வேலூர்

வேலூர்:

வேலூரில் பா.ஜ.க.சார்பில் வேல் யாத்திரை பொதுக்கூட்டம் நேற்று மாலை மண்டி தெருவில் நடந்தது. கூட்டத்துக்கு மாவட்ட தலைவர் தசரதன் தலைமை தாங்கினார். மாநில செயலாளர் கார்த்தியாயினி, மாவட்ட செயலாளர் சரவணகுமார், மாவட்ட துணை தலைவர் ஜெகன்நாதன், ஓ.பி.சி.அணி மாவட்ட செயலாளர் எஸ்.கே.மோகன் உள்பட பலர் முன்னிலை வகித்தனர். சிறப்பு அழைப்பாளராக மத்திய கயிறு வாரிய தலைவர் சி.பி.ராதாகிருஷ்ணன் கலந்து கொண்டு பேசினார்.

அப்போது அவர் பேசியதாவது:-

தமிழக அரசியலில் உள்ள கொரோனாவை அழிப்பது தான் தாமரையின் லட்சியம். பா.ஜ.க. எந்த மதத்துக்கும் எதிரானது அல்ல. இந்து மக்களை இழிவாகப் பேசினார்கள். அப்போது ஸ்டாலின் அமைதி காத்தார். இதற்கு தமிழக முதல் -அமைச்சர் மறுப்பு தெரிவிக்கவில்லை. காங்கிரஸ் இதுகுறித்து பேசவில்லை.

நாங்கள் யாரும் மனுஸ்மிருதி புத்தகத்தை பார்த்ததும் இல்லை, படித்ததும் இல்லை. எந்த தவறு இருந்தாலும் அதை சரி செய்யும் உரிமை இந்து மதத்துக்கு தான் உள்ளது. காலத்தால் எதுவெல்லாம் காலாவதி ஆகிறதோ அதை அந்தந்த மதத்தினரே தூக்கி எறிய வேண்டும். இதுவே முற்போக்கு சிந்தனை. பா.ஜ.க. தீண்டாமைக்கு எப்போதும் எதிராக நிற்கும். விடுதலை சிறுத்தைகள் கட்சி தலைவர் தொல்.திருமாவளவன் சாதி அரசியலை செய்து கொண்டிருக்கிறார். அவர் பா.ஜ.க.வில் இணையும் காலம் விரைவில் வருமே தவிர, என்றைக்கும் தாமரையை தமிழகத்தில் வீழ்த்த சாத்தியமில்லை.

காங்கிரஸ்-தி.மு.க. 10 ஆண்டு ஆட்சியில் தமிழகத்திற்கு எத்தனை மருத்துவ கல்லூரிகள் வந்தன. ஆனால் 2-வது முறை ஆட்சிக்கு வந்த மோடி அரசினால் ஒரே ஆண்டில் 11 மருத்துவக்கல்லூரிகள் வந்தன.

ஜல்லிக்கட்டை நிறுத்தியது காங்கிரஸும், தி.மு.க.வும் தான். ஆனால் அதை மீட்டது அ.தி.மு.க.வும், பா.ஜ.க.வும் தான். லஞ்சம், லாவண்யம் இல்லாத அரசு பா.ஜ.க.. முத்தலாக் தடை சட்டம் பெண்ணுரிமைக்காக கொண்டுவரப்பட்டது. நாங்கள் மதமாற்றத்தை மட்டுமே தடுக்கிறோம்.

இவ்வாறு அவர் பேசினார்.

தடையை மீறி பொதுக்கூட்டம் நடத்தப்பட்டதால் சி.பி.ராதாகிருஷ்ணன் மற்றும் மாவட்ட பார்வையாளர் வெங்கடேசன், பொது செயலாளர்கள் ஆர்.ஜெ.பாஸ்கர், பாபு உள்பட 350-க்கும் மேற்பட்ட பா.ஜ.க.வினரை போலீசார் கைது செய்தனர். இந்த பொதுக்கூட்டத்தையொட்டி மண்டி வீதி முழுவதும் போலீசாரின் பாதுகாப்பு வளையத்துக்குள் கொண்டு வரப்பட்டது. ஏராளமான போலீசார் பாதுகாப்பு பணியில் ஈடுபட்டிருந்தனர்.

இதேபோல் ராணிப்பேட்டையில் தடையை மீறி பா.ஜ.க. பொதுக்கூட்டத்தில் கலந்துகொண்ட முன்னாள் மத்திய மந்திரி பொன் ராதாகிருஷ்ணன் உள்பட 300 பேர் கைது செய்யப்பட்டனர்.

