செய்திகள்

சென்னை:

சட்டசபையில் இன்று கேள்வி நேரம் முடிந்ததும் மத்திய இணைய தள நூலகம் தொடர்பாக மு.க.ஸ்டாலின் பேசினார். அப்போது அவர் கூறியதாவது:-

மத்திய அரசு தொடங்கியுள்ள இணைய தள நூலகத்தில் ஆங்கிலம், இந்தி, சமஸ்கிருத புத்தகங்கள் இடம் பெற்றுள்ளன. ஆனால் தமிழ் மொழி முழுமையாக புறக்கணிக்கப்பட்டுள்ளது. இதுமட்டுமல்ல தென்னக மொழிகளான மலையாளம், தெலுங்கு, கன்னடம் போன்ற மொழிகளின் நூல்களும் இடம் பெறவில்லை.

தெற்கு, வடக்கு என்று மாநிலங்களை பிளவு படுத்தும் வகையில் மத்திய அரசு நடந்துள்ளது. தமிழ் நாட்டில் சுமார் 3 லட்சம் எழுத்தாளர்கள் எழுதிய 1 கோடி நூல்கள் உள்ளன. தமிழக வரலாறு உள்ளது.

இவையெல்லாம் இணைய தள நூலகத்தில் இடம் பெறவில்லை. ஆனால் வேறு நூல்கள் இடம் பெற்றுள்ளன. தமிழ் உள்ளிட்ட தென் மாநில மொழிகளை புறக்கணித்து மத்திய அரசு சமஸ்கிருத துதி பாடுகிறது.

தமிழக மக்களை இவ்வாறு புறக்கணித்த மத்திய அரசிடம் முதல்-அமைச்சர் பேசி இணைய தள நூலகத்தில் தமிழ்மொழி நூல்கள் இடம் பெற வழிவகை செய்ய வேண்டும் என்றார்.

இதே கருத்தை வலியுறுத்தி சட்டமன்ற காங்கிரஸ் தலைவர் ராமசாமி பேசினார். இதற்கு தமிழ் வளர்ச்சி துறை அமைச்சர் மாபா.பாண்டியராஜன் அளித்த பதில் வருமாறு:-

மத்திய அரசு இந்திய தேசிய இணைய தளத்தை தொடங்கி 5 நாட்கள் ஆகிறது. இந்தியாவில் உள்ள அனைத்து மொழி புத்தகங்களும் இடம் பெற வேண்டும். இந்தியாவின் பெருமையை உலகம் முழுவதும் அறிய வேண்டும் என்பதற்காகவே இதை தொடங்கியிருக்கிறார்கள்.

தமிழ், குஜராத்தி, கன்னடம் உள்ளிட்ட 8 மாநில மொழி புத்தகங்கள் இதில் விரைவில் இடம் பெற உள்ளன. இந்த இணைய தளம் குறித்து மத்திய மந்திரி பிரகாஷ் சவடேகரிடம் தொடர்பு கொண்டு கேட்டபோது நாட்டில் உள்ள அனைத்து மொழி புத்தகங்களும் இந்த இணைய தள நூலகத்தில் இடம் பெறும் என்று கூறினார்.

முதல் கட்டமாக இந்தி, ஆங்கிலம், சமஸ்கிருத நூல்கள் பரீட்சார்த்த முறையில் இடம் பெற்றுள்ளன. அனைத்து மொழிகளும் இடம் பெறுவதற்கான ஏற்பாடுகள் நடந்து வருகின்றன. இதில் 149 தமிழ் அறிஞர்களின் 2 ஆயிரம் புத்தகங்கள் மற்றும் தமிழக அரசு உரிமம் பெற்றுள்ள 10 ஆயிரம் புத்தகங்கள்இந்த கணினி நூலகத்தில் இடம் பெறுகின்றன. இன்னும் 2 வாரத்துக்குள் இதற்கான வடிவமைப்புகள் நிறைவு செய்யப்பட்டு அனைவரும் படிக்கும் நிலை வரும்.

இவ்வாறு அவர் கூறினார்.

பின்னர் பேசிய அமைச்சர் செங்கோட்டையன், “கன்னி மாரா நூலகத்தில் உள்ள 10 ஆயிரம் புத்தகங்கள் இந்த இணைய தள நூலகத்தில் இடம் பெற செய்வதற்கான அனைத்து ஏற்பாடுகளும் செய்யப்பட்டு விட்டது” என்றார். #MKStalin #TNassembly

மன்னார்குடி:

திருவாரூர் மாவட்டம் மன்னார்குடியில், தமிழக அனைத்து விவசாயிகள் சங்கங்களின் ஒருங்கிணைப்பு குழு தலைவர் பி.ஆர்.பாண்டியன், நிரூபர்களுக்கு பேட்டியளித்தார்.

