search icon
என் மலர்tooltip icon

    நீங்கள் தேடியது "Revanth Reddy"

    • ஒரு லட்சம் ரூபாய் வரையிலான பயிர்க்கடன் தள்ளுபடி தொகை விவசாயிகள் வங்கி கணக்கில் செலுத்தப்படும்.
    • இதற்கான 7 ஆயிரம் கோடி ரூபாய் ஒதுக்கப்பட்டுள்ளது- தெலுங்கானா முதல்வர்.

    ஒரு லட்சம் ரூபாய் வரையிலான விவசாயிகள் பயிர்க்கடன்கள் நாளை தள்ளுபடி செய்யப்படும் என தெலுங்கானா மாநில முதல்வர் ரேவந்த் ரெட்டி அறிவித்துள்ளார். காங்கிரஸ் அரசின் வாக்குறுதிப்படி தள்ளுபடி செய்யப்படுவதாக தெரிவித்துள்ளார்.

    காங்கிரஸ் கட்சியின் எம்எல்ஏ-க்கள், எம்எல்சி-க்கள், எம்.பி.க்கள் மற்றும் மற்ற அதிகாரிகள் இடையிலான ஆலோசனைக் கூட்டத்தின்போது மாநில அரசின் இரண்டு லட்சம் ரூபாய் பயிர்க்கடன் வாக்குறுதியின் ஒரு பகுதியாக நாளை முதல் படிப்படியாக விவசாயிகளின் கணக்கில் பணம் செலுத்தப்படும் எனத் தெரிவித்துள்ளார்.

    சுமார் 7 ஆயிரம் கோடி ரூபாய் அளவிற்கு பயிர்க்கடன் தள்ளுபடி செய்யப்பட இருக்கிறது. ஜூலை மாதம் இறுதியில் ஒன்றரை லட்சம் வரையிலான பயிர்க்கடன் தள்ளுபடி செய்யப்படும். ஆகஸ்ட் மாதத்துடன் 2 லட்சம் ரூபாய் வரையிலான பயிர்க்கடன்கள் தள்ளுபடி செய்யப்பட்டு முடிவடையும் எனவும் தெரிவித்துள்ளார்.

    ஒவ்வொரு விவசாயியையும் கடன் சுமையிலிருந்து விடுவிப்பதே காங்கிரஸ் அரசின் நோக்கம். கடந்த சந்திரசேகர் ராவின் பிஆர்எஸ் அரசு செய்ததைப் போல, கடன் தள்ளுபடி என்ற பெயரில், தனது அரசாங்கம் விவசாயிகளை ஏமாற்றவில்லை என ரேவந்த் ரெட்டி தெரிவித்தார்.

    2 லட்சம் ரூபாய் பயிர்க்கடன் தள்ளுபடி ஒரே தவணையில் விவசாயிகள் கணக்கில் செலுத்தப்படும். மொத்தமாக 31 ஆயிரம் கோடி ரூபாய் இதற்காக தெலுங்கானா அரசு ஒதுக்கியுள்ளது.

    2022 தேர்தல் பிரசாரத்தின்போது காங்கிரஸ் தலைவர் ராகுல் காந்தி 2 லட்சம் ரூபாய் வரை பயிர்க்கடன் தள்ளுபடி செய்யப்படும் என வாக்குறுதி அளித்தார். அதை நிறைவேற்றுவது அரசின் கடமை எனவும் ரேவந்த் ரெட்டி தெரிவித்துள்ளார்.

    • 17 ஆண்டுகளுக்கு பிறகு இந்திய அணி டி20 உலகக் கோப்பை வென்று அசத்தியது.
    • டி20 உலகக் கோப்பைக்கான இந்திய அணியில் முகமது சிராஜூ இடம் பிடித்தார்.

    சமீபத்தில் வெஸ்ட் இண்டீஸ் மற்றும் அமெரிக்காவில் டி20 உலகக் கோப்பை போட்டி நடைபெற்றது. இந்த தொடரில் இந்திய அணி தென் ஆப்பிரிக்காவை வீழ்த்தி சாம்பியன் பட்டம் வென்றது.

    17 ஆண்டுகளுக்கு பிறகு இந்திய அணி டி20 உலகக் கோப்பை வென்று அசத்தியது. இதனையடுத்து அணியில் இடம் பிடித்த வீரர்கள், பயிற்சியாளர் என அனைவருக்கும் சேர்த்து ரூ. கோடியை பிசிசிஐ வழங்கியது.

