நீங்கள் தேடியது "delta district"

திருத்துறைப்பூண்டி:

திருவாரூர் மாவட்ட கலெக்டர் சாருஸ்ரீயை, தமிழ்நாடு காவிரி விவசாயிகள் சங்கத்தின் பொதுச்செயலாளர் பி ஆர்.பாண்டியன் சந்தித்து டெல்டா மாவட்டங்களில் தண்ணீரின்றி கருகி வரும் சம்பா, தாளடி நெற்பயிர்களை காப்பாற்ற நடவடிக்கை எடுக்குமாறு வலியுறுத்தினார்.

பின்னர் பி.ஆர்.பாண்டியன் நிருபர்களுக்கு அளித்த பேட்டியில் கூறியிருப்பதாவது :-

காவிரி டெல்டா மாவட்டங்களில் தண்ணீரின்றி சம்பா, தாளடி நெற்பயிர்கள் கருகி வருகின்றன. காவிரியில் தண்ணீர் திறப்பு குறித்து முடிவு எடுக்கிற அதிகாரம் ஒன்றுபட்ட தஞ்சை மாவட்ட கலெக்டருக்கு தான் வழங்கப்பட்டிருந்தது. இது ஆங்கிலேயர் காலத்தில் இருந்து பின்பற்றப்படும் நடவடிக்கையாகும். நான்கு மாவட்டங்களாக பிரிக்கப்பட்ட பிறகு 4 மாவட்ட கலெக்டரிகளின் பரிந்துரையை ஏற்று மேட்டூர் அணை திறப்பதையும், அடைப்பதையும் வாடிக்கையாக பின்பற்றப்படுகிறது.

தற்போதைய தலைமைச் செயலாளர் சிவதாஸ் மீனா, நீர் பாசன துறையின் நிர்வாக அதிகாரத்திற்குள் தலையிடுவதும், தொழிற்சாலைகளுக்கு தண்ணீர் வழங்க வேண்டும் என்கிற நோக்கில் பயிர்கள் கருகுவதை காப்பாற்ற முயற்சிக்காமல் தண்ணீரை திறக்க மறுப்பது ஏற்கத்தக்கது அல்ல.

எனவே கருகி வரும் நெற்பயிர்களை காப்பாற்ற உடனடியாக மேட்டூர் அணையை திறக்க நீர்ப்பாசன துறை முன்வர வேண்டும் என வலியுறுத்தி வருகிற 3-ந் தேதி (சனிக்கிழமை) காலை 9 மணியளவில் தஞ்சை, திருவாரூர், நாகை, மயிலாடுதுறை ஆகிய 4 மாவட்டங்களில் சாலை மறியல் போராட்டம் நடைபெறும். இதில் ஏராளமான விவசாயிகள் பங்கேற்கின்றனர்.

இவ்வாறு அவர் கூறினார்.

சென்னை:

தி.மு.க. இளைஞர் அணி செயலாளரும், அமைச்சருமான உதயநிதி ஸ்டாலின் தஞ்சை, திருவாரூர், நாகப்பட்டினம், மயிலாடுதுறை, புதுக்கோட்டை, திருச்சி, அரியலூர், பெரம்பலூர், கடலூர் மாவட்டங்களில் சூறாவளி சுற்றுப் பயணம் மேற்கொண்டுள்ளார்.

இது தொடர்பாக வெளியிடப்பட்டுள்ள அறிக்கையில் கூறியிருப்பதாவது:-

இன்று மாலை 5 மணிக்கு நாகப்பட்டினம் அவுரித் திடலில் நாகை மாவட்ட தி.மு.க. இளைஞர் அணி செயல் வீரர்கள் கூட்டமும், இரவு 7 மணிக்கு மயிலாடுதுறை சீனிவாசபுரத்தில் மயிலாடுதுறை மற்றும் காரைக்கால் மாவட்ட இளைஞர் அணி செயல் வீரர்கள் கூட்டமும் நடக்கிறது. இந்த கூட்டத்தில் உதயநிதி ஸ்டாலின் கலந்து கொண்டு பேசுகிறார்.

