வேலூர்

வேலூர்:

வேலூர் பாராளுமன்ற தேர்தலில் தி.மு.க. சார்பில் போட்டியிடும் கதிர்ஆனந்த்தை ஆதரித்து மு.க.ஸ்டாலின் 3-வது நாளாக அணைக்கட்டு தொகுதிக்கு உட்பட்ட ஊசூரில் பேசினார்.

வெற்றி பெற்று பாராளுமன்றம் சென்றுள்ள 37 எம்.பி.க்களும் அங்கு தமிழக பிரச்சனைகள் குறித்து நாள்தோறும் குரல் எழுப்பி வருகின்றனர். ஆனால் தோல்வியை ஒப்புக்கொள்ள முடியாத அ.தி.மு.க.வினர் உண்மைக்கு புறம்பான வாக்குறுதிகளை அளித்து தி.மு.க. கூட்டணி வெற்றி பெற்று விட்டதாக கூறுகின்றனர்.

தமிழகத்தில் கடந்த 2017-18-ம் ஆண்டில் மட்டும் அ.தி.மு.க. அரசு திட்டங்களுக்காக ஒதுக்கிய நிதியில் மட்டும் மொத்தம் ரூ.28,179 கோடி பயன்படுத்தப்படாமல் திருப்பி அனுப்பப்பட்டுள்ளது.

இதில் கல்விக்காக ஒதுக்கப்பட்ட ரூ.1.627 கோடி, குடிநீர் திட்டங்களுக்காக ஒதுக்கிய ரூ.2,064 கோடி, சாலை, பாலங்களுக்காக ஒதுக்கிய ரூ.2,034 கோடி, ஏற்காட்டில் மேம்பாலம் கட்ட ஒதுக்கிய ரூ.138.95 கோடி, நீர்ப்பாசன திட்டங்களுக்கு ஒதுக்கிய ரூ.1,779,49 கோடி நிதியும் அடங்கும்.

எடப்பாடி பழனிசாமி தன்னை ஒரு விவசாயி என்று கூறிவருகிறார். 8 வழிச்சாலை திட்டத்தால் வாழ்வாதாரமே பறிபோகும் என விவசாயிகள் போராட்டங்கள் நடத்திய நிலையில் ஐகோர்ட்டு தடை உத்தரவு பிறப்பித்த பிறகும். அந்த தடைக்கு தடையாணை பெற இந்த அரசு சுப்ரீம் கோர்ட்டை அணுகியது.

மேலும் ஹைட்ரோகார்பன் திட்டத்தால் டெல்டா பகுதி விவசாயிகளை துயரத்தில் ஆழ்த்தியது. அப்படிப்பட்ட நிலையில் எடப்பாடி பழனிசாமியை ஒரு விவசாயியாக கருத முடியாது.

வேலூர் பாராளுமன்ற தேர்தலில் தி.மு.க. வெற்றி பெறும்போது காவிரி கூட்டு குடிநீர் விரிவுப்படுத்தப்பட்டு, விடுபட்ட அனைத்து கிராமங்களுக்கும் குடிநீர் கிடைக்கவும், விளைபொருட்களுக்கான குடிநீர் பதனக் கிடங்கு, அரசு மகளிர் கலைக்கல்லூரி அமைக்கவும் நடவடிக்கை எடுக்கப்படும்.

இவ்வாறு அவர் பேசினார்.

வேலூர்:

வேலூர் தொகுதி தி.மு.க. வேட்பாளரை ஆதரித்து தி.மு.க. தலைவர் மு.க.ஸ்டாலின் வாணியம்பாடி டவுன், வெள்ளக்குட்டை, நிம்மியம்பட்டு, மிட்டூர், குருசிலாப்பட்டு, பூங்குளம், ஆலங்காயம், போன்ற பகுதிகளில் தேர்தல் பிரச்சாரம் செய்தார். அப்போது அவர் பேசியதாவது:-

கடல் அலையே திரண்டு வந்திருப்பதுபோல் நீங்கள் அனைவரும் வந்திருக்கக்கூடிய இந்தக் காட்சியைப் பார்க்கின்ற பொழுது நிச்சயமாக உறுதியாக நம்முடைய அணியின் சார்பில் 39வது எம்.பி.யாக நம் வேட்பாளர் கதிர் ஆனந்த் பாராளுமன்றத்திற்கு போகப் போகின்றார் என்பது உறுதி. எந்த மாற்றமும் கிடையாது.

