ஈரோடு

ஈரோடு:

ஈரோடு தெற்கு மாவட்ட தி.மு.க. செயலாளர் சு.முத்துசாமி ஆலோசனை பேரில் மாநகர செயலாளர் மு.சுப்பிரமணியம் தலைமையில் ஈரோடு மாவட்ட கலெக்டர் கதிரவனிடம் தி.மு.க.வினர் ஒரு மனு கொடுத்தனர்.

ஈரோடு மாநகரத்தில் பாதாள சாக்கடை பணிகள் உள்பட பல்வேறு பணிகளுக்காக 60 வார்டுகளிலும் சாலைகள் தோண்டப்பட்டு வருகிறது. இதனால் ஈரோட்டில் ரோடுகள் குண்டும், குழியுமாக உள்ளது. இந்த ரோடுகள் நீண்ட நாட்களாக சீரமைக்கப்படாமல் உள்ளது.

இதனால் மாணவ- மாணவிகள், பொதுமக்கள், வாகன ஓட்டிகள் என பலர் இன்னல்களுக்கு ஆளாகி வருகின்றனர். மேலும் தோண்டப்பட்ட சாலைகளில் உள்ள குழிகளில் மழைநீர் தேங்கி கொசுக்களும் உற்பத்தியாகி வருகிறது.

இதனால் டெங்கு மற்றும் வி‌ஷ காய்ச்சல்கள் பரவும் அபாயம் உள்ளது. ரோடுகள் சரியாக மூடப்படாமல் இருக்கிறது. இதன் காரணமாக பல இடங்களில் தொடர் விபத்துக்கள் நடைபெற்று வருகின்றன.

இதை உடனடியாக மாவட்ட நிர்வாகம் சரி செய்து பொதுமக்களுக்கு உதவ வேண்டும்.

இவ்வாறு அந்த மனுவில் கூறப்பட்டுள்ளது.

இதில் மாநகர அவைத் தலைவர் சேகரன், மாநகர துணை செயலாளர் நந்தகோபு, மாநகர பொருளாளர் சண்முகம், மாவட்ட பிரதிநிதி கே.சந்திரசேகர், பகுதி செயலாளர்கள் லட்சுமண குமார், வி.சி.நடராஜன், அக்னி சந்துரு, பொ.ராமசந்திரன், நிர்மல் பாபு உள்பட நிர்வாகிகள் பலர் கலந்து கொண்டனர்.

ஈரோடு:

ஈரோடு மாவட்டத்தில் வடகிழக்கு பருவமழை தொடங்குவதற்கு முன்பே கடந்த 5 நாட்களாக பலத்த மழை பெய்து வருகிறது. நேற்று இரவும் மாவட்டத்தில் பரவலாக மழை கொட்டியது. குறிப்பாக வனப்பகுதியில் வரலாறு காணாத வகையில் கனமழை கொட்டி தீர்த்தது.

சத்தியமங்கலம் வனப்பகுதியையொட்டி உள்ள கடம்பூர் மல்லியம்துர்க்கம், காடகநல்லி, குத்தியா லத்தூர், ஈரட்டி உள்பட சுற்று வட்டார வனப்பகுதிகளில் நேற்று இரவு 7 மணிக்கு தொடங்கிய கனமழை நள்ளிரவு 12 மணி வரை கொட்டி தீர்த்தது.

இந்த கனமழையால் கடம்பூர் மலைப்பகுதியில் காட்டாறுகளில் வெள்ளம் பெருக்கெடுத்து ஓடியது. சத்தியமங்கலம் நால்ரோட்டில் இருந்து கடம்பூர் செல்லும் மலைப்பதையில் ரோட்டோரம் புகழ்மிக்க மல்லியம்மாள் கோவில் உள்ளது. குறுகிய வளைவு பாதையில் உள்ள இந்த மலையின் மேல் பகுதியிலிருந்து பேரிறைச்சலுடன் தண்ணீர் குற்றால அருவி போல் கொட்டி ரோட்டை ஆக்கிரமித்தப்படி பாய்ந்து மறுகரையில் உள்ள பள்ளத்தில் கொட்டியது.

ரோட்டில் வெள்ளம் பெருக்கெடுத்து ஓடியதால் நேற்று நள்ளிரவு முதல் கடம்பூர்-சத்தியமங்கலம் போக்குவரத்து அடியோடு துண்டிக்கப்பட்டது. இருபுறமும் வாகனங்கள் அணிவகுத்து போக முடியாமல் நின்றன. இதில் பல வாகனங்கள் சிரமத்துடன் திரும்பி சென்றன.

கடம்பூர் மலை பகுதியில் விடிய விடிய கொட்டிய கனமழையால் அப்பகுதியில் பார்க்கும் இடம் எல்லாம் திடீர் அருவிகள் தோன்றி தண்ணீர் கொட்டியது.

பெருந்துறை:

ஈரோடு மாவட்டம் பெருந்துறை அடுத்த சின்னிவலசு பகுதியை சேர்ந்த ஏழு வயது சிறுமிகள் 2 பேர் அப்பகுதியில் ஒரு கோவில் அருகே விளையாடிக் கொண்டிருந்தனர்.

அப்போது அங்கு அதே பகுதியை சேர்ந்த தங்கமுத்து (வயது 52) என்பவர் வந்தார்.

அவர் அந்த 2 சிறுமிகளிடமும் நைசாக பேச்சு கொடுத்து தனியாக ஒரு இடத்துக்கு அழைத்து சென்றார். பிறகு 2 சிறுமிகளுக்கும் பாலியல் தொல்லை கொடுத்தாக கூறப்படுகிறது. அவரிடமிருந்து 2 சிறுமிகளும் தப்பி ஓடி வந்து பெற்றோரிடம் கூறினர். இதை கேட்டு பெற்றோர்கள் அதிர்ச்சி அடைந்தனர்.