நாளை (ஞாயிற்றுக் கிழமை) காலை 10 மணிக்கு பட்டுக் கோட்டையில் பழஞ்சூர் செல்வம் இல்ல திருமண விழாவிலும், 11 மணிக்கு பரமேஸ்வரன் இல்ல திருமண விழாவிலும் 12 மணிக்கு மாவட்ட துணை செயலாளர் ரமேஷ் இல்ல புதுமனை புகுவிழா நிகழ்ச்சி யிலும் அமைச்சர் உதயநிதி பங்கேற்கிறார். பின்னர் மீண்டும் 12.30 மணி அளவில் பட்டுக் கோட்டை கோமதி விலாசில் தஞ்சை தெற்கு மாவட்ட முன்னோடிகளுக்கு பொற்கிழி வழங்கும் நிகழ்ச்சியிலும் பங்கேற்கிறார். மாலை 5 மணிக்கு புதுக்கோட்டை வடக்கு மற்றும் தெற்கு மாவட்ட இளைஞர் அணி செயல் வீரர்கள் கூட்டத்திலும், இரவு 7 மணிக்கு திருச்சி கலைஞர் அறிவாலயத்தில் நடக்கும் திருச்சி வடக்கு, தெற்கு, மத்திய மாவட்ட இளைஞர் அணி செயல் வீரர்கள் கூட்டத்திலும் உதயநிதி பங்கேற்று பேசுகிறார்.

நாளை மறுநாள் (திங்கட் கிழமை) காலை 11 மணி அளவில் அரியலூர் மாவட்ட கலெக்டர் அலுவலகத்தில் நடைபெறும் பல்வேறு துறைகளின், மாலை 4 மணிக்கு பெரம்பலூர் மாவட்ட கலெக்டர் அலவலக ஆய்வு கூட்டத்திலும் பங்கேற்கும் உதயநிதி அன்று இரவு அரியலூர், பெரம்பலூர் மாவட்ட இளைஞர் அணி செயல் வீரர்கள் கூட்டத்தில் கலந்து கொள்கிறார்.

வருகிற 29-ந் தேதி (செவ்வாய்கிழமை) காலை 10.30 மணிக்கு விருத்தாச்சலம் கழுதூரில் நடைபெறும் இளைஞர் அணி செயல் வீரர்கள் கூட்டத்தில் உதயநிதி கலந்து கொள்கிறார். இதில் கடலூர் கிழக்கு, மேற்கு மாவட்ட நிர்வாகிகள் கலந்து கொள்கிறார்கள். அன்று மாலை 4 மணி அளவில் கடலூர் மாவட்ட கலெக்டர் அலுவல கத்தில் நடைபெறும் பல்வேறு துறைகள் தொடர்பான ஆய்வு கூட்டத்திலும் உதயநிதி கலந்து கொள்கிறார்.

முன்னதாக இன்று காலையில் நாகப்பட்டினம் கலெக்டர் அலுவலகத்தில் முதலமைச்சர் மு.க.ஸ்டாலின் தலைமையில் நடைபெற்ற மண்டல ஆய்வு கூட்டத்தில் அமைச்சர் உதயநிதி கலந்து கொண்டார்.

நேற்று தஞ்சை மற்றும் திருவாரூரில் நடந்த தி.மு.க. இளைஞர் அணிசெயல் வீரர்கள் கூட்டத்திலும் கலந்து கொண்டு கட்சி நிர்வாகிகள் மத்தியில் பேசினார்.

சென்னை:

தமிழ்நாட்டின் காவிரி டெல்டா பகுதிகளில் அறுவடைக்கு தயாராக இருந்த சம்பா பயிர்கள் பருவம் தவறி பெய்த மழையின் காரணமாக நீரில் மூழ்கியதால் ஏற்பட்டுள்ள பாதிப்புகளை தணித்திடும் வகையில் நெல் கொள்முதல் விதிமுறைகளில் தேவையான தளர்வுகளை மத்திய அரசு வழங்க வேண்டும் என்று பிரதமர் நரேந்திர மோடிக்கு தமிழக முதலமைச்சர் மு.க.ஸ்டாலின் நேற்று முன்தினம் கடிதம் எழுதியிருந்தார்.

அந்தக் கடிதத்தில், 'பிப்ரவரி மாதத்தில் (இம்மாதம்) நெல் அறுவடை செய்ய தயாராக இருந்த நேரத்தில் துரதிஷ்டவசமாக தஞ்சை, திருவாரூர், நாகை, மயிலாடுதுறை மற்றும் புதுக்கோட்டை மாவட்டங்களில் பெய்த பருவம் தவறிய மழையால் சுமார் ஒரு லட்சம் எக்டேர் பரப்பிலான பயிர்கள் நீரில் மூழ்கி உள்ளன என்று ஆரம்ப மதிப்பீட்டின்படி தெரிவிக்கப்பட்டுள்து.