காவிரி மேலாண்மை ஆணைய முதல் கூட்டத்திலேயே ஜூலை மாதத்திற்கு 31.24 டி.எம்.சி தண்ணீரை தமிழகத்திற்கு கர்நாடக மாநிலம் திறந்து விட உத்தரவிட்டதை பாராட்டுகிறோம். இதனால் இந்த ஆண்டு ஒரு போக சம்பா சாகுபடியாவது மேற்கொள்ள முடியும் என நம்புகிறோம்.

ஆணையத்தின் இந்த உத்தரவை காவிரி நீர் பங்கீட்டு ஒழுங்காற்று குழு உடன் நிறைவேற்ற வேண்டும். கர்நாடகாவில் உள்ள அணைகளின் தண்ணீரை அன்றாடம் கணக்கிட்டு பகிர்ந்தளிக்கும் நிர்வாக அதிகாரத்தை ஆணையம் தனது கட்டுப்பாட்டிற்குள் கொண்டு வர வேண்டும்.

சுப்ரீம் கோர்ட்டுக்கு இணையான ஆணைய உத்தரவை நிறைவேற்ற மத்திய, மாநில அரசுகள் உதவிட வேண்டும். இதை யார் மீறினாலும் கோர்ட்டு அவமதிப்பு நடவடிக்கை எடுக்க வேண்டும். உடனடியாக மத்திய தொழில் பாதுகாப்பு படை பாதுகாப்பின் கீழ் கர்நாடக அணைகளை கொண்டு வர வேண்டும்.

இவ்வாறு அவர் கூறினார்.

சென்னை:

அம்மா மக்கள் முன்னேற்றக் கழக துணை பொதுச்செயலாளர் டி.டி.வி.தினகரன் எம்.எல்.ஏ. நிரூபர்களுக்கு பேட்டியளித்தார். அதன் விவரம் வருமாறு:-

கேள்வி:- 8 வழிச் சாலையை எதிர்த்து பேசிய வைகோ, தொல்.திருமாவளவன், திருநாவுக்கரசர் போன்ற தலைவர்கள் தற்போது மக்களைக் கேட்டு முடிவு செய்வோம் என்று சொல்வதன் மூலம் பின் வாங்குவதாக தெரிகிறதே?

பதில்:- பின்வாங்குற செயலாக தெரியலை. அரசாங்கத்திடம் எவ்வளவு சொன்னாலும் கேட்க மாட்டேங்கிறாங்க. மக்களை துன்புறுத்திக் கொண்டிருக்கிறார்கள். ஊடகங்களைப் பார்க்கும் போதே தெரிகிறது. மக்களிடம் கருத்து கேளுங்க. அதுதான் சரி என்று சொல்லி இருக்கலாம்.

கேள்வி:- 8 வழிச்சாலையின் தலைவர்களின் வீரியம் குறைந்தது போல் தெரிகிறதே?

பதில்:- வீரியம் எல்லாம் குறையவில்லை. 6-ந்தேதி திருவண்ணாமலையிலும், 9-ந்தேதி அரூரிலும் கண்டன ஆர்ப்பாட்டத்துக்காக அனுமதி கேட்டிருக்கிறோம். போலீஸ் அனுமதி கொடுக்க வில்லை என்றால் நீதிமன்றம் செல்வோம். நீதிமன்றத்தின் மூலம் நிச்சயம் வாய்ப்பு கிடைக்கும். போராட்டம் நடக்கும்.

கேள்வி:- காவிரி மேலாண்மை ஆணையத்தை எதிர்த்து சுப்ரீம்கோர்ட்டு செல்ல வேண்டும் என்று கர்நாடகத்தில் அனைத்துக் கட்சி சார்பாக முடிவெடுத்திருக்கிறார்கள். தமிழகத்திலும் எதிர்க்கட்சிகள் அனைத்துக் கட்சி கூட்டத்தை நடத்த வேண்டும் என்று கோரியும், தமிழக அரசு சார்பாக இதுவரை எந்த ஒரு பதிலும் சொல்லவில்லையே?

