தேர்தல் செய்திகள்

பூந்தமல்லி:

பூந்தமல்லி தொகுதி அதிமுக வேட்பாளர் க.வைதியநாதன் நேமம், சித்துகாடு, திருமணம், மேல் மணம்பேடு, அன்னம்மேடு உள்ளிட்ட பகுதிகளில் வாக்கு சேகரிப்பில் ஈடுபட்டார்.

அப்போது அவர், திருவள்ளூர், எல்லாபுரம், பூந்தமல்லி ஒன்றிய விவசாயிகளுக்கு விவசாய கருவிகள், உரங்கள் மானிய விலையில் வழங்கப்படும் என்றார். அவருடன் புரட்சி பாரதம் கட்சி தலைவர் பூவை எம்.ஜெகன்மூர்த்தி, அமைச்சர் பா.பென்ஜமின், மாவட்ட செயலாளர் சிறுணியம் பலராமன், முன்னாள் எம்.எல்.ஏ இரா.மணிமாறன், ஒன்றிய செயலாளர் ஜி.திருநாவுக்கரசு, உள்பட புரட்சிபாரதம் கட்சி நிர்வாகிகள் மற்றும் கூட்டணி கட்சியினர் சென்று வாக்கு சேகரித்தனர்.

ஸ்ரீவில்லிபுத்தூர்:

தமிழக பால்வளத்துறை அமைச்சர் கே.டி. ராஜேந்திரபாலாஜி ஸ்ரீவில்லிபுத்தூரில் நிருபர்களுக்கு பேட்டி அளித்தார். அப்போது அவர் கூறியதாவது:-

சேலம்-சென்னை இடையேயான 8 வழிச்சாலை திட்டத்துக்கு ஐகோர்ட்டு தடை விதித்துள்ளது. இது அரசுக்கு பின்னடைவு கிடையாது. இந்த தீர்ப்பை எதிர்த்து அரசு மேல் முறையீடு செய்யும்.

தொழில் துறை வளர்ச்சிக்கு சாலை வசதி மிகவும் அவசியம். எனவே அடுத்த கட்டமாக கூட்டணி கட்சி தலைவர்களை அழைத்து பேசி யாரும் பாதிக்காத அளவுக்கு முதல்-அமைச்சர் முடிவு எடுப்பார்.

கருத்து கணிப்பை தாண்டி மக்களின் கணிப்பு அ.தி.மு.க. தான். டெல்லியில் மோடி பிரதமராக வர வேண்டும், தமிழகத்தில் எடப்பாடி பழனிசாமி தலைமையிலான ஜெயலலிதாவின் ஆட்சி தொடர வேண்டுமென மக்கள் விரும்புகின்றனர்.

எடப்பாடி பழனிசாமி விவசாயி அல்ல, வி‌ஷ வாயு என்று ஸ்டாலின் கூறியிருக்கிறார். எடப்பாடியை எதிர்க்கும் அரசியல் இயக்கம் டெட்பாடி ஆகி விடும்.

எழுதிக் கொடுத்த பேப்பரை பார்த்து தான் தி.மு.க. தலைவர் மு.க.ஸ்டாலின் படிக்கிறார். சட்டசபையிலும் எழுதி வைத்து தான்பேசுவார்.

கலைஞரிடம் இருந்த திறமை மு.க.ஸ்டாலினிடம் இல்லை. சந்தர்ப்ப சூழ்நிலை காரணமாக தலைவர் ஆகி விட்டார்.

மக்களுக்கு சேவை செய்யும் எண்ணம் டி.டி.வி. தினகரனுக்கு துளியும் இல்லை. அவர் பணம், பணம் என்று தான் உள்ளார். அவரிடம் மனம் இல்லை, குணம் இல்லை.

ஸ்டாலின் ஒரு இடத்தில் மட்டும் கூட்டத்தை நடத்தி கூட்டம் கூட்டுகிறார். பல்வேறு இடங்களுக்குச் சென்று முதல்-அமைச்சரை போல் திறந்த வேனில் ஸ்டாலின் பிரசாரம் செய்வாரா?