நியாயமாக, கடந்த ஏப்ரல் மாதம் நடந்த தேர்தலிலேயே கதிர் ஆனந்த் அவர்கள் வெற்றி பெற்று அவர் பாராளுமன்றத்திற்கு சென்றிருக்க வேண்டும். ஆனால், குறிப்பிட்ட சிலர் திட்டமிட்டு சதி செய்து சூழ்ச்சி வலையைப் பின்னி தி.மு.க.வின் மீது ஒரு களங்கத்தை ஏற்படுத்த வேண்டும் என்பதற்காக, ரெய்டு என்கின்ற ஒரு நாடகத்தை மத்திய, மாநில அரசுகள் ஒன்றிணைந்து கழகத்தின் பொருளாளராக இருக்கக்கூடிய அண்ணன் துரை முருகன் பெயருக்கு களங்கம் ஏற்படுத்தக்கூடிய வகையில் ஒரு நாடகத்தை அரங்கேற்றினார்கள்.

நாங்கள் தேர்தல் அறிக்கையில் தெளிவாக சொன்னோம் தி.மு.க ஆட்சிக்கு வந்ததும் முதல் வேலையாக நீங்கள் அடமானம் வைத்திருக்கக்கூடிய அத்தனை நகைகளையும் வட்டியில்லாமல் மீண்டும் உங்களிடத்தில் ஒப்படைக்கக்கூடிய வாய்ப்பினை ஏற்படுத்தித் தருவோம் என்று உறுதி அளித்திருந்தோம்.

ஆனால், ஆட்சிக்கு வர முடியவில்லை. தற்பொழுது அ.தி.மு.க.வினர் என்ன சொல்கிறார்கள் என்றால் நடக்காத உறுதி மொழிகளை எல்லாம் தி.மு.க.வினர் கொடுத்துள்ளனர் மக்களை ஏமாற்றி ஓட்டு வாங்கி விட்டார்கள் மிட்டாய் கொடுத்து வாக்கு வாங்கி விட்டார்கள் என்று, ஒரு தவறான பிரச்சாரத்தை முதலமைச்சர் எடப்பாடி பழனிசாமி சொல்லிக் கொண்டிருக்கிறார்.

நான் கேட்கின்றேன் மக்களை ஏமாற்றியதால் 38 இடங்களில் நாங்கள் வெற்றி பெற்றிருக்கின்றோம் என்றால், நீங்கள் வென்ற ஒரே ஒரு இடத்தில் மிட்டாய் கொடுத்தீர்களா அல்லது அல்வா கொடுத்து அங்கிருக்கும் மக்களை ஏமாற்றினீர்களா? இதுதான் நான் கேட்கக்கூடிய கேள்வி. எனவே, இவற்றையெல்லாம் நீங்கள் சிந்தித்துப் பார்க்க வேண்டும். தமிழ்நாட்டு மக்களை எவ்வளவு கொச்சைப்படுத்தி பேசக்கூடிய நிலையில் இருக்கின்றார்கள் இவற்றிற்கெல்லாம் நீங்கள் சரியான பதில் தர வேண்டும்.

அவர், எதிர்க்கட்சித் தலைவர் மு.க.ஸ்டாலின் கனவு கண்டு கொண்டிருக்கின்றார். எத்தனை ஜென்மம் எடுத்தாலும் அ.தி.மு.க ஆட்சியை அழிக்க முடியாது என்கிறார். நான் கனவு காண வேண்டிய அவசியமெல்லாம் இல்லை. விரைவில் அது நினைவாக நடக்கப் போகிறதா இல்லையா என்பதை மட்டும் பாருங்கள்.

மோடியின் தயவில் பி.ஜே.பி ஆட்சியின் ஒத்துழைப்போடு, இந்த ஆட்சி நடந்து கொண்டிருக்கின்றதே தவிர வேறொன்றும் அல்ல அது தான் உண்மையும் கூட. எனவே இந்த ஆட்சியை காப்பாற்றுவதற்கும் நிலைத்து நீடித்து வைத்துக் கொள்ளவும், அவர்கள் மக்களைப் பற்றி எல்லாம் கவலைப்படாமல் இந்த ஆட்சி நீடித்து நிலைத்திருக்க வேண்டும் என்பதற்காக அங்கு இருக்கக்கூடிய ஆளும் கட்சி எம்.எல்.ஏ.க்களுக்கு மட்டுமல்லாமல், அமைச்சர்களுக்கும் மாதா மாதம் படி அளந்து கொண்டிருக்கின்றார்கள்.

