வேலூர்

வேலூர்:

வேலூர் தோட்டபாளையம் சோளாபுரி அம்மன் கோவில் பகுதியில் சுமார் 35 வயதுடைய வாலிபர் ஒருவர் நேற்று நள்ளிரவு 12 மணியளவில் சந்தேகத்திற்கிடமான வகையில் சுற்றித்திரிந்தார்.

இதைப்பார்த்த அப்பகுதி பொதுமக்கள் அவர் மீது சந்தேகம் அடைந்தனர். அவரை பிடித்து யார்? என்று விசாரணை மேற்கொண்டனர். ஆனால் அந்த நபர் சரியாக பதில் கூறவில்லை. அவர் வடமாநிலத்தை சேர்ந்தவர் என்பது தெரியவந்தது. அவரிடம் சில இரும்பு கம்பி துண்டுகள் இருந்தன. பூட்டிய வீடுகளின் பூட்டை திறக்க இவற்றை பயன்படுத்த வைத்திருக்கலாம் என்ற சந்தேகம் பொதுமக்களுக்கு ஏற்பட்டது.

சரியாக பதில் கூறாததால் சந்தேகம் அடைந்த பொதுமக்கள் அவரை சரமாரியாக தாக்கினர். இதனால் பரபரப்பு ஏற்பட்டது.

தகவல் அறிந்த போலீசார் சம்பவ இடத்திற்கு வந்து அந்த நபரிடம் விசாரணை மேற்கொண்டனர். பின்னர் அவரை விசாரணைக்காக போலீஸ் நிலையத்துக்கு அழைத்துச் சென்றனர்.

இந்த சம்பவம் குறித்து பொதுமக்கள் கூறுகையில், ‘‘பிடிபட்ட நபர் ஒவ்வொரு வீட்டிற்குள்ளும் சென்று வரவே திருட்டு முயற்சியில் ஈடுபடலாம் என்ற சந்தேகத்தின்பேரில் நாங்கள் பிடித்தோம். உடனே போலீசாருக்கும் தகவல் அளித்தோம். ஆனால் உடனடியாக போலீசார் வரவில்லை. அவர்கள் 1 மணி நேரத்திற்கு பின்னர் தான் வந்தனர். பிடிபட்ட நபர் முன்னுக்கு பின் முரணாக பேசுகிறார். நாங்கள் தமிழில் பேசுவது அவனுக்கு புரிகிறது. ஆனால் புரியாதது போல நடிக்கிறார். பல இடங்களில் இதேபோன்று அடி வாங்கி உள்ளதாக எங்களுக்கு தெரியவந்துள்ளது. ஏற்கனவே வேலூர் தோட்டப்பாளையம் பகுதியில் வடமாநிலத்தை சேர்ந்தவர்கள் அடிக்கடி வந்து செல்கின்றனர்.

எனவே எங்கள் பகுதியில் போலீசார் இரவு ரோந்தை தீவிரப்படுத்த வேண்டும்’’ என்றனர்.

வாலாஜா:

பாணாவரம் அடுத்த புதுபட்டு கொன்னப் பந்தாங்கல் பகுதியை சேர்ந்தவர் வெங்கடேசன் (வயது 30). அதே பகுதியை சேர்ந்த சிதம்பரம் (30) மற்றும் வாலாஜா காமராஜ் நகரை சேர்ந்த குமார் (50) ஆகிய 3 பேரும் கூலி வேலைக்காக வாலாஜா நோக்கி இன்று காலை பைக்கில் சென்றனர்.

அப்போது எதிரே வந்து திருவண்ணாமலை மாவட்டம் வல்லம் பகுதியை சேர்ந்த முரளி (24). இவர் தனது நண்பர் சிவராஜன் (23) என்பவருடன் பைக்கில் வாலாஜாவிற்கு வந்து கொண்டிருந்தார். அம்மனஞ்சேரி என்ற இடத்தில் வந்த போது 2 பைக்கும் நேருக்கு நேர் பயங்கரமாக மோதியது.

