விருதுநகர்

விருதுநகர்:

விருதுநகர் அல்லல்பட்டியை சேர்ந்த 43 வயது மதிக்கத்தக்க ஒருவர் தனியார் கண்ணாடி தயாரிப்பு நிறுவனத்தில் தொழிலாளியாக வேலை பார்த்து வந்தார். இவரது மனைவி பிளாஸ்டிக் கம்பெனியில் பணிபுரிகிறார்.

அவர்களுக்கு 2 மகள்கள் உள்ளனர். முதல் மகளுக்கு 14 வயது, 2வது மகளுக்கு 13 வயது. முதல் மகள் 9ம் வகுப்பும், 2வது மகள் 8ம் வகுப்பும் படித்து வருகின்றனர். அவர்கள் இருவரும் விருதுநகரில் உள்ள தனியார் பெண்கள் மேல்நிலைப்பள்ளியில் படிக்கின்றனர்.

இந்த நிலையில் 9ம் வகுப்பு படிக்கும் தொழிலாளியின் மகள் பள்ளியில் வகுப்பை கவனிக்காமல் சோகமாக இருந்திருக்கிறார். இதனை கவனித்த வகுப்பு ஆசிரியை அவரது நோட்டை வாங்கி பார்த்திருக்கிறார். அப்போது அதில், “இனியும் வாழக்கூடாது” என எழுதி இருந்தார்.

அதுகுறித்து ஆசிரியை, மாணவியிடம் கேட்டிருக்கிறார். அதற்கு அவர் தனக்கு வாழ விருப்பம் இல்லை என தெரிவித்திருக்கிறார். என்ன காரணம் என்று மாணவியிடம் ஆசிரியை கேட்டுள்ளார். அப்போது தனது தந்தையே தனக்கு பாலியல் தொல்லை கொடுத்து வருவதாக தெரிவித்தார்.

இதனால் அதிர்ச்சி அடைந்த வகுப்பு ஆசிரியை பள்ளியின் தலைமை ஆசிரியருக்கு தகவல் தெரிவித்தார். மாணவியின் நிலை கண்டு மனம் வருந்திய அவர்கள், அதுபற்றி போலீசில் புகார் செய்ய முடிவு எடுத்தனர். மாணவி பாலியல் தொல்லைக்கு ஆளானது குறித்து விருதுநகர் கிழக்கு போலீஸ் நிலையத்திற்கு தகவல் கொடுத்தனர்.

இதையடுத்து பாதிக்கப்பட்ட மாணவி மற்றும் அவரது தாயிடம் போலீசார் விசாரணை நடத்தினர். அப்போது மாணவி தனக்கு நேர்ந்த அவலம் குறித்து திடுக்கிடும் தகவல்களை வெளியிட்டிருக்கிறார்.

மாணவியின் பெற்றோர் இருவரும் தினமும் காலையில் வேலைக்கு சென்று விட்டு மாலையிலேயே வீடு திரும்புவார்களாம். அக்காள், தங்கை இருவரும் சேர்ந்தே பள்ளிக்கு சென்று வந்துள்ளனர்.

இந்த நிலையில் மாணவி உடல்நலம் பாதித்து பள்ளிக்கு செல்லாமல் வீட்டில் இருக்கும் நாட்களில் அவரது தந்தை வேலைக்கு செல்லாமல் வீட்டில் இருப்பாராம். அப்போது அவர் மகள் என்றும் பாராமல் மாணவிக்கு செக்ஸ் தொல்லை கொடுத்திருக்கிறார்.

அதுமட்டுமின்றி தினமும் இரவில் மாணவியின் தாய் மற்றும் தங்கை ஆகிய இருவரும் தூங்கிய பிறகு மாணவியிடம் சில்மிஷத்தில் ஈடுபட்டிருக்கிறார். அதற்கு அவர் மறுப்பு தெரிவித்தால் அடித்து பணிய வைத்துள்ளார்.

மேலும் இதுபற்றி யாரிடமாவது கூறினால் தாய் மற்றும் தங்கையை கொன்று விடுவேன் என மிரட்டி இருக்கிறார். தந்தையின் மிரட்டலுக்கு பயந்து மாணவியும் அவரது செயல் குறித்து யாரிடமும் கூறாமல் இருந்திருக்கிறார்.