அ.தி.மு.க ஆட்சி சிறந்த ஆட்சி என்று பெயரெடுத்ததாம். அதாவது, ஐ.எஸ்.ஐ முத்திரை அவர்களுக்கு குத்தி விட்டார்களாம். எதில் ஐ.எஸ்.ஐ முத்திரை? ஊழலிலா, நீங்கள் அடிக்கின்ற கொள்ளையிலா, நீங்கள் வாங்கிய கமசனிலா. நான் கேட்கின்றேன் கொட நாட்டு விவகாரம் ஒன்று போதாதா அதைப்பற்றி பேசக்கூடாது என்று நீதிமன்றம் சென்று தடை உத்தரவு வாங்கினீர்களே?

நான் கேட்கின்றேன், உங்கள் மீது ஊழல் இருக்கின்றது என்று சொல்லி சென்னை உயர்நீதி மன்றம் விசாரித்துவிட்டு சி.பி.ஐ விசாரணை நடத்த வேண்டும் என்று உத்தரவிட்டதா, இல்லையா. தான் எந்தத் தவறும் செய்யவில்லை உத்தமபுத்திரன் என்று நினைத்திருந்தால், விசாரணையை சந்திக்கக்கூடிய ஆற்றல், தெம்பு, திராணி முதலமைச்சருக்கு இருந்திருக்க வேண்டும். அதை விட்டுவிட்டு உச்ச நீதிமன்றத்திற்கு சென்று ஸ்டே வாங்கி இருக்கின்றீர்களே என்ன காரணம். எனவே அச்சம் இருக்கிறதல்லவா இது ஒன்றே போதும்.

அதுமட்டுமல்ல, தற்போது சாமி சிலை கடத்தலில் 2 அமைச்சர்கள் மீது பொன்மாணிக்கவேல் அபிடவிட் தாக்கல் செய்திருக்கின்றார். இதைவிட மானக்கேடு வேறென்ன இருக்கமுடியும்.

எனவே இந்த நிலையில் தான் இந்த ஆட்சி போய்க்கொண்டிருக்கின்றது இந்த ஆட்சிக்கு துணை நிற்கக் கூடிய வகையில் தான் மத்திய ஆட்சி இருந்து கொண்டிருக்கின்றது.

இவ்வாறு அவர் பேசினார்.

வேலூர்:

வேலூர் பாராளுமன்ற தொகுதி தேர்தலையொட்டி மு.க.ஸ்டாலின் பிரசாரம் செய்து வருகிறார். தி.மு.க. வேட்பாளர் கதிர்ஆனந்தை ஆதரித்து லத்தேரி, கே.வி.குப்பம், குடியாத்தம் சித்தூர் கேட், கொண்டசமுத்திரத்தில் மு.க. ஸ்டாலின் பேசியதாவது:-

கதிர்ஆனந்த் உங்கள் ஊரில் இருப்பவர். நேரில் சென்று அவரிடம் எந்த ஒரு குறையையும் கூறலாம்.

கடந்த ஏப்ரல் மாதம் இந்த தேர்தல் நடத்திருந்தால் அதிகமான ஓட்டு வித்தியாசத்தில் கதிர்ஆனந்த் வெற்றி பெற்று எம்.பி., ஆகியிருப்பார். சிலர் செய்த சதியால் தேர்தல் ரத்து செய்யப்பட்டது.

தி.மு.க.வை களங்கப்படுத்தும் நோக்கத்தோடு கடந்த ஏப்ரல் மாதம் ஓட்டுப்பதிவுக்கு முந்தைய நாள் கனிமொழி போட்டியிட்ட தூத்துக்குடி தொகுதியில் அவர் தங்கியிருந்த வீட்டிலும் ரெய்டு நடத்தப்பட்டது.

அந்த சதி முறியடிக்கப்பட்டு தேர்தலில் வெற்றி பெற்றோம். வெற்றி பெற்ற அனைத்து தொகுதியிலும் 3 லட்சத்தில் இருந்து 5½ லட்சம் வரை ஓட்டுகள் வித்தியாசத்தில் தி.மு.க. வேட்பாளர்கள் வெற்றி பெற்றனர்.

அந்த தேர்தலில் 24 தொகுதிகளில் உதயசூரியன் சின்னத்தில் வெற்றி பெற்றோம். வேலூரில் உதயசூரியன் சின்னத்தில் வெற்றி பெற்றால் இதோடு சேர்த்து 25 தொகுதிகள் ஆகும்.

