விளையாட்டு

கட்டாக்:

வெஸ்ட்இன்டீஸ் கிரிக்கெட் அணி இந்தியாவில் சுற்றுப்பயணம் செய்து விளையாடி வருகிறது. இரு அணிகள் மோதிய 20 ஓவர் போட்டி தொடரை இந்தியா 2-1 என்ற கணக்கில் கைப்பற்றியது. 3 ஆட்டம் கொண்ட ஒரு நாள் தொடரில் சென்னையில் நடந்த முதல் போட்டியில் வெஸ்ட்இண்டீஸ் 8 விக்கெட் வித்தியாசத்தில் வெற்றி பெற்றது.

விசாகப்பட்டினத்தில் நடந்த 2-வது போட்யில் இந்தியா 107 ரன்கள் வித்தியாசத்தில் வென்றது. இதனால் 1-1 என்ற களத்தில் சம நிலையில் உள்ளது.

இந்தியா-வெஸ்ட்இண்டீஸ் அணிகள் மோதும் 3-வது மற்றும் கடைசி ஒருநாள் போட்டி நாளை (22-ந்தேதி) ஒடிசா மாநிலம் கட்டாக்கில் நடக்கிறது. இப்போட்டி மதியம் 1.30 மணிக்கு தொடங்குகியது.

இந்த ஆட்டத்தில் வெல்லும் அணி தொடரை கைப்பற்றும் என்பதால் இரு அணி வீரர்களும் வெற்றிக்காக கடுமையாக போராடுவார்கள்.

விராட்கோலி தலைமையிலான இந்திய அணியில் பேட்டிங்கில் ரோகித் சர்மா, லோகேஷ் ராகுல், ஸ்ரேயாஸ் அய்யர், ரி‌ஷப்பண்ட் ஆகியோர் நல்ல நிலையில் உள்ளனர்.

கோலி, இரு ஆட்டங்களிலும் சோபிக்கவில்லை. முதல் ஆட்டத்தில் 4 ரன்னிலும், 2-வது ஆட்டத்தில் ரன் எதுவும் எடுக்காமலும் அவுட் ஆனார். இதனால் அவர் ரன் குவிக்க வேண்டிய கட்டாயத்தில் உள்ளார்.

பந்து வீச்சில் முகமது சமி, குல்தீப் யாதவ், ஜடேஜா ஆகியோர் நல்ல நிலையில் உள்ளனர்.காயம் அடைந்த வேகப்பந்து வீச்சாளர் தீபக் சாஹருக்கு பதிலாக நவ்தீப் சைனி சேர்க்கப்பட்டுள்ளார். கடந்த இரு ஆட்டங்களிலும் இந்திய அணியின் பீல்டிங் சுமாராக இருந்தது. கேட்சுகளை தவறவிட்டதால் விமர்சனங்களுக்கு உள்ளானார்கள். இதனால் பீல்டிங்கில் முன்னேற்றம் காண்பது அவசியம். பேட்டிங், பந்து வீச்சில் சமபலத்துடன் இருப்பதால் இந்திய வீரர்கள் நம்பிக்கையுடன் களம் இறங்குவார்கள்.

பொல்லார்ட் தலைமையிலான வெஸ்ட் இன்டீஸ் அணியில் இவின் லீவிஸ், ஷாய் ஷோய்ப், ஹெட்மயர், நிகோலஸ் பூரன் ஆகியோர் பேட்டிங்கில் நல்ல நிலையில் உள்ளனர். அவர்களின் அதிரடியை பொறுத்து ரன் குவிப்பு இருக்கும். பந்து வீச்சில் காட்ரெல், ஹோல்டர், ஜோசப், ரோஸ்டர் சேஸ் ஆகியோர் உள்ளனர்.

