நாகப்பட்டினம்

வேதாரண்யம்:

வேதாரண்யம் தாலுக்கா கோடியக்கரையில் அதிக அளவில் வி‌ஷத்தன்மையுள்ள ஜெல்லி மீன்கள் காணப்படுகின்றன. கடற்பரப்பில் அதிக அளவில் ஜல்லி மீன்கள் காணப்படுவதால் மீனவர்கள் மீன் பிடிப்பதில் சிக்கல் ஏற்பட்டுள்ளது.

ஆண்டுதோறும் அக்டோபர் முதல் மார்ச் வரை கோடியக்கரையில் மீன்பிடி சீசன் காலமாகும். இந்த மீன்பிடி சீசன் காலத்தில் பல்வேறு மாவட்டங்களை சேர்ந்த மீனவர்கள் தங்கி மீன்பிடிப்பார்கள். சீசன் முடிந்த பிறகு உள்ளூர் மீனவர்கள் மட்டும் சிறிய பைபர் படகில் மீன் பிடிக்க செல்வார்கள்.

தற்போது மீனவர் வலையில் அதிக அளவில் ஜெல்லி மீன்கள் சிக்குகின்றன. இதனால் வலைகளில் முறுக்கு ஏற்பட்டு மீன்பிடிக்க முடியாமல் மீனவர்கள் கரைதிரும்புகின்றனர்.

இது குறித்து கோடியக்கரை முன்னாள் மீனவர் நலச்சங்க சித்ரவேலு கூறும்போது, கோடியக்கரையில் தற்போது 100-க்கும் மேற்பட்ட பைபர் படகுகள் மீன்பிடித் தொழிலில் ஈடுபட்டு வருகின்றனர். மீனவர் வலையில் தற்போது அதிக அளவில் ஜெல்லி மீன்கள் சிக்குகின்றன.

இந்த வகையான ஜெல்லி மீன்களை சொரிமீன் என்றும் அழைப்பார்கள். இதில் சொரி, செஞ்சொரி, நெருப்புசொரி, பணங்காசொரி என நான்கு வகை உண்டு. தண்ணீர் நிறத்தில் காணப்படும் இந்த சொரிமீன்கள் உடலில் பட்டால் உயிருக்கு ஆபத்து ஏற்படும்.

மற்ற சொரிமீன்கள் உடம்பில் பட்டால் அரிப்பு ஏற்படும். கோடியக்கரையில் காணப்படுவது பனங்காய் சொரி வகை மீன்கள் ஆகும். இந்த மீன் லேசான அரிப்பு தன்மை உடையது. இந்த மீன்களை இங்கிருந்து பிடித்து பாடம் செய்து சீன நாட்டிற்கு அனுப்பி வைக்கின்றனர் என்றார்.

மயிலாடுதுறை:

மயிலாடுதுறை தருமபுரம் எல்.பி நகர் ஆலமரத்தடி பகுதியில் விவசாய கூலித் தொழிலாளர்கள் குடியிருப்பு உள்ளது. இங்கு பலர் குடிசை வீடுகள் கட்டி வசித்து வருகின்றனர். இந்நிலையில் இன்று காலை திடீரென அப்பகுதியில் உள்ள காமராஜ் என்பவரது வீட்டில் தீப்பிடித்தது. அப்போது காற்று பலமாக வீசியதால் அருகில் உள்ள கணேசன், குமார், முருகன், புனிதவள்ளி ஆகியோரது வீடுகளிலும் தீப்பிடித்தது. இதுபற்றி மயிலாடுதுறை தீயணைப்பு நிலையத்துக்கு தகவல் தெரிவிக்கப்பட்டது.

அதன்பேரில் நிலைய அலுவலர் அன்பழகன் தலைமையில் சம்பவ இடத்துக்கு விரைந்து வந்த தீயணைப்பு படை வீரர்கள் தீ மேலும் பரவாமல் தடுத்து அணைத்தனர்.

இருந்த போதிலும் 5 பேரின் குடிசை வீடுகளும் முற்றிலும் எரிந்து போனது. இதில் வீட்டில் இருந்த பொருட்களும் எரிந்து சேதமானது. மொத்தம் ரூ.10 லட்சம் மதிப்பிலான பொருட்கள் சேதமானதாக கூறப்படுகிறது. மின்கசிவால் இந்த தீவிபத்து ஏற்பட்டதாக கூறப்படுகிறது.

மயிலாடுதுறை:

மணல்மேடு களத்தூர் பகுதியை சேர்ந்தவர் பெருமாள் மகன் ஜெயராமன் (வயது 55). இவர் பந்தநல்லூர் அருகே நெய்வாசல் கிராமத்தில் கடையை வாடகைக்கு பிடித்து வெல்டிங் பட்டறை செய்து வருகிறார்.

இந்த நிலையில் தனது கடையில் மின்சாரம் இல்லாததால் அருகில் உள்ள மற்றொரு கடையில் தனது வெல்டிங் பொருட்களை வைத்து சென்றார்.

சம்பவத்தன்று வெல்டிங் பொருட்களை எடுப்பதற்காக ஜெயராமன் சென்றுள்ளார். அப்போது இரும்பு ‌ஷட்டரை திறக்கும் போது மின் கசிவின் காரணமாக அவரின் மீது மின்சாரம் பாய்ந்து சம்பவ இடத்திலேயே மயக்க மடைந்தார்.

அக்கம் பக்கத்தினர் அவரை மீட்டு மயிலாடுதுறை அரசு மருத்துவமனையில் சிகிச்சைக்காக சேர்த்தனர். அங்கு சிகிச்சை பலனின்றி இறந்தார்.