பாராளுமன்றத்தில் தி.மு.க. 3-வது இடத்தில் உள்ளது. 22 சட்டசபை இடைத்தேர்தலில் குடியாத்தம், ஆம்பூர் உட்பட 13 இடங்களில் வெற்றி பெற்றது. அ.தி.மு.க. 9 இடங்களைத் தான் பெற்றது. இப்போது தி.மு.க. வெற்றி பெற்ற 13 இடங்கள் ஏற்கனவே அ.தி.மு.க. வசம் இருந்ததில் 12 இடங்கள் ஆகும்.

நடந்து முடிந்த பாராளுமன்ற தேர்தலில் வாக்காளர்களுக்கு பொய்யான வெற்றி பெற்றதாக அ.தி.மு.க.வினர் சொல்கின்றனர்.

பொய் என்று சொன்னாலும் பரவாயில்லை. வாக்காளர்களுக்கு 'மிட்டாய்' கொடுத்து தி.மு.க. கூட்டணி 37 இடங்களில் வெற்றி பெற்றதாக அ.தி.மு.க.வினர் கூறி வருகின்றனர். மிட்டாய் என்றால் என்ன கமரகட்டா? பல்லி மிட்டாயா?

சரி அப்படியே நாங்க மிட்டாய் கொடுத்து ஜெயிச்சதாக வைத்துக் கொண்டாலும், தேனி தொகுதியில் நீங்கள் ஜெயிச்சீங்களே, அங்க நீங்க என்ன கொடுத்தீங்க? அல்வா. அதுவும் திருநெல்வேலி அல்வா இல்லை. டில்லி அல்வா கொடுத்து ஜெயிச்சீங்களா?.

தமிழகத்தில் விரைவில் ஆட்சி மாற்றம் ஏற்படும். சட்டமன்ற இடைத் தேர்தலில் இன்றும் கூடுதல் தொகுதிகளில் வெற்றி பெற்றிருந்தால் எடப்பாடி பழனிசாமி ஆட்சி முடிவுக்கு வந்திருக்கும். தற்போதும் எந்த நேரத்தில் என்ன நடக்கும் என்று கூற முடியாது. கர்நாடகத்தில் ஆட்சி மாற்றம் ஏற்பட்டது போன்று தமிழகத்திலும் ஏற்படலாம். மோடி நினைத்தால் அது நடக்கும்.

இங்கு ஆட்சியில் இருப்பவர்கள் மோடியின் காலில் விழுந்து கிடக்கிறார்கள் அதனால் மோடி நினைக்கவில்லை.

கொல்லைப்புறமாக ஆட்சிக்கு வராமல் மக்களின் ஆதரவை பெற்று வாக்குகள் வாங்கி ஆட்சிக்கு வரவேண்டும் என்று கருணாநிதி கூறுவார். அதன்படி மக்களின் ஆதரவை பெற்று தி.மு.க. ஆட்சிக்கு வரும். இந்த ஆட்சி கவிழ்ந்துவிடும் என்று ஸ்டாலின் கனவு காண்கிறார் என அ.தி.மு.க.வினர் விமர்சனம் செய்து வருகின்றனர். கனவு காண வேண்டிய அவசியம் இல்லை. விரைவில் ஆட்சி கவிழ்ப்பு நினைவாக போகிறது.

இந்தியா முழுவதிலும் நடந்த பாராளுமன்ற தேர்தலில் தி.மு.க. அதிக ஓட்டுகளை பெற்று ஓட்டு சதவீதத்தில் முதலிடத்தில் உள்ளது. டில்லிக்கு 38 எம்.பி.க்களும் கில்லி மாதிரி சென்றுள்ளனர். தமிழகத்துக்கு கேடு விளைவிக்கும் திட்டங்களை அவர்கள் தடுத்து நிறுத்தி வருகின்றனர்.

கருணாநிதி மற்றும் ஜெயலலிதா இருக்கும் வரை மத்திய அரசால் நீட் தேர்வு கொண்டுவர முடியவில்லை.

ஜெயலலிதா சர்வாதிகாரியாக இருந்தாலும் தமிழகத்தின் உரிமையை ஒருபோதும் விட்டுக் கொடுத்ததில்லை. மோடியா, லேடியா என பார்ப்போம் என கூறினார். இதற்காக ஜெயலலிதாவை பாராட்டுகிறேன்.

ஆனால் அவரது பெயர் சொல்லி தற்போது நடக்கும் ஆட்சியை டில்லியில் அடகு வைத்துவிட்டனர்.

