காஞ்சிபுரம்

சென்னை:

ஆலந்தூர் தொகுதி சட்ட மன்ற உறுப்பினர் தா.மோ. அன்பரசன் சென்னை குடிநீர் வாரிய நிர்வாக இயக்குனரை நேற்று நேரில் சென்று சந்தித்தார்.

அப்போது ஆலந்தூர், முகலிவாக்கம், மணப்பாக்கம் பகுதிகளில் விடுபட்ட பகுதிகளுக்கு மெட்ரோ குடிநீர் கிடைக்க நிதி ஒதுக்குமாறு வலியுறுத்தினார்.

ஆலந்தூர் பகுதியில் ரூ.66 கோடி செலவில் மெட்ரோ குடிநீர் வழங்கும் திட்டம் செயல்படுத்தப்பட்ட போது அங்குள்ள 160,161,162, 164,165,166 ஆகிய வட்டங்களில் உள்ள 82 தெருக்களிலும் மெட்ரோ குடிநீர் பணிகள் செயல்படுத்தப்படாமல் விடுபட்டுள்ளதை சுட்டிக் காட்டினார்.

இது பற்றி சட்டமன்றத்தில் ஏற்கனவே பேசியதாகவும், அமைச்சர் இதை நிறைவேற்றி தருவதாக கூறியதையும் சுட்டிக்காட்டினார்.

விடுபட்ட 82 தெருக்களிலும் குடிநீர் பணியை மேற்கொள்ள ரூ.13 கோடியே 71 லட்சம் அளவுக்கு திட்ட மதிப்பீடு தயாரிக்கப்பட்டு நிதி ஒதுக்காமல் உள்ளதால் விரைந்து நிதி ஒதுக்க நடவடிக்கை எடுக்குமாறு கேட்டுக்கொண்டார்.

ஆலந்தூரில் குடிநீர் பிரச்சினையை போக்க நெம்மேலி கடல் குடிநீரையும் வழங்குமாறு வலியுறுத்தினார்.

இதே போல் மணப்பாக்கம், முகலிவாக்கம் பகுதிகளில் உள்ள 156,157 ஆகிய வட்டங்கள் சென்னை மாநகராட்சியோடு இணைக்கப்பட்டு 7 ஆண்டு ஆகியும் மெட்ரோ குடிநீர் இணைப்பு வழங்காமல் உள்ளதை சுட்டிக்காட்டியதுடன் அங்கும் மெட்ரோ குடிநீர் கிடைக்க ஏற்பாடு செய்யும் படி கேட்டுக் கொண்டார்.

ஆதம்பாக்கம் பாலாஜி நகரில் 96- 2001-ம் ஆண்டில் அமைக்கப்பட்ட கழிவு நீர் வெளியேற்றும் நிலையத்தின் திறன்- குடியிருப்பு பகுதி அதிகரித்ததால் போதிய திறன், சக்தி இல்லாமல் உள்ளது.

எனவே கூடுதலாக ஒரு வெளியேற்றும் நிலையம் அமைத்து தர வேண்டும் என்றும், 156,157,158 ஆகிய வட்டங்களில் பாதாள சாக்கடை வசதிகளை அமைத்து தருமாறும் கேட்டுக் கொண்டார்.

இது தொடர்பாக தனித் தனியாக 5 கோரிக்கை மனுக்களையும் வழங்கினார்.

மாமல்லபுரம்:

மாமல்லபுரத்தில் உள்ள புராதன சின்னங்களான அர்ஜுனன் தபசு, கடற்கரை கோவில், ஐந்து ரதம், பிடாரி ரதம், புலிக்குகை மற்றும் மலைப்பகுதி குடவரை கோவில்களைகான வெளிநாடு மற்றும் உள்நாட்டு சுற்றுலா பயணிகள் அதிகளவில் வருகின்றனர்.

புராதன சின்னங்கள் அனைத்தும் தொல்லியல் துறை கட்டுப்பாட்டில் உள்ளது.

