புதுச்சேரி

திருக்கனூர்:

திருக்கனூர் அருகே குமாரபாளையம் மாரியம்மன் கோவில் தெருவை சேர்ந்தவர் வீர ராகவேல் (வயது40). இவரது அண்ணன் மோகன் (55). இருவரும் விவசாயிகள். இவர்கள் இருவருக்கும் பொதுவாக உள்ள இடத்தில் வீடு கட்டுவது சம்பந்தமாக தகராறு இருந்து வந்தது.

சம்பவத்தன்று இது தொடர்பாக இருவருக்கும் தகராறு ஏற்பட்டது. அப்போது மோகன் அவரது மனைவி லட்சுமி, மகன் பார்த்தீபன், மகள் பவித்ரா மற்றும் உறவினர் ஹரிஷ் ஆகிய 5 பேரும் சேர்ந்து வீர ராகவேலுவை செங்கல் மற்றும் தடி-இரும்பு பைப்பால் சரமாரியாக தாக்கினர்.

மேலும் கத்தியை எடுத்து வந்து கொலை செய்து விடுவதாக மிரட்டல் விடுத்தனர். இந்த தாக்குதலில் காயமடைந்த வீர ராகவேலு கதிர்காமம் மருத்துவக்கல்லூரி ஆஸ்பத்திரியில் சிகிச்சை பெற்றார். பின்னர் இதுகுறித்து காட்டேரிக்குப்பம் போலீசில் புகார் செய்தார். போலீசார் வழக்கு பதிவு செய்து விசாரணை நடத்தி வருகிறார்கள்.

திருக்கனூர் அருகே செல்லிப்பட்டு புதுகாலனியை சேர்ந்தவர் மணிகண்டன் (வயது24). தனியார் நிறுவன ஊழியர். இவருக்கும் அதே பகுதியை சேர்ந்த மினிவேன் டிரைவர் சபரி என்பவருக்கும் முன்விரோதம் இருந்து வந்தது. சம்பவத்தன்று இவர்களுக்கிடையே வாய் தகராறு ஏற்பட்டு மோதலாக மாறியது.

இதில் ஆத்திரமடைந்த சபரி மற்றும் அவரது தரப்பை சேர்ந்த அம்மனங்குப்பம் வெங்கட்டராமன் மற்றும் செந்தில் ஆகிய 3 பேரும் சேர்ந்து அவரை தடியாலும், கல்லாலும் தாக்கினர். இதில் மணிகண்டன் காயமடைந்தார்.

இதுகுறித்து மணிகண்டன் திருக்கனூர் போலீசில் புகார் செய்தார். போலீசார் வழக்கு பதிவு செய்து சபரி உள்பட 3 பேரையும் தேடி வருகிறார்கள்.

புதுச்சேரி:

புதுவை மாநில வளர்ச்சி தொடர்பாக எம்.எல்.ஏ.க்கள் லட்சுமிநாராயணன், அன்பழகன் ஆகியோர் அனுப்பியுள்ள கடிதம் தொடர்பாகவும், மாநில வளர்ச்சி தொடர்பான விபரங்களை குறிப்பிட்டு கவர்னர் கிரண்பேடி சமூக வலைதளத்தில் வெளியிட்டுள்ள பதிவில் கூறியிருப்பதாவது:-

கவர்னர் அலுவலகம் கடந்த 4 ஆண்டாக மதுக் கடைக்கான உரிமத்தை ஏலம் விட ஒரு பொதுவான கொள்கை உருவாக்க வலியுறுத்தி வருகிறது. இதன்மூலம் அரசின் கருவூலத்திற்கு வருவாயை கணிசமாக உயர்த்தலாம். கலால் துறையிலும் வெளிப்படையான மேலாண்மை உருவாகும்.

தனியார் நிறுவனங்களின் சொத்துக்களுக்கு வரி விதிப்பு, கேபிள் டி.வி. மீட்டெடுப்பு, நகராட்சி சேவைகளுக்கு பயனாளிகளிடம் கட்டணம் வசூலிப்பை முறைப்படுத்துவது, மின்சாரம், வணிகவரி மற்றும் சொத்துவரி உள்ளிட்ட பல நிலுவைத் தொகையை வசூலிக்க நடவடிக்கை எடுக்க வலியுறுத்தியுள்ளோம்.

குறிப்பாக பொதுத்துறை நிறுவனங்களின் செயல்பாடு தொடர்பான விஜயன் கமிட்டி அறிக்கையை செயல்படுத்த வலியுறுத்தினோம். அரசு சொத்துக்களை மீட்கவும், வாடகை வருவாயை சீரமைக்கவும் கோரினோம். மோட்டார் வாகன சட்டத்தை நடைமுறைப்படுத்தவும், மீறுவோர் மீது உடனடி அபராத முறையை கொண்டு வந்து சாலை பாதுகாப்பு நிதி கணக்கில் சேர்க்கவும் வலியுறுத்தப்பட்டது.

இந்த நிதி திரட்டும் நடவடிக்கைகள் அனைத்தும் அரசியல் விருப்பத்திற்காகவே காத்திருக்கிறது. குறிப்பாக காங்கிரஸ் எம்.எல்.ஏ. லட்சுமிநாராயணன் கடிதத்தின் அடிப்படையில், புதுவை அரசு இத்திட்டங்களை செயல்படுத்தினால் ரூ.4 ஆயிரம் கோடி பெற முடியும். அவரது கடிதத்தை அரசு பார்க்க வேண்டும். இந்த ஆதாரங்களின் அடிப்படையை பார்ப்பது அவசியம்.

