முடியும்." எனக் கூறியுள்ளார்.

முன்னதாக, சர்வதேச யோகா தினத்தை முன்னிட்டு, ஈஷா அறக்கட்டளை சார்பில் சென்னை, அண்ணா சாலையில் உள்ள புல்மேன் ஹோட்டலில் "மிராக்கிள் ஆஃப் மைண்ட்" 7 நிமிட தியான நிகழ்ச்சி நடைபெற்றது. இதில் 100-க்கும் மேற்பட்டவர்கள் கலந்து கொண்டனர்.

இலவசமாக வழங்கப்பட்ட ஆன்லைன் வகுப்புகளில், சத்குருவால் வடிவமைக்கப்பட்ட எளிய, சக்திவாய்ந்த யோகப் பயிற்சிகள் அளிக்கப்பட்டன. குறிப்பாக மூட்டுகள் மற்றும் தசைகளை வலுப்படுத்தும் 'யோக நமஸ்காரம்' எனும் பயிற்சி, உடல் மற்றும் உள்நிலையில் சமநிலை அதிகரிக்கும் 'நாடி சுத்தி' பயிற்சி மற்றும் மன அமைதி, தெளிவு, கவனத்தை மேம்படுத்தும் 'மிராக்கிள் ஆஃப் மைண்ட்' தியானப் பயிற்சியும் வழங்கப்பட்டன.

இன்று சர்வதேச யோகா தினம் கொண்டாடப்பட்டு வருகிறது. இதையொட்டி மாவட்டந்தோறும் யோகா நிகழ்ச்சி நடைபெற்றது. அந்த வகையில், வேலூர் மாவட்டம் குடியாத்தத்தில் உள்ள ஒரு தனியார் கல்லூரியில் யோகா நிகழ்ச்சி நடைபெற்றது. இந்நிகழ்ச்சியில் சிறப்பு விருந்தினர்களாக பா.ஜ.க. மூத்த தலைவர்களில் ஒருவரான தமிழிசை சவுந்தரராஜன் மற்றும் நிர்வாகியான நடிகை நமீதா ஆகியோர் பங்கேற்றனர்.

நிகழ்ச்சியில் நடிகை நமீதா பேசியதாவது:-

யோகா 5,000 ஆண்டுகள் பழமையானது. புதியது கிடையாது. 2007-ம் ஆண்டு பாலிவுட் நடிகை கரீனா கபூர் யோகா மூலம் உடலைக் கட்டுப்பாட்டோடு வைத்தபின் தான் யோகா பற்றி அனைவருக்கும் தெரிய வந்தது. அனைவரும் யோகா செய்யுங்கள். அது மனதிற்கும் உடலுக்கும் நல்லது.

என் குழந்தைகளிடம் நான் இன்றுவரை ஆங்கிலத்தில் பேசமாட்டேன். ஆனால் தமிழ், தெலுங்கு, குஜராத்தி உள்ளிட்ட தாய்மொழியில் தான் பேசுவேன். ஏனெனில் அவையே அவர்களின் தாய்மொழி. அதுதான் எனக்கு பெருமை. ஆங்கிலத்தை டி.வி.யிலோ, அல்லது வேறு எங்கேயாவது அவர்கள் கற்றுக்கொள்ளட்டும்.

அவர்களுக்கு ஸ்பைடர் மேன் தெரியாது. சூப்பர் மேன் தெரியாது, ஆனால் ஜெய் அனுமான் தெரியும் என்றார். 

விசாகப்பட்டினம்:

பிரதமர் மோடி 2014-ம் ஆண்டு ஆட்சி பொறுப்புக்கு வந்ததும் யோகா கலையை உலக அளவில் கொண்டு செல்வதற்கான முயற்சிகளில் ஈடுபட்டார். இதற்காக இந்தியா சார்பில் ஐ.நா. சபையிடம் வலியுறுத்தப்பட்டது.

இதையடுத்து ஒவ்வொரு ஆண்டும் ஜூன் 21-ந்தேதி சர்வதேச யோகா தினம் கடைபிடிக்கப்படும் என்று ஐ.நா. சபை அறிவித்தது. அதன்படி கடந்த 10 ஆண்டுகளாக ஜூன் 21-ந்தேதி சர்வதேச யோகா தினம் கொண்டாடப்பட்டது.

இந்த ஆண்டு உலகம் முழுவதும் 11-வது சர்வதேச யோகா தினம் இன்று (சனிக்கிழமை) காலை கொண்டாடப்பட்டது. ஆண்டுக்கு ஆண்டு இந்த தினத்தை கொண்டாடும் நாடுகளின் எண்ணிக்கை அதிகரித்து வருகிறது. இந்த ஆண்டு 191 நாடுகளில் 1,300 இடங்களில் யோகா நிகழ்ச்சிகள் நடத்த இந்திய கலாச்சார தொடர்பு மையத்தின் சார்பில் ஏற்பாடுகள் செய்யப்பட்டன.