துரைமுருகன் யார் என நான் சொல்லி உங்களுக்கு தெரியப்போவதில்லை. அவரது மகனான கதிர் ஆனந்தும் இத்தொகுதியின் குறைகளை பாராளுமன்றத்தில் எடுத்துக் கூற அவருக்கு ஓட்டு அளியுங்கள்.

கருணாநிதி பதவிப் பிரமாணம் செய்த விழா மேடையிலேயே தேர்தலில் அளித்த வாக்குறுதியாக ரூ.7ஆயிரம் கோடி விவசாய கடனை தள்ளுபடி செய்தார். அவருடைய மகன் நான்.

நானும் சொன்னதை செய்யமாட்டேனா. தற்போதுள்ள அ.தி.மு.க. அரசு பா.ஜ.க. தயவில் நடந்து வருகிறது. இப்போதுள்ள அ.தி.மு.க. அரசு விரைவில் அமித்ஷா அ.தி.மு.க. என பெயர் மாறும் போல உள்ளது. விரைவில் தி.மு.க. ஆட்சியை பிடிக்கும். அப்போது முதலாவதாக நகை கடன் தள்ளுபடி செய்யப்படும். தொடர்ந்து விவசாய கடன், மாணவர்களின் கல்வி கடனை தள்ளுபடி செய்வேன்.

இவ்வாறு அவர் பேசினார்.

மு.க.ஸ்டாலின் இன்று வாணியம்பாடி சட்டமன்ற தொகுக்குட்பட்ட பகுதிகளில் பிரசாரம் செய்கிறார்.

வாணியம்பாடி:

வேலூர் பாராளுமன்ற தொகுதி அ.தி.மு.க. கூட்டணி வேட்பாளர் ஏ.சி.சண்முகத்தை ஆதரித்து வாணியம்பாடி, ஆம்பூரில் நடந்த தேர்தல் பிரசார கூட்டத்தில் முதல்- அமைச்சர் எடப்பாடி பழனிசாமி பேசியதாவது:-

இந்தியாவில் 543 பாராளுமன்ற தொகுதியில் 542 தொகுதிக்கு தேர்தல் நடந்து முடிந்து விட்டது. ஆனால் வேலூர் தொகுதிக்கு மட்டும் தேர்தல் நடைபெறவில்லை. இந்த தேர்தல் நிறுத்தப்பட யார் காரணம் என்பது அனைவருக்கும் தெரியும்.

கடந்த பாராளுமன்ற தேர்தலில் நகைக்கடன் தள்ளுபடி, கல்வி கடன் தள்ளுபடி, விவசாய கடன் தள்ளுபடி, ஒவ்வொரு குடும்பத்துக்கும் மாதந்தோறும் 6 ஆயிரம் ரூபாய் என நிறைவேற்றவே முடியாத வாக்குறுதிகளை பொய் மூட்டைகளாக அவிழ்த்து விட்டு வெற்றி பெற்றார்கள்.

குழந்தைகளுக்கு கவர்ச்சிகரமான கவரில் சுற்றி மிட்டாய் கொடுத்து ஏமாற்றுவது போல் மக்களை ஏமாற்றி ஸ்டாலின் வெற்றி பெற்று விட்டார்.

இது உண்மையான வெற்றி அல்ல. தற்போது நடைபெற உள்ள வேலூர் தேர்தலில் என்ன பொய்களை சொல்லி ஸ்டாலின் ஓட்டு கேட்பார் என்று தெரியவில்லை. ஆனால் இங்கு பொய் பிரசாரம் எடுபடாது. அ.தி.மு.க.வை பொறுத்தவரை எந்த தேர்தலிலும் மக்களுக்கு கொடுத்த வாக்குறுதிகள் அனைத்தையும் நிறைவேற்றும் இயக்கம்.

நாங்கள் உண்மையை மட்டும் கூறி ஓட்டுகளை பெறுவோம். ஆனால் எதிர் அணியினர் திட்டமிட்டு பொய் வாக்குறுதிகளை கொடுத்து ஓட்டுகள் பெறுகின்றனர்.

நடந்து முடிந்த சட்டசபை இடைத்தேர்தலில் தமிழகத்தை ஆள்வதற்கு அ.தி.மு.க. தான் சிறந்த கட்சி என தெரிந்து எங்களுக்கு வாக்களித்து வெற்றி பெற செய்துள்ளனர். ஆகவே தி.மு.க. தலைவர் ஸ்டாலினின் தமிழகத்தில் தி.மு.க. ஆட்சி என்ற கனவு என்றுமே நிறைவேறாது.