இங்கு குரங்குகளின் தொல்லை நாளுக்கு நாள் அதிகரித்து வருகிறது.

சில சுற்றுலா பயணிகள் குரங்குகளை சீண்டுவதால் சிலரை கடித்த சம்பவங்களும் நடந்துள்ளது.

மேலும் சுற்றுலா பயணிகளின் குளிர் பானங்கள், உணவுகளை பறித்து குரங்குகள் அட்டகாசம் செய்து வருகின்றன. குரங்குகளை கட்டுப்படுத்துவது வனத்துறையினர் பொறுப்பு என்பதால் தொல்லியல்துறை காவலர்கள் இதனை கண்டு கொள்வதில்லை.

இதனால் மாமல்லபுரம் வரும் சுற்றுலா பயணிகளுக்கும் குரங்குகளால் பாதுகாப்பு இல்லாத நிலை ஏற்பட்டுள்ளது. குரங்குகளை பிடிக்க அதிகாரிகள் நடவடிக்கை எடுக்க வேண்டும் என்று சுற்றுலா பயணிகள்கோரிக்கை விடுத்து உள்ளனர்.

காஞ்சீபுரம்:

காஞ்சீபுரத்தை அடுத்த ஓரிக்கை, திருவேங்கடம் நகரில் வசித்து வருபவர் பசூல் ரகுமான் (65). தொழில் அதிபர். இவர் காஞ்சீபுரம் மேட்டுத்தெரு, ராஜவீதி பகுதியில் சூப்பர் மார்க்கெட் நடத்தி வருகிறார்.

நேற்று இரவு 11 மணி அளவில் அவர் ராஜவீதியில் உள்ள சூப்பர்மார்க்கெட்டை மூடிவிட்டு மோட்டார் சைக்கிளில் தனியாக வீட்டுக்கு புறப்பட்டார்.

காஞ்சீபுரம் காந்தி ரோட்டில் வந்த போது பின்னால் வந்த ஆம்னி கார் திடீரென பசூல்ரகுமான் ஓட்டி வந்த மோட்டார் சைக்கிள் மீது மோதியது. இதில் நிலை தடுமாறிய அவர் மோட்டார் சைக்கிளோடு கீழே விழுந்தார்.

உடனே காரில் இருந்த 5 பேர் கும்பல் பசூல் ரகுமானுக்கு முதலுதவி செய்வது போல் பேச்சு கொடுத்தனர். திடீரென அவர்கள் பசூல் ரகுமானை கத்தி முனையில் மிரட்டி காரில் ஏற்றி கடத்தி சென்று விட்டனர்.

நள்ளிரவு நேரம் என்பதால் அப்பகுதியில் ஆட்கள் நடமாட்டம் இல்லை. இதனால் கடத்தல் குறித்து உடனடியாக வெளியே தெரியவில்லை.

இதற்கிடையே பசூல் ரகுமானின் மகன் ஜயாலுதீனின் செல்போன் எண்ணுக்கு கடத்தல் கும்பல் போன் செய்தனர். அப்போது அவரிடம், “உங்கள் தந்தை பசூல் ரகுமானை கடத்தி உள்ளோம். அவரை விடுவிக்க ரூ.50 லட்சம் கொடுக்க வேண்டும்” என்று தெரிவித்தனர்.

இதனை கேட்டு அதிர்ச்சி அடைந்த அவர், தந்தை கடத்தல் குறித்து மாவட்ட போலீஸ் சூப்பிரண்டு சந்தோஷ் ஹதிமானிக்கு தகவல் தெரிவித்தார். டி.ஐ.ஜி. தேன்மொழி உத்தரவுப்படி கடத்தல் கும்பலை பிடிக்க 3 தனிப்படை அமைக்கப்பட்டது.

மேலும் கடத்தல்காரர்கள் தப்பிச் செல்வதை தடுக்க காஞ்சீபுரம், திருவண்ணாமலை, வேலூர் ஆகிய 3 மாவட்ட போலீசார் உஷார்படுத்தப்பட்டனர். அவர்கள் தீவிர வாகன சோதனையில் ஈடுபட்டு வந்தனர். இச்சம்பவத்தால் காஞ்சீபுரத்தில் பெரும் பரபரப்பு ஏற்பட்டது.