2-வது ஆட்டத்தில் வெஸ்ட்இண்டீஸ் பந்துவீச்சை இந்திய வீரர்கள் அடித்து நொறுக்கி 387 ரன் குவித்தனர். இதனால் அந்த அணி, பந்து வீச்சில் முன்னேற்றம் காண முயற்சிக்கும். அதேபோல் தொடரை வெல்லவும் கடுமையாக போராடும்.

இரு அணிகளும் நாளை மோதுவது 133-வது ஆட்டமாகும். இதுவரை நடந்த 132 போட்டியில் இந்தியா 63-ல், வெஸ்ட் இண்டீஸ் 63-ல் வெற்றி பெற்றுள்ளன. 2 ஆட்டம் டை ஆனது. 4 போட்டியில் முடிவில்லை.

இந்த ஆட்டம் ஸ்டார் ஸ்போர்ட்ஸ் டெலிவி‌ஷனில் நேரடியாக ஒளிபரப்பு செய்யப்படுகிறது.

சென்னை:

10 அணிகள் இடையிலான 6-வது இந்தியன் சூப்பர் லீக் (ஐ.எஸ்.எல்.) கால்பந்து போட்டி பல்வேறு நகரங்களில் நடந்து வருகிறது. இதில் நேற்றிரவு சென்னை நேரு ஸ்டேடியத்தில் அரங்கேறிய 42-வது லீக் ஆட்டத்தில் முன்னாள் சாம்பியன் சென்னையின் எப்.சி. அணி, கேரளா பிளாஸ்டர்சை எதிர்கொண்டது.

பரபரப்பான இந்த ஆட்டத்தில் 4-வது நிமிடத்தில் சென்னை வீரர் ஸ்கெம்ப்ரி கோல் அடித்து உள்ளூர் ரசிகர்களை உற்சாகத்தில் மிதக்க வைத்தார். 15-வது நிமிடத்தில் கேரளா கேப்டன் ஒக்பீச்சே ‘பிரீகிக்’ வாய்ப்பில் கோல் போட்டு ஆட்டத்தை சமனுக்கு கொண்டு வந்தார்.

26-வது நிமிடத்தில் சென்னை அணி வீரர் வல்ஸ்கிஸ் அடித்த கோல் சர்ச்சையாக வெடித்தது. அதாவது அந்த சமயத்தில் சென்னை வீரர் ‘பவுல்’ செய்ததால் கேரளா அணியினர் அது குறித்து நடுவருடன் பேசிக் கொண்டிருந்தனர். இந்த சில வினாடி குழப்பத்திற்கு இடையே பந்தை கடத்திச் சென்று சென்னை வீரர் வல்ஸ்கிஸ் கோலாக்கி விட்டார். ‘பவுல்’ விஷயத்தில் நடுவர் ஒரு முடிவுக்கு வராத நிலையில் கோல் அடித்ததை ஏற்றுக்கொள்ள முடியாது என்று கேரள வீரர்கள் நடுவரிடம் இடைவிடாது வாக்குவாதம் செய்தனர். களத்தில் ஆக்ரோஷமாக வரிந்து கட்டி நின்றனர். சில நிமிடங்களுக்கு பிறகு அது கோல் இல்லை என்று நடுவர் அறிவித்தார். இதனால் அதிர்ச்சிக்குள்ளான சென்னை வீரர்கள் நடுவரை முற்றுகையிட்டனர். சென்னை அணியின் பயிற்சியாளர், உதவியாளர்கள் ஆப்-சைடு நடுவரிடம் முறையிட்டனர். ஆனால் எதையும் நடுவர் கண்டுகொள்ளவில்லை. ஆட்டம் தொடர்ந்து நடந்தது.

