மயிலாடுதுறை

சீர்காழி:

மயிலாடுதுறை மாவட்டம் சீர்காழி துணை போலீஸ் சூப்பிரண்டு அலுவலகம் எதிரே பெரியார் சிலை உள்ளது. இந்த சிலைக்கு கடந்த சில மாதங்களுக்கு முன்பு போலீசார் சார்பில் பாதுகாப்பு கூண்டு அமைக்கப்பட்டது.

இந்த நிலையில் நேற்று மதியம் பெரியார் சிலைக்கு மாலை அணிவித்து நெற்றியில் விபூதி, குங்குமப் பொட்டு வைத்து அவமதிக்கப்பட்ட புகைப்படம் முகநூலில் பரவியதால் பரபரப்பு ஏற்பட்டது.

இதுகுறித்து தகவல் அறிந்த சீர்காழி போலீசார் உடனடியாக அங்கு சென்று பெரியார் சிலையில் அணிவிக்கப்பட்டு இருந்த மாலைகளை அகற்றி, விபூதி, குங்கும பொட்டு ஆகியவற்றை அழித்து சிலையை சுத்தம் செய்தனர். இந்த நிலையில் பெரியார் சிலை அவமதிக்கப்பட்ட தகவல் அறிந்து பெரியார் திராவிடர் கழகத்தினர் சிலை முன்பு குவிந்தனர்.

பெரியார் சிலைக்கு விபூதி, குங்குமம் இட்ட நபர்களை உடனடியாக கண்டுபிடித்து கைது செய்ய வேண்டும் என அவர்கள் வலியுறுத்தினர். தொடர்ந்து சீர்காழி போலீஸ் நிலையத்தில் இதுகுறித்து புகார் அளித்தனர்.

சீர்காழி:

சீர்காழி நகராட்சிக்கு உட்பட்ட பழைய பஸ் நிலையம் அருகே இரட்டை காளியம்மன் கோவில் தெருவில் கழிவுநீர் வடிகால் வாய்க்கால் உள்ளது. இந்த வாய்க்காலில் பழைய பஸ் நிலையத்தில் உள்ள வணிக நிறுவனங்கள் மற்றும் நகராட்சி கழிப்பிட கட்டிட கழிவுநீர் விடுவதால் தொடர்ந்து சுகாதாரக்கேடு ஏற்படுவதாக கூறி பொதுமக்கள் சீர்காழி நகராட்சியில் புகார் தெரிவித்து வந்தனர். ஆனால் இதுவரை நடவடிக்கை எடுக்காததால் நேற்று ஆத்திரமடைந்த இரட்டை காளியம்மன் கோவில் தெருவை சேர்ந்த பொதுமக்கள் சீர்காழி நகராட்சி அலுவலகத்தை முற்றுகையிட்டு நகராட்சி ஆணையரிடம் இரட்டை காளி அம்மன் கோவில் தெருவில் உள்ள வடிகால் வாய்க்காலில் கழிவுநீர் விடுவதற்கு எதிர்ப்பு தெரிவித்தனர். இதனைத் தொடர்ந்து சம்பவ இடத்திற்கு நேரில் சென்ற நகராட்சி ஆணையர் தமிழ்செல்வி வரும் காலங்களில் வடிகாலில் கழிவுநீர் விடாத வகையில் நடவடிக்கை எடுக்கப்படும் என தெரிவித்தார். அதன்பேரில் போராட்டக்காரர்கள், போராட்டத்தை கைவிட்டு கலைந்து சென்றனர்.

கொள்ளிடம்:

மயிலாடுதுறை மாவட்டம் கொள்ளிடம் அருகே புத்தூரில் உள்ள சீனிவாசா சுப்பராய அரசு தொழில்நுட்ப கல்லூரியில் கொள்ளிடம் வட்டார அளவிலான தொடக்கப்பள்ளி, உயர்நிலைப்பள்ளி மற்றும் மேல்நிலைப்பள்ளி தலைமை ஆசிரியர்கள், கிராம நிர்வாக அலுவலர்கள் மற்றும் கிராம உதவியாளர்களுக்கு தடுப்பூசி குறித்த விழிப்புணர்வு முகாம் நேற்று நடைபெற்றது.