இந்த நிலையில் ஜயாலுதினின் செல்போனுக்கு மீண்டும் தொடர்பு கொண்ட கடத்தல் கும்பல் பணம் குறித்து கேட்டனர். இதனை பதிவு செய்த போலீசார் கடத்தல் கும்பலின் இருப்பிடம் குறித்து ஆய்வு செய்தனர்.

அவர்கள் காஞ்சீபுரத்தை அடுத்த தூசி அருகே மாமண்டூர் பகுதியில் சென்று கொண்டு இருப்பது தெரிந்தது.

இதையடுத்து தனிப்படை போலீசார் அங்கு விரைந்து சென்றனர். இதனை அறிந்து கடத்தல் கும்பல் அதிகாலை 3 மணி அளவில் மாமண்டூர் வயல்வெளி பகுதியில் பசூல் ரகுமானை இறக்கி விட்டு தப்பி சென்று விட்டனர்.

நிம்மதி அடைந்த பசூல் ரகுமான் அங்கு வசிப்பவர்களிடம் செல்போன் வாங்கி கடத்தல் கும்பல் விட்டு சென்றது குறித்து மகன் ஜயாலுதீனுக்கும், உறவினர்களுக்கும் தெரிவித்தார்.

போலீசார் விரைந்து சென்று பசூல் ரகுமானை மீட்டனர். அவரிடம் கடத்தல் கும்பல் குறித்து விசாரணை நடத்தி வருகிறார்கள். அவர்களை பிடிக்க போலீசார் தீவிர நடவடிககை எடுத்து வருகின்றனர். #kidnapping

மாமல்லபுரம்:

மாமல்லபுரம் அடுத்த பூஞ்சேரி பகுதியைச் சேர்ந்தவர் கோவிந்தன். கூலித் தொழிலாளி. இவர் மது பழக்கத்தக்கு அடிமையானதால் மனைவி நாகம்மாள் சண்டை போட்டு விட்டு மகள்களை அழைத்துக் கொண்டு பெற்றோர் வீட்டுக்கு சென்று விட்டார்.

இதனால் மனமுடைந்த கோவிந்தன் வீட்டில் தூக்கு போட்டு தற்கொலை செய்து கொண்டார்.

திருவான்மியூர்:

நீலாங்கரையை அடுத்த பாலவாக்கம் மணியம்மை தெருவை சேர்ந்தவர் ராணி அம்மாள் (64). இவருக்கு 3 மகன்கள், 2 மகள்கள் உள்ளனர். அனைவருக்கும் திருமணமாகி விட்டது.

இந்த நிலையில், ராணி அம்மாள் தனக்கு சொந்தமான வீடு, நிலம் ஆகியவற்றை ஒரு மகனுக்கும், ஒரு மகளுக்கும் கொடுக்க முடிவு செய்தார். இதற்கான ஏற்பாடுகள் நடந்து வந்தன.

இதையடுத்து ராணி அம்மாளின் 3-வது மகன் பர்ணபாஸ் தாயின் முடிவுக்கு எதிர்ப்பு தெரிவித்தார். ஆட்டோ ஓட்டிவரும் இவர், தாயிடம் உள்ள வீடு, நிலம் ஆகியவற்றை எல்லா குழந்தைகளுக்கும் சமமாக கொடுக்க வேண்டும் என்று கூறியதாக தெரிகிறது.

ஆனால், ராணி அம்மாள் அதை ஏற்கவில்லை. தன்னை ஆதரித்து காப்பாற்றும் குழந்தைகளுக்குத்தான் கொடுப்பேன் என்று கூறி விட்டதாக சொல்லப்படுகிறது. இதனால் தாய்க்கும்- மகனுக்கும் இடையே தகராறு ஏற்பட்டது.