இந்த சர்ச்சை முடிந்த உடனே சென்னை வீரர் வல்ஸ்கிஸ் தட்டிக்கொடுத்த பந்தை சக வீரர் சேங்தே (30-வது நிமிடம்) லாவகமாக கோல் அடித்து சுடச்சுட பதிலடி கொடுத்தார். உள்ளூர் ரசிகர்களின் ஆர்ப்பரிப்பால் அரங்கமே அதிர்ந்தது. தொடர்ந்து 40-வது நிமிடத்தில் சென்னை வீரர் வல்ஸ்கிஸ் மேலும் ஒரு கோலை போட்டு, கேரளாவை நிலைகுலையச் செய்தார். இதனால் முதல்பாதியில் 3-1 என்ற கோல் கணக்கில் சென்னை அணி வலுவான முன்னிலை பெற்றது.

பிற்பாதியிலும் இரு அணியினரும் கோல் போடுவதில் தீவிரம் காட்டினர். 52-வது நிமிடத்தில் சென்னை வீரர் சேங்தே மேலும் ஒரு கோல் அடித்திருக்க வேண்டியது. தனி வீரராக எதிரணியின் கோல் எல்லையை நெருங்கிய அவர், கேரளா வீரர்கள் தன்னை சுற்றியதும் ஓங்கி உதைத்தார். ஆனால் அது மயிரிழையில் கம்பத்திற்கு வெளியே சென்று ஏமாற்றி விட்டது. பந்து அதிகமான நேரம் கேரளா வசமே (63 சதவீதம்) சுற்றிக் கொண்டிருந்தாலும் சென்னை தடுப்பு அரணை அவர்களால் உடைக்க முடியவில்லை. கடைசி நிமிடத்தில் சென்னை வீரர் எலி சபியா 2-வது முறையாக மஞ்சள் அட்டை பெற்றதால் அது சிவப்பு அட்டையாக காட்டப்பட்டு வெளியேற்றப்பட்டார். அடுத்த ஆட்டத்தில் அவரால் விளையாட முடியாது.

முடிவில் சென்னையின் எப்.சி. அணி 3-1 என்ற கோல் கணக்கில் கேரளாவை தோற்கடித்தது. 8-வது ஆட்டத்தில் ஆடிய சென்னை அணிக்கு இது 2-வது வெற்றியாகும். கேரளா சந்தித்த 4-வது தோல்வி இதுவாகும். ஐதராபாத்தில் இன்று இரவு 7.30 மணிக்கு நடக்கும் லீக் ஆட்டத்தில் ஐதராபாத் எப்.சி.-அட்லெடிகோ டி கொல்கத்தா அணிகள் மோதுகின்றன.

இங்கிலாந்து கேப்டன் இயான் மோர்கனை கொல்கத்தா நைட் ரைடர்ஸ் அணி வாங்கியுள்ளது. அவரது தலைமையில்தான் இங்கிலாந்து அணி உலக கோப்பையை வென்று சாதித்தது.

கொல்கத்தா அணிக்கும் அவர் கேப்டனாக நியமிக்கப்படலாம் என்று கருதப்பட்டது. ஆனால் இதனை கொல்கத்தா அணியின் தலைமை பயிற்சியாளர் பிரெண்டன் மெக்கல்லம் மறுத்துள்ளார்.

பிரெண்டன் மெக்கல்லம் கூறுகையில், ‘‘நிச்சயம் தினேஷ் கார்த்திக்தான் எங்கள் கேப்டன். அதில் மாற்றம் இல்லை. தற்போது சிறந்த கேப்டன்களில் ஒருவராக மோர்கன் விளங்குகிறார். தினேஷ் கார்த்திக்கின் கேப்டன்ஷிப்புக்கு உதவுவதில் மிக பொருத்தமானவராக மோர்கன் இருப்பார். அத்துடன் பேட்டிங்கில் 4-வது வரிசையையும் நிரப்புவார்’’ என்றார்.

இந்தியா 2007-ல் டி20 உலகக்கோப்பையையும், 2011-ல் 50 ஓவர் உலகக்கோப்பையையும் கைப்பற்றியது. இந்த இரண்டு கோப்பைகளையும் எம்எஸ் டோனி தலைமையில் இந்தியா கைப்பற்றியது. ஹர்பஜன் சிங், யுவராஜ், சேவாக் போன்றோர் இரண்டு உலகக்கோப்பைக்கான இந்திய அணியில் இடம் பிடித்திருந்தனர்.