வயல்களில் தேங்கியுள்ள தண்ணீரை வெளியேற்றி அறுவடை பணியை மீண்டும் தொடங்க தேவையான அனைத்து முயற்சிகளையும் எடுத்துவரும் நிலையில் தொடர்ந்து பலத்த மழை பெய்ததால் அறுவடை செய்யப்பட்ட தானியத்தில் ஈரப்பதம் அளவு அதிகமாக இருக்கும் என விவசாயிகள் கவலையில் ஆழ்ந்துள்ளனர்.

எனவே, தமிழ்நாடு நுகர்பொருள் வாணிபக்கழகம் 22 சதவீதம் வரை ஈரப்பதம் உள்ள நெல்லை விவசாயிகளிடம் இருந்து கொள்முதல் செய்ய அனுமதிக்கவும், முதிர்ச்சி அடையாத சுருங்கிய நெல்லின் குறைந்தபட்ச வரம்பை 3 சதவீதத்தில் இருந்து 5 சதவீதம் வரை தளர்த்தவும், சேதம் அடைந்த நிறமாற்றம் மற்றும் முளைத்த நெல்லை 5 சதவீதத்தில் இருந்து 7 சதவீதம் வரை தளர்த்தவும் தேவையான மதிப்பை இந்த சம்பா பயிருக்கும் குறைக்கவும் உரிய உத்தரவுகளை பிறப்பிக்க வேண்டும்' என கூறியிருந்தார்.

இந்தக் கடிதத்தை மத்திய அரசு உடனடியாக பரிசீலித்து உத்தரவு பிறப்பித்துள்ளது.

இதுகுறித்து தமிழக கூட்டுறவு, உணவு மற்றும் நுகர்வோர் பாதுகாப்புத்துறை கூடுதல் தலைமைச் செயலாளர் டாக்டர் ஜெ.ராதாகிருஷ்ணன் கூறியதாவது:-

விவசாயிகளின் நலனை கருத்தில்கொண்டு முதலமைச்சர் மு.க.ஸ்டாலின் பிரதமருக்கு எழுதிய கடிதத்தை மத்திய அரசு உடனடியாக பரிசீலித்து உள்ளது. அதாவது, மழையால் நெற்பயிர்கள் சேதம் அடைந்துள்ளதை நேரில் பார்வையிட மத்தியக்குழுவை அனுப்பிவைக்க மத்திய அரசு உத்தரவு பிறப்பித்துள்ளது.

மத்தியக்குழுவில் இடம்பெற்றுள்ள அதிகாரிகள் தமிழகத்துக்கு வருகை தந்து நேரில் பார்வையிட உள்ளனர். அதன்பின்பு, மத்தியக்குழு உரிய உத்தரவுகளை பிறப்பிக்கும்.

இவ்வாறு அவர் கூறினார்.

தஞ்சாவூர்:

காவிரி டெல்டா மாவட்டங்களில் குறுவை சாகுபடி பணிகள் மும்முரமாக நடந்து வருகிறது. கடந்த ஆண்டை போல் இந்த ஆண்டும் குறுவை சாகுபடி தொகுப்பு திட்டம் தமிழக அரசால் அறிவிக்கப்பட்டுள்ளது.

இந்த நிலையில் இன்று குறுவை சாகுபடி தொகுப்பு திட்டம் குறித்து விவசாயிகளுடன் கலந்துரையாடல் கூட்டம் தஞ்சை காட்டுதோட்டத்தில் உள்ள மாவட்ட வேளாண்துறை இணை இயக்குனர் அலுவலகத்தில் நடைபெற்றது.

இந்த கூட்டத்திற்கு வேளாண்மை இயக்குனர் அண்ணாதுரை தலைமை தாங்கினார். மாவட்ட கலெக்டர் தினேஷ் பொன்ராஜ் ஆலிவர் முன்னிலை வகித்தார். மாவட்ட வேளாண் துறை இணை இயக்குனர் ஜஸ்டின் வரவேற்று பேசினார்.

இதில் மாவட்டத்தின் பல்வேறு இடங்களில் இருந்து வந்திருந்த ஏராளமான விவசாயிகள் கலந்து கொண்டனர்.