    இந்நிலையில் டி20 உலகக் கோப்பைக்கான இந்திய அணியில் இடம் பிடித்த முகமது சிராஜூக்கு தெலுங்கானா முதலமைச்சர் அவரை பாராட்டி பரிசுகளை அறிவித்துள்ளார்.

    அந்த வகையில் தெலுங்கான முதலமைச்சரான ரேவந்த் ரெட்டி இந்திய வீரரான சிராஜை நேரில் அழைத்துப் பாராட்டி, அவருக்கு மாநில அரசின் சார்பில் ஹைதராபாத்தில் ஒரு வீடும், அரசாங்க வேலையும் தரப்படும் உறுதி அளித்துள்ளார்.

    • ஆந்திர மாநிலத்தில் உண்மையான எதிர்க்கட்சி இல்லை.
    • இரு மாநிலங்களிலும் பரபரப்பை ஏற்படுத்தி உள்ளது.

    திருப்பதி:

    ஆந்திரா, தெலுங்கானா மாநிலங்களுக்கு இடையே நிலவும் பிரச்சனைகள் குறித்து முதல் மந்திரிகள் சந்திரபாபு நாயுடு, மற்றும் ரேவந்த் ரெட்டி இருவரும் கடந்த 6-ந்தேதி சந்தித்து பேசினர்.

    இதனையடுத்து பேட்டி அளித்த சந்திரபாபு நாயுடு தெலுங்கானா மாநிலத்தில் தெலுங்கு தேசம் கட்சி மீண்டும் தனது பழைய பெருமையை மீட்டெடுக்கும். தெலுங்கானா மாநிலத்திலும் தெலுங்கு தேசம் கட்சிக்கு பொதுமக்கள் ஆதரவு அளிப்பார்கள் என்றார்.

    இந்த நிலையில் ஆந்திர மாநிலத்தில் ஒய்.எஸ்.ராஜசேகர ரெட்டியின் பிறந்த நாள் விழாவில் தெலுங்கானா முதல் மந்திரி ரேவந்த் ரெட்டி கலந்து கொண்டார்.

    ஆந்திர மாநிலத்தில் உண்மையான எதிர்க்கட்சி இல்லை. ஆந்திர மாநிலத்தில் வருகிற 2029-ம் ஆண்டு தேர்தலில் வெற்றி பெற்று காங்கிரஸ் கட்சி ஆட்சிக்கு வரும். கடப்பாவில் இடைத்தேர்தல் நடக்க வாய்ப்பு உள்ளது. அதில் தீவிர பிரசாரம் செய்து காங்கிரஸ் வெற்றி பெறுவதை உறுதி செய்வேன்.


    ஓய்.எஸ். ராஜசேகர ரெட்டி, ராகுல் காந்தியை பிரதமராக பார்க்க நினைத்தார். அதனை நிறைவேற்ற பாடுபடுவோம். ஆந்திர மாநிலத்தில் தற்போது உண்மையில் பா.ஜ.க. ஆட்சி நடைபெறுகிறது.

    சந்திரபாபு நாயுடு, ஜெகன் மோகன் ரெட்டி, பவன் கல்யாண் ஆகியோர் நரேந்திர மோடியின் ஆதரவாளர்கள்.

    ஆந்திராவில் தற்போது எதிர்க்கட்சியே இல்லை. ஒய்.எஸ். சர்மிளா மக்களின் குறலாக இருப்பார். சர்மிளாவை முதல் மந்திரி ஆக்குவதுடன் ராஜசேகர ரெட்டி ஆசையை நிறைவேற்ற காங்கிரஸ் தொண்டர்கள் பாடுபட வேண்டும்.

    இவ்வாறு அவர் பேசினார்.

    ஆந்திர தெலுங்கானா மாநில பிரச்சனைகள் குறித்த சந்திப்புக்கு பிறகு சந்திரபாபு நாயுடு மற்றும் ரேவந்த் ரெட்டி இருவரும் மோதும் விதத்தில் கருத்துக்களை தெரிவித்துள்ளனர். இது இரு மாநிலங்களிலும் பரபரப்பை ஏற்படுத்தி உள்ளது.

    • தெலுங்கானாவில் காங்கிரஸ் கட்சிக்கு சரியான எதிர்கட்சிகள் எதுவும் இல்லை.
    • ஆந்திராவில் தெலுங்கு தேசம் கட்சி புத்துயிர் பெறும்.