யோகா கலை தோன்றிய இந்தியாவில் மட்டும் 5 லட்சத்துக்கும் மேற்பட்ட இடங்களில் யோகா நிகழ்ச்சி நடத்த ஏற்பாடுகள் செய்யப்பட்டு இருந்தது. அதன்படி இன்று நாடு முழுவதும் யோகா நிகழ்ச்சிகள் கோலாகலமாக நடைபெற்றன.

பிரதமர் மோடி ஒவ்வொரு ஆண்டும் நாட்டின் ஏதாவது ஒரு நகரில் யோகா நிகழ்ச்சியில் பங்கேற்பதை வழக்கத்தில் வைத்துள்ளார். அதன்படி இன்று அவர் ஆந்திர மாநிலம் விசாகப்பட்டினத்தில் நடந்த யோகா நிகழ்ச்சியில் பங்கேற்றார். இதற்காக அவர் நேற்று பீகார், ஒடிசா சுற்றுப்பயணத்தை முடித்துக்கொண்டு இரவே விசாகப்பட்டினத்துக்கு வந்து தங்கி இருந்தார்.

இன்று அதிகாலை 5.30 மணிக்கு அவர் விசாகப்பட்டினம் ஆர்.கே. கடற்கரைக்கு வந்தார். அங்கு அவர் யோகா பயிற்சி செய்வதற்கு சிறப்பு அரங்குகள் அமைக்கப்பட்டு இருந்தன. அங்கு ஆயிரக்கணக்கான இளைஞர்கள் யோகா பயிற்சி செய்ய தயார் நிலையில் இருந்தனர்.

காலை 6 மணிக்கு யோகா பயிற்சி தொடங்கியது. இளைஞர்களுடன் சேர்ந்து பிரதமர் மோடி யோகா பயிற்சி செய்தார். பல்வேறு வகையான யோகாசனங்களை அவர்கள் ஒருங்கிணைந்து செய்தனர். ஒவ்வொரு யோகாசனத்தின் போதும் பிரதமர் மோடி அமைதியான முறையில் செய்தார்.

அவரை சுற்றி இருந்த இளைஞர்களும் யோகா பயிற்சியை நேர்த்தியுடன் செய்தனர். சுமார் ஒரு மணி நேரம் யோகா பயிற்சி நடைபெற்றது. பிரதமர் மோடியுடன் ஆந்திர முதல்-மந்திரி சந்திரபாபு நாயுடு, துணை முதல்-மந்திரி பவன் கல்யாண் மற்றும் முக்கிய பிரமுகர்கள் பங்கேற்றனர்.

யோகா பயிற்சி முடிந்ததும் பிரதமர் மோடி உரையாற்றினார். பிறகு அவர் தன்னுடன் சேர்ந்து யோகா பயிற்சி செய்த இளைஞர்களுடன் சிறிது நேரம் கலந்துரையாடினார். முன்னதாக 11-வது யோகா தினத்தை சிறப்பிக்கும் வகையில் சிறப்பு தபால் தலையையும் பிரதமர் மோடி வெளியிட்டார்.

பிரதமர் மோடி தலைமையில் நடைபெற்ற மிக பிரமாண்டமான யோகா நிகழ்ச்சியில் 3 லட்சத்துக்கும் மேற்பட்டவர்கள் கலந்து கொண்டது குறிப்பிடத்தக்கது. இது உலக சாதனை புத்தகமான கின்னஸ் சாதனை புத்தகத்தில் இடம் பெறும் என்று தெரிகிறது. அதற்கு ஏற்ற வகையில் விசாகப்பட்டினத்தில் இன்று மிக விரிவான அளவுக்கு யோகா பயிற்சி ஏற்பாடுகள் செய்யப்பட்டு இருந்தன.

யோகா நிகழ்ச்சி நடைபெற்ற ஆர்.கே. கடற்கரையில் இருந்து போகாபுரம் என்ற பகுதி வரை சுமார் 26 கிலோ மீட்டர் தூரத்துக்கு சாலையில் மற்றும் சாலையையொட்டிய பகுதிகளில் யோகா பயிற்சிகள் செய்ய அரங்குகளும், சிறப்பு ஏற்பாடுகளும் செய்யப்பட்டு இருந்தன. இந்த பகுதிகளில் சுமார் 3 லட்சத்து 20 ஆயிரத்துக்கும் மேற்பட்டவர்கள் வந்திருந்து யோகா செய்ததாக கணிக்கப்பட்டுள்ளது.