மத்திய அரசும் பல நிபந்தனைகளை கடுமையாக விதித்துள்ளது. இதுபோன்ற நிலையை புரிந்துகொள்ளவும், செயல்படுத்தவும் மக்களுக்கு விழிப்புணர்வை ஏற்படுத்துவது அவசியம். வளங்களை திரட்டவும், அரசாங்க நிதியை புத்திசாலித்தனமாக பயன்படுத்தவும் ஒரு கூட்டு அரசியல் விருப்பம் தேவை. கவர்னர் அலுவலகம் முழு ஆதரவையும் இப்பணிகளுக்கு வழங்கும்.

இவ்வாறு அதில் பதிவிட்டுள்ளார்.

புதுச்சேரி:

புதுவை முதல்-அமைச்சர் நாராயணசாமி நிருபர்களிடம் கூறியதாவது:-

புதுவையின் வருமானத்தை பெருக்க மதுக்கடைகளை திறக்க அமைச்சரவையில் முடிவு செய்து கோப்பு அனுப்பினோம். கவர்னர் கிரண்பேடி தமிழகத்தில் உள்ளதை போல மது விற்க வேண்டும் என உத்தர விட்டார். இதனால் மறுபரிசீலனை செய்து கோப்பு அனுப்பினோம். இன்னும் அந்த பிரச்சினை தீராத நிலையில் உள்ளது. அதற்கு ஒரு முடிவினை அரசு எடுக்கும்.

வெகுவிரைவில் மதுக்கடைகள் திறக்கப்படும். சென்னை ஐகோர்ட்டில் காரைக்காலை சேர்ந்த ஒருவர் புதுவையில் உரிமம் ரத்தானால் மதுக்கடைகளை திறக்கக்கூடாது எனவும், என் மீதும் தனிப்பட்ட குற்றச்சாட்டை கூறி மனு தாக்கல் செய்திருந்தார். மனு விசாரணைக்கு வந்த போது நீதிபதிகள், மதுக் கடை திறப்பது அரசின் கொள்கை முடிவு. சி.பி.ஐ. விசாரணைக்கும், மதுக்கடைக்கும் சம்பந்தம் கிடையாது.

தற்காலிக உரிமம் ரத்து செய்யப்பட்ட மதுக் கடைகளை திறக்கக்கூடாது. ஆனால் கலால்துறை விதிப்படி எந்த நடவடிக்கை எடுக்கவும் கலால்துறைக்கு அதிகாரம் உண்டு என்று கூறியுள்ளனர்.

மேலும் என்மீது கூறப்பட்ட குற்றச்சாட்டுகளை நீதிபதிகள் தள்ளுபடி செய்துள்ளனர். நீதிமன்ற உத்தரவு வந்த பிறகு என் மீது ஆதாரமற்ற புகார்களை கூறியவர்கள் மீது நடவடிக்கை எடுக்க தயங்கமாட்டேன். வெளி நாட்டில் இருந்து வருபவர்களின் விபரங்களை மத்திய அரசு தருவதில்லை. இதுகுறித்து மத்திய அரசு, தமிழக அரசு மற்றும் சென்னை விமான நிலையத்திற்கு கடிதம் எழுதி விபரம் கேட்க கலெக்டருக்கு உத்தர விடப்பட்டுள்ளது.

இவ்வாறு அவர் தெரிவித்தார்.

புதுச்சேரி:

புதுவை லாஸ்பேட்டை கருவடிக்குப்பம் மெயின் ரோடு பாரதி நகரை சேர்ந்தவர் குமார் (வயது 34). இவர் பொதுப்பணித்துறையில் தினக்கூலி ஊழியராக வேலை பார்த்து வருகிறார்.

நேற்று முன்தினம் இரவு இவர் இடையன்சாவடி ரோட்டில் குமாரின் நண்பர்களான இடையன்சாவடியை சேர்ந்த வசந்தகுமார், அகிலன், புண்ணியகோடி ஆகியோருடன் பேசிக் கொண்டு இருந்தார்.

அப்போது கருவடிக்குப்பத்தை சேர்ந்த சரவணன் (வயது 36), விக்கி (27), பாலா (27) மற்றும் சாரதி (20) ஆகியோருடன் அங்கு வந்தனர்.

அவர்கள் குமாரை தகாத வார்த்தைகளால் திட்டி கையால் சரமாரியாக தாக்கினர். மேலும் இதனை தடுக்க முயன்ற புண்ணியகோடியை பீர் பாட்டிலாலும், வசந்த குமாரை இரும்பு பைப்பாலும் தாக்கினர்.

அதோடு கத்தியை காட்டி கோழியை அறுப்பது போல் கொலை செய்து விடுவதாக மிரட்டல் விடுத்தனர்.

இதனை பார்த்து பயந்து போன குமார், வசந்தகுமார், புண்ணியகோடி மற்றும் அகிலன் ஆகியோர் அலறல் சத்தம் போட்டனர்.

இந்த அலறல் சத்தம் கேட்டு அக்கம் பக்கத்தினர் திரண்டு வந்ததும் தாக்கிய கும்பல் அங்கிருந்து தப்பி ஓடிவிட்டனர்.

இந்த தாக்குதலில் படுகாயம் அடைந்த குமார் உள்பட 3 பேரும் புதுவை அரசு ஆஸ்பத்திரியில் சிகிச்சை பெற்றனர்.

இதுகுறித்து குமார் லாஸ்பேட்டை போலீசில் புகார் செய்தார். போலீசார் வழக்கு பதிவு செய்து சரவணன் உள்பட 4 பேரை தேடி வருகிறார்கள்.