கல்வியில் சிறந்து விளங்கும் மாநிலத்தில் பொருளாதாரம் மேம்பாடு அடையும். அங்கு அமைதி நிலவும். எனவே தமிழகத்தில் மாணவர்களுக்கு சிறந்த கல்வியை வழங்க வேண்டும் என்பதற்காக ஜெயலலிதா பல்லாயிரக்கணக்கான கோடிகளை மாணவர்களின் கல்விக்கு ஒதுக்கீடு செய்தார்.

இந்தியாவில் இதுவரை எந்த மாநில அரசும் வழங்காத திட்டமான இலவச லேப்-டாப் திட்டத்தில் 43.50 லட்சம் மாணவ, மாணவிகளுக்கு லேப்-டாப் வழங்கியுள்ளோம்.

வல்லரசு நாடான அமெரிக்காவில் கூட இப்படிபட்ட திட்டம் செயல்படுத்தப்பட வில்லை. இன்னும் 10 ஆண்டுகள் கழித்து பார்த்தால் தமிழகம் விஞ்ஞான உலகமாக இருக்கும்.

தி.மு.க. ஆட்சியின் போது 100-க்கு 32 பேர் உயர்கல்வி படித்தார்கள். தற்போது இந்தியாவிலேயே அதிகபட்சமாக 100-க்கு 48.6 மாணவர்கள் உயர்கல்வி படித்து வருகிறார்கள்.

வேலூர் மாவட்டம் முழுவதும் வாணியம்பாடி உள்பட 11 நகராட்சி, 5 பேரூராட்சி மற்றும் 944 ஊரக ஊராட்சியில் ஆயிரத்து 300 கோடி ரூபாயில் காவிரி கூட்டு குடிநீர் திட்டம் நிறைவேற்றி குடிநீர் வழங்கப்பட்டு வருகிறது. அதேபோல் சுகாதார துறையில் புதிய சகாப்தத்தை உருவாக்கி வருகிறோம்.

வேலூர் தொகுதி தேர்தல் முடிந்தவுடன் தமிழகத்தில் உள்ள அனைத்து ஏழை தொழிலாளர் குடும்பத்தினருக்கு 2 ஆயிரம் ரூபாய் வழங்கப்படும்.

எத்தனை அவதாரம் எடுத்தாலும் மு.க.ஸ்டாலினால் ஆட்சி அமைக்க முடியாது. மக்களை ஏமாற்றி ஓட்டு வாங்கி வெற்றி பெற்றாலும் மக்கள் தி.மு.க.வை தொங்கலில் விட்டுள்ளனர். மத்தியிலும் ஆட்சி அமைக்க முடியவில்லை. மாநிலத்திலும் ஆட்சி அமைக்க முடியவில்லை.

ஸ்டாலின் எத்தனை அவதாரம் எடுத்தாலும் அ.தி.மு.க.வை ஒன்றும் செய்துவிட முடியாது. பல பொய்களை சொல்லி ஓட்டு பெற்றனர். பொய் சொல்வதற்காகவே அவருக்கு டாக்டர் பட்டம் வழங்கலாம்.

ஸ்டாலின் மீண்டும் ஓட்டு கேட்க வருவார். டீ கடைக்கு சென்று டீ குடிப்பார். மார்க்கெட்டுக்கு செல்வார். பொய் சொல்லி ஓட்டு கேட்பார். மக்களே உஷாராக இருங்கள். ஏமாறாதீர்கள்.

ஐ.எஸ்.ஐ. தரம் பெற்ற கட்சி அ.திமு.க. முத்திரையில்லாத கட்சி தி.மு.க., அ.தி.மு.க.வில் சாதாரண தொண்டன் கூட முதல்வராகலாம். ஆனால் தி.மு.க.வில் ஸ்டாலின் குடும்ப வாரிசுகள் தான் பொறுப்புக்கு வருவார்கள். மக்களுக்கான கட்சி அ.தி.மு.க., தி.முக. கார்ப்பரேட் கம்பெனி. ஆகவே அ.தி.மு.க. வேட்பாளர் ஏ.சி.சண்முகத்துக்கு வாக்களித்து வெற்றி பெற செய்யுங்கள்.

இவ்வாறு அவர் பேசினார்.

முதல் அமைச்சர் எடப்பாடி பழனிசாமி இன்று குடியாத்தம், கே.வி.குப்பத்தில் பிரசாரம் செய்கிறார்.