வேலூர்

வேலூர்:

வேலூரை அடுத்த விருபாட்சிபுரத்தை சேர்ந்தவர் வேணுகோபாலன் (வயது 42). துப்புரவு தொழிலாளி. இவர் நேற்று இரவு 7.30 மணியளவில் பழைய பஸ்நிலையத்தில் நின்று கொண்டிருந்தார். அப்போது அங்கு வந்த மர்மகும்பல் ஒன்று திடீரென கத்தியால் வேணுகோபாலனை வெட்டி விட்டு தப்பிச்சென்றனர்.

இதில் படுகாயம் அடைந்த வேணுகோபாலனை பொதுமக்கள் மீட்டு சிகிச்சைக்காக அடுக்கம்பாறை அரசு மருத்துவமனையில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

இது தொடர்பாக வேலூர் வடக்கு போலீசார் வழக்குப்பதிவு செய்து வேணுகோபாலனை கத்தியால் வெட்டி விட்டு தப்பியோடிய மர்மகும்பலை தேடி வருகின்றனர். ‘வேணுகோபாலனுக்கும், அவரது மருமகனுக்கும் இடையே குடும்பதகராறு இருந்து வருவதாகவும், அதனால் மர்ம கும்பலை ஏவி அவரை கொலை செய்ய முயற்சி செய்திருக்கலாம் என்ற சந்தேகம் உள்ளது.

இது தொடர்பாக தீவிர விசாரணை நடத்தி வருகிறோம்’ என்று போலீசார் தெரிவித்தனர்.

வேலூர்:

வேலூர் மாவட்டத்தில் உள்ள தமிழ்நாடு கனிம நிறுவனத்தின் டாமின் வெர்மிகுலேட் சுரங்கம் 1978 ஆம் ஆண்டு முதல் இயங்கி வருகிறது.

திருப்பத்தூர் தாலுகா செவ்வத்தூர் மற்றும் எலவம்பட்டி ஊராட்சி பகுதிக்குட்பட்ட 23,710 எக்டேர் பரப்பளவில் கையகப்படுத்தப்பட்ட பகுதிகளில் கனிமம் வெட்டி எடுக்கப்படுகிறது. இந்த கனிம சுரங்கத்தில் வெர்மிகுலேட் கனிமம் வெட்டி எடுக்கப்படுகிறது.

இந்த வெர்மிகுலேட் கனிமம் வெப்பத்தை தனிக்கும் தன்மை கொண்டதால் வீடுகளின் கூரைகளில் பதிக்கவும், மின்சார இன்சுலேட்டர்கள் பேருந்து மேற்கூரை சீட், மேலும் வேளாண்துறையில் மரக்கன்றுகளை சுற்றி போடப்பட்டு ஈரப்பதத்தை பாதுகாக்கும் வகையில் உள்ளதால் அதிக அளவு பயன்படுத்தப்படுகிறது.

மாதத்திற்கு 100 முதல் 150 டன் அளவிற்கு வெட்டி எடுக்கப்படும் வெர்மிகுலேட் வேளாண் பயன்பாட்டிற்காக கோவை, தேனி மற்றும் தமிழகத்தின் பல்வேறு பகுதிகளுக்கு அனுப்பி வைக்கப்படுகிறது. கோடைக்காலத்தில் மட்டும் கனிமம் வெட்டும் பணிகள் நடைபெறும். மழைக்காலத்தில் இந்த சுரங்கப் பணிகள் நடைபெறாது.

இந்த நிறுவனத்தில் 40 பணியாட்கள் சுற்று வட்டார பகுதிகளில் இருந்து பணிபுரிந்து வருகிறார்கள்.

தொடர்ந்து நவீன தொழில் நுட்பத்தை கொண்டு ரூ.1.80 கோடி மதிப்பில் பட்டப்பட்டுள்ள புதிய வெர்மிகுலேட் கனிமத்தை தரம்பிரித்து சுடேற்றி பிரிக்கும் அலகு அமைக்கப்பட்டுள்ளது. இந்நிலையில் கலெக்டர் ராமன் பார்வையிட்டு ஆய்வு செய்து கேட்டறிந்தார்.

இதேபோன்ற அமைப்பு சென்னை அம்பத்தூரில் இயங்கி வருகிறது. இந்த வெர்மிகுலேட் தாது கனிமத்தை எடுத்து வரும் செலவை குறைக்கும் வகையில் இந்த புதிய சுரங்க அலகு கட்டப்பட்டுள்ளது. இதன்மூலம் பெருமளவு பயண நேரம் மிச்சப்படும் கலனின் போட்டு சூடேற்றப்படும் போது வெர்மிகுலேட் கனிம தாது மண் பாப்கார்ன் போன்று மாறிவிடும்.

