விளையாட்டு

டாப்-8 வீரர்கள் மட்டுமே பங்கேற்றுள்ள உலக டூர் இறுதி சுற்று பேட்மிண்டன் சாம்பியன்ஷிப் போட்டி சீனாவின் குவாங்ஜோவ் நகரில் நடைபெற்றது.

இன்று நடைபெற்ற இறுதிப் போட்டியில் ஜப்பானைச் சேர்ந்த கென்டோ மொமோட்டா இந்தோனேசியாவைச் சேர்ந்த இளம் வீரரான அந்தோணி சினிசுகாவை எதிர்கொண்டார். நம்பர் ஒன் வீரரான கென்டோ மொமோட்டாவிற்கு அந்தோணி சினிசுகா கடும் சவாலாக விளங்கினார்.

இதனால் முதல் செட்டை அந்தோணி 21-17 எனக் கைப்பற்றினார். ஆனால் 2-வது செட்டில் மொமோட்டா சிறப்பாக விளையாடி அதை 21-17 தன்வசமாக்கினார். ஆனால் வெற்றியை தீர்மானிக்கும் 3-வது செட்டில் அந்தோணி முன்னிலை பெற்றிருந்தாலும், அதன்பின் கோட்டை விட்டதால் கென்டோ மொமோட்டா 21-14 எனக்கைப்பற்றி சாம்பியன் பட்டம் வென்றார்.

3-வது செட்டில் மொமோட்டா ஒரு கட்டத்தில் 5-12 என பின்தங்கியிருந்தார். அதன்பின் சிறப்பாக விளையாடி புள்ளிகளை பெற்றார். 17-14 என முன்னிலைப் பெற்றிருந்தபோது, அந்தோணி காயம் அடைந்தார். அதன்பின் 21-14 என மொமோட்டா வெற்றி பெற்றார்.

இந்தியா - வெஸ்ட் இண்டீஸ் அணிகளுக்கு இடையிலான முதல் ஒருநாள் கிரிக்கெட் போட்டி சென்னை சேப்பாக்கம் மைதானத்தில் நடைபெற்று வருகிறது. டாஸ் வென்ற வெஸ்ட் இண்டீஸ் பந்து வீச்சை தேர்வு செய்தது. இந்திய அணியில் ஷிவம் டுபே அறிமுகம் ஆனார்.

கேஎல் ராகுல், ரோகித் சர்மா ஆகியோர் தொடக்க வீரர்களாக களம் இறங்கினர். லோகேஷ் ராகுல் 6 ரன்கள் எடுத்த நிலையில் ஆட்டமிழந்தார். அடுத்து வந்த விராட் கோலி 4 ரன்னில் ஸ்டம்பை பறிகொடுத்தார்.

இதனால் இந்தியா 7 ஓவரில் 25 ரன்கள் எடுப்பதற்குள் இரண்டு விக்கெட்டுக்களை இழந்தது. 3-வது விக்கெட்டுக்கு ரோகித் சர்மா உடன் ஷ்ரேயாஸ் அய்யர் ஜோடி சேர்ந்தார். ஷ்ரேயாஸ் அய்யர் நம்பிக்கையுடன் பந்தை எதிர்கொண்டார். அதேவேளையில் ரோகித் சர்மாவால் அதிரடி ஆட்டத்தை வெளிப்படுத்த முடியவில்லை.

இருவரும் நிதானமாக விளையாட இந்தியாவின் ஸ்கோர் உயர ஆரம்பித்தது. ஆனால் 19-வது ஓவரின் முதல் பந்தில் ரோகித் சர்மா 36 ரன்னில் ஆட்டமிழந்தார். ரோகித் சர்மா 56 பந்தில் 6 பவுண்டரியுடன் அந்த ரன்னை எடுத்தார்.

அப்போது இந்தியா 3 விக்கெட் இழப்பிற்கு 80 ரன்கள் எடுத்திருந்தது. அதன்பின் 4-வது விக்கெட்டுக்கு ஷ்ரேயாஸ் அய்யர் உடன் ரிஷப் பந்த் ஜோடி சேர்ந்தார். இந்த ஜோடி தாக்குப்பிடித்து விளையாடி வருகிறது.