    திருப்பதி:

    ஆந்திர முதல்-மந்திரி சந்திரபாபு நாயுடு நேற்று முன்தினம் தெலுங்கானா முதல் மந்திரி ரேவந்த் ரெட்டியை சந்தித்தார். அப்போது ஆந்திரா தெலுங்கானா பிரிவினையால் ஏற்பட்டுள்ள முக்கிய பிரச்சினைகள் குறித்து பேச்சுவார்த்தை நடத்தினர்.

    இந்த நிலையில் முதல்-மந்திரி சந்திரபாபு நாயுடு அளித்த பேட்டியில் கூறியதாவது:-

    தெலுங்கானா பிரிவினைக்கு பிறகு கடந்த 10 ஆண்டுகளாக தெலுங்கு தேசம் கட்சி தெலுங்கானா தேர்தலில் போட்டியிடாமல் இருந்தது.

    தெலுங்கானாவில் பிரதான ஆளும் கட்சியாக இருந்த சந்திரசேகரராவின் பி.ஆர்.எஸ் கட்சி படுதோல்வியை சந்தித்தது. தற்போது தெலுங்கானாவில் காங்கிரஸ் கட்சிக்கு சரியான எதிர்கட்சிகள் எதுவும் இல்லை.

    ஒருங்கிணைந்த ஆந்திராவாக இருந்தபோது தெலுங்கு தேசம் கட்சிக்கு அதிக அளவில் ஆதரவு இருந்தது. அதேபோல் தெலுங்கானாவில் தெலுங்குதேசம் கட்சி பிரிவு மீண்டும் தொடங்கப்படும்.

    இதனால் ஆந்திராவில் தெலுங்கு தேசம் கட்சி புத்துயிர் பெறும்.

    இவ்வாறு அவர் கூறினார்.

    தெலுங்கானாவில் மீண்டும் கட்சியை செயல்படுத்துவதற்கான திட்டங்களையும் அறிவித்தார். தெலுங்கானா மக்களும் தெலுங்கு தேசம் கட்சிக்கு ஆதரவு அளிப்பார்கள் என அவர் கூறினார்.

    தெலுங்கானா முதல்-மந்திரியுடனான சந்திப்புக்கு பிறகு அந்த மாநில அரசியலில் சந்திரபாபு நாயுடு கவனம் செலுத்துவது பரரப்பை ஏற்படுத்தி உள்ளது.

    • சில சொத்துகள், நிலம், தண்ணீர், மின்சாரம் உள்ளிட்டவற்றை உரிய முறையில் பிரிப்பது முழுமையாக முடிவடையாமல் இருந்து வருகிறது.
    • கூட்டத்தில் நிலுவையில் உள்ள சொத்துகளை பிரிப்பது தொடர்பாக தீவிர ஆலோசனை மேற்கொள்ளப்பட்டது.

    ஆந்திராவில் இருந்து தெலுங்கானா தனி மாநிலமாக 2014-ம் ஆண்டு ஜூன் மாதம் 2-ந்தேதி பிரிக்கப்பட்டது. தெலுங்கானா தனி மாநிலமாக பிரிக்கப்பட்டு சுமார் 10 ஆண்டுகள் ஆகியும் சில சொத்துகள், நிலம், தண்ணீர், மின்சாரம் உள்ளிட்டவற்றை உரிய முறையில் பிரிப்பது முழுமையாக முடிவடையாமல் இருந்து வருகிறது.

    இது தொடர்பாக நேற்று ஆந்திர முதல்-மந்திரி சந்திரபாபு நாயுடு, தெலுங்கானா மாநில முதல்-மந்திரி ரேவந்த் ரெட்டி ஆகியோர் தலைமையில் அதிகாரிகள் கலந்து கொண்ட கூட்டம் மகாத்மா ஜோதி ராவ் புலே பிரஜா பவனில் நடைபெற்றது.

    இந்த கூட்டத்தில் நிலுவையில் உள்ள சொத்துகளை பிரிப்பது தொடர்பாக தீவிர ஆலோசனை மேற்கொள்ளப்பட்டது. இதையடுத்து இப்பிரச்சனையை சுமூகமாக முடிக்க இரு மாநில அதிகாரிகள் கொண்ட குழுவை அமைப்பது என முடிவு செய்யப்பட்டுள்ளது. இந்தக் குழு பற்றிய அறிவிப்பு விரைவில் வெளியாகலாம் என கூறப்படுகிறது.

