வேலூர்

வேலூர்:

காட்பாடி வள்ளிமலை சாலையில் வி.டி.கே. நகரில் மாரியம்மன் கோவில் உள்ளது. 50 ஆண்டு பழமையான இந்த கோவிலில் 30 ஆண்டுக்கு முன்பு 150 கிலோ ஐம்பொன் அம்மன் சிலை செய்து வைத்தனர்.

கோவிலை சுற்றிலும் குடியிருப்புகள் உள்ளது. அப்பகுதி மக்கள் கோவிலில் விழா நடத்தி வருகின்றனர். தினமும் பூஜைகள் செய்யப்படுகிறது.

பொதுமக்கள் எப்போது வேண்டுமானாலும் தரிசனம் செய்வதற்காக கோவில் திறந்தே இருக்கும். இரவு நேரங்களிலும் பூட்டுவதில்லை.

இந்த நிலையில் நேற்று இரவு மர்ம கும்பல் கோவிலுக்குள் புகுந்தனர். அங்கிருந்த 150 கிலோ ஐம்பொன் சிலையை கொள்ளையடித்து சென்று விட்டனர்.

இன்று காலை கோவிலுக்கு வந்த பூசாரி சிலை காணாமல் போனதை கண்டு திடுக்கிட்டார். இதுபற்றி கோவில் நிர்வாகிகளுக்கு தகவல் தெரிவித்தார். அவர்கள் காட்பாடி போலீஸ் நிலையத்தில் புகார் அளித்தனர்.

போலீசார் சம்பவ இடத்திற்கு சென்று பார்வையிட்டு விசாரணை நடத்தினர். கைரேகைகள் சேகரிக்கப்பட்டது. கொள்ளைபோன சிலையின் மதிப்பு லட்சக்கணக்கில் இருக்கும் என கூறப்படுகிறது.

இந்த சம்பவம் அந்த பகுதியில் பெரும் பரபரப்பை ஏற்படுத்தியது.

காட்பாடியில் வெளியூர் கும்பல் தங்கிருந்து கொள்ளையில் ஈடுபட்டு வருகின்றனர். கடந்த சில நாட்களுக்கு முன்பு செங்குட்டையில் உள்ள தனியார் பள்ளி ஆசிரியர் வீட்டில் ஆயுதங்களுடன் புகுந்து ஆசிரியர் மற்றும் அவரது குடும்பத்தினரை மிரட்டி 28 பவுன் நகையை பறித்து சென்றனர்.

கொள்ளை கும்பல் அங்குள்ள கண்காணிப்பு கேமராவில் பதிவாகியுள்ளனர். அவர்களை தீவிரமாக தேடி வருவதாக போலீசார் தெரிவித்தனர்.

இந்த நிலையில் அதே பகுதியில் உள்ள கோவிலில் ஐம்பொன் சிலை கொள்ளையடிக்கப்பட்டுள்ளது பரபரப்பை ஏற்படுத்தியுள்ளது.

தொடர் கொள்ளை சம்பவங்களால் அப்பகுதி மக்கள் பீதியடைந்துள்ளனர். திருட்டு சம்பவங்களை தடுக்க நடவடிக்கை எடுக்க வேண்டும் என வலியுறுத்தியுள்ளனர்.

வாலாஜா:

வேலூர் மாவட்டம் வாலாஜாபேட்டை நகரத்தில் மக்களுக்கு ஆபத்தை விளைவிக்கும் வகையில் சாலையில் சுற்றித்திரியும் கால்நடைகளால் பல்வேறு விபத்துகள் நடந்து வருகிறது.

இதனால் உயிர் சேதங்கள் ஏற்பட்டு வருவதாகவும் கால்நடைகளை பிடிக்க நடவடிக்கை எடுக்க வேண்டும் எனவும் பொதுமக்கள் தரப்பில் தொடர்ந்து புகார் கொடுத்தும் நகராட்சி நிர்வாகம் மெத்தனமாக இருந்து வருகிறது.

இது குறித்து ராணிப்பேட்டை உதவி கலெக்டர் இளம்பகவத்திடம் தொடர்ந்து பல்வேறு அமைப்பினர் புகார் கொடுத்தனர். அதன்பேரில் உதவி கலெக்டர் களத்தில் இறங்கினார்.