தமிழகத்தில் சட்டம், ஒழுங்கு நன்றாக இருப்பதால் தான் மு.க.ஸ்டாலின் டி-சர்ட் போட்டு நடந்து சென்று ஓட்டு கேட்கிறார். தி.மு.க. ஆட்சி போல் சட்டம், ஒழுங்கு இருந்தால் அவரால் நடக்க முடியுமா?

ஸ்டாலின் பேச்சில் வன்மம் உள்ளது. சண்டையை தூண்டி விடுகிறார். எப்படியாவது ஆட்சியை பிடித்து விடலாம் என்று ஏக்க பெருமூச்சு விடுகிறார். இது நடக்கவே நடக்காது.

40 பாராளுமன்ற தொகுதிகளிலும் 18 சட்டசபை இடைத் தேர்தலிலும் அ.தி.மு.க. மற்றும் கூட்டணி கட்சிகள் தான் வெற்றி பெறும்.

மேற்கண்டவாறு அவர் கூறினார். #ministerrajendrabalaji #admk #mkstalin #salemtochennai8wayroad

சென்னை:

தென் சென்னை பாராளுமன்ற தொகுதி தி.மு.க வேட்பாளர் தமிழச்சி தங்கபாண்டியனை ஆதரித்து முன்னாள் மத்திய அமைச்சர் ப.சிதம்பரம் சைதாப்பேட்டை குயவர் வீதியில் நடைபெற்ற தேர்தல் பிரச்சார பொதுக்கூட்டத்தில் பேசியதாவது:

’’இந்த தொகுதியில் பேசுவது இரட்டிப்பு மகிழ்ச்சி. இந்த தொகுதியில் தமிழ் நிற்கிறது. இந்த தொகுதியில் நிற்பது தனி பெண்மணி அல்ல. தமிழ் அறிவு நிற்கிறது, தமிழ் ஆராய்ச்சியாளர் நிற்கிறார். இங்கே இந்த கூட்டணி வேட்பாளர் வெற்றிபெறுவது மாத்திரமல்ல, தமிழே வெற்றி பெறுகிறது. அவரை வெற்றிப் பெற செய்வது தமிழர்களின் கடமை.

இக்கூட்டணி புதிய கூட்டணி அல்ல, 1971ம் ஆண்டு கலைஞரும், இந்திரா காந்தியும் இந்த கூட்டணியை முதன்முதலாக அமைத்தார்கள். இந்த கூட்டணி பாராளுமன்றத் தேர்தலுக்காக 5முறை அமைந்தது. ஐந்து முறை கூட்டணி அமைந்த போதும் கலைஞர் நம்மோடு இருந்தார். ஐந்து முறையும் இந்த கூட்டணி வெற்றி பெற்றது. இதுவரை இந்த கூட்டணி தோற்றதில்லை, வருகின்ற 2019 தேர்தலிலும் உங்களுடைய ஆதரவோடு வெற்றி பெறும்.

இக்கூட்டணியை வெற்றிச் செய்வது கலைஞருக்கு செய்யும் மரியாதையாகும். இதை மனதில் வைத்து தமிழச்சி தங்கபாண்டியனுக்கு உதயசூரியன் சின்னத்தில் வாக்களித்து வெற்றி பெற செய்ய வேண்டும்.

இவ்வாறு அவர் பேசினார்.

தி.மு. மாவட்ட செயலாளர் மா.சுப்ரமணியம் எம்.எல்.ஏ, தலைமையில் நடைபெற்ற இந்த கூட்டத்தில், சைதை மேற்கு பகுதி செயலாளர் கிருஷ்ணமூர்த்தி, மகேஷ்குமார், குணசேகர், சைதை அன்பரசன், ஸ்ரீதரன், காங்கிரஸ் கட்சி சார்பில் தாமோதரன், கராத்தே தியாகராஜன் , தி.நகர் ஸ்ரீராம், சைதை முத்தமிழ், கோபிநாத்,திருவான்மியூர் சாந்தி,மலர்கொடி, சுசிலா கோபாலகிருஷ்ணன், மதிமுக சுப்ரமனியம், இந்திய கம்யூனிஸ்ட், மார்க்சிஸ்ட் கம்யூனிஸ்ட், விடுதலை சிறுத்தைகள், இந்தியன் யூனியன் முஸ்லீம் லீக், மனிதநேய மக்கள் கட்சி, இந்திய ஜனநாயக கட்சியை சேர்ந்த நிர்வாகிகள் மற்றும் தொண்ண்டர்கள் கலந்துகொண்டனர். #PChidambaram #LokSabhaElections2019

