புதுக்கோட்டை

புதுக்கோட்டை:

புதுக்கோட்டை மாவட்டம் குளத்தூர் வட்டம்,கீரனூர் உள் வட்டத்திற்கு உட்பட்ட கீரனூர், மருதூர், வாலியம்பட்டி, வாழமங்கலம், ஒடுக்கூர், ஆகிய குறுவட்டங்களுக்கு உட்பட்ட மங்கதேவன் பட்டி, நாஞ்சூர், ஒடுகம்பட்டி, சீமானூர், வத்தனாக்குறிச்சி, வடுகப்பட்டி ஆகிய வருவாய் கிராமங்களுக்கு 1,426-ம் பசலிக்கான வருவாய் தீர்வாயம் மாவட்ட கலெக்டர் கணேஷ் தலைமையில் நடைபெற்றது.

வருவாய் தீர்வாயம் நடைபெற்ற குறுவட்டங்களை சார்ந்த வருவாய் கிராம மக்கள் கலந்து கொண்டு ஆக்கிரமிப்பு அகற்றுதல், முதியோர் நலத் திட்டஉதவி கோருதல், பட்டா மாறுதல், பட்டா வழங்க கோருதல் உள்ளிட்ட பல்வேறு கோரிக்கை மனுக்களை அளித்தனர். மனுக்களின் மீது நடவடிக்கை மேற்கொள்ள சம்பந்தப்பட்ட துறை அலுவலர்களுக்கு உத்தரவிட்டார். மேலும், வருவாய் தீர்வாயம் நடைபெறும் குறுவட்டங்களை சேர்ந்த கிராமங்களுக்கான அடங்கல் மற்றும் கணக்கு புத்தகங்களை பார்வையிட்டு கணக்குகள் சரியாக உள்ளனவா என்று சம்பந்தப்பட்ட அலுவலர்களுடன் கேட்டறிந்து, அந்த கிராமங்களுக்கான கிராம புலப்படங்களை பார்வையிட்டு தணிக்கை செய்தார்.

நில அளவைத்துறையினர் பயன்படுத்தும் நில அளவை கருவிகள் சரியாக உள்ளனவா? என்றும் ஆய்வு செய்தார்.

மேலும் வேளாண்மைத் துறையின் சார்பில் தேசிய மண்வள அட்டை இயக்க திட்டத்தின் கீழ் 7 பயனாளிகளுக்கு மண்வள அட்டைகளும், நீடித்தமானாவாரி வேளாண்மை இயக்க திட்டத்தின் கீழ் 5 பயனாளிகளுக்கு மானிய விலையில் உளுந்து இடுபொருட்களும் வழங்கினார்.

நிகழ்ச்சியில், வேளாண் இணை இயக்குநர் ராஜகோபால், இலுப்பூர் வருவாய் கோட்டாட்சியர் வடிவேல்பிரபு, வட்டாட்சியர்கள் கலைமணி, சுப்பையா, அரசு அலுவலர்கள் மற்றும் பொதுமக்கள் கலந்து கொண்டனர்.

விராலிமலை:

சென்னையை சேர்ந்தவர் தங்கராஜ். இவர் அவரது மனைவி குணசுந்தரி  மற்றும் மகன் கார்த்திக், மகள் பிரியா, உறவினர்கள் சுப்புலட்சுமி , சவுமியா ஆகியோருடன் விருதுநகரில் நடைபெறும் கோவில் திருவிழாவில் பங்கேற்பதற்காக சென்னையில் இருந்து கார் மூலம் விருதுநகர் சென்றார். காரை பாட்ஷா என்பவர் ஓட்டினார்.

இன்று காலை புதுக்கோட்டை மாவட்டம் விராலிமலை அருகே கசவனூர் திருச்சி-மதுரை நான்கு வழிச்சாலையில் செல்லும் போது திடீரென டிரைவரின் கட்டு பாட்டை இழந்த கார் நடு ரோட்டில் தாறுமாறாக ஓடி சாலையோர பள்ளத்தில் கவிழ்ந்தது.

இந்த விபத்தில் காரில் இருந்த 6 பேரும் காய மடைந்தனர் . பலத்த காயமடைந்த குணசுந்தரி சம்பவ இடத்திலேயே ரத்த வெள்ளத்தில் இறந்தார். இது குறித்த தகவல் அறிந்ததும் விராலிமலை போலீஸ் இன்ஸ்பெக்டர் செவிலியன் மற்றும் போலீசார் சம்பவ இடத்திற்கு விரைந்து சென்று காயம் அடைந்தவர்களை மீட்டு சிகிச்சைக்காக திருச்சி தனியார் மருத்துவமனையில் சேர்த்தனர்.