பிரதமர் மோடியுடன் யோகா நிகழ்ச்சியில் பங்கேற்ற 3 லட்சத்து 20 ஆயிரம் பேரும் எளிதாக வந்து செல்வதற்கு விசாகப்பட்டினம் நகருக்குள் 3 ஆயிரத்துக்கும் மேற்பட்ட சிறப்பு பஸ்கள் ஏற்பாடு செய்யப்பட்டு இருந்தன. அந்த பஸ்கள் மூலம் மாணவர்கள், பெண்கள், இளைஞர்கள், பணிபுரிபவர்கள் மிக எளிதாக தங்களுக்கு ஒதுக்கப் ட்ட பகுதிக்கு சென்று வந்தனர்.

இவர்கள் யோகா பயிற்சி செய்வதற்கு தேவையான யோகா விரிப்புகள் இலவசமாக வழங்கப்பட்டன. இதற்காக 5 லட்சம் யோகா விரிப்புகளை ஆந்திர மாநில அரசு விசாகப்பட்டினத்தில் நேற்று தயார் நிலையில் வைத்தது குறிப்பிடத்தக்கது.

விசாகப்பட்டினம் யோகா நிகழ்ச்சியில் பங்கேற்றவர்கள் தங்களது வருகையை பதிவு செய்தனர். இதற்காக தனி வலைதளம் உருவாக்கப்பட்டு இருந்தது. மேலும் விசாகப்பட்டினத்தில் இன்று அதிகாலை மழை பெய்ய வாய்ப்பு இருப்பதாக வானிலை இலாகா கூறி இருந்ததால் யோகா பயிற்சிக்கான மாற்று ஏற்பாடுகளையும் ஆந்திர அரசு செய்து இருந்தது.

3 லட்சத்துக்கும் மேற்பட்டவர்களுடன் பிரதமர் மோடி ஒரே பகுதியில் இருந்ததால் விசாகப்பட்டினத்தில் ஆர்.கே. கடற்கரை பகுதியில் மிக பலத்த பாதுகாப்பு ஏற்பாடுகள் செய்யப்பட்டு இருந்தன. யோகா பயிற்சி நடைபெற்ற 26 கிலோ மீட்டர் தொலைவும் சிறப்பு போலீஸ் பாதுகாப்பு படையும் கண்காணிப்பு வளையத்துக்குள் வைக்கப்பட்டு இருந்தது.

அந்த 26 கிலோ மீட்டர் தூரத்துக்கும் சாலையின் இரு பகுதிகளிலும் 1,200-க்கும் மேற்பட்ட கண்காணிப்பு கேமராக்கள் பொருத்தப்பட்டு பார்வையாளர்கள் கண்காணிக்கப்பட்டனர். அந்த பகுதியில் மட்டும் 10 ஆயிரம் போலீசார் பாதுகாப்பு பணியில் ஈடுபட்டது குறிப்பிடத்தக்கது.

யோகா நிகழ்ச்சியை சமூக விரோதிகள் சீர்குலைத்து விடக்கூடாது என்பதற்காக விசாகப்பட்டினத்தில் உயர் தொழில்நுட்ப கட்டுப்பாட்டு மையமும் அமைக்கப்பட்டு இருந்தது.

உலகில் உள்ள 191 நாடுகளில் 11-வது சா்வதேச யோகா தினம் இன்று கொண்டாடப்பட்டது. சர்வதேச யோகா தினத்தை முன்னிட்டு, இன்று நாடு முழுவதும் யோகா தின பயிற்சிகள் மற்றும் கொண்டாட்டங்கள் நடைபெற்றது.

இதையொட்டி தமிழக பா.ஜ.க. முன்னாள் தலைவர் அண்ணாமலை வெளியிட்டுள்ள எக்ஸ் தள பதிவில்,

சர்வதேச யோகா தினத்தை முன்னிட்டு, இன்றைய தினம் எனது இல்லத்தில் யோகா பயிற்சி மேற்கொண்டதில் மகிழ்ச்சி.

நமது பாரதப் பிரதமர் நரேந்திர மோடியின் முயற்சியால், கடந்த 2014 ஆம் ஆண்டு ஐநா சபை, நமது பாரத நாட்டின் அடையாளங்களில் ஒன்றான யோகாசனத்தை அங்கீகரித்து, ஆண்டுதோறும் ஜூன் 21 அன்று சர்வதேச யோகா தினம் கொண்டாடப்படுகிறது.

