நீங்கள் தேடியது "parliamentary election 2024"

வரும் ஏப்ரல்-மே மாத காலகட்டத்தில் மக்களவை தேர்தல் நடைபெறவுள்ளது.

2014லிருந்து 2 முறை மத்தியில் ஆட்சியமைத்த பா.ஜ.க., 3-ஆம் முறையாக மீண்டும் ஆட்சியை பிடிக்க நாடு முழுவதும் தீவிர பிரசாரம் செய்து வருகிறது.

பா.ஜ.க.வை எதிர்த்து காங்கிரஸ் கட்சி, நாடு முழுவதும் உள்ள பா.ஜ.க.வை எதிர்க்கும் கட்சியினருடன் கூட்டணி அமைத்து, வெல்வதற்கு வியூகம் அமைத்து வருகிறது.

இந்நிலையில், இன்று, குஜராத் மாநில போர்பந்தர் தொகுதி சட்டமன்ற உறுப்பினரான அர்ஜுன் மோத்வாடியா (Arjun Modhwadia), குஜராத் மாநில பா.ஜ.க. தலைவர் சிஆர் பாட்டில் (CR Paatil) முன்னிலையில் பா.ஜ.க.வில் இணைந்தார்.

தனது முடிவு குறித்து அர்ஜுன் மோத்வாடியா தெரிவித்ததாவது:

காந்திஜி மற்றும் சர்தார் வல்லபாய் பட்டேல் போன்ற நல்ல தலைவர்கள் பிரதமர் மோடி மற்றும் உள்துறை அமைச்சர் அமித்ஷா வடிவில் நாட்டிற்கு கிடைத்துள்ளனர்.

வளர்ச்சியை நோக்கி இந்தியாவை கொண்டு செல்ல பிரதமர் மோடியின் கனவை நனவாக்க பா.ஜ.க.வில் இணைந்துள்ளேன்.

எனக்கு எதிராக எந்த வழக்கும் பதிவு செய்யப்படவில்லை; எனக்கு யாரும் எந்த அழுத்தமும் தரவில்லை.

மக்களுடன் காங்கிரசிற்கு இருந்த தொடர்பு முற்றிலும் அறுந்து விட்டது. உ.பி. மாநில அயோத்யாவில் நடைபெற்ற பகவான் ஸ்ரீஇராமர் கோவில் கும்பாபிஷேக அழைப்பை புறக்கணித்ததன் மூலம், காங்கிரஸ், மக்களின் உணர்வை புரிந்து கொள்ள தவறி விட்டது.

இவ்வாறு மோத்வாடியா தெரிவித்தார்.

முன்னதாக, "கனத்த இதயத்துடன்" காங்கிரஸ் கட்சியின் அனைத்து பொறுப்புகளிலிருந்தும், தான் விலகுவதாக அர்ஜுன் மோத்வாடியா, காங்கிரஸ் தலைவர் மல்லிகார்ஜுன் கார்கேவிற்கு கடிதம் எழுதினார்.

40 ஆண்டுகளுக்கும் மேலாக காங்கிரஸ் கட்சியில் இருந்தவர் அர்ஜுன் மோத்வாடியா என்பது குறிப்பிடத்தக்கது.

பாராளுமன்றத்தின் 543 இடங்களுக்கு வரும் ஏப்ரல்-மே மாதங்களில் தேர்தல் நடைபெறவுள்ளது. சில தினங்களில் அதற்கான அறிவிப்பை தலைமை தேர்தல் ஆணையர் ராஜிவ் குமார் வெளியிடுவார்.

2014ல் பாரதிய ஜனதா கட்சியை தலைமையாக கொண்டு அமைந்த தேசிய ஜனநாயக கூட்டணி காங்கிரஸ் தலைமையிலான ஐக்கிய முற்போக்கு கூட்டணியை எதிர்த்து களமிறங்கியது. அதுவரை குஜராத் முதல்வராக இருந்த நரேந்திர மோடி, பிரதமர் வேட்பாளராக பா.ஜ.க.வினால் முன்னிறுத்தப்பட்டு, தேர்தலில் வென்று பிரதமரானார்.