பதில்:- தமிழக அரசு இதுவரை என்னதான் செய்திருக்கிறது? நீதிமன்றம் சரியா முடிவெடுக்கறதால காவிரி மேலாண்மை ஆணையம் அமைக்கப்பட்டிருக்கு. தொடர்ந்து பார்ப்போம். தமிழகத்தில் அரசு ஒன்று இருக்கிறதா? நீங்கதான் நினைக்கிறீங்க. மக்கள் யாரும் அரசு ஒன்று இருப்பதாக பொருட்படுத்தவில்லை. இருக்கிற அரசாங்கமும் மக்களை கஷ்டப்படுத்த தான் இருக்கிறது என்பது மக்களோடு எண்ணம். விரைவில் இந்த அரசாங்கத்துக்கு நல்ல முடிவு வரும்.

கேள்வி:- தொடர்ந்து நீங்க தமிழகம் முழுவதும் சுற்றுப்பயணம் மேற் கொண்டுவர்றீங்க. போற இடங்களில் எல்லாம் உங்களுக்கு எப்படி வரவேற்பு இருக்கு?

பதில்:- வரவேற்பை பற்றி நீங்கள்தான் சொல்லணும்?

கேள்வி:- போற இடங்களில் எல்லாம் அ.தி.மு.க.வோட அடிமட்ட தொண்டர்கள் எல்லாம் உங்கள் பக்கம் இருப்பதாக சொல்லப்படுதே?

பதில்:- உண்மைதான். தொன்னூறு சதவீதத்துக்கு மேலே அம்மாவோட தொண்டர்கள் எங்கக் கூட தான் இருக்காங்க. ஆட்சி அதிகாரத்துல இருக்கிற தால அ.தி.மு.க. என்கிற கட்சி ஓடிக்கிட்டு இருக்கு. ஆட்சியை விட்டு இறங்கினால் அது முழுவதும் எங்களிடம் வந்து விடும்.

இவ்வாறு தினகரன் கூறினார். #ADMK #Dhinakaran

சென்னை:

பெப்சி அலுவலகத்தில் நடிகை குஷ்பு பேட்டி அளித்தார். அதன் விவரம் வருமாறு:-

கேள்வி:- ஜிஎஸ்டி வரி அமலுக்கு வந்து ஒரு ஆண்டு முடிவடைந்தது பற்றி?

பதில்:- வரி கட்டினால் தான் நாடு நன்றாக இருக்கும். ஆனால் ஜி.எஸ்.டி. வி‌ஷயத்தில் அருண் ஜெட்லி, அமித்ஷாவுக்கு தெளிவு இல்லை. தவறுதலாக பல வி‌ஷயங்களை செயல்படுத்தி விட்டார்கள். மன்மோகன் சிங் ஜி.எஸ்.டி.யால் ஜி.டி.பி. குறையும் என்று முன்பே கூறினார். அப்போது அவரை பா.ஜ.க.வினர் திட்டினார்கள். இப்போது அதுதானே நடக்கிறது. வரலாற்றிலேயே இல்லாத அளவிற்கு இந்திய ரூபாயின் மதிப்பு குறைந்து விட்டது. ஜிஎஸ்டியால் ஏகப்பட்ட பொருளாதார பிரச்சினைகள்.

கே:- பெண்களுக்கு பாதுகாப்பில்லாத நாடுகள் பட்டியலில் இந்தியா முதலிடத்தில் இருப்பது பற்றி?

ப:- தாமசன்ராய்ட்டர் என்ற நிறுவனம் கூறியிருக்கிறது. அதை அப்படியே ஏற்றுக்கொள்ள வேண்டிய அவசியம் இல்லை. சில பிரச்சினைகள் இருந்தாலும் இந்தியாவில் பெண்கள் பெரிய அளவில் முன்னேறிக்கொண்டு இருக்கிறார்கள். அதே சமயம் நாட்டில் பெண்கள் மீதான பாலியல் தாக்குதல் அதிகரித்து வருகிறது. 2015- 2016 காலகட்டத்தில் இது தொடர்பாக 39 ஆயிரம் வழக்குகள் பதியப்பட்டுள்ளன.

2013 -ல் இதே நிறுவனம் இதே வி‌ஷயத்தில் இந்தியா நான்காவது இடத்தில் இருப்பதாக சொன்னபோது மோடி ஒரு பெண் தலைவியாக இருக்கும் நாட்டில் இப்படியா? என்று சோனியா காந்தியை பார்த்து கேள்வி கேட்டார். இப்போது நாங்கள் கேள்வி கேட்கிறோம். அவர்கள் மழுப்பலாக பதில் சொல்கிறார்கள்.

கே:- சேலம் சென்னை 8 வழி சாலை பற்றி?