மேலும் குணசுந்தரி உடலை மீட்டு பிரேத பரிசோதனைக்காக திருச்சி அரசு மருத்துவ மனைக்கு அனுப்பி வைத்தனர். விபத்துக்கான காரணம் குறித்து போலீசார் வழக்கு பதிவு செய்து விசாரித்து வருகின்றனர்.

புதுக்கோட்டை:

புதுக்கோட்டை மாவட்டம், அறந்தாங்கி அருகே உள்ள அழியாநிலை இலங்கை அகதிகள் முகாமை சேர்ந்தவர் சுரேஷ்குமார் (வயது 25). இவர் கடந்த 2.10.16 அன்று ஒரு சிறுமியை பாலியல் பலாத்காரம் செய்த வழக்கில், திருமயம் அனைத்து மகளிர் போலீசாரால் கைது செய்யப்பட்டு புதுக்கோட்டை சிறையில் அடைக்கப்பட்டார்.

இந்நிலையில் நேற்று முன்தினம் மதியம் உணவு சாப்பிட சுரேஷ்குமார் உள்ளிட்ட கைதிகளை ஜெயிலில் உள்ள அறைகளில் இருந்து சிறை காவலர்கள் திறந்து விட்டனர். அப்போது ஜெயில் சுவற்றின் மீது ஏறி கைதி சுரேஷ்குமார் தப்பி ஓடி விட்டார். இதுகுறித்து சிறை காவலர்கள் புதுக்கோட்டை டவுன் போலீசில் புகார் செய்தனர்.

இந்நிலையில் சுரேஷ்குமார் தப்பி ஓடிய சம்பவத்தில் பணியின் போது கவனக்குறைவாக இருந்த சிறை காவலர்கள் அன்பழகன், ரவி, மோகன் ஆகிய 3 பேரையும் பணியிடை நீக்கம் செய்து திருச்சி சரக சிறைத்துறை டி.ஐ.ஜி. ஜெயபாரதி உத்தரவிட்டுள்ளார்.

புதுக்கோட்டை:

புதுக்கோட்டை நகராட்சி, சந்தைப்பேட்டையில் நகராட்சி சார்பில் ஆதரவற்றோருக்காக புதிதாக கட்டப்பட்ட “நம்ம இல்லத்தை” மாவட்ட வருவாய் அலுவலர் ராமசாமி தலைமை யில் தமிழ்நாடு வீட்டுவசதி வாரிய தலைவர்பி.கே.வைரமுத்து முன்னிலையில் மக்கள் நல்வாழ்வுத்துறை அமைச்சர் டாக்டர்.சி.விஜயபாஸ்கர் திறந்து வைத்தார்.

பின்னர் அமைச்சர் விஜயபாஸ்கர் பேசியதாவது:-

நகர்பகுதிகளில் வீடு இல்லாமல் ஆதரவற்ற நிலையில் சாலையோரங்கள், ரெயில் நிலையங்கள், பேருந்து நிலையங்கள் உள்ளிட்ட பல்வேறு இடங்களில் ஏழை மக்கள் தங்கியுள்ளார்கள். இவ்வாறு தங்கியுள்ள ஏழை மக்களின் துயரத்தை போக்கும் வகையில் புதுக்கோட்டை நகராட்சி, சந்தைப் பேட்டையில் தேசிய நகர்புற வாழ்வாதார திட்டத்தின் கீழ் மத்திய, மாநில அரசுகளின் பங்களிப்புடன் ரூ.25 லட்சம் மதிப்பீட்டில் புதிதாக கட்டப்பட்ட நகர்புற வீடு அற்ற ஏழை மக்களுக்கான நம்ம இல்லம் திறந்து வைக்கப்பட்டுள்ளது.

இக்கட்டடம் 2500 ச.அ பரப்பளவில் கட்டப்பட்டுள்ளது. இதில் தங்கும் இடம், கட்டில், மெத்தை, தலையனை, படுக்கைவிரிப்புகள் 6 கழிவறைகள், 4 குளியலறைகள், மின்விசிறி, பாதுகாப்பு சுற்றுச்சுவர் உள்ளிட்ட பல்வேறு நவீன வசதிகளுடன் எழிலுற கட்டப்பட்டுள்ளதுடன் தற்பொழுது இந்த இல்லத்தில் தங்கியுள்ள 39 நபர்களுக்கும் 3 வேலையும் இலவச உணவு வழங்கப்படும்.