இவற்றை 3 பிரிவாக தரம் பிரித்து அதன் தேவைக்கேற்ப விற்பனை செய்யப்படும். இந்த அலகை விரைவில் தமிழக முதல் அமைச்சர் திறந்து வைக்கவுள்ளார்கள் என்று டாமின் கோட்ட மேலாளர் ரமேஷ்பாபு, கலெக்டர் ராமனிடம் தெரிவித்தார்.

இதனை தொடர்ந்து கந்திலி ஊராட்சி ஒன்றியத்து ஊரக வளர்ச்சி மூலம் கட்டப்பட்டுள்ள தனிநபர் கழிப்பறை கட்டமைப்பு மற்றும் பாரத பிரதம மந்திரியின் வீடுகள் வழங்கும் திட்டத்தில் கட்டப்பட்டுள்ள வீட்டினையும் பார்வையிட்டார்.

சப்-கலெக்டர் பிரியங்கா, டாமின் கனிம நிறுவன கோட்ட மேலாளர் ரமேஷ்பாபு, சுரங்க பணி உதவியாளர் கார்த்திகேயன், திருப்பத்தூர் தாசில்தார் சத்தியமூர்த்தி, வட்டா வளர்ச்சி அலுவலர்கள் சீனிவாசன், சந்திரன் மற்றும் பலர் கலந்துக் கொண்டனர்.

வேலூர்:

வேலூர் வேலப்பாடி பூந்தோட்டம் பகுதியில் கடந்த சில மாதங்களுக்கு முன்பு கோட்டீஸ்வரன் என்பவர் கொலை செய்யபட்டார். இந்த வழக்கில் ஓல்டுடவுனை சேர்ந்த சாய்சரத் (24) என்பவர் உள்பட 4 பேர் கைது செய்யபட்டனர். ஜெயிலில் அடைக்கப்பட்ட சாய்சரத் ஜாமினில் வெளியே வந்தார். அவர் சரியாக வேலைக்கு போகாமல் வீட்டில் பணம் கேட்டுள்ளார்.

இதனால் வீட்டில் தகராறு ஏற்பட்டது. மனமுடைந்த சாய்சரத் நேற்று வீட்டில் தூக்குபோட்டு தற்கொலை செய்து கொண்டார். வேலூர் தெற்கு போலீசார் இது தொடர்பாக வழக்குபதிவு செய்து விசாரணை நடத்தி வருகின்றார்.

வேலூர்:

கோடைகாலத்தில் வேலூர் மாவட்டத்தில் வெயில் கொளுத்தும். இதனால் பொதுமக்கள் கோடைகாலங்களில் மிகுந்த சிரமத்திற்குள்ளாவார்கள். இந்த வருடம் கோடைகாலம் முடிந்தும் வேலூரில் வெயிலின் தாக்கம் குறையவில்லை. வேலூர் மாவட்டத்தில் அவ்வப்போது மழை பெய்தாலும், அதற்கு இணையாக வெயிலும் கொளுத்துகிறது.

இந்த நிலையில் நேற்று முன்தினம் 100 டிகிரியும், நேற்று 101.7 டிகிரியும் வெயில் பதிவானது.

இதனால் பகல் நேரத்தில் பொதுமக்கள் நடமாட்டம் குறைந்து சாலைகள் வெறிச்சோடி காணப்பட்டது.

நேற்று இரவு 8.30 மணி அளவில் திடீரென மழை பெய்ய தொடங்கியது. சுமார் ½ மணி நேரம் மழை பெய்ததால் சாலையில் மழைநீர் பெருக்கெடுத்து ஓடியது.

இரவில் பெய்த மழையால் பொதுமக்கள் மகிழ்ச்சி அடைந்தனர்.

ஜோர்பேட்டை:

வேலூர் மாவட்டம் நாட்டறம்பள்ளியை சேர்ந்தவர் மதியழகன்(வயது 24) ஆட்டோ டிரைவர் இவரது மனைவி ஜனனி (20) இவர்களுக்கு 1 மகன் உள்ளார்.

இந்நிலையில் மதியழகன் நேற்று இரவு நாட்டறம்பள்ளியில் இருந்து ஜோலார்பேட்டை நோக்கி பைக்கில் வந்து கொண்டிருந்தார். அப்போது குடியாலகுப்பம் என்ற இடத்தில் வந்த போது அங்கு சாலையின் ஓரம் நிறுத்தி வைக்கப்பட்டிருந்த லாரியின் பின் பக்கம் மோதினார்கள் இதில் மதியழகன் பலத்த காயமடைந்து சம்பவ இடத்திலேயே துடிதுடித்து இறந்தார்.

இது குறித்து தகவலறிந்த ஜோலார்பேட்டை போலீசார் சம்பவ இடத்திற்கு வந்து உடலை கைப்பற்றி திருப்பத்தூர் அரசு அஸ்பத்திரிக்கு அனுப்பி வைத்து விசாரணை நடத்தி வருகின்றனர்.