யோகா பயிற்சிகள், உடல் ரீதியாக மட்டுமல்லாமல், மன ரீதியாகவும், ஆன்மீக ரீதியாகவும் நல்வாழ்வை மேம்படுத்துவதை , உலக நாடுகள் உணர்ந்து வருகின்றன. உலகம் முழுவதும் கடந்த சில ஆண்டுகளில், மக்கள் பலரும் யோகாவை தங்கள் வாழ்க்கையின் ஒரு பகுதியாக மாற்றியுள்ளனர்.

யோகா பயிற்சி செய்வது வழக்கமான உடற்பயிற்சியைத் தாண்டி, உடல் மற்றும் மன நல்வாழ்வை மேம்படுத்துவதோடு, சுவாசத்தை சீரமைப்பது, மன அழுத்தத்தைக் குறைப்பது என, அன்றாட வாழ்வை மேம்படுத்துகிறது.

அனைவரும் யோகாசனம் செய்வோம். நமது உடலையும், உள்ளத்தையும் மேம்படுத்துவோம்.

இவ்வாறு அதில் கூறப்பட்டுள்ளது.

உலகில் உள்ள 191 நாடுகளில் 11-வது சா்வதேச யோகா தினம் இன்று கொண்டாடப்படுகிறது. சர்வதேச யோகா தினத்தை முன்னிட்டு, இன்று நாடு முழுவதும் யோகா தின பயிற்சிகள் மற்றும் கொண்டாட்டங்கள் நடைபெற்றது.

இந்த நிலையில் பா.ம.க. தலைவர் அன்புமணி ராமதாஸ் வெளியிட்டுள்ள எக்ஸ் தள பதிவில்,

யோகா மனிதர்களுக்கு காலம் கொடுத்தக் கொடை. வாழ்க்கை முறை மாற்றங்கள், மன அழுத்தங்கள் ஆகியவற்றால் உடல் நலனுக்கு கேடு வராமல் தடுக்கும் அரண். ஆரோக்கியம் காக்கும் அருமருந்து யோகா கலைக்கு ஈடு இணை எதுவுமில்லை. விலையில்லா மருத்துவக் கலையான யோகாசனத்தை நாம் அனைவரும் கற்றுக்கொள்ள வேண்டும்; உலகம் முழுவதும் பரப்ப வேண்டும்!

இவ்வாறு அதில் கூறப்பட்டுள்ளது.

உலகில் உள்ள 191 நாடுகளில் 11-வது சா்வதேச யோகா தினம் இன்று கொண்டாடப்படுகிறது. சர்வதேச யோகா தினத்தை முன்னிட்டு, இன்று நாடு முழுவதும் யோகா தின பயிற்சிகள் மற்றும் கொண்டாட்டங்கள் நடைபெற்றது.

சர்வதேச யோகா தினத்தையொட்டி சென்னை தாம்பரத்தில் மத்திய இணை அமைச்சர் எல்.முருகன் தலைமையில் யோகா நிகழ்ச்சி நடைபெற்றது. நிகழ்ச்சியில் பங்கேற்று எல்.முருகன் யோகா செய்தார்.

இதையடுத்து மத்திய இணை அமைச்சர் எல்.முருகன் செய்தியாளர்களுக்கு பேட்டி அளித்தார். அப்போது அவர் கூறியதாவது:

* உள்துறை அமைச்சர் அமித்ஷாவின் பயணம் தொடர்ச்சியாக தமிழ்நாட்டில் இருக்கும்.

* தோல்வி பயத்தில் கீழடி, தொகுதி மறுசீரமைப்பை தி.மு.க. கையில் எடுத்துள்ளது.

* கீழடி விவகாரத்தில் மத்திய அரசுக்கு இருக்கும் அக்கறை தமிழ்நாடு அரசுக்கு இல்லை.

* அடிமைப்படுத்திய ஆங்கில மொழியில் இருந்து வெளியே வரவேண்டும் என்றுதான் அமித்ஷா கூறினார்.

இவ்வாறு அவர் கூறினார்.

சர்வதேச யோகா தினம் இன்று கொண்டாடப்படுகிறது. இதையொட்டி 'ஒரே பூமி, ஒரே ஆரோக்கியம்' என்ற கருப்பொருளில் உலகில் உள்ள 191 நாடுகளில் யோகா நிகழ்ச்சி நடைபெறுகிறது. யோகா தினத்தையொட்டி நாடு முழுவதும் யோகா குறித்த விழிப்புணர்வு நிகழ்ச்சிகள் நடத்தப்படுகின்றன.