கடந்த ஆண்டு ஜனவரி மாதம் முதல் தற்போது வரை தந்தையின் பாலியல் தொல்லையால் மாணவி அவதிக்குள்ளாகி இருக்கிறார். இந்த நிலையில்தான் மாணவியின் செயல்பாட்டை கவனித்த வகுப்பு ஆசிரியை, அவரிடம் விசாரித்தபோது மாணவிக்கு தந்தை பாலியல் தொல்லை கொடுத்த தகவல் வெளியானது.

மாணவி பாலியல் தொல்லைக்கு உள்ளானது குறித்து அவரது தாய் போலீசில் புகார் செய்தார். அதன்பேரில் மாணவியின் தந்தை மீது போலீசார் வழக்குப்பதிந்து கைது செய்தனர். அவர் மீது போக்சோ சட்டப்பிரிவு மற்றும் கொலைமிரட்டல் வழக்கு பதியப்பட்டுள்ளது.

பள்ளி மாணவிக்கு அவரது தந்தையே பாலியல் தொல்லை கொடுத்தது விருதுநகரில் பரபரப்பை ஏற்படுத்தி உள்ளது.

விருதுநகர்:

திருச்சியில் பல்வேறு கோரிக்கைகளை வலியுறுத்தி இன்று 108 ஆம்புலன்ஸ் ஊழியர்களின் ஆர்ப்பாட்டம் நடைபெறுகிறது.

இதில் பங்கேற்பதற்காக தூத்துக்குடி மாவட்டத்தில் இருந்து பல்வேறு பகுதியைச் சேர்ந்த ஆம்புலன்ஸ் டிரைவர்கள், ஊழியர்கள் இன்று அதிகாலை 4 மணிக்கு தூத்துக்குடியில் இருந்து புறப்பட்டனர். நாககன்னியாபுரத்தைச் சேர்ந்த ஆசைத்தம்பி (வயது 20) என்பவர் வேனை ஓட்டினார்.

காலை 6 மணியளவில் விருதுநகர் சாத்தூர் 4 வழிச்சாலையில் வேன் சென்று கொண்டிருந்தது. கோவில் புலிக்குத்தி விலக்கு பகுதியில் வந்தபோது திடீரென டிரைவரின் கட்டுப்பாட்டை இழந்து வேன் தாறுமாறாக ஓடியது. அதே வேகத்தில் நடுரோட்டில் கவிழ்ந்து விபத்துக்குள்ளானது.

வேனில் இருந்தவர்கள் கூக்குரலிட்டனர்‌. உடனே அப்பகுதியை சேர்ந்த பொதுமக்கள் விரைந்து செயல்பட்டு வேனில் சிக்கியவர்களை மீட்டனர்.

விபத்து குறித்து தகவல் அறிந்த சூலக்கரை போலீசார் சம்பவ இடத்திற்கு வந்து காயமடைந்த வல்லநாட்டைச் சேர்ந்த பட்டு ராஜா (28), டிரைவர் ஆசை தம்பி, மூகைதீன் (32), பிரசாத் (37), பால்ராஜ் (55), செல்லச்சாமி (70) உள்பட 11 பேரை மீட்டு விருதுநகர், சாத்தூர் அரசு ஆஸ்பத்திரிகளுக்கு அனுப்பி வைத்தனர். அங்கு அவர்களுக்கு சிகிச்சை அளிக்கப்பட்டு வந்தது. இதில் பலத்த காயமடைந்த பட்டு ராஜா ஆஸ்பத்திரியில் சிகிச்சை பலனின்றி பரிதாபமாக இறந்தார். மற்றவர்கள் சிகிச்சை பெற்று வருகின்றனர்.

இந்த விபத்து தொடர்பாக சூலக்கரை போலீசார் வழக்குப்பதிவு செய்து விசாரணை நடத்தி வருகின்றனர்.