கூட்டத்தில் விவசாயிகள் குறுவை சாகுபடி தொகுப்பு திட்டம் மற்றும் பல்வேறு திட்டங்கள் குறித்து பேசினர். அப்போது திருவையாறு ஊராட்சி ஒன்றியத்தில் கட்டப்பட்ட வேளாண் அலுவலகத்தை உடனடியாக திறந்து பயன்பாட்டுக்கு கொண்டு வர வேண்டும். உரங்களை லிக்யூடாக வழங்க வேண்டும். பேட்டரி ஸ்பிரே வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி பேசினர். முன்னதாக குறுவை சாகுபடி தொகுப்பு திட்டத்தை மீண்டும் அறிவித்த தமிழக அரசுக்கு விவசாயிகள் நன்றி தெரிவித்து கொண்டனர்.

நாகப்பட்டினம்:

டெல்டா மாவட்டங்களில் ஏற்பட்ட கஜா புயல் சேத பாதிப்புகளை மத்திய குழு தலைவர் டேனியல் தலைமையிலான குழுவினர் நேற்று முன்தினம் புதுக்கோட்டை மாவட்ட பகுதிகளில் ஆய்வு செய்தனர். நேற்று தஞ்சை, திருவாரூர் மாவட்டங்களில் ஆய்வு செய்தனர்.

அப்போது தென்னை விவசாயிகள், வீடுகளை இழந்த மக்கள் மத்திய குழுவினரிடம் கண்ணீர் மல்க வேதனையை தெரிவித்தனர்.

இன்று 3-வது நாளாக நாகை மாவட்டத்தில் மத்திய குழுவினர் சேத பகுதிகளை பார்வையிட்டு ஆய்வு செய்தனர்.

நாகை, வேட்டைகாரனிருப்பு, கோடியக்கரை, புஷ்பவனம், கோவில்பத்து ஆகிய பகுதிகளை ஆய்வு செய்தனர். அப்போது புஷ்பவனம் கிராமத்தில் கடல்நீர் உட்புகுந்தால் அந்த கிராமமே சேறும் சகதியுமாக இருப்பதை பார்த்து மத்திய குழுவினர் அதிர்ச்சி அடைந்தனர். இதுபற்றி நாகை மாவட்ட கலெக்டர் சுரேஷ்குமாரிடம், சேறும் சகதியை அகற்ற உடனடியாக நடவடிக்கை எடுக்குமாறு அறிவுறுத்தினர்.

இதையடுத்து மத்திய குழுத்தலைவர் டேனியல் ரிச்சர்டு நிருபர்களுக்கு பேட்டி அளித்தார். அப்போது அவர் கூறியதாவது:-

கஜா புயலால் டெல்டா மாவட்டங்களில் மிக அதிகமாக சேதம் ஏற்பட்டுள்ளது. குறிப்பாக ஏராளமான தென்னை மரங்கள் விழுந்துள்ளன. விவசாயிகள் வேதனையை கேட்டு அறிந்து கொண்டோம். ஏராளமான மக்கள் வீடுகளை இழந்துள்ளனர்.

கஜா புயல் சேத பாதிப்புகள் குறித்து கணக்கெடுத்து உள்ளோம். இதை மத்திய அரசிடம் சமர்ப்பித்து கூடுதல் நிவாரணம் வழங்க வலியுறுத்துவோம்.

இவ்வாறு அவர் கூறினார். #CentralCommittee #gajacyclone #stormdamage

சென்னை:

கஜா புயல் நடத்திய கோரத் தாண்டவத்தால் தஞ்சை, திருவாரூர், நாகை, புதுக்கோட்டை ஆகிய 4 மாவட்டங்களும் உருக்குலைந்து விட்டன.

மக்களின் அனைத்து விதமான வாழ்வாதாரங்களையும் கஜா புயல் கபளீ கரம் செய்து விட்டதால் ஏழை - எளியவர்கள் நடுத்தர மக்கள் அடுத்து என்ன செய்வது, எப்படி சமாளிப்பது என்பது புரியாமல் தவித்தபடி உள்ளனர்.