இந்தியாவிலும் அனைத்து மாநிலங்களிலும் மக்கள் பெருந்திரளாக பங்கேற்கும் வகையில் யோகா பயிற்சிக்கான நிகழ்ச்சிகளுக்கு ஏற்பாடு செய்யப்பட்டுள்ளன. இந்தியா மற்றும் உலகம் முழுவதும் 8 லட்சம் இடங்களில் இதற்கான ஏற்பாடுகள் செய்யப்பட்டுள்ளன. இந்த இடங்களில் எல்லாம் காலை முதல் யோகா நிகழ்ச்சிகள் நடைபெற்றது. யோகா நிகழ்ச்சியில் பெருந்திரளான மக்களும் பங்கேற்று யோகா செய்தனர்.

ஆந்திர மாநிலம் விசாகப்பட்டினத்தில் நடைபெறும் யோகா நிகழ்ச்சியில் பிரதமர் மோடி கலந்து கொண்டு உரையாற்றினார். இதையடுத்து பொதுமக்களுடன் இணைந்து அவர் யோகாசனம் செய்தார். இந்த நிகழ்ச்சியில் ஆந்திர முதல்வர் சந்திரபாபு நாயுடு, துணை முதலமைச்சர் பவன் கல்யாண் பங்கேற்றனர்.

உத்தரகாண்ட் மாநிலம் டேராடூனில் நடைபெற்ற யோகா நிகழ்ச்சியில் ஜனாதிபதி திரௌபதி முர்மு பங்கேற்று யோகா செய்தார்.

சர்வதேச யோகா தினத்தை முன்னிட்டு பல்வேறு இடங்களில் யோகா நிகழ்ச்சி ஏற்பாடு செய்யப்பட்டுள்ளன. யோகா நிகழ்ச்சியில் பங்கேற்று அரசியல் தலைவர்கள், பொதுமக்கள் யோகாசனம் செய்தனர்.

டெல்லியில் மக்களவை சபாநாயகர் ஓம் பிர்லா யோகா செய்தார்.

அகர்தலாவில் திரிபுரா முதல்வர் மாணிக் சாஹா யோகா செய்தார்.

லண்டனில் உள்ள இந்திய உயர் ஆணையரகத்தால் ஏற்பாடு செய்யப்பட்ட நிகழ்ச்யில் பங்கேற்று யோகா செய்த பொதுமக்கள்.

நெல்லையில் பா.ஜ.க. மாநில தலைவர் நயினார் நாகேந்திரன் தலைமையில் யோகா தினம் கொண்டாடப்பட்டது.

ஜம்மு காஷ்மீரில் உலகின் மிக உயரமான ரெயில் பாலமான செனாப் ரெயில் பாலத்தின் அருகில் சர்வதேச யோகா தினத்தை கொண்டாடப்பட்டது. இந்த நிகழ்வில் சிவில் நிர்வாக அதிகாரிகள், வடக்கு ரெயில்வே, சிஆர்பிஎஃப், உள்ளூர்வாசிகள் மற்றும் யோகா ஆர்வலர்கள் கலந்து கொண்டனர். அனைவரும் செனாப் பள்ளத்தாக்கின் அமைதியான நிலப்பரப்பில் ஆசனங்களைச் செய்தனர்.

மத்திய அமைச்சர் பியூஷ் கோயல் மும்பையில் யோகா நிகழ்ச்சியில் பங்கேற்று யோகா செய்தார்.

சென்னையில் மத்திய இணை அமைச்சர் எல்.முருகன் தலைமையில் யோகா தினம் கொண்டாடப்பட்டது. அவர் யோகா நிகழ்ச்சியில் பங்கேற்று யோகா செய்தார்.

உத்தரபிரதேசம் மாநிலம் மதுராவில் பா.ஜ.க. எம்.பி. ஹேமா மாலினி யோகா நிகழ்ச்சியில் பங்கேற்றார்.

அவர் கூறுகையில், அனைவரும் யோகா செய்ய வேண்டும். யோகா நம் வாழ்க்கைக்கு முக்கியமானது, மேலும் உடலை ஆரோக்கியமாக வைத்திருப்பது மிகவும் முக்கியம். நான் எப்போதும் அதைச் செய்கிறேன். எனக்கு ஒரு சிறிய முழங்கால் பிரச்சனை உள்ளது. மேலும் சில ஆசனங்களை என்னால் சரியாகச் செய்ய முடியவில்லை, ஆனால் நான் யோகா செய்கிறேன் என்று கூறினார்.

தெலுங்கானாவில் மத்திய அமைச்சர் வீரேந்திர குமார் ரங்கரெட்டி யோகா நிகழ்ச்சியில் பங்கேற்று யோகா செய்தார்.

பஞ்சாப் மாநிலம் அமிர்தசரஸில் அட்டாரி எல்லையில் நடைபெறும் யோகா நிகழ்ச்சியில் எல்லைப் பாதுகாப்புப் படையினர் பங்கேற்று யோகா செய்தனர்.