விருதுநகர் மாவட்டம் வத்திராயிருப்பு அருகே மேற்கு தொடர்ச்சி மலைப்பகுதியில் அமைந்துள்ளது சதுரகிரி சுந்தரமகாலிங்கம் கோவில். இந்த கோவிலுக்கு ஒவ்வொரு மாதமும் பிரதோஷம், அமாவாசை, பவுர்ணமி நாட்கள் மட்டுமே பக்தர்கள் மலையேறி சென்று சாமி தரிசனம் செய்ய அனுமதி வழங்கப்பட்டு வருகிறது.

இந்நிலையில் இன்று சித்திரை மாத பிரதோஷத்தை முன்னிட்டு பல்வேறு மாவட்டங்களில் இருந்து வருகை புரிந்த நூற்றுக்கணக்கான பக்தர்கள் அதிகாலை முதலே தாணிப்பாறை வனத்துறை கேட்டுக்கு முன்பு குவிந்தனர்.

பின்னர் காலை 7 மணிக்கு வனத்துறை கேட் திறக்கப்பட்டு பக்தர்கள் மலைப்பாதை வழியாக சதுரகிரி சுந்தரமகாலிங்கம் கோவிலுக்கு சென்று வருகின்றனர்.

பிரதோஷத்தை முன்னிட்டு சதுரகிரி சுந்தரமகாலிங்கம் சாமிக்கு 18 வகையான அபிஷேக பொருட்களை கொண்டு பிரதோஷ சிறப்பு அபிஷேகங்கள் நடைபெற்றது.

பின்னர் சதுரகிரி சுந்தரமகாலிங்கம் சாமி சிறப்பு அலங்காரத்தில் பிரதோஷ சிறப்பு பூஜைகள் நடைபெற்றது. பல்வேறு மாவட்டங்களில் இருந்து வருகை புரிந்த பக்தர்கள் பிரதோஷ வழிபாட்டில் கலந்துகொண்டு சதுரகிரி சுந்தர மகாலிங்க சாமி அருளை பெற்றனர்.பக்தர்களுக்கு தேவையான உணவு உள்ளிட்ட அடிப்படை வசதிகளை கோவில் நிர்வாகத்தினர் செய்திருந்தனர்.

இதையும் படிக்கலாம்...‘ஹரே ராமா’, ‘ஹரே கிருஷ்ணா’ வார்த்தைகளை கொண்டு உருவான மகா மந்திரம்

சாத்தூர்:

விருதுநகர் மாவட்டம் சாத்தூர் ரெயில் நிலையம் அருகே ஒரு இளம்பெண் நேற்று முன்தினம் மாலை ரெயில் முன் பாய்ந்து தற்கொலை செய்து கொண்டதாக ரெயில்வே போலீசாருக்கு தகவல் வந்தது.

சம்பவ இடத்திற்கு வந்த தூத்துக்குடி ரெயில்வே போலீசார் அக்கம் பக்கத்தினரிடம் விசாரணை செய்ததில் இறந்தவர் குறித்து விவரம் தகவல் கிடைக்காததால் உடலை கைப்பற்றி தூத்துக்குடி அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

இந்த நிலையில் தற்கொலை செய்து கொண்ட இளம்பெண் சாத்தூர் யூனியன் அலுவலகத்தில் இரவுநேர காவலராக பணிபுரியும் வெங்கடாசலபுரத்தை சேர்ந்த சீனிவாசன் என்பவரின் மகள் சபர்மதி (வயது 26) என்பது தெரியவந்தது. இவர் பி.காம் பட்டதாரி ஆவார்.

சீனிவாசன் தனது மகள் குடும்ப பிரச்சினையின் காரணமாக நேற்று முன்தினம் முதல் காணவில்லை என்று தேடி வந்துள்ளார். இதுகுறித்து சாத்தூர் டவுன் போலீசிலும் புகார் செய்துள்ளார்.

இந்த நிலையில் ரெயில் முன் பாய்ந்து இளம்பெண் தற்கொலை குறித்து போலீசார் தகவல் அளித்தவுடன் சீனிவாசன் குடும்பத்தினருடன் தூத்துக்குடி அரசு மருத்துவமனைக்கு சென்று பார்த்தபோது அங்கு இறந்தவர் தனது மகள் சபர்மதி என்பது தெரிய வந்தது.

இதுகுறித்து சாத்தூர் டவுன் போலீசார் வழக்குப் பதிவு செய்து விசாரணை நடத்தி வருகின்றனர்.