40 ஓவர் வரை இந்த ஜோடி நிலைத்து நின்றார் இந்தியா 250 ரன்களை தாண்ட வாய்ப்புள்ளது. தற்போது இந்தியா 29 ஓவர்கள் முடிவில் 3 விக்கெட் இழப்பிற்கு 129 ரன்கள் எடுத்துள்ளது. ஷ்ரேயாஸ் அய்யர் 45 ரன்னுடனும், ரிஷப் பந்த் 28 ரன்னுடனும் களத்தில் உள்ளனர்.

தென்ஆப்பிரிக்கா அணியின் அதிரடி பேட்ஸ்மேன் ஏபி டி வில்லியர்ஸ். 360 டிகிரி என்று அழைக்கப்படும் அவர், இங்கிலாந்தில் நடைபெற்ற 50 ஓவர் உலகக்கோப்பை தொடருக்கு முன் அனைத்து வகை சர்வதேச கிரிக்கெட்டிலும் இருந்து ஓய்வு பெற்றார்.

மேலும் ஹசிம் அம்லா, ஸ்டெயின் போன்றோர் ஓய்வு பெற்றதால் அந்த அணி திணறியது. தற்போது அணியை சீரமைக்கும் வேலையில் தென்ஆப்பிரிக்கா கிரிக்கெட் போர்டு தீவிரம் காட்டி வருகிறது.

தென்ஆப்பிரிக்கா கிரிக்கெட் போர்டு இயக்குனராக ஸ்மித் நியமிக்கப்பட்டுள்ளார். தலைமை பயிற்சியாளராக முன்னாள் விக்கெட் கீப்பர் மார்க் பவுச்சர் நியமிக்கப்பட்டுள்ளார்.

இவர்களின் முதல் இலக்கே அடுத்த வருடம் ஆஸ்திரேலியாவில் நடைபெற இருக்கும் டி20 உலகக்கோப்பை தொடருக்கு சிறந்த அணியை தயார் செய்வதே ஆகும்.

முதற்கட்டமாக ஏபி டி வில்லியர்ஸ்-ஐ மீண்டும் டி20 சர்வதேச அணிக்கு அழைத்து வர முயற்சி செய்கிறது. இதுகுறித்து அவரிடம் பேசுவேன் என்று மார்க் பவுச்சர் தெரிவித்துள்ளார்.

இதுகுறித்து மார்க் பவுச்சர் கூறுகையில் ‘‘நீங்கள் உலகக்கோப்பை தொடருக்கு செல்லும்போது, தலைசிறந்த வீரர்களுடன் விளையாட விரும்புவீர்கள். ஏபி டி வில்லியர்ஸ் சிறந்த வீரர்களில் ஒருவர் என நான் உணர்ந்தால், அவருடம் பேசி மீண்டும் அணிக்கு திரும்ப ஏன் அழைக்கக் கூடாது? ’’ என்றார்.

இங்கிலாந்து உலகக்கோப்பை தொடரில் விளையாட ஏபி டி வில்லியர்ஸ் தயாராக இருந்து நிலையில், தென்ஆப்பிரிக்கா கிரிக்கெட் போர்டு நிராகரித்தது குறிப்பிடத்தக்கது.

இந்திய அணியின் இளம் வீரர் பிரித்வி ஷா. டெஸ்ட் போட்டியில் அறிமுகமான ஆட்டத்தில் சதம் அடித்து அசத்தினார். மேலும், அந்த தொடரில் தொடர் நாயகன் விருதை பெற்று சாதனைப் படைத்தார். ஆனால் ஆஸ்திரேலியா தொடரில் விளையாட சென்றபோது காயத்தால் அணியில் இடம் பெற முடியாமல் போனது.

அதன்பின் தடைசெய்யப்பட்ட ஊக்கமருந்தை உட்கொண்டதாக தடைவிதிக்கப்பட்டது.  தடையில் இருந்து மீண்ட அவர் சையத் முஷ்டாக் அலி டிராபில் விளையாடினார். தற்போது ரஞ்சி டிராபியில் விளையாடி வருகிறார்.

இந்நிலையில் பிரித்வி ஷாவின் ஆட்டத்தை பார்க்கும்போது சேவாக்கை நினைவுப் படுத்துகிறார் என திலிப் வெங்சர்க்கார் தெரிவித்துள்ளார்.