டெல்லியில் மத்திய அமைச்சர் சிவராஜ் சிங் சவுகான் யோகா நிகழ்ச்சியில் பங்கேற்றார். அப்போது அவர் கூறுகையில், சர்வதேச யோகா தினத்தை முன்னிட்டு அனைவருக்கும் எனது நல்வாழ்த்துகளை தெரிவித்துக் கொள்கிறேன்.

உலகம் முழுவதும் யோகாவை ஊக்குவித்ததற்காக பிரதமர் மோடிக்கு நன்றி தெரிவித்துக்கொள்கிறேன். ஆரோக்கியமாக இருக்க யோகா செய்வது மிகவும் முக்கியம் என்று கூறினார்.

ராஜஸ்தான் முதல்வர் பஜன்லால் சர்மா, ஏராளமான பொதுமக்களுடன் சேர்ந்து, ஜெய்சால்மரில் யோகா செய்தார்.

அரியானா மாநிலம் பரிதாபாத்தில் உள்ள அருண் ஜெட்லி தேசிய நிதி மேலாண்மை நிறுவனத்தில் சர்வதேச யோகா தினம் மத்திய நிதியமைச்சர் நிர்மலா சீதாராமன் தலைமையில் நடைபெற்றது.

ஜம்மு-காஷ்மீரின் உதம்பூரில் சர்வதேச யோகா தினத்தை முன்னிட்டு பாதுகாப்பு அமைச்சர் ராஜ்நாத் சிங், ராணுவத் தலைமைத் தளபதி ஜெனரல் உபேந்திர திவேதி மற்றும் பிற இந்திய ராணுவ வீரர்கள் யோகா செய்தனர்.

உத்தரபிரதேச மாநிலம் கோரக்பூரில் முதல்வர் யோகி ஆதித்யநாத் மற்றும் பிற பிரமுகர்கள் யோகா செய்தனர்.

சர்வதேச யோகா தினம் இன்று கொண்டாடப்படுகிறது. இதையொட்டி 'ஒரே பூமி, ஒரே ஆரோக்கியம்' என்ற கருப்பொருளில் உலகில் உள்ள 191 நாடுகளில் யோகா நிகழ்ச்சி நடைபெறுகிறது.

இந்தியாவிலும் அனைத்து மாநிலங்களிலும் மக்கள் பெருந்திரளாக பங்கேற்கும் வகையில் யோகா பயிற்சிக்கான நிகழ்ச்சிகளுக்கு ஏற்பாடு செய்யப்பட்டுள்ளன. இந்தியா மற்றும் உலகம் முழுவதும் 8 லட்சம் இடங்களில் இதற்கான ஏற்பாடுகள் செய்யப்பட்டுள்ளன. இந்த இடங்களில் எல்லாம் காலை முதல் யோகா நிகழ்ச்சிகள் நடைபெற்றது. யோகா நிகழ்ச்சியில் பெருந்திரளான மக்களும் பங்கேற்று யோகா செய்தனர்.

இந்த யோகா நிகழ்ச்சியை மிகப்பிரமாண்டமாக நடத்துவதற்கு, ஆந்திர மாநில அரசு ஏற்பாடு செய்து இருந்தது. ஆந்திராவில் இன்று 3 லட்சம் பேர் பங்கேற்கும் கின்னஸ் சாதனை யோகா நிகழ்ச்சி நடைபெற்றது.

விசாகப்பட்டினத்தில் நடைபெறும் யோகா நிகழ்ச்சியில் பிரதமர் மோடி கலந்து கொண்டு உரையாற்றினார். இதையடுத்து பொதுமக்களுடன் இணைந்து அவர் யோகாசனம் செய்தார். இந்த நிகழ்ச்சியில் ஆந்திர முதல்வர் சந்திரபாபு நாயுடுவும் பங்கேற்றார்.

உலகில் உள்ள 191 நாடுகளில் 11-வது சா்வதேச யோகா தினம் இன்று கொண்டாடப்படுகிறது. சர்வதேச யோகா தினத்தை முன்னிட்டு, இன்று நாடு முழுவதும் யோகா தின பயிற்சிகள் மற்றும் கொண்டாட்டங்கள் நடைபெறுகிறது.

சா்வதேச யோகா தினத்தையொட்டி பிரதமர் மோடி வெளியிட்டுள்ள எக்ஸ் தள பதிவில்,

சர்வதேச யோகாசன தினத்தையொட்டி அனைவருக்கும் வாழ்த்துகள். யோகா இன்று முழு உலகத்தையும் இணைத்துள்ளது பெருமைக்குரியது, மகிழ்ச்சி தருகிறது. யோகா அனைவருக்குமானது. அதற்கு எல்லைகள் கிடையாது.