புயல் தாக்கி இன்றுடன் 6-வது நாளை எட்டியுள்ள நிலையில் 90 சதவீத கிராமங்கள் இன்னமும் முழுமையான இயல்பு நிலைக்கு திரும்பவில்லை. மின்சாரம், குடிநீர், உணவுப் பொருட்கள் இல்லாததே அதற்கு முக்கிய காரணமாகக் கருதப்படுகிறது. இதை சீர்படுத்த தமிழக அரசின் அனைத்துத் துறை அதிகாரிகளும், ஊழியர்களும் களத்தில் இறங்கி உள்ளனர். அவர்களுக்கு உதவ போலீசாரும் குவிக்கப்பட்டுள்ளனர்.

ஆனால் தஞ்சை, திருவாரூர், நாகை, புதுக்கோட்டை மாவட்டங்களில் ஒருவரை கூட விடாமல் கஜா புயல் உடல் அளவிலும் மனதளவிலும் காயப்படுத்தி விட்டது. 6-வது நாளாக ஆதங்கத்துடன் இருக்கும் 4 மாவட்ட மக்களுக்கும் உதவும் வகையில் சுமார் 3 லட்சம் பேரை தமிழக அரசு களத்தில் இறக்கி நிவாரணப் பணிகளைத் தீவிரப்படுத்தி உள்ளது.

46 பேரின் உயிரைப் பறித்த கஜா புயல் சுமார் 2 லட்சம் வீடுகளை சேதப்படுத்தி உள்ளது. சுமார் 2 கோடி மரங்கள் சாய்ந்துள்ளன. தென்னை மரங்கள் மட்டும் 40 லட்சம் அளவுக்கு வேரோடு சரிந்து விட்டன. சுமார் 1 லட்சம் ஹெக்டேர் விளை நிலங்களில் பாதிப்பு ஏற்பட்டுள்ளது. அதில் அதிக பட்சமாக வாழை, கரும்பு, பயிர் வகைகள் நாசமாகி விட்டன.

1 லட்சத்துக்கும் மேற்பட்ட மின் கம்பங்கள் விழுந்துள்ளன. சுமார் 5 ஆயிரம் கி.மீ. தொலைவுக்கான மின் கம்பிகள் அறுந்துள்ளன. ஆயிரத்துக்கும் மேற்பட்ட கால்நடைகள் உயிரிழந்துள்ளன. சுமார் 1 லட்சம் பேர் வீடுகளில் இருந்து வெளியேறி 625 முகாம்களில் தங்க வைக்கப்பட்டுள்ளனர்.

புயல் தாக்கிய கடந்த வெள்ளிக்கிழமை சேத விபரங்கள் முழுமையாக வெளியில் தெரியவில்லை. அரசு எடுத்த முன் எச்சரிக்கையால் உயிரிழப்புகளை தடுத்து விட்டனர் என்று கருதப்பட்டது. ஆனால் மக்களின் வாழ்வாதாரங்களை புயல் நாசமாக்கி விட்டதை அடுத்தடுத்து வரும் நாட்களில்தான் அறிய முடிந்தது.

உணவு, உடை, உறைவிடம், குடிநீர், மண்ணெய், பால் உள்ளிட்ட அத்தியாவசியப் பொருட்கள் எதுவும் கிடைக்காமல் டெல்டா மாவட்ட மக்கள் கடும் அவதிக்குள்ளாகி இருக்கிறார்கள். வாழ்வாதாரத்தையும் இழந்து வயிற்றுப் பசியோடும் இருப்பது என்பது மிக, மிக கொடூரமான சூழ்நிலையாக அங்கு உள்ளது. மொத்தத்தில் டெல்டா மாவட்டங்களில் வரலாறு காணாத பேரழிவு ஏற்பட்டுள்ளது.

கடந்த 2011-ம் ஆண்டு கடலூர் மாவட்டத்தைப் புரட்டி போட்ட தானே புயலால் அம்மாவட்ட மக்கள் வாழ்வாதாரங்களை இழந்து கதறினார்கள். அந்த இழப்புகளில் இருந்து மீள அம்மாவட்ட மக்களுக்கு பல மாதங்கள் ஆனது. அத்தகைய தானே புயல் பாதிப்பை விட கஜா புயல் 10 மடங்கு அதிகமாக கோரத் தாண்டவம் ஆடி பாதிப்புகளை ஏற்படுத்தி இருப்பதாக டெல்டா மாவட்டங்களில் நிவாரண பணிகளில் ஈடுபட்டுள்ள அரசு மூத்த அதிகாரிகள் கூறியுள்ளனர். தொழில் அதிபர்கள், விவசாயிகள், மீனவர்கள், கூலித் தொழிலாளிகள், பெண்கள் என அனைத்துத் தரப்பினரும் உடமைகளை இழந்து தவிக்கிறார்கள்.