2019 தேர்தலில் மீண்டும் என்.டி.ஏ போட்டியிட்டு வென்று, பா.ஜ.க.வின் மோடி இரண்டாம் முறையாக பிரதமரானார்.

2024 தேர்தலில் பா.ஜ.க.வை வீழ்த்த கடந்த 2023ல் பல மாநிலங்களில் உள்ள பா.ஜ.க.வை எதிர்க்கும் சுமார் 25க்கும் மேற்பட்ட கட்சிகள் காங்கிரஸ் தலைமையில் "இந்தியா கூட்டணி" எனும் பெயரில் ஒரு மெகா கூட்டணியை உருவாக்கின.

ஐக்கிய ஜனதா தளம், ஆம் ஆத்மி, திரிணாமுல் காங்கிரஸ், தி.மு.க. உள்ளிட்ட தங்கள் மாநிலங்களில் அதிக வெற்றி வாய்ப்புகளை உடைய கட்சிகளின் தலைவர்கள் இதை உருவாக்கினர்.

இவர்கள் ஒருங்கிணைந்து ஒரு தலைவரை தேர்ந்தெடுத்து மோடிக்கு எதிராக முன்னிறுத்துவார்கள் என்று அரசியல் விமர்சகர்களாலும், பா.ஜ.க. எதிர்ப்பாளர்களாலும் பெரிதும் நம்பப்பட்டு வந்தது.

ஆனால், அண்மையில் மேற்கு வங்க முதல்வர் மம்தா பானர்ஜி, அம்மாநிலத்தில் தனித்து போட்டியிட போவதாகவும், தேர்தல் முடிவுகள் வெளியான பிறகே கூட்டணி ஆட்சி குறித்து பேச முடியும் என திட்டவட்டமாக தெரிவித்துள்ளார். "திரிணாமுல் காங்கிரஸ் இல்லையென்றால் இந்தியா கூட்டணி இல்லை" என காங்கிரஸ் கட்சியின் பொது செயலாளர் ஜெய்ராம் ரமேஷ் தெரிவித்திருந்தார்.

இதே போல், ஆம் ஆத்மி கட்சியும் பஞ்சாப் மாநிலத்தில் அனைத்து மக்களவை தொகுதிகளிலும் தனித்து போட்டியிட போவதாக அறிவித்து விட்டது.

பீகார் முதல்வர் நிதிஷ் குமார் பா.ஜ.க.வுடன் இணைய திட்டமிட்டுள்ளதாகவும் உறுதிப்படுத்தப்படாத செய்திகள் வெளிவந்தன. காங்கிரஸ் கட்சியினர், கூட்டணி சம்பந்தமாக சரிவர பேசுவதில்லை என சில மாதங்களுக்கு முன் நிதிஷ் விமர்சித்திருந்தார்.

தொடக்கம் முதலே கூட்டணிக்கு தலைமை பொறுப்பை காங்கிரஸ் விரும்பியது தெளிவாக தெரிந்தது. பிரதமர் வேட்பாளராக ராகுலை பிற கட்சிகள் ஆதரிக்க வேண்டும் என அதன் தலைமை விரும்புகிறது.

கடந்த நவம்பரில் காங்கிரஸ் கட்சி, வட இந்தியாவில் ம.பி., ராஜஸ்தான், சத்தீஸ்கர் மாநில சட்டசபை தேர்தல்களில் தோல்வியடைந்தது.

இப்பின்னணியில், சமாஜ்வாதி கட்சி, ராஷ்டிரிய ஜனதா தளம் ஆகியவை காங்கிரசுடன் ஒத்து போகவில்லை.

மேலும், கேரளாவில் பா.ஜ.க. இன்னும் செல்வாக்கு பெற்ற கட்சியாக வளரவில்லை. அங்கு கம்யூனிஸ்ட் கட்சிக்கு மாற்று என காங்கிரஸ் உள்ள நிலையில், அவர்களாலும் மாநிலத்தில் எதிர்த்து மத்தியில் ஆதரிக்க முடியுமா என்பது சந்தேகமே.

தமிழ்நாட்டில் "நாற்பதும் நமதே" என களமிறங்கியுள்ள தி.மு.க. தொகுதி பங்கீட்டில் காங்கிரஸ் கட்சிக்கு அதிக இடங்களை கொடுக்க சம்மதிப்பதும் கேள்விக்குறிதான்.