இதுகுறித்து திலிப் வெங்சர்க்கார் கூறுகையில் ‘‘பிரித்வி ஷா தலைசிறந்த கிரிக்கெட் வீரர். அவருடைய திறமையில் எந்தவித சந்தேகமும் இல்லை. அவர் சங்கடமான சோதனையை சந்தித்தார். ஏனென்றால், இருமல் டானிக்கில் தடை செய்யப்பட்ட ஊக்கமருந்து கலந்திருந்ததால் அந்த நிலை ஏற்பட்டது.

தற்போது அதிக அளவில் முதிர்ச்சி அடைந்துள்ளார். மிகவும் சிறப்பான ஆட்டத்தை வெளிப்படுத்தி வருகிறார். அவரது ஏராளமான ஷாட்டுகள் ஆச்சரியம் அளிக்கும் வகையில் உள்ளது. ஏராளமான ஷாட்டுகளை பார்க்கும்போது அவர் எனக்கு சேவாக்கை நினைவு படுத்துகிறார்’’ என்றார்.

சென்னை:

இந்திய கிரிக்கெட் அணியின் முன்னாள் கேப்டன் சச்சின் டெண்டுல்கர். தனது பேட்டிங் திறமையால் இந்தியா மட்டுமல்லாது உலகம்  முழுவதும் கோடிக்கணக்கான ரசிகர்களை கவர்ந்திழுத்தவர். சச்சின் போன்ற பிரபலங்களை டுவிட்டர், பேஸ்புக் போன்ற சமூக  வலைத்தளங்களில் பின்தொடர்பவர்கள் அதிகம்.  

அவர்கள் பதிவிடும் தகவல்களை, செய்திகளை லைக் செய்வதும் இணையவாசிகளின் வாடிக்கையாக இருந்து வருகிறது.  அவ்வகையில் சச்சின் டெண்டுல்கர் அவரது டுவிட்டர் பக்கத்தில் தமிழில் பதிவிட்ட குறுந்தகவல் ஒன்றை இணையவாசிகள் வைரல்  ஆக்கியுள்ளனர்.
 
‘எதிர்பாராத சந்திப்புகள் சில சமயம் மறக்க முடியாத தருணங்களாக மாறுகின்றன, டெஸ்ட் தொடரில் விளையாடுவதற்கான நான்  ஒருமுறை சென்னை வந்த போது நுங்கம்பாக்கம் தாஜ் கோரமண்டல் ஓட்டல் பணியாளர் ஒருவரை சந்தித்தேன்.

கிரிக்கெட் ஆட்டத்தின்போது முழங்கைகளில் அணியும் பாதுகாப்பு பட்டை (எல்போ பேட்) குறித்து அந்த ஓட்டலின் ஊழியர் அப்போது  எனக்கு ஆலோசனை கூறினார். அவர் கூறிய பின்னர் உடனடியாக பட்டையின் வடிவத்தை மாற்றினேன்.
அவரை மீண்டும் சந்திக்க ஆசைப்படுகிறேன். அவரை கண்டுபிடிக்க எனக்கு நீங்கள் அனைவரும் உதவ வேண்டும்’  என டெண்டுல்கர் தனது டுவிட்டர் பக்கத்தில் பதிவிட்டிருந்தார். 

2001-ம் ஆண்டு இந்தியா-ஆஸ்திரேலியா கிரிக்கெட் போட்டி சென்னையில் நடந்தபோது சச்சின் டெண்டுல்கர் நுங்கம்பாக்கம் தாஜ் கோரமண்டல் ஓட்டலில் தங்கியிருந்தபோது அவருக்கு காபி பரிமாற வந்த ஓட்டல் பணியாளர்  அளித்த ஆலோசனை மிகப்பெரிய பலனை அளித்தது.

2001-ம் ஆண்டு மார்ச் 18 முதல் 21-ம் தேதிவரை நடைபெற்ற வரலாற்று சிறப்புமிக்க அந்தப் போட்டித்தொடரில் முதல் இன்னிங்சில் சதம் அடித்திருந்த சச்சின் 126 ரன்களை குவித்து இந்திய அணி 501 ரன்களுடன் வெற்றிவாகை சூடுவதற்கு களம் அமைத்து தந்தார்.