இதில் வெங்கடேசன், குமார் மற்றும் சிவராஜன் ஆகிய 3 பேரும் தூக்கி வீசப்பட்டு படுகாயத்துடன் சம்பவ இடத்திலேயே பரிதாபமாக இறந்தனர். சிதம்பரம், முரளி படுகாயமடைந்தனர்.

வாலாஜா போலீசார் பலியான 3 பேரின் உடல்களை மீட்டு வாலாஜா அரசு ஆஸ்பத்திரிக்கு அனுப்பி வைத்தனர்.

படுகாயமடைந்த முரளியை வேலூர் அடுக்கம்பாறை அரசு ஆஸ்பத்திரியிலும், சிதம்பரத்தை வேலூர் தனியார் ஆஸ்பத்திரியிலும் சிகிச்சை பெற்று வருகின்றனர்.

வேலூர்:

வேலூர் பகுதிக்குட்பட்ட சென்னை-பெங்களூரு தேசிய நெடுஞ்சாலையில் லிப்ட் கேட்பதுபோல் இரவு முதல் விடியற்காலை வரை கொள்ளை கும்பல் வழிப்பறி கொள்ளை சம்பவங்களில் ஈடுபட்டு வருவதாக புகார் எழுந்துள்ளது.

குறிப்பாக வேலூரில் இருந்து பள்ளிகொண்டா டோல்கேட் இடைப்பட்ட பகுதியில் வாகன ஓட்டிகளை மறித்து செல்போன், நகை, பணம் உள்பட உடமைகளை பறிக்கின்றனர். வழிப்பறியின் போது, வாகன ஓட்டிகளை தாக்குகின்றனர்.

2 நாட்களுக்கு முன்பு நள்ளிரவில் பெங்களூருவில் இருந்து தோல் மூலப்பொருள் ஏற்றி வந்த கண்டெய்னர் லாரியை, வேலூர் அடுத்த பொய்கை தேசிய நெடுஞ்சாலையில் 3 பேர் கும்பல் வழிமறித்தனர்.

லாரி டிரைவரை தாக்கி அங்கேயே கட்டிப்போட்டு விட்டு லாரியை கடத்திச் சென்றனர். இதுகுறித்து, விரிஞ்சிபுரம் போலீசில் புகார் அளிக்கப்பட்டது. இந்த நிலையில் நேற்று முன்தினம் இரவு காட்பாடி பகுதியில் அந்த லாரியை மீட்கப்பட்டது.

லாரியை விட்டுவிட்டு கடத்தல் கும்பல் தப்பிஓடி விட்டனர். இதுபோன்ற தொடர் சம்பவங்களால் வேலூர் மார்க்கமாக வந்து செல்லும் லாரி உள்ளிட்ட வாகன ஓட்டிகள் அச்சத்தில் உள்ளனர். அட்டூழியத்தில் ஈடுபட்டு வரும் கும்பலை பிடித்து கடும் நடவடிக்கை எடுக்கவும் கோரிக்கை வைத்துள்ளனர்.

வேலூர்:

ஆற்காட்டை அடுத்த கலவையை சேர்ந்த கோபாலகிருஷ்ணன் மனைவி முத்துலட்சுமி (வயது 23). இவருக்கு, 2015-ம் ஆண்டு நடந்த கொலை வழக்கு தொடர்பாக ஆயுள் தண்டனை விதிக்கப்பட்டது.

இதையடுத்து அவர் கடந்த 10-ந்தேதி வேலூர் மத்திய பெண்கள் ஜெயிலில் அடைக்கப்பட்டார். நிறைமாத கர்ப்பிணியாக இருந்த அவருக்கு நேற்று முன்தினம் இரவு திடீரெனப் பிரசவ வலி ஏற்பட்டது.

பிரசவ வலியால் துடித்த அவரை, சிறை மருத்துவர்கள் பரிசோதனை செய்து, அடுக்கம்பாறை அரசு மருத்துவமனையில் அனுமதிக்க பரிந்துரை செய்தனர். அதன்பேரில் முத்துலட்சுமி சிகிச்சைக்காக அடுக்கம்பாறையில் அனுமதிக்கப்பட்டார். அங்கு, அவருக்கு டாக்டர்கள் சோதனை செய்தனர்.