தமிழகத்தை பொறுத்த வரை நடிகர் கமலஹாசனின் மக்கள் நீதி மய்யம், கேட்கும் இடங்களை தி.மு.க. தராவிட்டால் அக்கட்சி 40 இடங்களிலும் தனித்து போட்டியிட உள்ளதாகவும் வதந்திகள் உலா வருகிறது.

நாம் தமிழர் கட்சி 40 இடங்களிலும் வழக்கம் போல் போட்டியிடும் என எதிர்பார்க்கலாம்.

தி.மு.க. கூட்டணியில் உள்ள பிற கட்சிகளில் எத்தனை பேர் அ.தி.மு.க. அணிக்கு தாவி செல்வார்கள் என்பதும் உறுதியாகவில்லை.

இப்பின்னணியில், வெல்வதில் தீவிரம் காட்ட வேண்டிய கட்டாயத்தில் உள்ள தி.மு.க., காங்கிரசுடன் சமரசம் செய்து கொள்வது கடினம்.

தே.ஜ.கூ. அணியில், தேர்தலுக்கு சில மாதங்களே உள்ள நிலையில் இந்துக்களின் தெய்வமான பகவான் ஸ்ரீஇராமர் கோவில் கும்பாபிஷேகத்தை நடத்தி வைத்த பிரதமர், அந்த வெற்றியை அரசியல் பிரசாரத்தில் பயன்படுத்தலாம். இது மக்களவை தேர்தலில் முக்கிய மாநிலமான உ.பி.யில் உள்ள இடங்களை வெல்ல பா.ஜ.க.விற்கு பயன்படும்.

காங்கிரசின் முதன்மை பதவிக்கான ஆசை, பிரதான கூட்டணி தலைவர்களின் மாநிலத்தில் மட்டுமே உள்ள செல்வாக்கு, தற்போது நிலவும் ஒற்றுமையின்மை, ஒரு சில தலைவர்களின் "மதில் மேல் பூனை" நிலைமை ஆகியவை "வெல்ல முடியாதவர்" என்கிற பிம்பம் கொண்ட பிரதமர் மோடிக்கு வலு சேர்க்கவே பயன்படும் என்பதை இந்தியா கூட்டணி உணர்ந்தாக வேண்டும்.

"ஊர் ரெண்டு பட்டால், கூத்தாடிக்கு கொண்டாட்டம்" எனும் பழமொழியை "இந்தியா கூட்டணி" தலைவர்கள் நினைவில் வைத்து கொள்வது நல்லது. அவர்களது ஒற்றுமையின்மையால் மோடி "ஹாட்ரிக்" அடிக்க வாய்ப்புண்டு.

2024 ஜூன் மாதம், 17-வது பாராளுமன்றத்தின் காலம் நிறைவடைகிறது.

மொத்தம் உள்ள 543 இடங்களுக்கான தேர்தல் இவ்வருடம் மே இறுதிக்குள் நடைபெற உள்ளது. இதில் தமிழ்நாட்டின் 39 பாராளுமன்ற தொகுதிகளும், புதுச்சேரியின் 1 தொகுதியும் அடங்கும்.

இது குறித்து ஆலோசிக்க அனைத்து மாநில தலைமை தேர்தல் அதிகாரிகளுடன் இந்திய தேர்தல் ஆணையம் ஆலோசனை நடத்த போகிறது. இதற்காக தமிழ்நாட்டின் தலைமை தேர்தல் அதிகாரி சத்யபிரதா சாகு டெல்லி பயணம் மேற்கொண்டுள்ளார். இதில் அனைத்து மாநில தலைமை தேர்தல் அதிகாரிகளும் கலந்து கொள்கின்றனர்.

பாராளுமன்ற தேர்தல் தொடர்பாகவும், தேர்தல் பாதுகாப்பு மற்றும் வாக்காளர் இறுதி பட்டியல் குறித்தும் விவாதித்து முடிவு எடுக்க நடைபெறும் இந்த ஆலோசனை கூட்டம், 2 நாட்கள் நடைபெற உள்ளது.