    • தெலுங்கானா முதல் மந்திரி ரேவந்த் ரெட்டி இன்று பிரதமர் மோடியை சந்தித்தார்.
    • அப்போது பிரதமர் மோடிக்கு நந்தி சிலையை பரிசாக அளித்தார்.

    புதுடெல்லி:

    சமீபத்தில் நடைபெற்ற தெலுங்கானா மாநில சட்டசபை தேர்தலில் காங்கிரஸ் கட்சி அபார வெற்றி பெற்றது. ரேவந்த் ரெட்டி முதல் மந்திரியாக பொறுப்பேற்றார். துணை முதல் மந்திரியாக விக்ரமர்கா மல்லு பதவி வகித்து வருகிறார்.

    இந்நிலையில், தெலுங்கானா முதல் மந்திரி ரேவந்த் ரெட்டி தலைநகர் டெல்லியில் இன்று பிரதமர் மோடியை சந்தித்துப் பேசினார்.

    அப்போது துணை முதல் மந்திரியும் உடனிருந்தார். இருவரும் பிரதமர் மோடிக்கு நந்தி சிலையை பரிசாக அளித்தனர்.

    இந்த சந்திப்பு சுமார் அரை மணி நேரம் நடந்தது. தெலுங்கானா மாநிலம் தொடர்பான பல முக்கிய பிரச்சனைகள் குறித்து இருவரும் விவாதித்தனர்.

    இதைத் தொடர்ந்து, மத்திய உள்துறை மந்திரி அமித்ஷாவையும் ரேவந்த் ரெட்டி சந்தித்துப் பேசினார்.

    ஏற்கனவே இன்று காலை ஆந்திர முதல் மந்திரி சந்திரபாபு நாயுடு பிரதமர் மோடியை சந்தித்தார் என்பது குறிப்பிட்டத்தக்கது.

    • தகுதியான கைதிகள் குறித்த விவரங்களை பட்டியலிட்டு அளித்தனர்.
    • கைதிகள் இன்று விடுதலை செய்யபட்டனர்.

    திருப்பதி:

    தெலுங்கானா மாநிலத்தில் உள்ள ஜெயில்களில் கிட்டத்தட்ட 10 ஆண்டுகளுக்கு மேலாக உள்ள கைதிகளை விடுதலை செய்ய வேண்டும் என அவர்களது குடும்பத்தினர் முதல் மந்திரி ரேவந்த் ரெட்டியிடம் மனு அளித்தனர்.

    இதனைத் தொடர்ந்து மூத்த அதிகாரிகள் கைதிகளின் குடும்பத்தினர் அளித்த மனுக்களை ஆய்வு செய்தனர். இதில் விடுதலை செய்ய தகுதியான கைதிகள் குறித்த விவரங்களை பட்டியலிட்டு அளித்தனர்.

    இந்த பட்டியல் அமைச்சரவை ஒப்புதலுக்கு பிறகு கவர்னரிடம் அளித்து ஒப்புதல் பெறப்பட்டது. இதனை தொடர்ந்து தெலுங்கானா மாநிலம் கொல்லப்பள்ளி ஜெயிலில் இருந்து 213 கைதிகளை விடுதலை செய்ய உத்தரவு பிறப்பிக்கப்பட்டது.

    இந்த கைதிகள் இன்று விடுதலை செய்யபட்டனர். இந்த கைதிகளில் 205 பேர் ஆயுள் தண்டனை 8 பேர் அதற்கு குறைவான தண்டனை பெற்றவர்கள் என்பது குறிப்பிடத்தக்கது.

    • போதை பொருள் தடுப்பது குறித்த ஆலோசனைக் கூட்டம் நடந்தது.
    • அரசு வழிகாட்டுதல் முறைகளை படக்குழுவினர் கடைப்பிடிக்க வேண்டும்.

    திருப்பதி:

    தெலுங்கானா மாநிலத்தில் போதை பொருள் தடுப்பது குறித்த ஆலோசனைக் கூட்டம் முதல் மந்திரி ரேவந்த் ரெட்டி தலைமையில் நடந்தது.