வேலூர்:

வேலூர் மண்டல மாசுக்கட்டுப்பாட்டு வாரிய இணை முதன்மை சுற்றுச்சூழல் பொறியாளராக பணியாற்றி வருபவர் பன்னீர்செல்வம். இவர் முறைகேடாக பணம் பெற்றதாக எழுந்த புகாரை அடுத்து கடந்த மாதம் வேலூர் லஞ்ச ஒழிப்பு போலீசார் காட்பாடி மற்றும் ராணிப்பேட்டை சிப்காட்டில் உள்ள அவரது வீடுகளில் திடீர் சோதனை நடத்தினர்.

அப்போது அவரிடம் இருந்து ரூ.3 கோடியே 58 லட்சத்து 93 ஆயிரம் மற்றும் 3½ கிலோ தங்க நகைகள், 6½ கிலோ வெள்ளி பொருட்கள் பறிமுதல் செய்யப்பட்டது. மேலும் அவரது மனைவியின் வங்கி லாக்கரில் இருந்தும் தங்க நாணயங்கள் பறிமுதல் செய்யப்பட்டது. பறிமுதல் செய்யப்பட்ட நகைகள் வேலூர் தலைமை நீதித்துறை கோர்ட்டில் ஒப்படைக்கப்பட்டது. மேலும் அவரை கைது செய்ய லஞ்ச ஒழிப்பு போலீசார் தீவிரம் காட்டி வருகின்றனர்.

இந்த நிலையில் பன்னீர்செல்வம், தலைமை நீதித்துறை கோர்ட்டில் முன் ஜாமீன் கேட்டு மனுதாக்கல் செய்திருந்தார். இந்த மனு மீது விசாரணை மேற்கொள்ளப்பட்டது. மனுவை விசாரித்த நீதிபதி ஆனந்தன், பன்னீர்செல்வத்தின் முன்ஜாமீன் மனுவை தள்ளுபடி செய்து உத்தரவிட்டார்.

வேலூர்:

வேலூர் மாநகராட்சி ஸ்மார்ட் சிட்டி திட்டத்தின் கீழ் தேர்வு செய்யப்பட்டு பல்வேறு வளர்ச்சி பணிகள் நடைபெற்று வருகிறது. இப்பணிகளை கலெக்டர் சண்முகசுந்தரம் நேற்று அலுவலர்களுடன் சென்று ஆய்வு மேற்கொண்டார்.

அதன்படி வேலூர் கஸ்பா பகுதியில் ரூ.5 கோடி மதிப்பில் அமைக்கப்பட்டுள்ள விளையாட்டு மைதானத்தில் உள்ள நடைபாதை, கிரிக்கெட் மைதானம், பார்வையாளர்கள் அமரும் இடம், ஓடுதளம், நடைபாதை மற்றும் 300 பேர் அமரும் வகையில் அமைக்கப்படும் அரங்கத்திற்கான இடங்களையும், அங்கு நடைபெற்று வரும் பணிகளையும் ஆய்வு செய்தார்.

அதைத்தொடர்ந்து வேலூர் புதிய பஸ் நிலையத்தில் ரூ.46 கோடியே 51 லட்சம் மதிப்பில் 70 பஸ்கள் நிற்க கூடிய வகையில், பயணிகள் காத்திருப்பு அறை, முதல் தளத்தில் வணிக வளாகம் அமைக்கப்படுவதையும், அந்த பணிகளுக்கு உபயோகப்படுத்தப்படும் இரும்பு ராடுகள், சிமெண்டு கலவைகள் தரம் குறித்து ஆய்வு செய்தார். அப்போது அதிகாரிகள் 40 சதவீத பணிகள் முடிக்கப்பட்டுள்ளதாக அவரிடம் தெரிவித்தனர்.

அருகில் ரூ.11 கோடி மதிப்பில் 42 கார்கள் மற்றும் ஆயிரம் இருசக்கர வாகனம் நிறுத்தும் வகையில் பல்வேறு வசதிகளுடன் கட்டப்பட்டு வரும் மல்டி லெவல் கார் பார்க்கிங் கட்டிடத்தை பார்வையிட்டார். 90 சதவீதப் பணிகள் முடிவடைந்துள்ள நிலையில் வர்ணம் பூசுகின்ற பணியை விரைந்து முடித்து பொது மக்களின் பயன்பாட்டிற்கு கொண்டுவர பணிகளை விரைந்து முடிக்க அறிவுறுத்தினார். அப்போது, முத்துமண்டபம் அண்ணாநகரை சேர்ந்த பொதுமக்கள் தங்களுக்கு பொதுபாதை வேண்டி நடவடிக்கை எடுக்க வேண்டும் என திரண்டு வந்து கலெக்டரிடம் மனு அளித்தனர்.