முதல் 2 நாட்கள் டெல்டா மாவட்டங்களின் பாதிப்பு பற்றி வெளி உலகுக்கு முழுமையாக தெரியாமல் இருந்தது. ஆனால் இப்போதுதான் தஞ்சை, திருவாரூர், நாகை, புதுக்கோட்டை மாவட்டங்களில் குக்கிராமங்களில் கடும் அழிவு ஏற்பட்டு இருப்பது தெரிய வந்துள்ளது. இந்த இழப்புகளைக் கண்டு சேத விபரங்களை ஆய்வு செய்து கணக்கிட்டு தகவல் சேகரிக்க சென்றுள்ள அதிகாரிகள் அதிர்ச்சியில் உறைந்துள்ளனர்.

தற்போதைய சூழ்நிலையில் டெல்டா மாவட்ட மக்களுக்கு முதல் தேவை சுத்தமான உணவும், குடிநீரும்தான். அதை முகாம்கள் அமைத்து அரசு அதிகாரிகள் வழங்கி வருகிறார்கள். தன்னார்வத் தொண்டர்களும் பாதிக்கப்பட்ட மக்களுக்கு உணவு பொருட்களை வழங்கி வருகிறார்கள்.

6-வது நாளான இன்று டெல்டா மாவட்ட மக்களுக்கு உணவு பொருட்கள் ஓரளவு கிடைத்து விட்ட நிலையில் உடைகள் மற்றும் அத்தியாவசிய பொருட்கள் இல்லாமல் உள்ளனர். அந்த பொருட்களையும் தன்னார்வ அமைப்புகள் வழங்கத் தொடங்கி உள்ளனர். எனவே இன்னும் சில தினங்களில் பாதிக்கப்பட்ட மக்கள் நிம்மதியான நிலைக்கு திரும்ப முடியும் என்று எதிர்பார்க்கப்படுகிறது.

என்றாலும் டெல்டா மாவட்டங்களில் மக்கள் மத்தியில் எப்போது இயல்பு நிலை திரும்பும் என்பது கேள்விக்குறியாக உள்ளது. நிவாரணப் பணிகளில் ஈடுபட்டுள்ள அரசுத்துறை அதிகாரிகள் கூறுகையில், “டெல்டா மாவட்டங்களில் இயல்பு நிலை திரும்ப ஒரு மாதம் ஆகும்” என்றனர். ஆனால் முழுமையான சகஜ நிலை வர பல மாதங்களாகும் என்று தன்னார்வத் தொண்டு அமைப்புகள் கூறுகின்றன.

டெல்டா மாவட்ட மக்களின் குடிநீர், உணவு மற்றும் அத்தியாவசிய பொருட்கள் தேவை ஓரளவு தீர்த்து வைக்கப்பட்டு விடும் நிலையில் மக்களின் அடுத்த மிகப்பெரிய முக்கியத் தேவையாக மின்சாரம் உள்ளது. டெல்டாவில் சுமார் 1 லட்சம் மின் கம்பங்கள் விழுந்து விட்டதால் மின் இணைப்பை சீராக்குவது மிகப்பெரிய சவாலாக மாறி உள்ளது.

புதிய மின் கம்பங்களை நட்டு, கம்பிகளை இணைத்து, மின் மாற்றி உள்ளிட்ட உபகரணங்கள் பொருத்தி மின் இணைப்பை வழங்கி வருகிறார்கள். மின்சார உபகரணங்கள் அனைத்தும் போதுமான அளவுக்கு கை இருப்பு உள்ள நிலையில் சுமார் 14 ஆயிரம் மின்சார ஊழியர்கள் இந்த நிவாரண பணியில் ஈடுபடுத்தப்பட்டுள்ளனர்.

வயல், காடுகளைக் கடந்து கிராமங்களுக்கு மின் கம்பிகளை இழுத்து சென்று மீண்டும் மின் இணைப்பு கொடுப்பது மின் வாரிய ஊழியர்களுக்கு பெரும் சிரமமாக உள்ளது. எனவே டெல்டா மாவட்டங்களில் மின்சார இணைப்பு முழுமையாக கிடைக்க குறைந்த பட்சம் 2 முதல் 3 வாரம் ஆகும் என்று கூறப்படுகிறது.