நேற்று முன்தினம் நகராட்சி மற்றும் வருவாய்த்துறை ஊழியர்களின் உதவியுடன் 9 மாடுகளை பிடித்து நகராட்சியில் ஒப்படைத்து நடவடிக்கை எடுக்க உத்தரவிட்டார்.

இதில் காகிதக்காரத் தெருவை சேர்ந்த பால் வியாபாரி பிரகாஷ் (30) என்பவர் நகராட்சி அலுவலகம் வந்து அதிகாரிகளை திட்டியதுடன் கொலை மிரட்டலும் விடுத்து, அங்கிருந்த தனது மாட்டை அவிழ்த்து ஓட்டிச் சென்றார். இந்த சம்பவம் நகரில் பரபரப்பை ஏற்படுத்தியது.

இது குறித்து வாலாஜா நகராட்சி துப்புரவு மேற்பார்வையாளர் தாவூத் போலீசில் புகார் செய்தார். அதன்பேரில் போலீசார் வழக்கு பதிவு செய்து பிரகாசை கைது செய்து, கோர்ட்டில் ஆஜர்படுத்தி ஜெயிலில் அடைத்தனர்.

ஜோலார்பேட்டை:

ஜோலார்பேட்டை ரெயில் நிலையத்தில் உள்ள ரெயில்வே பணிமனையில் 100க்கும் மேற்பட்டோர் பணியாற்றி வருகின்றனர். இந்நிலையில், நேற்று பணிமனையில் பழுதான சரக்கு ரெயில் பெட்டிகளை பழுது பார்க்கும் பணியில் ஊழியர்கள் ஈடுபட்டிருந்தனர்.

அப்போது, ரெயில் பெட்டிகளில் தேய்ந்து பழுதான உதிரிபாகங்களை வெல்டிங் மூலம் அகற்றியபோது, வெல்டிங் கேஸ் சிலிண்டர் திடீரென தீப்பற்றி எரிந்தது.

இதையடுத்து அங்கிருந்த 100க்கும் மேற்பட்டோர் பணிமனையில் இருந்து வெளியேறினர்.

இதுகுறித்து ஒப்பந்த ஊழியர்கள் தலைமைக் கண்காணிப்பாளர் ஜான்சன் நாட்டறம்பள்ளி தீயணைப்பு நிலையத்துக்குத் தகவல் தெரிவித்தார்.தீயணைப்பு நிலைய அலுவலர் கலைமணி தலைமையிலான வீரர்கள் அங்கு சென்று, தீயை அணைத்தனர். தீப்பிடித்த சிலிண்டரை அங்குள்ள தண்ணீர் தொட்டியில் அழுத்தினர்.

இதனால் ரெயில்வே பணிமனையில் தீ விபத்து தவிர்க்கப்பட்டது.

வேலூர்:

முன்னாள் பிரதமர் ராஜீவ்காந்தி கொலை வழக்கு கைதியான முருகன் வேலூர் ஜெயிலில் அடைக்கப்பட்டுள்ளார். கடந்த மாதம் 18-ந் தேதி அவரது அறையில் இருந்து செல்போன் பறிமுதல் செய்தனர். பின்னர் முருகன் தனி அறைக்கு மாற்றப்பட்டார். அவருக்கு சலுகைகள் ரத்து செய்யப்பட்டது.

இந்நிலையில் சிறை அதிகாரிகள் தன்னை கொடுமைப்படுத்துவதாக கூறி முருகன் 18-ந்தேதியில் இருந்து தொடர் உண்ணாவிரதம் இருந்து வந்தார்.

சிறை அதிகாரிகள் அறிவுறுத்தலின்படி 20 நாட்களாக இருந்த உண்ணாவிரதத்தை கடந்த 6-ந்தேதி முருகன் கைவிட்டார். இதையடுத்து நளினியுடன் சந்திக்க அனுமதியளித்தனர்.

தனி சிறை வேண்டாம். ஏற்கனவே இருந்த அறையில் அடைக்குமாறு முருகன் சிறை அதிகாரிகளிடம் கேட்டு வந்ததாக கூறப்படுகிறது. இதற்கு சிறை அதிகாரிகள் மறுப்பு தெரிவித்து வந்தனர்.