பின்னர் சர்க்கார் தோப்பு பகுதியில் ரூ.13 கோடியே 24 லட்சம் மதிப்பில் 2.40 மெகாவாட் மின் உற்பத்தி செய்யும் வகையில் 70 சதவீதப் பணிகள் முடிவடைந்துள்ள சோலார் மின் உற்பத்தி திட்ட பணிகளையும், ரூ.69 கோடியே 9 லட்சம் மதிப்பில் நடைபெறும் கழிவுநீர் சுத்திகரிப்பு நிலைய பணிகள், சத்துவாச்சாரி பகுதியில் உள்ள ஊராட்சி ஒன்றிய நடுநிலைப் பள்ளி, ராகவேந்திரா நகர் பகுதியில் தலா ரூ.13 லட்சம் மதிப்பில் கட்டப்படும் 3 அங்கன்வாடி மைய பணிகள், வள்ளலார் பகுதியில் உள்ள அறிவியல் பூங்காவில் நடைபாதை, புது தரை அமைக்கும் பணிகள், சி.எம்.சி. மருத்துவமனை பின்பகுதியில் 1.25 ஏக்கர் பரப்பளவு கொண்ட இடத்தில் ரூ.1 கோடி மதிப்பில் பூங்கா அமைக்கப்படும் இடம் உள்பட மொத்தம் ரூ.147 கோடியே 26 லட்சம் மதிப்பில் நடைபெறும் பல்வேறு பணிகளை கலெக்டர் பார்வையிட்டு ஆய்வு செய்தார்.

இந்த ஆய்வின் போது மாநகராட்சி கமிஷனர் சங்கரன், என்ஜினீயர் சீனிவாசன், அரசு போக்குவரத்து கழக மேலாளர் நடராஜன், வட்டார போக்குவரத்து அலுவலர் செந்தில்வேலன் மற்றும் அதிகாரிகள் பலர் உடன் இருந்தனர்.

குடியாத்தம்:

வேலூர் மாவட்டம் குடியாத்தத்தில் தினமும் நூற்றுக்கும் மேற்பட்டோர் கொரோனா பரிசோதனை செய்து வந்தனர். தற்போது கொரோனா பரிசோதனையும் குறைந்துவிட்டது. கொரோனா தொற்றும் குறைந்துவிட்டது. குடியாத்தத்தில் கொரோனா தொற்றால் பாதிக்கப்பட்டவர்கள் குடியாத்தம், வேலூர் மற்றும் சென்னை மருத்துவமனைகளில் சேர்க்கப்பட்டு சிகிச்சை பெற்று திரும்பினர். 65-க்கும் மேற்பட்டோர் சிகிச்சை பலனின்றி இறந்துள்ளனர்.

குடியாத்தம் தாலுகாவில் வேலூர் மாநகராட்சிக்கு அடுத்தபடியாக கொரோனா தொற்று நோயாளிகள் அதிகம். கொரோனா தொற்று உள்ளவர்களுக்கு சிகிச்சை அளிக்க குடியாத்தத்தில் உள்ள ஒரு தனியார் கல்லூரியில் சிறப்பு வார்டு உருவாக்கப்பட்டது. நோயாளிகள் எண்ணிக்கை படிப்படியாக குறைந்ததால் கல்லூரியில் இருந்த சிறப்பு வார்டு விலக்கிக்கொள்ளப்பட்டது. குடியாத்தம் அரசு மருத்துவமனையில் மட்டும் கொரோனா வார்டு செயல்பட்டு வருகிறது.

இந்த மருத்துவமனையில் கொரோனா பிரிவில் பணியாற்றிய மருத்துவர்கள், செவிலியர்கள், சுகாதாரப் பணியாளர்கள் என பலருக்கும் கொரோனா தொற்று ஏற்பட்டது. அவர்கள் சிகிச்சை பெற்றபின் மீண்டும் அரசு மருத்துவமனையில் பணிக்கு திரும்பினர். இந்த நிலையில் குடியாத்தம் அரசு மருத்துவமனையில் கொரோனா வார்டில் பணியில் இருந்த மருத்துவர்கள் மற்றும் செவிலியர்களுக்கு கொரோனா பரிசோதனை மேற்கொள்ளப்பட்டது.

அதில் பெண் டாக்டர், 2 செவிலியர்கள், ஒரு சுகாதார பணியாளர் என 4 பேருக்கு மீண்டும் கொரோனா தொற்று இருப்பது தெரியவந்தது. குடியாத்தம் பகுதியில் கொரோனா தொற்று குறைந்து வரும் வேளையில், தற்போது கடந்த ஜூலை மாதம் கொரோனா தொற்றால் பாதிக்கப்பட்ட பெண் மருத்துவர், செவிலியர் மற்றும் சுகாதார பணியாளர்களுக்கு மீண்டும் கொரோனா தொற்று இருப்பது பெரும் அச்சத்தை ஏற்படுத்தியுள்ளது.