தமிழ்நாட்டில் காலியாக உள்ள சட்டசபை தொகுதிகளுக்கும், பாராளுமன்றத்திற்கும் தேர்தல் அறிவிக்கப்பட்டால் அதற்கு ஆணையம் தயாராக உள்ளதாக சில தினங்களுக்கு முன் சத்யபிரதா சாகு தெரிவித்திருந்தது குறிப்பிடத்தக்கது.

பிப்ரவரி 8 அன்று பாகிஸ்தானில் பாராளுமன்றத்திற்கான தேர்தல் நடைபெறவுள்ளது.

இதில் போட்டியிட பாகிஸ்தான் பிடிஐ (PTI) எனப்படும் தெஹ்ரிக்-ஏ-இன்சாஃப் (Tehreek-e-Insaf) கட்சியின் தலைவரும் முன்னாள் பிரதமருமான 71 வயதான இம்ரான் கான் வேட்புமனு தாக்கல் செய்தார். ஆனால், ஊழல் வழக்கில் சிறை தண்டனை பெற்றவரான அவரது மனு, பாகிஸ்தான் தேர்தல் ஆணையத்தால் தள்ளுபடி செய்யப்பட்டது. அவருடன் அக்கட்சியை சேர்ந்த பல மூத்த தலைவர்களின் வேட்பு மனுக்களும் தள்ளுபடி செய்யப்பட்டன.

முறையற்ற காரணங்களை கூறி இம்ரானின் மனு தள்ளுபடி ஆனதாக அவர் கட்சி, தேர்தல் ஆணையத்தை விமர்சித்திருந்தது.

இம்ரான் கானின் மனு தள்ளுபடி செய்யப்பட்டதற்கான காரணத்தை தற்போது பாகிஸ்தானின் தேர்தல் ஆணையம் சுமார் 8 பக்கம் கொண்ட அறிக்கையில் வெளியிட்டிருக்கிறது.

ஆணையத்தின் அறிக்கையில் தெரிவிக்கப்பட்டிருப்பதாவது:

இஸ்லாமாபாத் கூடுதல் செஷன்ஸ் நீதிமன்றத்தில் இம்ரான் கான் நேர்மையற்றவர் என தீர்ப்பு வழங்கப்பட்டு விட்டது. அத்தகைய ஒருவர் தேர்தலில் போட்டியிட தார்மீக உரிமை இழந்தவராகிறார். இம்ரானின் பெயரை முன்மொழிந்தவரும், வழிமொழிந்தவரும் அவர்கள் கூறிய தொகுதிகளில் வசிக்கவில்லை; அதுவும் ஒரு காரணம். அரசு கஜானாவிற்கு சேர்க்க வேண்டிய பொருளை முறைகேடாக பயன்படுத்தி லாபம் ஈட்டிய வழக்கில் நேர்மையற்றவராக கருதி தேர்தலில் போட்டியிட நீதிமன்றம் தீர்ப்பளித்தது. அந்த தகுதியின்மை அவருக்கு தொடர்கிறது. தண்டனை நிறுத்தி வைக்கப்பட்டுள்ளதே தவிர, தீர்ப்பு நிறுத்தி வைக்கப்படவில்லை. எனவே தேர்தலில் போட்டியிடும் தார்மீக உரிமையை இம்ரான் இழக்கிறார்.

இவ்வாறு அதில் கூறப்பட்டுள்ளது.

பிடிஐ கட்சியின் 90 சதவீத தலைவர்களின் வேட்பு மனுக்கள் தேர்தல் ஆணையத்தால் தள்ளுபடி செய்யப்பட்டது குறிப்பிடத்தக்கது.

அடுத்த வருடம் நடைபெறவுள்ள பாராளுமன்ற தேர்தலில் தற்போதைய ஆளும் பா.ஜ.க.வை எதிர்த்து கடந்த ஜூலை மாதம் காங்கிரஸ் உள்ளிட்ட பல மாநிலங்களின் முக்கிய கட்சிகளை உள்ளடக்கிய 25 கட்சிகளுக்கும் மேற்பட்டவர்கள் இணைந்து ஒரு கூட்டணியை உருவாக்கினர்.