இந்நிலையில் தன்னை மீண்டும் பழைய அறைக்கு மாற்றும் வரை தொடர் உண்ணாவிரதத்தில் ஈடுபடுவேன் என்று சிறை போலீசாரிடம் முருகன் நேற்று முன்தினம் மனு அளித்து உண்ணாவிரதம் இருந்து வருகிறார். அதைத் தொடர்ந்து இன்று 3-வது நாளாக முருகன் சாப்பிட மறுத்து தொடர்ந்து உண்ணா விரதத்தில் ஈடுபட்டுள்ளார்.

வாணியம்பாடி:

வாணியம்பாடி ஜாப்ராபாத் பகுதியை சேர்ந்தவர் இர்ஷாத் கான் (32). இவரது மனைவி ‌ஷபானா (30). இவர்களுக்கு 5 மகள்கள், 1 மகன் உள்ளனர்.

கடந்த 2 ஆண்டுகளுக்கு முன்பு இர்ஷாத்கான் வெளிநாட்டிற்கு வேலைக்கு சென்றார். கடந்த 10 நாட்களுக்கு முன்பு வெளிநாட்டில் இருந்து ஊருக்கு வந்தார். வெளிநாட்டில் இருந்து வந்தது முதல் குடித்துவிட்டு மனைவியின் நடத்தையில் சந்தேகம் உள்ளதாக தகராறில் ஈடுபட்டு வந்தார்.

இந்த நிலையில் நேற்று முன்தினம் மாலை மீண்டும் கணவன், மனைவி இடையே தகராறு ஏற்பட்டுள்ளது. இதில் ஆத்திரம் அடைந்த இர்ஷாத்கான் வீட்டில் இருந்த கத்தியை எடுத்து வந்து ‌ஷபானா வயிற்றில் சரமாரியாக குத்தினார். இதில் ரத்த வெள்ளத்தில் அவர் மயங்கி சரிந்தார். இர்ஷாத்கான் அங்கிருந்து தப்பி ஓடிவிட்டார்.

குடல் சரிந்த ‌ஷபானா வலியால் அலறி துடித்து கூச்சலிட்டார். அலறல் சத்தம் கேட்ட அக்கம் பக்கத்தினர் அவரை மீட்டு சிகிச்சைக்காக வாணியம்பாடி அரசு ஆஸ்பத்திரியில் சேர்த்தனர்.

பின்னர் மேல்சிகிச்சைக்காக அடுக்கம் பாறை அரசு ஆஸ்பத்திரியில் சேர்த்தனர். அங்கு சிகிச்சை பலனின்றி ‌ஷபானா இன்று காலை பரிதாபமாக உயிரிழந்தார்.

இதுகுறித்து வாணியம்பாடி தாலுகா போலீசார் வழக்குப்பதிவு செய்து இர்ஷாத்கானை பிடித்து விசாரணை நடத்தி வருகின்றனர்.

வேலூர்:

வேலூர் மின்வாரிய செயற்பொறியாளர் நடராஜன் வெளியிட்டுள்ள செய்திக்குறிப்பில் கூறியிருப்பதாவது:-

வேலூர் துணை மின் நிலையத்தில் அத்தியாவசிய மின்சாதன பராமரிப்பு பணிகள் நாளை மேற்கொள்ளப்பட உள்ளது. இதனால் காலை 9 மணி முதல் மாலை 5 மணி வரை வேலூர் புதிய பஸ் நிலையம், பழைய பஸ் நிலையம் பைபாஸ் ரோடு, தோட்டப்பாளையம், வேலூர் டவுன், பஜார், சலவன்பேட்டை, ஆபிசர்ஸ் லைன், கஸ்பா, ஊசூர், விரிஞ்சிபுரம், செதுவாலை, கொணவட்டம், சேண் பாக்கம் மற்றும் அதை சுற்றியுள்ள அனைத்து பகுதிகளிலும், கிராமங்களிலும் மின் வினியோகம் நிறுத்தப்படும்.

இவ்வாறு அதில் கூறப்பட்டுள்ளது.