மேலும், இவர்களுக்கு தனியாக பணியாளர்கள் நியமிக்கப்பட்டுள்ளனர். இதன் மூலம் வீடில்லாமல் பொது இடங்களில் வசித்து வரும் ஏழை பொது மக்கள் மிகுந்த பயன்பெறுவார்கள். எனவே புதுக்கோட்டை மாவட்டத்தில் வீடு இல்லாத ஆதரவற்றோர் நகராட்சியின் ‘நம்ம இல்லத்தை” பயன்படுத்தி கொள்ள வேண்டும் என்று பேசினார்.

இந்நிகழ்ச்சியில் புதுக்கோட்டை நகராட்சி ஆணையர் (பொறுப்பு) ஜீவாசுப்பிரமணியன், முன்னாள் மாவட்ட ஊராட்சிக்குழுத் தலைவர் ராமையா, முன்னாள் நகர்மன்றத் துணைத்தலைவர் சேட்(என்ற) அப்துல்ரஹ்மான், முன்னாள் நகர்மன்ற உறுப்பினர்கள் பாஸ்கர், தியாகு, கூட்டுறவு சங்கத் தலைவர்கள், முன்னாள் உள்ளாட்சி அமைப்பின் பிரதிநிதிகள் மற்றும் அரசு அலுவலர்கள் உள்ளிட்ட பலர் கலந்து கொண்டனர்.

புதுக்கோட்டை:

புதுக்கோட்டை மாவட்டம் அறந்தாங்கி அருகே உள்ள அழியாநிலை பகுதியில் உள்ள இலங்கை அகதிகள் முகாமை சேர்ந்தவர் ராஜமோகன். இவரது மகன் சுரேஷ்குமார் (வயது 25). இவர் கடந்த 2.10.16-ந்தேதி, அதே பகுதியை சேர்ந்த சிறுமியை பலாத்காரம் செய்த வழக்கில் திருமயம் அனைத்து மகளிர் போலீசாரால் கடந்த 6.10.16-ந்தேதி கைது செய்யப்பட்டு புதுக்கோட்டை சிறையில் அடைக்கப்பட்டார்.

இந்நிலையில் நேற்று மதியம் உணவுவிற்காக சிறை காவலர்கள் சுரேஷ்குமார் உள்ளிட்ட அனைத்து கைதிகளையும் ஜெயிலில் உள்ள கைதிகள் அறையில் இருந்து வெளியே கொண்டு வந்தனர்.

அப்போது வரிசையின் முதல் ஆளாக உணவு வாங்கி சுரேஷ்குமார் சாப்பிட்டார். பின்னர் யாருக்கும் தெரியாமல் தான் அணிந்திருந்த கைலியை கொண்டு, கயிறுபோல் திரித்து கொண்டு, அதனை சுமார் 20 அடி உயரம் உள்ள சிறையின் சுவற்றின் மேல் உள்ள கல்லில் மாட்டினார். பின்னர் அதன் மூலம் சுவற்றில் ஏறி தப்பி ஓடினார். உணவுவேளை முடிந்த பிறகு மீண்டும் அனைத்து கைதிகளையும் அறையில் அடைக்க, சிறை காவலர்கள், கைதிகளின் பதிவேட்டை சரிபார்த்தனர். அப்போது சுரேஷ்குமார் காணவில்லை என்பது தெரியவந்தது.

இது குறித்து சிறை துறை அதிகாரிகள் புதுக்கோட்டை டவுன் போலீசில் புகார் செய்துள்ளனர். புகாரின் பேரில் போலீசார் சுரேஷ்குமார் எப்படி தப்பித்தார்? என்று விசாரணை நடத்தி வருகின்றனர். மேலும் தப்பி ஓடிய கைதி சுரேஷ்குமாரை பிடிக்க போலீசார் தீவிர தேடுதல் வேட்டையில் ஈடுபட்டுள்ளனர்.

புதுக்கோட்டை:

புதுக்கோட்டையில் டி.டி.வி.தினகரன் ஆதரவாளர்கள் ஆலோசனைக் கூட்டம் முன்னாள் அம்மா பேரவை மாவட்ட துணைச் செயலாளர் எஸ்.ஜி.செங்கொடியான் தலைமையில் நடைபெற்றது.