யோகா வெறும் உடற்பயிற்சி அல்ல. அது ஒரு வாழ்க்கை முறை. விசாகப்பட்டினத்தில் இந்த ஆண்டு யோகா தின கொண்டாட்டங்களில் கலந்துகொள்வது மகிழ்ச்சி அளிக்கிறது.

இவ்வாறு அதில் கூறப்பட்டுள்ளது.

பிரதமர் மோடி விசாகப்பட்டினத்தில் நடந்த பிரமாண்டமான யோகா தின நிகழ்ச்சியில் பங்கேற்று யோகா செய்த பிறகு அங்கு கூடியிருந்தவர்கள் மத்தியில் பேசினார். அப்போது அவர் கூறியதாவது:-

இந்தியா கேட்டுக் கொண்டதற்கு இணங்க ஐ.நா. சபை அறிவித்ததால் 2015-ம் ஆண்டு முதல் ஒவ்வொரு ஆண்டும் ஜூன் 21-ந்தேதி சர்வதேச யோகா தினம் கொண்டாடப்பட்டு வருகிறது. யோகாவை உலகம் முழுக்க இந்தியா கொண்டு சென்று இருக்கிறது. இதன் மூலம் உலகின் பெரிய சக்தியாக இந்தியா உருவெடுத்து இருக்கிறது.

நாம் ஒவ்வொருவரும் தனி மனிதர்கள் அல்ல. இயற்கையோடு இணைந்து வாழ வேண்டிய ஒரு அங்கமாக இருக்கிறோம். அந்த வகையில் உலகம் முழுக்க சென்றுள்ள யோகா பயிற்சி மக்களின் அன்றாட நிகழ்வுகளில் ஒரு அங்கமாக மாறி இருக்கிறது.

இன்று யோகா உலகத்தையே இணைத்து இருக்கிறது. உலக மக்களை ஒற்றுமையாக இருக்க செய்ய யோகா வழிவகுக்கிறது. இதை நினைத்து பார்க்கும்போது ஆச்சரியமாக இருக்கி றது. யோகா மூலம் உலகில் அமைதியை ஏற்படுத்த முடியும்.

தற்போது உலகில் ஆங்காங்கே மோதல்களும், கருத்து வேறுபாடுகளும் காணப்படுகின்றன. இவை அனைத்தையும் தீர்த்து வைக்கும் மிகப்பெரிய ஆயுதமாக யோகா திகழ்கிறது. இந்தியாவில் பல கோடி மக்களின் வாழ்க்கையை யோகா மாற்றி உள்ளது.

யோகா பயிற்சி செய்ய வயது, அனுபவம் என்று எதுவும் தேவையில்லை. யோகாவுக்கு எல்லைகளே கிடையாது. அதனால்தான் அது உலகம் முழுக்க தனது சிறகை விரித்துள்ளது. உலக மக்களை இணைக்கும் பாலமாக அது மாறி வருகிறது.

யோகா பயிற்சி உலகில் அமைதி நிலவுவதை உறுதி செய்யும் வகையில் அமைந்துள்ளது. அந்த வகையில் யோகா பயிற்சி சக்தி வாய்ந்த ஆயுதமாகும். யோகா செய்வதற்கு எந்த பின்னணியும் இருக்க வேண்டிய அவசியம் இல்லை. திறன் இருந்தால் எல்லோரும் யோகா பயிற்சி செய்யலாம்.

இன்று உலகை இணைத்துள்ள யோகாவை பல கோடி மக்கள் தினமும் மகிழ்ச்சியுடன் செய்கிறார்கள். இது உலக மக்களுக்கு இந்தியா கொடுத்த பரிசும், அருமருந்தும் என்று சொல்லலாம். அந்த வகையில் நாம் யோகா பயிற்சியை புரட்சிகரமான ஒன்றாக மாற்றி இருக்கிறோம்.

யோகா பயிற்சி செய்யாதவர்கள் இன்று முதல் அந்த பயிற்சியை செய்ய தொடங்குங்கள். ஏற்கனவே நான் மனதின் குரல் நிகழ்ச்சியில் உடல் பருமன் பற்றி பேசி இருக்கிறேன். உணவில் எண்ணெய் சேர்ப்பதை குறைத்துக் கொள்ளுங்கள் என்று சொல்லி இருக்கிறேன்.

இப்போது யோகா தினத்தை முன்னிட்டு நீங்கள் ஒவ்வொருவரும் தினமும் யோகா செய்ய வேண்டும் என்று கேட்டுக் கொள்கிறேன்.