இதில் முத்துலட்சுமிக்கு சாதாரண வயிற்று வலிதான் பிரசவ தேதி இன்னும் ஒரு மாதம் உள்ளதால். அவரை சாதாரணவார்டுக்கு மாற்றியுள்ளோம். முத்துலட்சுமிக்கு ஏற்கனவே பிறந்த 2 குழந்தைகளும் அறுவை சிகிச்சை மூலமே நடந்துள்ளது.

எனவே 3-வது பிரசவமும் இன்னும் 2 வாரத்தில் அறுவை சிகிச்சை மூலம் பிரசவம் செய்யப்படும் என டாக்டர்கள் தெரிவித்தனர்.

வேலூர்:

திருவண்ணாமலையை சேர்ந்தவர் தினேஷ் (வயது 28), லாரி டிரைவர். இவர், சிங்கப்பூருக்கு அனுப்பப்பட இருந்த சரக்கு பொருட்களை பெங்களூருவில் இருந்து லாரியில் ஏற்றிக் கொண்டு சென்னை துறைமுகத்திற்கு நேற்றிரவு புறப்பட்டு வந்து கொண்டிருந்தார்.

பெங்களூரு-சென்னை தேசிய நெடுஞ்சாலையில் நள்ளிரவு 1 மணியளவில் வேலூர் பள்ளிகொண்டா அருகே வந்தார். அப்போது டோல்கேட் பகுதியில் நின்று இருந்த மர்ம நபர்கள் 2 பேர் லாரிக்கு கை காட்டி லிப்ட் கேட்டனர். தினேசும் பரிதாபபட்டு லாரியை நிறுத்தி லிப்ட் கொடுத்தார்.

லாரி 100 மீட்டர் தூரம் வந்தபோது, திடீரென மர்ம நபர்கள் 2 பேரும் மறைத்து வைத்திருந்த கத்தியை எடுத்து டிரைவரை மிரட்டினர். ஆள் நடமாட்டம் இல்லாத சாலை ஓர பகுதியில் கத்தி முனையில் லாரியை நிறுத்த செய்தனர். பிறகு, டிரைவர் தினேஷை லாரிக்குள் வைத்து கொடூரமாக 2 பேரும் மாறிமாறி தாக்கினர்.

இதில் பலத்தகாயமடைந்த டிரைவர் அலறி துடித்தார். டிரைவரிடம் இருந்த ரூ.30 ஆயிரம் பணத்தை பறித்துக் கொண்டு மர்ம நபர்கள் லாரியில் இருந்து கீழே இறங்கி தப்பி ஓடிவிட்டனர்.

இதையடுத்து, ரத்தம் சொட்ட சொட்ட டிரைவர் தினேஷ், பள்ளி கொண்டா போலீஸ் நிலையத்திற்கு நடந்தே சென்றார். அவரை போலீசார் பார்த்ததும், அதிர்ச்சியடைந்தனர். சம்பவம் குறித்து டிரைவர் தெரிவித்தவுடன் போலீசார், அவரை மீட்டு குடியாத்தம் அரசு ஆஸ்பத்திரியில் அனுமதித்தனர்.

அங்கு டிரைவருக்கு தீவிர சிகிச்சை அளிக்கப்படுகிறது. சாலையோரம் நிறுத்தப்பட்டு இருந்த சரக்கு லாரியை போலீசார் கைப்பற்றினர். லாரி உரிமை யாளருக்கும் தகவல் கொடுக்கப்பட்டது. மேலும், வழக்குப்பதிவு செய்து லிப்ட் கேட்டு தாக்கி பணம் பறித்த மர்ம நபர்களை பிடிக்க தேடுதல் வேட்டையை தீவிரப்படுத்தியுள்ளனர். இச்சம்பவம் பரபரப்பை ஏற்படுத்தியிருக்கிறது.