நிகழ்ச்சிக்கு ஒ.கே.பி. கார்த்திக் பிரபாகரன், வீரமணி, வீரவெற்றி, பாண்டியன், உமாகணேசன், ஆகியோர் முன்னிலையில் கூட்டத்திற்கு மதுரை மாவட்டத்தை சேர்ந்த ராமசுப்பு கலந்து கொண்டு சிறப்புரை ஆற்றினர்.

டி.டி.வி.தினகரன் கைதை கண்டித்து மாபெரும் கண்டன ஆர்ப்பாட்டம் நடத்தப்பட வேண்டும். அ.தி.மு.க பொதுச் செயலாளர் வழிக்காட்டுதலில் கட்சியின் சாதி அரசியல் கிடையாது சாதி என்றால் அ.தி.மு.க தான். அ.தி.மு.க கட்சியின் நல்ல தலைமையை டி.டி.வி. தினகரன் மூலமாக தான் நடத்தப்படும். கட்சிக்கு நல்ல தலைமை கிடைத்துள்ளது. கட்சி தலைமைக்கு வலுசேர்க்குவும் ஊன்று துணையாக இருப்போம் என்று பேசினார்.

நிகழ்ச்சியில் கந்தர்வக்கோட்டை பாசறை செயலாளர் அருண்குமார், ஒன்றிய அம்மா பேரவை சக்திவேல், புதுக்கோட்டை முன்னாள் ஒன்றிய செயலாளர் அப்பாதுரை, குமார்,செந்தில், சுரேஷ் மலையூர்ராஜா மற்றும் புதுக்கோட்டை மாவட்ட ஒன்றியத்தில் உள்ள கந்தர்வ க்கோட்டை, விராலிமலை, கறம்பக்குடி, அறத்தாங்கி, மணல்மேடுக்குடி, திருமயம், பொண்ணமராவதி, ஆலங்குடி பகுதிகளிலிருந்து பலர் கலந்து கொண்டனர்.

பொன்னமராவதி:

தமிழகத்தில் கடும் குடிநீர் தட்டுப்பாடு நிலவி வருகிறது. பருவமழை பொய்த்ததாலும், காவிரியில் நீர் இல்லாததாலும் டெல்டா பகுதியில் கடும் வறட்சி நிலவுவதோடு, குடிநீர் தட்டுப்பாடு ஏற்பட்டுள்ளது. குடிநீருக்காக மாவட்ட நிர்வாகம் சார்பில் பல்வேறு பகுதிகளிலும் போர்க்கால அடிப்படையில் நடவடிக்கை எடுக்கப்பட்டு வருகிறது. இதனால் மனிதர்கள் மட்டுமின்றி கால் நடைகளும் பெரிதும் பாதிக்கப்பட்டுள்ளன.

பெரும்பாலான பகுதிகளில் வனப்பகுதியில் இருந்து குடிநீருக்காக மான், யானை போன்ற வன விலங்குகள் மக்கள் குடியிருப்பு பகுதிக்குள் புகுந்து தண்ணீர் அருந்தி செல்லும் சம்பவங்கள் அரங்கேறி வருகிறது. சமூக வலைதளங்களில் குரங்குகள், பறவைகள் தாகத்தை தீர்க்க குடிநீர் குழாயில் நீர் அருந்துவது போன்ற படங்கள் வலம் வந்துள்ளன.

தற்போது புதுக்கோட்டை மாவட்டம் பொன்னமராவதியில் தண்ணீர் குழாயை திறந்து ஒரு ஆடு நீர் அருந்துவது பொதுமக்களிடையே வியப் பினை ஏற்படுத்தியுள்ளது.

பொன்னமராவதி பட்டமரத்தான் கோவில் எதிரே பேரூராட்சியின் சார்பில் குடிநீர் தொட்டி வைக்கப்பட்டிருந்தது. அந்த குடிநீர்தொட்டியை ஆடு ஒன்று தனது தலையால் குழாயை திறந்து நீர் அருந்தி செல்கிறது. கடந்த சில வாரங்களாக இந்த ஆடு தினமும் இக்குடிநீர் குழாயை தேடி வந்து நீர் அருந்தி செல்கிறது.

இது அப்பகுதி பொதுமக்களை வியப்பில் ஆழ்த்தியுள்ளது.