திருப்போரூர்:

திருப்போரூர் சட்டமன்ற இடைத்தேர்தலில் அதிமுக சார்பில் போட்டியிடும் திருக்கழுக்குன்றம் எஸ்.ஆறுமுகம் மற்றும் காஞ்சிபுரம் பாராளுமன்ற வேட்பாளர் மரகதம்குமரவேல் ஆகியோருக்கு ஆதரவாக முன்னாள் அமைச்சரும் கழக அமைப்பு செயலாளருமான வி.சோமசுந்தரம் திருக்கழுக்குன்றம் ஒன்றியத்தில் உள்ள அனைத்து கிராமங்களிலும் வாக்குகள் சேகரித்தார்.

அப்போது பேசிய வேட்பாளர் ஆறுமுகம், மத்திய, மாநில அரசின் திட்டங்கள் நேரிடையாக கிராமமக்களுக்கு கிடைக்க முக்கிய பங்காற்றுவேன் என்றார். அவருடன் துணை செயலாளர் எஸ்வந்த்ராவ், மஞ்சளாரவிக்குமார், ஆனூர் பக்தவச்சலம், விஜயரங்கன், அரிதாஸ், பா.ம.க. காரணை ராதா, முன்னாள் சேர்மன் வாசு,விவசாயபிரிவு மாம் பாக்கம்லட்சுமணன், கூட்டுறவு சங்கதலைவர் ரத்தினம், சாலூர் ஜானகிராமன், தேமுதிக, த.மா.கா, புரட்சிபாரதம், உள்ளிட்ட கூட்டணி கட்சி நிர்வாகிகள் சென்று வாக்கு சேகரித்தனர்.  #LokSabhaElections2019 #ADMK

சென்னை:

மக்கள் நீதி மய்யம் கட்சியின் வடசென்னை பாராளுமன்ற தொகுதி வேட்பாளரான முன்னாள் ஐ.பி.எஸ். அதிகாரி ஏ.ஜி.மவுரியா நேதாஜி நகர் மற்றும் காசிமேடு சி.ஜி. காலனி, ராயபுரம், கொருக்குப்பேட்டை உள்ளிட்ட பகுதிகளில் வீடு வீடாக சென்று ‘டார்ச் லைட்’ சின்னத்துக்கு வாக்கு சேகரித்தார். அப்போது அவரை மக்கள் எழுச்சியுடன் வரவேற்றனர். வாங்கய்யா... வாங்க... மாற்றத்துக்காகத்தான் காத்திருக்கிறோம் என்று கூறி வாழ்த்து தெரிவித்தனர்.

30 ஆண்டுகளாக குடிநீருக்காக குடத்துடன் ரோட்டில் காத்துக்கிடக்கிறோம் என்று பெண்கள் முறையிட்டனர். அவர்களிடம் மக்கள் நீதி மய்யம் வேட்பாளரான என்னை வெற்றி பெற செய்யுங்கள். இலவச குடிநீர் வீடு தேடி வரும் என்று மவுரியா உறுதி அளித்தார்.