    போதைப் பொருட்கள் பயன்பாடு குறித்து விரைவான விழிப்புணர்வு ஏற்படுத்த வேண்டும். இதற்காக சினிமா துறையை அதிகாரிகள் பயன்படுத்திக் கொள்ள வேண்டும்.

    தெலுங்கானா மாநிலத்தில் புதிதாக வெளியாகும் சினிமா டிக்கெட் விலையை உயர்த்த வேண்டுமானால் அரசு வழிகாட்டுதல் முறைகளை படக்குழுவினர் கடைப்பிடிக்க வேண்டும்.

    குறிப்பாக டிக்கெட் விலை உயர்வை உயர்த்த வேண்டும் என கோரிக்கை வைக்கும் முன்னணி நடிகர்கள் 2 குறும் படங்களில் நடிக்க வேண்டும். அதில் ஒன்று சைபர் குற்றம் மற்றொன்று போதைப் பொருள் எதிர்ப்பு குறித்து இருக்க வேண்டும்.

    இந்த 2 குறும்படங்களும் படம் திரையிடப்படுவதற்கு முன்பாக தியேட்டர்களில் ஒளிபரப்ப வேண்டும். இந்த புதிய நிபந்தனைகளை பூர்த்தி செய்தால் மட்டுமே டிக்கெட் விலை உயர்வுக்கு அரசு ஒப்புதல் அளிக்கும்.

    இவ்வாறு அவர் பேசினார்.

    சினிமா டிக்கெட் விலை உயர்த்த நடிகர்கள் விழிப்புணர்வு படங்களில் நடிக்க வேண்டும் என முதல் மந்திரி உத்தரவிட்டுள்ளது சமூக வலைதளங்களில் வரவேற்று பாராட்டி வருகின்றனர்.

    • இரு மாநிலங்களுக்கும் பிரச்சினைகள் இருந்து வருகின்றன.
    • பிரச்சினைகளை நாம் மிகவும் இணக்கமாக தீர்க்க வேண்டியது அவசியம்.

    திருப்பதி:

    ஆந்திர மாநிலத்தில் இருந்து தெலுங்கானா மாநிலம் பிரிக்கப்பட்டு 10 ஆண்டுகள் ஆகிறது. இந்த நிலையில் இரு மாநிலங்களுக்கும் பிரச்சினைகள் இருந்து வருகின்றன.

    இது குறித்து பேச்சுவார்த்தை நடத்த சந்திரபாபு நாயுடு தெலுங்கானா காங்கிரஸ் கட்சி முதல்-மந்திரி ரேவேந்த் ரெட்டிக்கு அழைப்பு விடுத்து கடிதம் எழுதியுள்ளார்.

    அதில் நமது மாநிலங்களின் நலன் மற்றும் முன்னேற்றத்தில் குறிப்பிடத்தக்க தாக்கங்கள் ஏற்பட்டுள்ளது. இந்த பிரச்சினைகளை நாம் மிகவும் இணக்கமாக தீர்க்க வேண்டியது அவசியம்.

    வருகிற 6-ந் தேதி பிற்பகல் சந்தித்து பேச விரும்புகிறேன். இந்த சந்திப்பு முக்கிய பிரச்சினைகளுக்கு தீர்வாக அமையும் என நான் நம்புகிறேன்.

    மேலும் ஆந்திரா, தெலுங்கானா மாநிலங்களுக்கு பரஸ்பர நன்மைகளையும் பயக்கும் தீர்வுகளை அடைய நாம் இருவரும் சேர்ந்து திறம்பட ஒத்துழைக்க முடியும் என சந்திரபாபு நாயுடு கூறியுள்ளார்.

    ஒருங்கிணைந்த ஆந்திராவாக இருந்தபோது தெலுங்கானா முதல்-மந்திரி ரேவேந்த் ரெட்டி தெலுங்கு தேசம் கட்சியில் இருந்தார். அவர் சந்திரபாபு நாயுடுவின் நெருங்கிய உதவியாளராகவும் இருந்தார்.

    மேலும் கட்சிக்கு அப்பாற்பட்டு ரேவந்த் ரெட்டி மாநிலத்தின் வளர்ச்சிக்காக நற்பெயரையும் பெற்று வருகிறார். அவர் சமீபத்தில் டெல்லிக்கு சென்ற போது ஜேபி நட்டா பா.ஜ.க. தலைவர்களையும் சந்தித்தார்.