ப:- நாட்டுக்கு வளர்ச்சி தேவை. ஆனால் விவசாயம் பாதிக்க கூடாது. பாதிக்கப்படும் விவசாயிகளுக்கு நியாயமான பதில் இல்லை. ஸ்டெர்லைட் வி‌ஷயத்திலும் மாநில அரசிடம் சரியான பதில் இல்லை.

கே:- சர்கார் படத்தில் விஜய் சிகரெட் பிடித்ததற்காக பா.ம.க. எதிர்ப்பு தெரிவிக்கிறதே?

ப:- எல்லாவற்றிற்கும் கருத்து சொல்லிக்கொண்டே இருந்தால் நம் வேலையை நாம் செய்ய முடியாது.

கே:- தமிழகத்தில் கவர்னர் ஆய்வு தொடர்கிறதே?

ப:- ராமர்-லட்சுமணர் போல இருக்கும் முதல்வரும் துணை முதல்வரும் எங்கள் வேலையை நீங்கள் ஏன் செய்கிறீர்கள்? என்று கேட்கட்டுமே... தம்பி நீங்க இப்ப பேசக்கூடாது என்று டெல்லியில் இருந்து சொல்லி இருக்கிறார்கள். தங்கள் ஆட்சியை 3 ஆண்டுகள் காப்பாற்றுவதற்காக இருவரும் அமைதியாக இருக்கிறார்கள்.

கே:- தமிழக காங்கிரஸ் தலைவர் மாற்றப்படுவார் என்று கூறினீர்களே?

ப:- அதுபற்றி பேச வேண்டாம். அது முடிந்து போன வி‌ஷயம். மீண்டும் மீண்டும் அரைத்தால் புளித்துவிடும். மாற்றுவார்களா என பார்ப்போம்.

கே:- தமிழக மகிளா காங்கிரசில் இருந்து நடிகை நக்மா நீக்கப்பட்டு இருக்கிறாரே?

ப:- எனக்கும் மகிளா காங்கிரசுக்கும் சம்பந்தம் இல்லை. அது மேலிடம் எடுத்த முடிவு.

கே:- கர்நாடகத்தில் ஆளும் காங்கிரஸ் கூட்டணி அரசு காவிரி வி‌ஷயத்தில் மீண்டும் மேல் முறையீடு செய்யப்போகிறதே?

ப:- இது குறித்து கர்நாடக காங்கிரஸ் அமைச்சர் சிவகுமார் தான் பதில் கூற வேண்டும்.

கே:- பாராளுமன்ற தேர்தலில் போட்டியிடுவீர்களா?

ப:- இன்னும் பல மாதங்கள் இருக்கின்றன. என்ன நடக்கும் என்று தெரியாது. எனக்கு சீட் கிடைக்கா விட்டால் எனக்கும் தலைமைக்கும் பிரச்சினை என்பார்கள். கிடைத்து விட்டால் அந்த தைரியத்தில் பேசுகிறார் என்பார்கள். நான் வீடு செல்வதற்குள் என்னவெல்லாமோ நடந்து விடும். அதெல்லாம் வரும் போது பார்க்கலாம்.

இவ்வாறு அவர் கூறினார். #Kushboo #ADMK

கரூர்:

தமிழ்நாடு கொங்கு இளைஞர் பேரவையின் நிறுவன தலைவர் தனியரசு எம்.எல்.ஏ. கரூரில் நிரூபர்களுக்கு பேட்டி அளித்தார். அப்போது அவர் கூறியதாவது:-

தமிழகத்தில் வளர்ச்சி திட்டங்கள் அவசியம் தேவை. சேலம்-சென்னை 8 வழி பசுமை சாலை திட்டத்தால் பாதிக்கக்கூடிய விவசாயிகளின் நிலம், மற்றும் வீடுகளுக்கு சந்தை மதிப்பை விட 4 மடங்கு கூடுதலாக இழப்பீடு வழங்க வேண்டும்.

பாதிக்கப்படும் மக்கள் மற்றும் விவசாயிகளுக்கு மாற்று இடம் போன்றவற்றினை உறுதி செய்த பின்னர் நிலத்தை அளந்து எடுக்க வேண்டும். அதற்கு முன்பாக நிலத்தை அளப்பது, எடுப்பது போன்ற நடவடிக்கைகளில் ஈடுபட்டால் மக்களுடம் இணைந்து கொங்கு இளைஞர் பேரவை போராடும். அந்த வகையில் சாலையே வேண்டாம் என அன்புமணி ராமதாஸ் போன்றவர்கள் நிராகரிக்ககூடாது.