இதற்கிடையே டெல்டா மாவட்டங்களில் தெருக்கள், முக்கிய சாலைகள் ஓரங்களில் சரிந்து விழுந்த மரங்கள், மின் கம்பங்கள் இன்னமும் 60 சதவீதம் அகற்றப்படாமல் உள்ளன. ஆங்காங்கே குப்பைகள் சேர்ந்து இருப்பது சுகாதார சீர்கேட்டை ஏற்படுத்தும் அச்சுறுத்தலை உருவாக்கி உள்ளன. இதைத் தொடர்ந்து டெல்டா மாவட்டங்களில் 2214 மருத்துவ முகாம்கள் அமைத்து மக்களுக்கு சிகிச்சை அளிக்கப்பட்டு வருகிறது.

உடல் நலம் பாதித்த மக்களுக்கு இலவசமாக மருந்து, மாத்திரைகள் வினியோகிக்கப்பட்டுள்ளது.

சுமார் ஆயிரம் டாக்டர்கள், நர்சுகள் டெல்டா மாவட்டங்களில் முகாமிட்டு சுகாதார பணிகளில் ஈடுபட்டுள்ளனர். நிலவேம்பு குடிநீர், பிளிச்சிங் பவுடர்கள் தேவைக்கும் அதிகமாக கை இருப்பு வைக்கப்பட்டுள்ளன. தற்போது மழை பெய்து வருவதால் அதற்கு ஏற்ப முன் எச்சரிக்கை நடவடிக்கைகளை சுகாதாரத்துறை மேற் கொண்டுள்ளது.

நேற்றும் இன்றும் டெல்டா மாவட்டங்களில் பெய்து வரும் மழை காரணமாக நிவாரணப் பணிகளில் சற்று பின்னடைவு ஏற்பட்டுள்ளது. பல இடங்களில் அரசுத் துறை அதிகாரிகள் மழையையும் பொருட்படுத்தாமல் நிவாரணப் பணிகளில் ஈடுபட்டுள்ளனர்.

நிவாரண உதவிகள் செய்வதற்கு தேவையான அனைத்து அத்தியாவசியப் பொருட்களும் அரசு வசம் போதுமான அளவுக்கு உள்ளது. ஆனால் அவற்றை மக்களிடம் உடனுக்குடன் கொண்டு சென்று சேர்க்க முடியாதபடி சாலைகளில் இடையூறு உள்ளது. இதை கண்டித்து பல இடங்களில் மக்கள் மறியலில் ஈடுபடுகின்றனர்.

அவர்கள் கஜா புயல் பாதிப்பை உணர்ந்து அரசு எடுக்கும் நடவடிக்கைகளுக்கு ஒத்துழைப்பு தர வேண்டும் என்று டெல்டா மாவட்டங்களில் முகாமிட்டுள்ள அமைச்சர்கள் வேண்டுகோள் விடுத்துள்ளனர். நிவாரணப் பணிகளை ஒரு வாரத்துக்குள் முடித்து விட வேண்டும் என்ற இலக்குடன் அமைச்சர்களும், அதிகாரிகளும் பணிகளில் ஈடுபட்டுள்ளனர்.

மின்சார இணைப்பு முழுமையாக சீரான பிறகே மக்கள் முகங்களில் சற்று நிம்மதியை பார்க்க முடியும் என்று கருதப்படுகிறது. ஆனால் மக்களின் வாழ்வாதாரம் எப்போது மீண்டும் வலுப்பெறும் என்பதுதான் அனைத்துத் தரப்பு மக்களிடமும் கேள்விக்குறியாக எழுந்துள்ளது.

டெல்டா மாவட்ட மக்கள் பயிர் பாசனத்தை இழந்த நிலையில் தென்னை, வாழை போன்றவற்றையே நம்பி இருந்தனர். அந்த தென்னை மரங்களும் விழுந்து விட்டதால் வாழ்வாதாரத்துக்கான உள் கட்டமைப்பை எப்படி, எப்போது மீண்டும் உருவாக்கப் போகிறார்கள் என்ற ஏக்கமும், எதிர்பார்ப்பும் அதிகரித்துள்ளது. #Gajastorm #Thanestorm #storm