    பிரதமர் மோடியை தனது மூத்த சகோதரர் என அழைத்தார். மாநிலத்தின் வளர்ச்சிக்காக அனைவரிடமும் நட்புறவை வளர்த்துக் கொள்ள தயாராக இருப்பதாக ஏற்கனவே அவர் தெரிவித்துள்ளார்.

    எனவே சந்திரபாபு நாயுடு அழைப்பிற்கு ரேவந்த் ரெட்டி சம்மதம் தெரிவிப்பார் என கூறப்படுகிறது. பா.ஜ.க. கூட்டணியில் உள்ள சந்திரபாபு நாயுடு காங்கிரஸ் முதல்-மந்திரியை சந்திக்க அழைப்பு விடுத்திருப்பது பரபரப்பை ஏற்படுத்தியது.

    • தெலுங்கானா சட்டமன்ற தேர்தலில் காங்கிரஸ் 64 இடங்களை கைபற்றி ஆட்சியை பிடித்தது.
    • முதல்வர் ரேவந்த் ரெட்டி சால்வை அணிவித்தார்.

    கடந்த ஆண்டு நடைபெற்ற தெலுங்கானா சட்டமன்றத் தேர்தலுக்குப் பிறகு காங்கிரஸுக்கு மாறிய 6வது பிஆர்எஸ் எம்எல்ஏ செவெல்லா காலே யாதய்யா ஆவார். தெலுங்கானா சட்டமன்ற தேர்தலில் காங்கிரஸ் 64 இடங்களை கைபற்றி ஆட்சியை பிடித்தது. அதில் பிஆர்எஸ் கட்சி 39 இடங்களை மட்டுமே வென்று தோல்வி அடைந்தது.

    இந்நிலையில் தெலுங்கானா காங்கிரஸ் தனது எக்ஸ் தளப்பக்கத்தில் கூறியிருப்பதாவது,

    தெலுங்கானாவில் பாரத் ராஷ்டிர சமிதிக்கு பெரும் பின்னடைவை ஏற்படுத்திய நிலையில், அதன் எம்.எல்.ஏ.வான செவெல்லா காலே யாதய்யா இன்று ஆளும் காங்கிரஸில் இணைந்தார். அவருக்கு முதல்வர் ரேவந்த் ரெட்டி சால்வை அணிவித்தார். அவருடன் தெலுங்கானா கட்சி விவகாரங்களுக்கான அகில இந்திய காங்கிரஸ் பொறுப்பாளர் தீபா தாஸ்முன்சி மற்றும் பிற தலைவர்கள் முன்னிலையில் யாதய்யா ஆளும் கட்சியில் இணைந்தார் என்று தெலுங்கானா காங்கிரஸ் தெரிவித்துள்ளது.

    • தெலுங்கானா சின்னம் மாற்றி அமைப்பதில் அரசுக்கு சிக்கல்.
    • தெலுங்கானா அன்னை உருவம் மாற்றி அமைக்கப்படும்.

    திருப்பதி:

    தெலுங்கானா மாநில 10-ம் ஆண்டு விழா வருகிற 2-ந் தேதி கோலாகலமாக கொண்டாடப்படுகிறது.

    புதிதாக ஆட்சியில் அமர்ந்த காங்கிரஸ் கட்சி முதல்-மந்திரி ரேவந்த் ரெட்டி தெலுங்கானா மாநிலத்திற்கு தனியாக மாநில பாடல் உருவாக்கப்படும்.

    மாநில சின்னம், தெலுங்கானா அன்னை உருவம் மாற்றி அமைக்கப்படும் என அறிவித்தார்.

    பல்வேறு சர்ச்சைகளுக்கு இடையே இசையமைப்பாளர் கீரவாணி இசையில் ஜெய ஜெய ஹே தெலுங்கானா என்ற பாடல் தயாரானது. இந்த பாடல் மாநில பாடலாக அங்கீகரிக்கப்பட்டது.

    பாடலை தேர்வு செய்யும் கூட்டத்தில் பா.ஜ.க. மற்றும் பிரதான எதிர்க்கட்சியான பி.ஆர்.எஸ். கட்சி நிர்வாகிகள் பங்கேற்கவில்லை.

    புதிதாக தயாராகும் தெலுங்கானா மாநில சின்னத்தில் சார்மினார் மற்றும் காகதியா வளைவு அகற்ற முடிவு செய்துள்ளனர். இதற்கு எதிர்க்கட்சிகள் கடுமையாக எதிர்ப்பு தெரிவித்தனர். இதனால் தெலுங்கானா சின்னம் மாற்றி அமைப்பதில் அரசுக்கு சிக்கல் ஏற்பட்டுள்ளது.