கடந்த 10 ஆண்டுகளாக உலகம் முழுக்க பரவி வரும் யோகா பயிற்சியை நான் பார்த்துதான் வருகிறேன். அது என் மனதில் நிறைய மாற்றங்களையும், ஆச்சரியங்களையும் தருகிறது. 2015-ம் ஆண்டே மிக குறுகிய நாட்களில் 175 நாடுகளுக்கு யோகா பயிற்சியை கொண்டு சென்று சேர்த்தோம்.

2018-ம் ஆண்டு உலகம் முழுக்க சுமார் 10 கோடி பேர் ஜூன் 21-ந்தேதி யோகா பயிற்சி செய்தார்கள். கடந்த ஆண்டு இந்த எண்ணிக்கை சுமார் 25 கோடியாக அதிகரித்து சாதனை படைத்தது. தொடர்ந்து இந்த எண்ணிக்கை நிச்சயம் அதிகரிக்கும்.

இப்படி உலகம் முழுக்க யோகா செய்பவர்களின் எண்ணிக்கை ஆண்டுக்கு ஆண்டு அதிகரித்து வருகிறது. இது உலகம் முழுவதும் ஒற்றுமையையும், ஆதரவையும் நிச்சயம் மேம்படுத்தும். இது சாதாரண செயல் அல்ல.

யோகா செய்தால் மனதில் இருக்கும் அழுத்தம் குறையும். ஈகோவை குறைக்கும். மனதில் அமைதியையும், மகிழ்ச்சியையும் உண்டாக்கும். இத்தகைய சக்தி வாய்ந்த யோகாவை அவசியம் ஒவ்வொருவரும் செய்ய வேண்டும்.

யோகா என்பது நமது மனதில் சமநிலையை கொண்டு வருவதற்கான ஒரு அற்புதமான பட்டன் ஆகும். இடைவெளியை ஏற்படுத்தி தரும் அந்த பட்டனை நாம் சரியாக பயன்படுத்த வேண்டும்.

இவ்வாறு பிரதமர் மோடி கூறினார்.

செங்கல்பட்டு:

ஒவ்வொரு ஆண்டும் ஜூன் 21-ம் தேதி சர்வதேச யோகா தினமாக கடைப்பிடிக்கப்படுகிறது.

இந்நிலையில், சர்வதேச யோகா தினத்தை முன்னிட்டு, செங்கல்பட்டு மாவட்டம் மாமல்லபுரத்தில் உள்ள கடற்கரை கோவில், ஐந்து ரதம் உள்ளிட்ட புராதன சின்னங்களை இலவசமாக சுற்றிப்பார்க்க தொல்லியல்துறை இன்று அனுமதி அளித்துள்ளது.

சென்னையை அடுத்த மாமல்லபுரத்தில் பல்வேறு புராதன சின்னங்கள் உள்ளன. இங்கு தினமும் ஆயிரக்கணக்கான சுற்றுலா பயணிகள் வந்து புராதன சின்னங்களை கண்டு களித்து வருகின்றனர். இந்த புராதன சின்னங்கள் தொல்லியல்துறை கட்டுப்பாட்டில் உள்ளன என்பது குறிப்பிடத்தக்கது.

சென்னை:

வருகிற 21-ந்தேதியன்று கொண்டாடப்படும் 11-வது சர்வதேச யோகா தினத்தை முன்னிட்டு, அனைவரும் யோகா பயிற்சி செய்ய வேண்டும் என்று கவர்னர் கேட்டு கொண்டு இருக்கிறார். 10 ஆண்டுகளை நிறைவு செய்ததை குறிக்கும் வகையில், இந்த ஆண்டுக்கான கருப்பொருள் ஒரே பூமி, ஒரே ஆரோக்கியத்திற்கான யோகா.

தமிழ்நாடு கவர்னர் மாளிகை, சென்னை அண்ணா பல்கலைக்கழகத்துடன் இணைந்து, 2025 சர்வதேச யோகா தின நிகழ்விற்காக நிறுவனங்கள், மையங்கள், அமைப்புகள், நிர்வாக துறைகள், கிராமங்கள், வேளாண் அறிவியல் மையங்கள், விவசாயிகள், மீனவர்கள், கைவினைஞர்கள் தவிர பிற பிரிவுகள் உள்பட பல்வேறு துறைகளிலும் பரவலான பங்கேற்பை செயல்படுத்த, ஒரு பிரத்யேக https://events.annauniv.edu/ என்ற இணையவழி சேவையை தொடங்கி உள்ளது. யோகா பயிற்சியில் பங்கேற்க விரும்புபவர்கள் தங்கள் விவரங்களை, இணையவழி வாயிலாக பதிவு செய்து கொள்ளலாம்.

இந்த தகவலை கவர்னர் மாளிகை தெரிவித்துள்ளது.