இக்கூட்டணியின் முதல் சந்திப்பு பாட்னாவிலும், இரண்டாவது சந்திப்பு பெங்களூரூவிலும், 3-வது சந்திப்பு மும்பையிலும் நடந்தது.

நான்காவது சந்திப்பு இரு தினங்களுக்கு முன் புது டெல்லியில் நடைபெற்றது.

இச்சந்திப்பில், தேர்தலில் கூட்டணி கட்சிகளின் இட பங்கீடு, பேரணிகள், பிரதமர் வேட்பாளர் உள்ளிட்ட பல முக்கிய விஷயங்கள் விவாதிப்பதாக இருந்தது.

பிரதமர் வேட்பாளர் பெயரில் இந்த சந்திப்பில் எந்த ஒருமித்த கருத்தும் எட்டப்படவில்லை.

இந்நிலையில், இச்சந்திப்பில் பங்கேற்ற பீகார் மாநில ஐக்கிய ஜனதா தள எம்.பி. சுனில் குமார் பின்டு இந்த கூட்டம் குறித்து தெரிவித்ததாவது:

பல பெரிய தலைவர்கள் பங்கேற்றனர். சில தினங்களுக்கு முன் காங்கிரஸ் நிதி நெருக்கடியில் இருப்பதனால் மக்களிடம் நன்கொடை கேட்டது.

கடந்த சில சந்திப்புகளில் டீ, பிஸ்கட், சமோசா அளித்து உபசரித்தனர்.

ஆனால், இந்த முறை சமோசா இல்லை; டீ, பிஸ்கட் மட்டும்தான்.

இடப்பங்கீடு, பிரதமர் வேட்பாளர் என எந்த விஷயத்திலும் முடிவும் எட்டப்படாமல்தான் சந்திப்பு நிறைவடைந்தது.

இவ்வாறு பின்டு கூறினார்.

இந்தியாவில், இம்மாதம் 5 மாநிலங்களில் நடைபெறும் சட்டசபை தேர்தல்களை அடுத்த வருட பாராளுமன்ற தேர்தலுக்கு முன்னோட்டமாக அரசியல் கட்சிகள் கருதுவதால் வெற்றி வாய்ப்பு அதிகம் உள்ள வேட்பாளர்களையே களத்தில் இறங்கியுள்ளனர்.

அனைத்து கட்சிகளின் வேட்பாளர்கள் பட்டியல்கள் ஒன்றன் பின் ஒன்றாக வெளிவருகின்றன. இவற்றில் காங்கிரஸ் மற்றும் பா.ஜ.க. ஆகிய இரு தேசிய கட்சிகளின் பட்டியல்களில் ஆண்களே பெரும்பான்மை வகிக்கின்றனர்.

சமீபத்தில் இந்திய பாராளுமன்றத்திற்கான புதிய கட்டிடத்தில் முதல் சிறப்பு கூட்டத் தொடர் நடைபெற்றது. அதில் நாடாளுமன்ற மற்றும் சட்டசபை தேர்தல்களில் பெண் வேட்பாளர்களுக்கு கட்டாயம் 33 சதவீதம் இட ஒதுக்கீடு கிடைப்பதை உறுதி செய்ய மசோதா தாக்கல் செய்யப்பட்டது.

ஆனால், இரண்டு தேசிய கட்சிகளின் வேட்பாளர் பட்டியலில் 12 சதவீதத்திற்கும் குறைவாகவே பெண் வேட்பாளர்கள் நிறுத்தப்பட்டுள்ளனர் என தெரிய வந்துள்ளது.

மத்திய பிரதேசம், ராஜஸ்தான், சத்தீஸ்கர், தெலுங்கானா மற்றும் மிசோரம் ஆகிய 5 மாநிலங்களில் மொத்தம் உள்ள 679 சட்டசபை தொகுதிகளுக்கு, பா.ஜ.க. 643 வேட்பாளர்களையும், காங்கிரஸ் 666 வேட்பாளர்களையும்  களம் இறக்கியுள்ளன.

போட்டியில் களம் இறங்கி உள்ள இந்த வேட்பாளர்களில் பா.ஜ.க. 80 சார்பில் பெண் வேட்பாளர்களும்,  காங்கிரஸ் கட்சி சார்பில் 74 பெண் வேட்பாளர்களும் களம் இறங்கியுள்ளனர்.