வட்டார மருத்துவ அலுவலர் டாக்டர் ரமேஷ்குமார் முகாமை தொடங்கி வைத்து பேசினார். அப்போது அவர் கூறியதாவது:-

கொள்ளிடம் பகுதியில் இன்று (அதாவது நேற்று) முதல் 60 வயதை கடந்தவர்களுக்கு கொரோனா தடுப்பூசி போடும் பணி தொடங்கி உள்ளது.

முதல் நாளில் 60 வயதை கடந்த 65 பேர் ஆர்வத்துடன் வந்து கொரோனா தடுப்பூசி போட்டுக் கொண்டனர். இந்த தடுப்பூசி முற்றிலும் இலவசமாக போடப்படுகிறது. சர்க்கரை நோய், ரத்த அழுத்த நோய், இதய நோய், புற்றுநோய் ஆகிய இணை நோய்களினால் பாதிக்கப்பட்ட 45 வயதுக்கு மேற்பட்டவர்களுக்கும், 60 வயதுக்கு மேற்பட்ட அனைவருக்கும் கொரோனா தடுப்பூசி முற்றிலும் இலவசமாக போடப்படும்.

மருத்துவமனைகளில் நடைபெறும் முகாமில் அனைவரும் தவறாமல் கலந்து கொண்டு கொரோனா தடுப்பூசி போட்டுக்கொள்ள வேண்டும். தடுப்பூசி போட வருபவர்கள் பான்கார்டு, ஓட்டுனர் உரிமம், குடும்ப அட்டை, ஸ்மார்ட் கார்டு, ஆதார் அட்டை, வங்கி கணக்கு புத்தகம் ஆகியவற்றில் ஏதாவது ஒன்றின் நகலை அவசியம் கொண்டு வரவேண்டும்.

இவ்வாறு அவர் கூறினார்.

முகாமில் வட்டார மருத்துவ மேற்பார்வையாளர் ராஜாராமன் சுகாதார ஆய்வாளர்கள் கருணாகரன் சதீஷ் மற்றும் மருத்துவ அலுவலர்கள் சுகாதார ஆய்வாளர்கள் செவிலியர்கள் உள்பட பலர் கலந்து கொண்டனர்.

பொறையாறு:

தமிழகத்தில் சட்டமன்ற தேர்தல் அடுத்த மாதம் (ஏப்ரல்) 6-ந் தேதி நடைபெறுகிறது. இதனால் தேர்தல் நடத்தை விதிமுறைகள் அமலில் உள்ளது. எனவே தொடர்ந்து தரங்கம்பாடி தாலுகாவில் 3 தேர்தல் பறக்கும் படை அமைக்கப்பட்டது. இவர்கள் பல்வேறு குழுக்களாக பிரிந்து வாகன சோதனையில் ஈடுபட்டு வருகின்றனர். அதேபோல் நேற்று பறக்கும் படை தாசில்தார் ராகவன் தலைமையில் சிறப்பு சப்-இன்ஸ்பெக்டர் குருமூர்த்தி மற்றும் போலீசார் கொண்ட குழுவினர் பொறையாறு, ராஜீவ்புரம், தரங்கம்பாடி, கருவி, கிடாரங்கொண்டான், கீழையூர், செம்பனார்கோவில், பரசலூர், ஆறுபாதி, உள்ளிட்ட பகுதிகளில் வாகன சோதனையில் ஈடுபட்டனர். மேலும் பறக்கும் படையினர் ரோந்து பணியில் ஈடுபட்டு அரசியல் கட்சியினர் சாலை ஓரங்களில் வைத்திருந்த பேனர்களை அகற்றினர்.

திருக்கடையூர்:

மயிலாடுதுறை மாவட்டம் திருக்கடையூர் அருகே சின்னமேட்டில் கன்னிகா பரமேஸ்வரி அம்மன் கோவில் உள்ளது. இந்த கோவிலில் நேற்று மாசிமக திருவிழா தொடங்கியது. இந்த திருவிழாவை முன்னிட்டு கடற்கரையில் படகு போட்டி நடைபெற்றது. இதில் 25 படகுகளும், ஒவ்வொரு படகிற்கும் 3 மீனவர்கள் வீதம் கலந்து கொண்டனர். கடற்கரையில் இருந்து 500 மீட்டர் தூரத்தில் எல்லையில் படகு நிறுத்தி வைக்கப்பட்டு இருக்கும். அந்த படகில் இருப்பவர்களிடம் இருந்து போட்டியில் கலந்து கொள்பவர்கள் கொடியை பெற்று திரும்பி கரைக்கு வரவேண்டும் என நிர்ணயிக்கப்பட்டு இருந்தது.