நேற்று இரவு பர்ணபாஸ் ஆட்டோவில் வீடு திரும்பினார். அப்போது ராணி அம்மாள் வீட்டு வாசலில் தூங்கிக் கொண்டு இருந்தார். அவரை பர்ணபாஸ் கத்தியால் குத்தி கொலை செய்தார். அவர் அணிந்திருந்த நகை, கம்மல் ஆகியவற்றை எடுத்துச் சென்று மனைவியிடம் கொடுத்தார். அவை ரத்தக்கறையுடன் இருந்ததால் பர்ணபாஸ் மனைவி அதிர்ச்சி அடைந்தார்.

இதற்கிடையே, சொத்து கொடுக்காத ஆத்திரத்தில் தனது தாயை பர்ணபாஸ் கொலை செய்தது தெரிய வந்தது. தகவல் அறிந்ததும் பாலவாக்கம் போலீசார் சம்பவ இடம் சென்று விசாரணை நடத்தினார்கள்.

இதையடுத்து, தப்பி ஓடமுயன்ற பர்ணபாசை போலீசார் கைது செய்தனர். அவரிடம் விசாரணை நடந்து வருகிறது. இந்த கொலைக்கு வேறு யாரும் தூண்டுதலாக இருந்தார்களா என்பது குறித்து போலீசார் விசாரித்து வருகிறார்கள்.

போரூர்:

சென்னை எம்.ஜி.ஆர். நகர் சிவா விஷ்ணு கோயில் தெருவைச் சேர்ந்தவர் செந்தில்குமார். கட்டிட தொழிலாளி. இவரது மனைவி சீதா (வயது29). நேற்று இரவு செந்தில்குமார் குடிபோதையில் வீட்டிற்கு வந்து மனைவி சீதாவுடன் தகராறில் ஈடுபட்டார்.

இதனால் மனவேதனை அடைந்த சீதா வீட்டில் இருந்த மண்எண்ணெய் தனது உடலில் ஊற்றி தீ வைத்து கொண்டார். இதில் பலத்த தீக்காயம் அடைந்த அவரை மீட்டு சிகிச்சைக்காக கீழ்ப்பாக்கம் அரசு மருத்துவமனையில் சேர்த்தனர். அங்கு சிகிச்சை பலனின்றி இன்று அதிகாலை சீதா பரிதாபமாக உயிரிழந்தார்.

மாமல்லபுரம்:

கல்பாக்கம், அணுபுரம், நெய்குப்பி, கரியச்சேரி பகுதிகளில் தொடர்ந்து வீடுகளின் பூட்டை உடைத்து மர்மநபர்கள் நகைகளை கொள்ளையடித்து செல்லும் சம்பவம் நடந்து வருகிறது. இது குறித்து சதுரங்கபட்டினம் போலீசார் வழக்கு பதிவு செய்து விசாரணை நடத்தி வந்தனர்.

இந்த நிலையில் அப்பகுதியில் தொடர் கொள்ளையில் ஈடுபட்ட மேடவாக்கம் பகுதியை சேர்ந்த சரவணன், அவரது நண்பர் சதீஷ்ஆகிய 2 பேரையும் போலீசார் கைது செய்தனர்.அவர்களிடம் இருந்து 3பவுன் நகையை பறிமுதல் செய்தனர்.

ஆலந்தூர்:

புதுச்சேரி முதல் மந்திரி நாராயணசாமி சென்னை விமான நிலையத்தில் நிருபர்களுக்கு பேட்டி அளித்தார். அப்போது அவர் கூறியதாவது:-

“பெட்ரோல்- டீசல் விலையை உயர்த்துவதற்கான அதிகாரம் மத்திய அரசிடம் தான் உள்ளது. மாநில அரசிடம் இல்லை. காங்கிரஸ் ஆட்சியின் போது பெட்ரோல் - டீசல் விலை மிக குறைவாக இருந்தது. தற்போதுள்ள பா.ஜனதா ஆட்சியில் கச்சா எண்ணை விலை குறைவாக இருக்கிற போதும் சென்னையில் ரூ. 85, மும்பையில் ரூ.90, கொல்கத்தாவில் ரூ.89 என அதிகமாக உள்ளது.