இந்நிலையில் நிகழ்ச்சி ஒன்றில் கலந்து கொண்டு பேசிய ஹர்பஜன் சிங், யுவராஜ் சிங் இல்லை என்றால் இந்திய அணிக்கு இரண்டு உலகக்கோப்பை இல்லை என்று தெரிவித்துள்ளார்.

இதுகுறித்து ஹர்பஜன் சிங் கூறுகையில், ‘‘நாம் உலகக்கோப்பை குறித்து பேசிக் கொண்டிருக்கிறோம். இந்திய கிரிக்கெட் அணி பெருமைப்படும் வகையில் இருக்கிறது என்றால், அதற்கு யுவராஜ் சிங்கின் பங்களிப்பு மிகமிக முக்கியமானது.

ரசிகர்கள் அடிக்கடி சச்சின் தெண்டுல்கர், சவுரவ் கங்குலி, அனில் கும்ப்ளே, கபில்தேவ் ஆகியோரை பற்றி பேசிக் கொண்டிருக்கிறார்கள். அனால், யுவராஜ் சிங் மட்டும் இல்லை என்றால், நமக்கு இரண்டு உலகக்கோப்பை கிடைத்திருக்காது.

யுவராஜ் சிங் இல்லை என்றால் நாம் அரையிறுதி வரை மட்டுமே முன்னேறி இருப்போம். சிறந்த அணிகள் அரையிறுதிக்கு முன்னேறும். தற்போது கூட நாம் அரையிறுதிக்கு முன்னேறினோம். ஆனால், உலகக்கோப்பையை வெல்ல, யுவராஜ் சிங் போன்ற வீரர்கள் தேவை. நாங்கள் அதிர்ஷ்டமானவர்கள். அவரை போன்ற ஒரு வீரரை பெற்றிருந்தோம்.

2011 உலகக்கோப்பைக்குப் பின் நாம் இரண்டு தொடர்களில் விளையாடியுள்ளோம். நம்மால் கோப்பையை வெல்ல முடியவில்லை. அவரை போன்ற ஒரு வீரரை விரைவில் கண்டுபிடிப்போம் என்ற நம்பிக்கை உள்ளது’’ என்றார்.

கொல்கத்தாவில் நேற்று நடைபெற்ற ஐபிஎல் வீரர்கள் ஏலத்தில் கொல்கத்தா நைட் ரைடர்ஸ் அணி கம்மின்ஸ் (ரூ. 15.5 கோடி), மோர்கன் (ரூ. 5.25 கோடி), வருண் சக்ரவர்த்தி (ரூ. 4 கோடி), டாம் பாண்டன் (ரூ. 1 கோடி), ராகுல் திரிபாதி (ரூ. 60 லட்சம்), கிறிஸ் கிரீன் (ரூ.20 லட்சம்), நிகில் சங்கர் நாயக் (ரூ. 20 லட்சம்), பிரவிண் தாம்பே (ரூ.20 லட்சம்), எம். சித்தார்த் (ரூ.20 லட்சம்) ஆகியோரை ஏலத்தில் எடுத்துள்ளது.

ஏற்கனவே அந்த அணியில் தினேஷ் கார்த்திக், ஷுப்மான் கில், நிதிஷ் ராணா, ரின்கு சிங், குல்தீப் யாதவ், பிரதீஷ் கிருஷ்ணா, சந்தீப் வாரியர், நாகர்கோட்டி, ஷிவம் மவி, சித்தேஷ் லாட், மணிமாறன், அந்த்ரே ரஸல், சுனில் நரைன், பெர்குசன், ஹாரி கர்னே ஆகியோர் உள்ளனர்.