மேலும், ஆஸ்திரேலியாவுடனான அந்த போட்டித்தொடரை 2-1 என்ற புள்ளிக்கணக்கில் இந்தியா வென்றது.

இந்நிலையில், சச்சின் சந்திக்க விரும்பிய நபர் சென்னை பெரம்பூரில் வசிக்கும் குருபிரசாத் என்று தற்போது தெரியவந்துள்ளது.

’சச்சினுக்கு அன்று நான் ஆலோசனை கூறிய சம்பவம் எனது வாழ்நாளில் மறக்க முடியாத அற்புதமான தருணமாகும். என்னை அவர் சந்திக்க விரும்புவதை அறிந்து நான் மிக்க மகிழ்ச்சி அடைந்துள்ளேன்’ என
நெகிழ்ச்சியுடன் கூறுகிறார், குருபிரசாத்.
 

மும்பை: 

சென்னை:

இந்தியா-வெஸ்ட்இண்டீஸ் அணிகள் இடையிலான 3 ஆட்டங்கள் கொண்ட ஒருநாள் போட்டி தொடரில் முதலாவது ஒருநாள் கிரிக்கெட் போட்டி சென்னை சேப்பாக்கத்தில் உள்ள எம்.ஏ.சிதம்பரம் ஸ்டேடியத்தில் நாளை (ஞாயிற்றுக்கிழமை) பிற்பகல் 1.30 மணிக்கு நடக்கிறது.

இந்த போட்டிக்காக இரு அணி வீரர்களும் நேற்று முன்தினம் சென்னை வந்தனர். வெஸ்ட்இண்டீஸ் அணி வீரர்கள் சேப்பாக்கம் மைதானத்தில் நேற்று காலையில் பயிற்சியில் ஈடுபட்டனர். இந்திய அணியினர் பிற்பகலில் பயிற்சி மேற்கொண்டனர்.

பயிற்சிக்கு பிறகு வெஸ்ட்இண்டீஸ் அணியின் உதவி பயிற்சியாளர் ரோட்டி எஸ்ட்விக் அளித்த பேட்டியில் கூறியதாவது:-

ஹெட்மயர், பூரன், ஹோப் ஆகிய இளம் வீரர்கள் முன்னேற்றம் கண்டு வருகிறார்கள். இது எங்களுக்கு உற்சாகம் அளிக்கிறது. நீங்கள் எந்த அளவுக்கு கடினமாக உழைத்து போட்டிக்கு தயாராகிறீர்கள் என்பது தான் முக்கியமானதாகும். கடினமான உழைப்பின் மூலம் தான் விராட்கோலி உயர்ந்த நிலையை எட்டி இருக்கிறார். அவரிடம் இருந்து இதனை நிறைய வீரர்கள் கற்றுக்கொள்ள வேண்டும். உங்களுக்கு வாய்ப்பு கிடைத்தாலும், கடினமாக உழைக்கவில்லை என்றால் சாதிக்க முடியாது. கடின உழைப்பு உங்களுக்கு சலிப்பை ஏற்படுத்தலாம். ஆனால் அது தான் உங்களுக்கு சிறந்த வெற்றியை தேடிக்கொடுக்கும்.

இந்த போட்டி தொடரில் எங்கள் அணி வீரர்கள் சிறப்பாக செயல்பட்டு வருகிறார்கள். உண்மையிலேயே எங்கள் வீரர்கள் கடினமாக உழைத்து வருகிறார்கள். இதனால் வெற்றியை ருசிக்க தொடங்கி உள்ளனர். 20 ஓவர் போட்டியில் ஹெட்மயர் ஆட்டம் அருமையாக இருந்தது. டெஸ்ட் போட்டி போன்ற நீண்ட நேர போட்டிகளை எடுத்து கொண்டால் அவர் இளம் வயது வீரர் என்பதை மக்கள் மறந்து விடுகிறார்கள். ஒருநாள் போட்டியில் அவர் 4 சதங்கள் அடித்து இருக்கிறார். அவரிடம் நிறைய திறமை இருக்கிறது. கிரிக்கெட்டை பொறுத்தமட்டில் ஒருபோதும் அஜாக்கிரதையாக இருக்கக்கூடாது.