இது தொடர்பாக ஈரோடு சைல்டு லைன் உறுப்பினரான புவனேஸ்வா பெருந்துறை போலிஸ் நிலையத்தில் புகார் செய்தார்.

புகாரை பெற்ற இன்ஸ்பெக்டர் சரவணன் சிறுமிகளிடம் செக்ஸ் குறும்பில் ஈடுபட்டதாக கூறப்படும் தங்கமுத்து மீது வழக்குபதிவு செய்து தலைமறைவான அவரை தேடி வருகிறார்கள்.

கவுந்தப்பாடி:

கவுந்தப்பாடி மற்றும் காந்தி நகர் துணை மின் நிலையங்களில் நாளை (17-ந் தேதி) மின் பராமரிப்பு பணிகள் நடக்கிறது.

இதையொட்டி நாளை காலை 9 மணி முதல் மாலை 5 மணி வரை கீழ்கண்ட இடங்களில் மின்சாரம் இருக்காது.

கவுந்தப்பாடி, கொளத்துப்பாளையம், ஓடத்துறை, பெத்தாம்பாளையம், எல்லீஸ்பேட்டை சிங்காநல்லூர், பெருந்தலையூர், வெள்ளாங்கோவில், ஆப்பக்கூடல், கிருஷ்ணாபுரம், தர்மபுரி, கே.புதூர், மாரப்பம்பாளையம், அய்யம்பாளையம், வேலம்பாளையம், சந்திராபுரம் பெருமாபாளையம், தன்னாசிபட்டி, பாண்டியம்பாளையம்.

குஞ்சரமடை, ஓடமேடு, கருக்கம்பாளையம், கண்ணாடி புதூர், மாணிக்க வலசு, அய்யன் வலசு, மணிபுரம், விராலி மேடு, தங்கமேடு, சேவா கவுண்டனூர், ஆலத்தூர், கவுண்டன் பாளையம், குட்டி பாளையம், செரையாம் பாளையம்.

காஞ்சிகோவில், பள்ளபாளையம், கவுண்டம் பாளையம், கரட்டுபாளையம், சின்னியம் பாளையம், அய்யன் வலசு, பெருமாபாளையம், முள்ளம்பட்டி, ஓலப்பாளையம், கந்தம்பாளையம் பிரிவு, சாமிகவுண்டன் பாளையம், வேட்டை பெரியாம்பாளையம், காந்தி நகர், நடுவலசு, கருக்கம்பாளையம், துடுப்பதி, பொன்னாண்டா வலசு, கொளத்தான் வலசு.

சூரியம்பாளையம், பெத்தாம்பாளையம், இளையாம்பாளையம், ஒசப்பட்டி, மாத நாயக்கன்பாளையம், சாணார்பாளையம், தீர்த்தம்பாளையம், சமாதானபுரம், சீரங்க கவுண்டம்பாளையம், பாலக்கரை, தொட்டியனூர், கோவில் காட்டு வலசு.

இந்த தகவலை ஈரோடு மின் பகிர்மான வட்ட செயற்பொறியாளர் பழனிவேல் தெரிவித்தார்.

டி.என்.பாளையம்:

டி.என்.பாளையம் அடுத்த கள்ளிப்பட்டி வடக்கு வீதியை சேர்ந்தவர் பாப்பாத்தி என்கிற தவசியம்மாள் (வயது 78). இவரின் கணவரும் முதல் மகனும் ஏற்கனவே இறந்துவிட்ட நிலையில் தற்போது மகன் பகவதி (வயது 60) மற்றும் மகள் ஒருவரும் வெவ்வேறு ஊர்களில் உள்ளனர்.

தனியாக வசிக்கும் தனது வயதான அம்மாவை கவனித்து கொள்ள கள்ளிப்பட்டியை சேர்ந்த புஷ்பா என்ற பெண்ணை சம்பளத்திற்கு மகன் பகவதி சேர்த்துள்ளார்.

வயது முதிர்வு காரணமாக தவசியம்மாளுக்கு உடல் ரீதியான பல பிரச்சனைகள் இருப்பதாக சொல்லப்படுகிறது.

இந்நிலையில், வேலையாள் புஷ்பா மளிகை சாமான்கள் வாங்க சென்றுவிட்டு சுமார் அரைமணி நேரம் கழித்த வீடு திரும்பியவர் வீட்டுக்குள் நெருப்பு புகை வருவதை பார்த்து அதிர்ச்சியடைந்துள்ளார்.

உடனே அக்கம் பக்கத்தினரின் உதவியுடன் பூட்டப்பட்ட கதவை திறந்து பாத்தபோது தவசியம்மாள் உடல் கருகிய நிலையில் பிணமாக கிடந்தார். மண்ணெண்ணெய் கேன் அருகில் கிடந்ததால் மண்ணெண்ணெய் ஊற்றி தீ வைத்ததாக தெரிகிறது.

கோபி அரசு மருத்துவ மனைக்கு கொண்டு சென்ற தவசியம்மாளின் உடல் இன்று பிரேத பரிசோதனை செய்யப்படுகிறது. இது குறித்து பங்களாபுதூர் போலீசார் வழக்கு பதிவு செய்து விசாரணை நடத்தினர். இச்சம்பவம் அப்பகுதியில் சோகத்தையும், பரபரப்பையும் ஏற்படுத்தியுள்ளது.