கொருக்குப்பேட்டை குப்பை மேட்டால் ஏற்படும் பாதிப்புகளில் இருந்து மக்களை காக்க மக்கள் நீதி மய்யம் புதிய திட்டம் வகுத்துள்ளதாகவும் அவர் தெரிவித்தார். குப்பை மேட்டால் மாசு பட்டுள்ள நிலத்தடி நீரை மாற்ற குப்பையில் இருந்து மின்சாரம், உரம் தயாரிக்கப்படும் குப்பைமேடு இருக்கும் பகுதியில் மழைநீர் சேகரிப்பு மையங்களை சேகரிக்கும் திட்டம் செயல்படுத்தப்படும் என்றும் அவர் உறுதி அளித்தார். மக்களின் மன மாற்றம் நிச்சயம் வெற்றியை தேடித்தரும் என்றும் மவுரியா தெரிவித்தார். #LokSabhaElections2019 #MakkalNeedhiMaiam

ராயபுரம்:

வடசென்னை பாராளுமன்ற தொகுதி தேமுதிக வேட்பாளர் அழகாபுரம் மோகன்ராஜ், மற்றும் பெரம்பூர் சட்டமன்றதொகுதி அ.தி.மு.க. வேட்பாளர் ஆர்.எஸ். ராஜேஷ், ஆகியோரை ஆதரித்து கழக அவைத் தலைவர் இ.மதுசூதனன், மற்றும் சமத்துவ மக்கள் கட்சி தலைவர் சரத்குமார், ஆகியோர் 36-வது வட்டம் முல்லை நகரில் இரட்டை இலை சின்னத்திற்கு வாக்கு சேகரித்தனர்.

கொடுங்கையூர் பள்ளிக் கூட சாலை அருகில் உள்ள காந்தி சிலை, எம்.ஆர்.நகர் மீன் மார்க்கெட், பாரதி நகர், சாஸ்திரி நகர், பி.வி.காலனி, எஸ்.ஆர்.பூக்கடை, உள்ளிட்ட பகுதிகளில் திறந்த ஜீப்பில் வீதி வீதியாக சென்று ஆதரவு திரட்டினார். பிரசாரத்தின் போது சரத்குமார் பேசியதாவது:-

எதிர்கட்சிகளின் சூழ்ச்சிக்கு வாக்காளர்கள், துணை போக வேண்டாம். மெகா கூட்டணி தமிழகத்தில் 40 இடங்களிலும் வெற்றி பெறும்.

அம்மா விட்டுச் சென்ற பணியை எடப்பாடி பழனிசாமி சிறப்பாக செய்து வருகிறார்.

இவ்வாறு அவர் பேசினார்.

சென்னை:

பெரம்பூர் தொகுதி அ.ம.மு.க. வேட்பாளர் பி.வெற்றிவேல் தொகுதி முழுவதும் தீவிர பிரசாரத்தில் ஈடுபட்டு வருகிறார்.

அனைத்து சமூகத்தினர் பொதுநல அமைப்புகளை சந்தித்து ஆதரவு திரட்டினார். கொடுங்கையூர் குப்பைமேடு அப்பகுதியில் உள்ள மக்களுக்கு சுகாதார சீர்கேடு அச்சத்தை ஏற்படுத்தி வருகிறது. சுற்றுச்சூழல் மாசு படுவதன் மூலம் மக்களின் வாழ்க்கை தரம் குறைந்து வருவதால் நவீன தொழில் நுட்பத்தில் குப்பை மேட்டை நவீனப்படுத்த நடவடிக்கை எடுக்கப்படும் என்று வேட்பாளர் பி.வெற்றிவேல் பிரசாரத்தின்போது வாக்குறுதி அளித்தார்.

பல மைல் துரத்துக்கு பாதிப்பை ஏற்படுத்தி வரும் குப்பைமேடு பிரச்சினைக்கு முற்றுப்புள்ளி வைக்க தகுந்த நடவடிக்கை எடுத்து மேம்படுத்த அனைத்து முயற்சிகலும் மேற்கொள்ளப்படும் என்றார். வீதிவீதியாக சென்று ஆதரவு திரட்டிய வெற்றிவேலுக்கு பெண்கள் உற்சாக வரவேற்பு அளித்தனர். #LokSabhaElections2019

அம்பத்தூர்:

பாராளுமன்ற தேர்தலையொட்டி வாக்காளர்களுக்கு அரசியல் கட்சியினர் பணம், பரிசு பொருட்கள் கொடுப்பதை தடுக்க தேர்தல் பறக்கும் படையினர் தீவிர கண்காணிப்பில் ஈடுபட்டு வருகிறார்கள்.