இதுகுறித்து பந்தநல்லூர் போலீசார் ஜெயராமனின் இறப்பு சந்தேக மரணம் என்று வழக்குப்பதிவு செய்தனர். இதையடுத்து திருப்பனந்தாள் அரசு மருத்துவமனைக்கு ஜெயராமன் உடலை பிரேத பரிசோதனைக்கு கொண்டு வந்தபோது அப்பகுதி கிராம மக்கள் மின்சாரம் பாய்ந்து இறந்து போன ஜெயராமனுக்கு நிவாரணம் வழங்க வேண்டும். சந்தேக மரணத்தை, விபத்து மரணமாக போலீசார் மாற்ற வேண்டும் என்று கூறி கோ‌ஷங்கள் எழுப்பி அரசு மருத்துவமனையை முற்றுகையிட்டனர்.

தகவலறிந்த போலீசார் கிராம மக்களிடம் பேச்சு வார்த்தை நடத்தினர். உரிய நடவடிக்கை எடுக்கப்படும் என்று உறுதி அளித்ததால் கிராம மக்கள் கலைந்து சென்றனர். இதனால் சிறிது நேரம் பரபரப்பு நிலவியது.

வேதாரண்யம்:

நாகை மாவட்டம் வேதாரண்யத்தை அடுத்த கோடியக்கரையை சேர்ந்தவர் குமார் (வயது 40), டிராக்டர் டிரைவர். இவரும், அதே பகுதியை சேர்ந்த கபில் (26) என்பவரும் கடந்த 6-ந் தேதி டிராக்டரில் சென்றனர். குமார் டிராக்டரை ஓட்டி சென்றார். அப்போது காற்று பலமாக வீசியதால் டிராக்டர் நிலைதடுமாறி பள்ளத்தில் கவிழ்ந்தது. இதில் கீழே விழுந்த குமார் மீது டிப்பர் ஏறியது. இதில் அவர் படுகாயமடைந்தார். கபில் லேசான காயத்துடன் தப்பினார்.

இந்த சம்பவத்தில் படுகாயமடைந்த குமாரை மீட்டு வேதாரண்யம் அரசு ஆஸ்பத்திரியில் சிகிச்சை அளித்தனர். பின்னர் அவர் தஞ்சை மருத்துவக் கல்லூரி ஆஸ்பத்திரியில் அனுமதிக்கப்பட்டு சிகிச்சை பெற்று வந்தார். அங்கு சிகிச்சை பலன் அளிக்காமல் குமார் நேற்று இரவு பரிதாபமாக இறந்தார்.

இதுபற்றிய புகாரின் பேரில் வேதாரண்யம் போலீசார் வழக்குப்பதிவு செய்து விசாரணை நடத்தினர்.

வேதாரண்யத்தை அடுத்த கரியாபட்டினம் சந்தன மாரியம்மன் கோவில் தெருவை சேர்ந்த ஆறுமுகம் மகன் குமார் (வயது 39). இவர் தனியார் உப்பு கம்பெனியில் ஊழியராக வேலை பார்த்து வந்தார். அவர் நேற்று மோட்டார் சைக்கிளில் அதே பகுதியில் உள்ள சோமநாதர் கோவிலடி என்ற இடத்தில் சென்றபோது மோட்டார் சைக்கிள் டயர் வெடித்து எதிரே வந்த இன்னொரு மோட்டார் சைக்கிள் மீது மோதினார். இதில் குமார் தலையில் பலத்த காயம் ஏற்பட்டது. அவரை மீட்டு வேதாரண்யம் அரசு ஆஸ்பத்திரியில் முதலுதவி சிகிச்சை அளித்தனர். பின்னர் அவர் மேல் சிகிச்சைக்காக தஞ்சை மருத்துக்கல்லூரி ஆஸ்பத்திரியில் அனுமதிக்கப்பட்டார். அங்கு அவர் சிகிச்சை பலன் அளிக்காமல் பரிதாபமாக இறந்தார்.

இதுபற்றிய புகாரின் பேரில் வேதாரண்யம் போலீசார் வழக்குப்பதிவு செய்து விசாரணை நடத்தி வருகின்றனர்.

மயிலாடுதுறை:

மயிலாடுதுறை அருகே தலைஞாயிறுராமசாமி கூட்டுறவு சர்க்கரை ஆலை ஊழியர்கள் தொ.மு.ச தலைவர் டிஎஸ்.குமார் தலைமையில் ஆலை நுழைவு வாயில் முன்பு ஆலை பணியாளர்கள் உண்ணாவிரதம் போராட்டம் நடைபெற்றது.

இதில் தி.மு.க. தேர்தல் பணிக்குழு உறுப்பினரும் முன்னாள் எம்.எல்.ஏ. வுமான குத்தாலம்.கல்யாணம் கண்டன உரையாற்றினார். இதில் 2018-19ஆலை ஊழியர்களுக்கு ஊதியத்தை உடனே வழங்கவேண்டும். அதே போல் ஆலைக்கு நிரந்தர மேலாண்மை இயக்குனர் நியமிக்க வேண்டும். நடப்பு ஆண்டு கரும்பு அரவை அரசு உடனடியாக துவங்க நடவடிக்கை எடுக்க வேண்டும் என வலியுறுத்தி உண்ணாவிரத போராட்டம் நடைபெற்றது.

இதில் எஸ்.கமலநாதன். பீ.மோகன்.ஐ.ஜெயபால் உள்பட பலர் கலந்து கொண்டனர்.