நாரி ஷக்தி வந்தன் அதிநியம் (Nari Shakti Vandan Adhiniyam) எனும் பெயரில் பா.ஜ.க. பெண்களுக்கான இட ஒதுக்கீட்டு மசோதாவை தாக்கல் செய்தது. பெண்கள் இட ஒதுக்கீட்டிற்கு தங்கள் கட்சிதான் முதலில் பாடுபட்டதாகவும் தங்கள் முயற்சியில் பா.ஜ.க. நற்பெயர் வாங்கி கொள்ள முயல்வதாகவும் காங்கிரஸ் கட்சி விமர்சனம் செய்து வந்தது.

ஆனால், இரண்டு கட்சிகளுமே வெற்றி வாய்ப்பை மனதில் வைத்துத்தான் வேட்பாளர் தேர்வை நடத்தி இருப்பதாக தகவல்கள் வெளியாகி உள்ளன.

இந்த விஷயத்தில் இரண்டு கட்சிகளுமே பரஸ்பர விமர்சனத்தையும் தவிர்த்து விட்டதை சுட்டி காட்டும் பெண்ணுரிமை ஆர்வலர்கள், பெண்களுக்கான 33 சதவீத இட ஒதுக்கீட்டில் அரசியல் கட்சிகள் உண்மையில் ஆர்வம் காட்டவில்லை என சமூக வலைதளங்களில் கருத்து தெரிவிக்கின்றனர்.

மத்தியில் ஆளும் பா.ஜ.க.வின் தலைமையிலான தேசிய ஜனநாயக கூட்டணியில் தமிழ்நாட்டின் எதிர்கட்சியான அ.தி.மு.க. அங்கம் வகித்து வந்தது. ஆனால், 2021 சட்டமன்ற தேர்தலில் அ.தி.மு.க. தோல்வியுற்றது. பா.ஜ.க.வுடனான கூட்டணிதான் இதற்கு காரணம் என அக்கட்சியில் சிலர் கருத்து தெரிவித்து வந்தனர். ஆனாலும் கூட்டணி தொடர்ந்தது.

இந்நிலையில், தமிழக பா.ஜ.க.வின் தலைவர் அண்ணாமலை, அ.தி.மு.க.வினரின் சித்தாந்த தலைவர்களில் முக்கியமானவரும் தமிழகத்தின் முன்னாள் முதல்வருமான அண்ணாதுரை குறித்து கூறிய கருத்து சர்ச்சைக்குள்ளானது. இது அ.தி.மு.க.வினரை ஆத்திரமடைய செய்தது.

இது மட்டுமல்லாமல், "மத்தியில் மோடி, தமிழகத்தில் எடப்பாடி" எனும் அ.தி.மு.க.வின் முழக்கத்தையும் அண்ணாமலை ஏற்க மறுத்தார். 

இதை தொடர்ந்து அண்ணாமலையை பா.ஜ.க.வின் தலைமை பொறுப்பில் இருந்து நீக்குமாறு அ.தி.மு.க.வினர் பா.ஜ.க.வின் அகில இந்திய தலைமையிடம் கோரிக்கை வைத்தனர். ஆனால், இதனை தலைமை ஏற்க மறுத்ததாக தெரிகிறது.

இந்நிலையில், பா.ஜ.க.வை உள்ளடக்கிய தேசிய ஜனநாயக கூட்டணியிலிருந்து விலகுவதாகவும், அக்கூட்டணி முறிந்ததாகவும் அ.தி.மு.க.வின் முக்கிய தலைவர் கே.பி. முனுசாமி அதிகாரபூர்வமாக அறிவித்தார்.

இது தொடர்பாக அ.தி.மு.க.வின் சார்பில் வெளியிடப்பட்ட அறிக்கையில் கூறப்பட்டிருப்பதாவது:

மாவட்டக் கழக செயலாளர்கள், கழக நாடாளுமன்ற, சட்டமன்ற உறுப்பினர்கள் ஆலோசனைக் கூட்டத்தில் ஏகமனதாக நிறைவேற்றப்பட்ட தீர்மானம் !