மத்திய மோடி அரசு தங்களின் ஆட்சி இல்லாத மாநிலங்களில் கவர்னரை வைத்து கொண்டு உரிமையை பறிக்கும் விதத்தில் செயல்படுவது கூட்டாட்சி தத்துவத்துக்கு எதிரானது. அந்த வகையில் மாநில சுயாட்சியை காக்கும் வகையில் தமிழக கவர்னருக்கு எதிராக கருப்புக்கொடி போராட்டம் நடத்தி வரும் தி.மு.க. செயல் தலைவர் மு.க.ஸ்டாலினை தமிழ்நாடு கொங்கு இளைஞர் பேரவை வரவேற்கிறது. ஜெயலலிதா மறைவுக்கு பின்னர் கட்சியில் ஏற்பட்டுள்ள பிளவே இதற்கு காரணமாகிவிட்டது.

கவர்னர் ஆய்வினை எதிர்க்க முதல்வர் மற்றும் துணை முதல்வருக்கு உள்ளூர எண்ணம் உள்ளது. சட்டசபையில் தாங்கள் பெரும்பான்மையை நிரூபித்த பின்னர் இதில் ஒரு முடிவு எடுப்பார்கள் என்று நம்புகிறேன். தமிழக முதல்வராக ஜெயலலிதா இருந்திருந்தால் கவர்னர் ஆய்வு செய்ய அனுமதித்து இருக்க மாட்டார்.

இவ்வாறு அவர் கூறினார். #Jayalalitha

புதுச்சேரி:

தி.மு.க. மகளிரணி மற்றும் மகளிர் தொண்டரணி சார்பில் கருணாநிதி பிறந்த நாள் விழா கருத்தரங்கம் புதுவை கம்பன் கலையரங்கில் நடந்தது.

கருத்தரங்கிற்கு கனிமொழி எம்.பி. தலைமை தாங்கினார். மாற்று திறணாளிகளுக்கு சக்கர நாற்காலிகளை வழங்கி பேசினார். அவர் பேசியதாவது:-

ஜனாதிபதி, கவர்னர் பதவிகள் நியமன பதவிகளாகும். மக்களால் தேர்வு செய்யப்பட்ட பிரதிநிதிகள் மூலமாக அவர்கள் தேர்வு செய்யப்படுகிறார்கள். எனவே மக்கள் பிரதிநிதிகள் பரிந்துரைகள் படி அவர்கள் செயல்பட வேண்டும்.

தமிழகத்தில் வளர்ச்சி மிகவும் பாதிக்கப்பட்டுள்ளது. அதே போல் புதுவை கவர்னர் கிரண்பேடியால் புதுவை மாநில வளர்ச்சியும் பாதிக்கப்பட்டுள்ளது.

தற்போது நாட்டில் பெண்களுக்கு பாதுகாப்பு இல்லாத சூழ்நிலை நிலவி வருகிறது. மத்தியில் ஆளும் பாரதிய ஜனதா இந்து, இந்தி, இந்துஸ்தாகளை உருவாக்க முனைப்பு காட்டி வருகிறது. அதன்படி நடந்தால் சிறு பான்மையின மக்கள், தலித் மக்கள், பெண்கள் ஆகியோர் அடிமைகள் ஆக்கப்படுவார்கள்.

எனவே மத்தியில் ஆளும் மதவாதிகளை தூக்கி எறிய வேண்டும், நமது உரிமைகள் நிலைபெற மத்தியில் ஆட்சி மாற்றம் வரவேண்டும்.

கருத்தரங்கில் புதுவை முதல்-அமைச்சர் நாராயணசாமி, விடுதலை சிறுத்தைகள் கட்சி தலைவர் தொல். திருமாவளவன், தி.மு.க. செயல் திட்டகுழு உறுப்பினர் ஜெகத்ரட்சகன், திண்டுக்கல் முன்னாள் எம்.எல்.ஏ. பாலபாரதி ஆகியோர் சிறப்புரையாற்றினர்.

கருத்தரங்கை தொடர்ந்து கனிமொழி எம்.பி. நிருபர்களுக்கு பேட்டி அளித்தார்.

அப்போது அவர் கூறுகையில், காவிரி மேலாண்மை ஆணையத்தில் தமிழகத்திற்கு 31.24 டி.எம்.சி. தண்ணீரை கர்நாடக அரசு திறந்து விட வேண்டும். இது நடைமுறைக்கு வந்தால் விவசாயிகள் பயனடைவார்கள். சென்னை-சேலம் பசுமை வழிசாலை திட்டத்தில் மக்களின் கருத்தை கேட்காமல் அரசு செயல்பட்டு வருகிறது என்றார். #Kanimozhi #GovernorKiranBedi