உரிய ஆவணம் இன்றி கொண்டு செல்லப்படும் ரொக்கப்பணம், தங்கம் உள்ளிட்டவையை பறிமுதல் செய்து வருகிறார்கள்.

இந்த நிலையில் மேற்கு முகப்பேர் பகுதியில் தேர்தல் அதிகாரி செந்தில்குமார் தலைமையில் பறக்கும் படையினர் வாகன சோதனையில் ஈடுபட்டனர்.

அப்போது ஒரு வேனில் ரூ. 2 கோடியே 34 லட்சம் ரொக்கம் இருந்தது. அவை ஏ.டி.எம். எந்திரத்துக்கு நிரப்ப கொண்டு செல்லப்பட்ட பணம் என்று அதில் இருந்த ஊழியர்கள் தெரிவித்தனர்.

ஆனால் அவர்களிடம் பணத்துக்கான ஆவணம் இல்லை. இதையடுத்து ரூ. 2 கோடியே 34 லட்சத்தை அதிகாரிகள் பறிமுதல் செய்து வளசரவாக்கத்தில் உள்ள மண்டல அலுவலகத்தில் ஒப்படைத்தனர். உரிய ஆவணத்தை கொடுத்து பணத்தை பெற்றுக் கொள்ளுமாறு அறிவுறுத்தி உள்ளனர்.

கும்மிடிப்பூண்டியை அடுத்த பொம்மாஜிகுளத்தில் உள்ள சோதனைச்சாவடியில் நேற்று இரவு சப்-இன்ஸ்பெக்டர் ராஜேந்திரன் தலைமையில் போலீசார் வாகன சோதனையில் ஈடுபட்டனர்.

அப்போது கவரைப்பேட்டையில் இருந்து ஆந்திர மாநிலம் சத்யவேடு நோக்கிச் சென்ற மினி வேனை நிறுத்தி சோதனை செய்தனர். அதில் ஏ.டி.எம். எந்திரங்களில் நிரப்புவதற்காக தனியார் நிறுவனம் மூலம் ரூ. 80 லட்சம் கொண்டு செல்லப்பட்டது தெரியவந்தது.

இதற்கு உரிய ஆவணம் இல்லாததால் ரூ. 80 லட்சத்தை பறிமுதல் செய்து கும்மிடிப்பூண்டி கருவூலத்தில் ஒப்படைத்தனர். விசாரணைக்கு பிறகு ரொக்கப்பணம் திரும்ப ஒப்படைக்கப்பட உள்ளதாக அதிகாரிகள் தெரிவித்தனர்.

மதுரவாயல் அருகே மேட்டுக்குப்பம் மெயின் ரோட்டில் நேற்று இரவு கோயம்பேடு உதவி கமி‌ஷனர் ஜெயராமன், மதுரவாயல் இன்ஸ்பெக்டர் ராதா கிருஷ்ணன், மற்றும் திருவள்ளூர் மாவட்ட தேர்தல் பறக்கும் படை அதிகாரி ராஜ்கமல் ஆகியோர் வாகன சோதனையில் ஈடுபட்டனர்.

அப்போது அவ்வழியே வந்த மினி வேனை மடக்கி சோதனை நடத்தினர் அதில் ரூ. 65 லட்சத்து 74 ஆயிரம் இருந்தது. வேனில் இருந்தவர்களிடம் விசாரித்த போது தனியார் பால் நிறுவனத்திற்கு சொந்தமான வாகனம் என்பதும் கடைகளில் வசூல் செய்யப்பட்ட மொத்த பணம் என்றும் தெரிவித்தனர்.

ஆனால் உரிய ஆவணங்கள் ஏதும் இல்லாததால் ரூ. 65 லட்சத்து 75 ஆயிரத்தை பறிமுதல் செய்தனர். #LokSabhaElections2019