தேசிய ஜனநாயகக் கூட்டணியில் உள்ள பாரதிய ஜனதா கட்சியின் மாநிலத் தலைமை, கடந்த ஒருவருட காலமாக திட்டமிட்டே, வேண்டுமென்றே, உள்நோக்கத்தோடு, அனைத்திந்திய அண்ணா திராவிட முன்னேற்ற கழகத்தின் மீதும், எங்களுடைய கழக தெய்வங்களான பேரறிஞர் அண்ணா அவர்களையும், இதய தெய்வம் மாண்புமிகு புரட்சித் தலைவி அம்மா அவர்களையும் அவதூறாக பேசியும், எங்களின் கொள்கைகளை விமர்சித்தும் வருகின்றது.

மேலும், பாரதிய ஜனதா கட்சியின் மாநில தலைமை, கடந்த 20.06.2023 அன்று மதுரையில் நடைபெற்ற வரலாற்று சிறப்புமிக்க, அனைத்திந்திய அண்ணா திராவிட முன்னேற்ற வீர வரலாற்றின் பொன்விழா எழுச்சி மாநாட்டை சிறுமைப்படுத்தியும், 2 கோடிக்கும் மேற்பட்ட தொண்டர்களை வழிநடத்தி வரும், எங்கள் கழக பொதுச் செயலாளர் மாண்புமிகு சட்டமன்ற எதிர்க்கட்சித் தலைவர், தமிழ்நாட்டின் முன்னாள் முதலமைச்சர் 'புரட்சித் தமிழர்' திரு. எடப்பாடி கே. பழனிசாமி அவர்களை பற்றியும் அவதூறாக விமர்சித்து வருகிறது.

இந்த செயல், கழகத் தொண்டர்கள் மற்றும் நிர்வாகிகள் மத்தியில் கொந்தளிப்பான சூழ்நிலையை ஏற்படுத்தி உள்ளது.

இந்நிலையில், தலைமைக் கழக புரட்சி தலைவர் எம்.ஜி.ஆர். மாளிகையில் இன்று மாலை (25.9.2023 திங்கட்கிழமை) கழகப் பொது செயலாளர், மாண்புமிகு சட்டமன்ற எதிர்க்கட்சி தலைவர், தமிழ்நாட்டின் முன்னாள் முதலமைச்சர் 'புரட்சி தமிழர்' திரு. எடப்பாடி கே. பழனிசாமி அவர்கள் தலைமையில் நடைபெற்ற தலைமை கழகச் செயலாளர்கள், மாவட்டக் கழக செயலாளர்கள், கழக நாடாளுமன்ற, சட்டமன்ற உறுப்பினர்கள் ஆலோசனை கூட்டத்தில், 2 கோடிக்கும் மேற்பட்ட தொண்டர்களின் எண்ணத்திற்கும், விருப்பத்திற்கும், உணர்வுகளுக்கும் மதிப்பளித்து, அனைத்திந்திய அண்ணா திராவிட முன்னேற்ற கழகம் இன்று முதல், பாரதிய ஜனதா கட்சியில் இருந்தும், தேசிய ஜனநாயக கூட்டணியில் இருந்தும் விலகிக் கொள்கிறது என்று ஏகமனதாக தீர்மானிக்கப்படுகிறது.

இவ்வாறு அந்த அறிக்கையில் தெரிவிக்கப்பட்டுள்ளது.

இதற்கிடையே, பா.ஜ.க.வுடன் எக்காலத்திலும் கூட்டணி கிடையாது என தீர்மானம் இயற்றி அ.தி.மு.க. அக்கூட்டணியிலிருந்து விலகியதற்கான காரணங்களை குறிப்பிட்டு வெளியிட்டுள்ள அறிக்கையில், "பாரதிய ஜனதா கட்சி இடம் பெற்றுள்ள தேசிய ஜனநாயக கூட்டணியிலிருந்து விலகி" என்பதற்கு பதிலாக "பாரதிய ஜனதா கட்சியில் இருந்தும், தேசிய ஜனநாயக கூட்டணியில் இருந்தும் விலகி" என வாசகங்கள் இடம் பெற்றிருப்பது சமூக வலைதளங்களில் வைரலாகி வருகிறது.