இந்நிலையில் வலுவான அணிக்கான சிறந்த வீரர்களை ஏலத்தில் எடுக்கவில்லை என்று கொல்கத்தா நைட் ரைடர்ஸ் அணிக்கு இரண்டு கோப்பையை வாங்கி கொடுத்த கவுதம் காம்பிர் குற்றம்சாட்டியுள்ளார்.

இதுகுறித்து கொல்கத்தா நைட் ரைடர்ஸ் கூறுகையில் ‘‘பேட் கம்மின்ஸை பற்றிய நேர்மறையான கருத்து என்னவெனில், அவர் புதுப்பந்தில் விக்கெட் வீழ்த்த கூடியவர். ஏனென்றால், அவர் பந்தை ஸ்விங் செய்வார். அவரது பந்தில் வேகம் உள்ளது. ஆனால் டெத் ஒவரில் அவர் எப்படி பந்து வீசுவார் என்ற கவலை உள்ளது. இருந்தாலும் சிறந்த பந்து வீச்சு திறமையை பெற்றவர். 2014-ல் கொல்கத்தா அணியில் இருந்துள்ளார். தற்போது மிகப்பெரிய அளவில் முன்னேற்றம் அடைந்துள்ளார்.

அனைத்து போட்டிகளிலும் அவர் விளையாடி மூன்று அல்லது நான்கு போட்டிகளை தனிப்பட்ட முறையில் வென்று கொடுப்பார் என்று நம்புகிறேன். ஏனென்றால், அதிக அளவான பணத்திற்கு ஏலம் எடுக்கப்பட்டுள்ளார்.


அணி நிர்வாகம் மிட்செல் மார்ஷ் அல்லது மார்கஸ் ஸ்டோனிஸ் ஆகியோர் ஒருவரை எடுத்திருக்க வேண்டும். அப்படி இருந்திருந்தால் அணியின் வலுவானதாக இருந்திருக்கும். அனைத்து வீரர்களும் தொடர் முழுவதும் விளையாடுவார்கள் என்று நங்கள் நம்பியிருக்கிறார்கள்.

பேட் கம்மின்ஸ்க்கு காயம் ஏற்பட்டால், லூக்கி பெர்குசன் மாற்று வீரராக களம் இறக்கப்படலாம். ஆனால், டாப் ஆர்டர் பேட்ஸ்மேன்களுக்கு மாற்று வீரர்கள் இல்லை’’ என்றார்.

இங்கிலாந்து கிரிக்கெட் அணி தென்ஆப்பிரிக்காவில் சுற்றுப் பயணம் செய்துள்ளது. இரு அணிகளுக்கும் இடையிலான முதல் டெஸ்ட் செஞ்சூரியனில் வருகிற 26-ந்தேதி தொடங்குகிறது.

இதற்காக இங்கிலாந்து அணி தயாராகி வருகிறது. ஆனால், தென்ஆப்பிரிக்கா சீதோஷ்ணநிலை பிடிக்காமல் இங்கிலாந்து வீரர்கள் பலர் காய்ச்சலால் அவதிப்படுகிறார்கள். இன்னும் ஆறு நாட்களே உள்ளதால் வீரர்கள் கலந்து கொள்ள முடியாத நிலை ஏற்பட்டால் சிக்கலாகிவிடும்.

இதனால் முன்னெச்சரிக்கை காரணமாக டொமினிக் பெஸ், கிரேக் ஓவர்ட்டன் ஆகிய இரண்டு பந்து வீச்சாளர்களை கூடுதலாக அணியில் சேர்த்துள்ளது. இருவரும் சனிக்கிழமை அணியில் இணைய இருக்கிறார்கள்.

பயிற்சி ஆட்டத்தில் ஸ்டூவர்ட் பிராட், ஆர்சர், ஜேக் லீச் ஆகியோர் கலந்து கொள்ளவில்லை என்று குறிப்பிடத்தக்கது.