இந்தியாவுக்கு எதிரான 20 ஓவர் போட்டித் தொடரில் எங்கள் அணியினர் ஆடிய விதம் மகிழ்ச்சி அளிக்கிறது. கரீபியனில் நடந்த இந்தியா-வெஸ்ட் இண்டீஸ் இடையிலான 20 ஓவர் தொடரில் இரு அணிகளுக்கும் இடையிலான செயல்பாட்டில் அதிக வித்தியாசம் இருந்தது. ஆனால் இந்த 20 ஓவர் தொடரில் இரு அணிகளுக்கும் இடையே சிறிய வித்தியாசம் தான் தெரிந்தது. இதேபோல் ஒருநாள் போட்டி தொடரிலும் நாங்கள் நன்றாக செயல்படுவோம் என்று நம்புகிறேன்.

இவ்வாறு அவர் கூறினார்.

இந்திய அணியின் பந்து வீச்சு பயிற்சியாளர் பரத் அருண் அளித்த பேட்டியில், ‘ஷிவம் துபே ஒவ்வொரு ஆட்டத்தில் இருந்தும் நம்பிக்கையை பெற்று வருகிறார். மும்பையில் நடந்த வெஸ்ட்இண்டீசுக்கு எதிரான கடைசி 20 ஓவர் போட்டியில் முதல் ஓவரில் அதிக ரன்களை விட்டுக்கொடுத்த அவர் பின்னர் சரிவை சமாளித்து சிறப்பாக பந்து வீசினார். அவர் மீது கேப்டன் விராட்கோலி நம்பிக்கை வைத்து வாய்ப்பு அளித்தார். அதனை அவர் சரியாக பயன்படுத்தினார். அவரிடம் அபாரமான திறமை உள்ளது. அவர் நல்ல நம்பிக்கையை பெறும் போது சிறந்த ஆல்-ரவுண்டராக உருவெடுப்பார். வேகப்பந்து வீச்சாளர் தீபக் சாஹர் பந்து வீச்சில் எல்லா வகையிலும் சிறப்பாக செயல்படுகிறார்.

சிறந்த கலவை கொண்ட அணியை உருவாக்கும் வகையில் ஒவ்வொருவருக்கும் வாய்ப்பு வழங்கப்படுகிறது. ரவீந்திர ஜடேஜாவுக்கு ஆல்-ரவுண்டராக வாய்ப்பு அளிக்கப்படுவது அணிக்கு உதவிகரமாக இருக்கிறது. அவர் பேட்டிங், பந்து வீச்சு, பீல்டிங் மூன்றிலும் அசத்துகிறார். சுழற்பந்து வீச்சாளர்கள் குல்தீப் யாதவும், யுஸ்வேந்திர சாஹலும் மீண்டும் இணைந்து பந்து வீசுவார்களா? என்று கேட்கிறீர்கள். அதற்குரிய சூழ்நிலை அமைந்தால் இரண்டு பேருக்கும் வாய்ப்பு கிடைக்கலாம்.

ஆல்-ரவுண்டர் வாஷிங்டன் சுந்தர் இந்திய அணியில் ஒவ்வொரு முறை வாய்ப்பு கிடைக்கும் போதும் அதை சரியாக பயன்படுத்தி கொள்கிறார். வருங்காலத்தில் அவருக்கு ஒருநாள் போட்டிக்கான அணியிலும் இடம் கிடைக்கும்’ என்றார்.

முதலாவது ஒரு நாள் போட்டிக்கான பாதுகாப்பு ஏற்பாடுகள் குறித்து இணை கமிஷனர் சுதாகர், துணை கமிஷனர் தர்மராஜன் ஆகியோர் சேப்பாக்கம் ஸ்டேடியத்தில் நேற்று ஆய்வு செய்தனர். இன்றும், நாளையும் மோப்ப நாய் உதவியுடன் மைதானத்தில் சோதனை நடத்தப்படும் என்றும், பாதுகாப்பு பணியில் 3 ஆயிரம் போலீசார் ஈடுபடுத்தப்படுவார்கள் என்றும் அவர்கள் தெரிவித்தனர்.