    இது தொடர்பான எந்த முடிவையும் இன்னும் எடுக்கவில்லை. மேலும் தெலுங்கானா அன்னை சிலையை மாற்றியமைப்பது குறித்தும் இன்னும் முடிவு எடுக்கப்படவில்லை.

    அனைத்து பிரிவினரும் ஏற்றுக் கொள்ளும்படி அரசு சின்னம் மற்றும் தெலுங்கானா அன்னை சிலை இருக்கும் வகையில் அரசு முடிவு எடுக்கும் என முதல் மந்திரி ரேவேந்த் ரெட்டி உறுதி அளித்துள்ளார். 

    இந்த விமர்சனத்தை ஆடியோ வடிவில் கேட்க "Play" பட்டனை கிளிக் செய்யவும்
    • மாநில அந்தஸ்து வழங்கியதன் மூலம் தெலுங்கானா மக்களின் சுயமரியாதையை சோனியா காந்தி பாதுகாத்துள்ளார்.
    • தெலுங்கானா மாநிலத்திற்கு தனி சின்னம் மற்றும் மாநில பாடல் தயார் செய்யப்படுகிறது.

    திருப்பதி:

    ஆந்திராவில் இருந்து பிரிந்து தெலுங்கானா மாநிலம் உருவாகி 10 ஆண்டுகள் ஆகிறது. வருகிற 2-ந் தேதி தெலுங்கானா மாநில தின விழா கொண்டாட்டத்திற்கு ஏற்பாடு செய்துள்ளனர்.

    தெலுங்கானா அரசு மற்றும் அரசியல் கட்சிகள் சார்பில் 3 நாட்கள் தொடர் கொண்டாட்டங்கள் நடத்தப்படுகிறது.

    தெலுங்கானா மாநிலம் உருவாக காரணமாக இருந்த சோனியா காந்திக்கு பாராட்டு விழா நடத்த தெலுங்கானா மாநில காங்கிரஸ் அரசு முடிவு செய்தது. இதற்காக முதல் மந்திரி ரேவந்த் ரெட்டி சோனியா காந்தியை நேரில் சந்தித்து அழைப்பு விடுத்தார்.

    இதுதொடர்பாக அவர் அளித்த பேட்டியில் கூறியதாவது:-

    தெலுங்கானா மாநில அந்தஸ்து வழங்கியதற்கு நன்றி தெரிவிக்கும் வகையில் சோனியா காந்திக்கு பாராட்டு தெரிவித்துக் கொள்கிறோம். எங்களது அழைப்பிற்கு அவர் சாதகமாக பதிலளித்தார்.

    பாராட்டு விழாவில் அவர் கலந்து கொள்வதாக தெரிவித்துள்ளார். மாநில அந்தஸ்து வழங்கியதன் மூலம் தெலுங்கானா மக்களின் சுயமரியாதையை சோனியா காந்தி பாதுகாத்துள்ளார்.

    சோனியா காந்திக்கு பாராட்டு விழா பிரஜாலா பலானா பகுதியில் பிரம்மாண்டமாக நடத்தப்படும். இதில் மாநிலம் உருவாக காரணமாக இருந்த தலைவர்களுக்கு அழைப்பு விடுக்கப்பட்டுள்ளது. அவர்களும் கலந்து கொள்வார்கள்.

    தெலுங்கானா மாநிலத்திற்கு தனி சின்னம் மற்றும் மாநில பாடல் தயார் செய்யப்படுகிறது. இசையமைப்பாளர் கீரவாணி ஆட்சேபம் தெரிவித்ததால் மற்றொரு இசையமைப்பாளர் மூலம் தெலுங்கானா மாநில பாடல் உருவாக்க முடிவு செய்யப்பட்டுள்ளது.

    தெலுங்கானா மாநில சின்னத்தில் அரசாட்சியின் பிரதிபலிப்பு இருக்காது. சர்வாதிகார ஆட்சிக்கு எதிராக தெலுங்கானா மக்களின் போராட்ட உணர்வை பிரதிபலிக்கும் வகையில் சின்னம் வடிவமைக்கப்படும்.

    இவ்வாறு அவர் கூறினார்.

    ×