மத்திய அரசு பெட்ரோலை சுத்திகரித்து மலேசியா, சிங்கப்பூர் ஆகிய நாடுகளுக்கு விட்டர் 32 ரூபாய், 34 ரூபாய் என கொடுக்கும் போது நமது நாட்டு மக்களுக்கு விலை குறைவாக கொடுக்க முடியவில்லை. மக்கள் மீது மத்திய அரசு சுமையை ஏற்றுகிறது. அதற்கு காரணம் தவறான அணுகுமுறை மற்றும் பொருளாதார கொள்கை.

பெட்ரோல்- டீசலை ஜி.எஸ்.டி.க்குள் கொண்டு வர நான் எதிர்க்கவில்லை. பா.ஜனதா கட்சி ஆளும் மாநிலத்தில் உள்ள பெரும்பாலான முதல் மந்திரிகள் தான் எதிர்க்கிறார்கள். மாநிலத்துக்கு நஷ்டம் ஏற்படும் என்கிறார்கள்.

2015-ம் ஆண்டில் காங்கிரஸ் ஆட்சியின் போது பிரதமர் மன்மோகன் சிங் பிரான்ஸ் சென்று 126 ரபேல் விமானம் வாங்க ஒப்பந்தம் செய்தார். ஒரு விமானம் ரூ.576 கோடி என விலை நிர்ணயிக்கப்பட்டது.

ஆனால் பிரதமர் மோடி 26 விமானங்கள் மட்டும் எங்களுக்கு போதும் என்று சொல்லி ஒரு விமானத்துக்கு ரூ.1670 கோடி என விலை நிர்ணயம் செய்து ஒப்பந்தம் செய்துள்ளார். இதனால் நாட்டுக்கு ரூ. 41 ஆயிரம் கோடி நஷ்டம்.

காங்கிரஸ் ஆட்சி காலத்தில் ரபேல் விமானம் வாங்க போட்ட ஒப்பந்தம் குறித்து பிரதமர் மோடி மற்றும் வெளியுறவு துறை, பாதுகாப்பு துறை அமைச்சகங்களுக்கு தெரியாதா?

பிரான்ஸ் முன்னாள் அதிபர் ஹோலண்டே வெளியிட்டுள்ள அறிக்கையில் இந்த ஒப்பந்தத்தை ரிலையன்ஸ் நிறுவனத்துக்கு தர வேண்டும் என பிரதமர் மோடி கூறினார் என பகிரங்கமாக கூறி இருக்கிறார். ரிலையன்ஸ் ஒரு திவாலான நிறுவனம், அதற்கு சாதகமாக மோடி செயல்பட்டு வருகிறார். அதில் மாபெரும் இமாலய ஊழல் நடைபெற்று இருக்கிறது.

காங்கிரஸ் கட்சியை விமர்சனம் செய்யும் பிரதமர் மோடி ரபேல் விமானம் பற்றி கேட்கும் கேள்விகளுக்கு வாய் திறக்க மறுக்கிறார். இது குறித்து காங்கிரஸ் கட்சி நாடு முழுவதும் போராட்டங்கள் நடத்தி வருகிறது. பாராளுமன்ற குழு விசாரிக்க வேண்டும் என வலியுறுத்தி வருகிறோம்.

போபர்ஸ் ஊழலை சொல்லி காங்கிரசை விமர்சனம் செய்யும் பா.ஜனதா ரபேல் போர் விமானத்தில் நடைபெற்ற ஊழலுக்கு பதில் சொல்ல வேண்டும். ஊழல் செய்தவர்கள் தண்டிக்கப்பட வேண்டும். பா.ஜனதாவுக்கு இனி இறந்த காலம் தான்.

இவ்வாறு அவர் கூறினார். #RafaleDeal #Narayanaswamy