அதன்படி நேற்று காலை 10 மணிக்கு படகு போட்டி தொடங்கியது. பின்னர் போட்டியில் வெற்றி பெற்றவர்களுக்கு முதல் பரிசு ரூ.10 ஆயிரமும், 2-வது பரிசு ரூ.7 ஆயிரத்து 500-ம், 3-வது பரிசு ரூ.5 ஆயிரமும், 4-வது பரிசு ரூ.4 ஆயிரமும், 5-வது பரிசு ரூ.3 ஆயிரமும் வழங்கப்பட்டன.

இதனை மீனவ கிராம மக்கள் ஏராளமானோர் கண்டு களித்தனர். இதற்கான ஏற்பாடுகளை சின்னமேடு ஊர் பஞ்சாயத்தார்கள் மற்றும் கிராம மக்கள் செய்து இருந்தனர்.

மயிலாடுதுறை:

மயிலாடுதுறை மாவட்டம் திருவெண்காடு அருகே உள்ள பெருந்தோட்டம் பீச் தெருவில் வசித்து வந்தவர் பாலகிருஷ்ணன் மகள் கலையழகி(வயது 26). எம்.சி.ஏ. பட்டதாரியான இவர், சென்னையில் தனியார் நிறுவனத்தில் வேலை பார்த்து வந்தார்.

கடந்த சில நாட்களுக்கு முன்பு தனது சொந்த ஊரான பெருந்தோட்டத்திற்கு வந்தார். இந்த நிலையில் நேற்று அவரது தாயார் தமிழ்ச்செல்வி, உறவினர் திருமணத்திற்காக வைத்தீஸ்வரன் கோவில் சென்று விட்டார்.

திருமண நிகழ்ச்சியில் கலந்து கொண்டு விட்டு நேற்று மாலை தமிழ்ச்செல்வி தனது வீட்டிற்கு வந்தார். அப்போது அவர் கண்ட காட்சியால் அவர் அதிர்ச்சியில் உறைந்து போனார். வீட்டில் தனது மகள் கலையழகி ரத்த காயங்களுடன் இறந்து கிடந்ததை பார்த்து கதறி அழுதார்.

அவரது அழுகுரல் கேட்டு அக்கம் பக்கத்தினர் அங்கு ஓடி வந்து பார்த்தனர். அப்போதுதான் வீட்டில் தனியாக இருந்த கலையழகியை மர்ம நபர்கள் கொலை செய்தது தெரிய வந்தது.

இதுகுறித்து போலீசாருக்கு தகவல் தெரிவிக்கப்பட்டது. தகவல் அறிந்த சீர்காழி போலீஸ் துணை சூப்பிரண்டு யுவ ப்பிரியா, திருவெண்காடு போலீஸ் இன்ஸ்பெக்டர் ராஜேஷ், சப்-இன்ஸ்பெக்டர்கள் குருமூர்த்தி, அழகேந்திரன், தனிப்பிரிவு சப்-இன்ஸ்பெக்டர் ஆதவன் ஆகியோர் சம்பவ இடத்திற்கு விரைந்து சென்று பார்வையிட்டனர்.

பின்னர் இந்த கொலை தொடர்பாக விசாரணை நடத்தினர். அதனைத்தொடர்ந்து கொலை செய்யப்பட்ட கலையழகியின் உடலை கைப்பற்றி பிரேத பரிசோதனைக்காக சீர்காழி அரசு மருத்துவமனைக்கு அனுப்பி வைத்தனர். கலையழகியை கொலை செய்தவர்கள் யார்? இந்த கொலைக்கான காரணம் என்ன? என்பது குறித்து விசாரணை நடத்தி வரும் போலீசார் கொலையாளிகளை வலைவீசி தேடி வருகிறார்கள்.