ஈரோடு

ஈரோடு:

ஈரோட்டில் இன்று மாலை ஏ.ஈ.டி.பள்ளி வளாகத்தில் எம்.ஜி.ஆர். நூற்றாண்டு விழா நடக்கிறது. இதில் சபாநாயகர் தனபால், முதல்-அமைச்சர் எடப்பாடி பழனிச்சாமி, துணை முதல் -அமைச்சர் ஓ.பன்னீர்செல்வம் உள்பட பலர் கலந்து கொள்கிறார்கள்.

நூற்றாண்டு விழா பணிகள் நடைபெறுவதை பள்ளி கல்வி துறை அமைச்சர் செங்கோட்டையன் மற்றும் சுற்றுச்சூழல்துறை அமைச்சர் கே.சி.கருப்பணன் ஆகியோர் பார்வையிட்டனர்.

அப்போது அமைச்சர் செங்கோட்டையன் கூறியதாவது:-

எம்.ஜி.ஆர். நூற்றாண்டு விழாவில் 15 ஆயிரம் மாணவர்களுக்கு விழிப்புணர்வு ஏற்படுத்தும் வகையில் வழிகாட்டு நிகழ்ச்சி நடைபெறுகிறது. இந்த நிகழ்ச்சி மாணவர்களை சிறந்த கல்வியாளர்களாக மாறுவதற்கான நிகழ்ச்சியாக அமையும்.

மாணவர்கள் அனைத்து போட்டி தேர்வுகளையும் சிறப்பாக எதிர்கொண்டு வெற்றிபெறும் வகையில் தமிழ்நாடு முழவதும் 412 பயிற்சி மையங்கள் அமைக்கப்படும். நேற்று மாலை 3.30 மணி யளவில் அரசு ஊழியர்களின் நிர்வாகிகள் கோட்டையில் முதல்- அமைச்சரை சந்தித்தனர்.

இதையடுத்து இன்று எம்.ஜி.ஆர். நூற்றாண்டு விழாவில் அரசு ஊழியர்கள் சங்க நிர்வாகிகளுடன் மீண்டும் முதல்வர் பேச்சு வார்த்தை நடத்த உள்ளார். இந்த பேச்சுவார்த்தை சுமூக உடன்பாடு ஏற்பட்டு நிறைவு பெறும் வகையில் அமையும்.

இதையொட்டி முதல்அமைச்சருக்கு ஜாக்டோ-ஜியோ அமைப்பினர் நன்றி கூறும் நிகழ்ச்சியும் நடைபெறும்.

இவ்வாறு அமைச்சர் செங்கோட்டையன் கூறினார்.

ஈரோடு:

ஈரோட்டில் இன்று நடை பெறும் எம்.ஜி.ஆர். நூற்றாண்டு விழாவில் கலந்து கொள்ள வந்த பாராளுமன்ற துணை சபாநாயகர் தம்பித்துரை நிருபர்களிடம் கூறியதாவது:-

நீட் தேர்வை ஜெயலலிதா ஏற்கவில்லை. அவரது நிலை பாட்டில்தான் அரசும் உள்ளது. எனவே தமிழகத்தை பொறுத்தவரை அமைச்சர்கள் நீட் தேர்வை ஏற்றுக் கொள்ளவில்லை.

நீட் தேர்வை குஜராத் மாநிலம் ஏற்கவில்லை. மேற்கு வங்காளம், கர்நாடகாவும் ஏற்றுக்கொள்ளவில்லை. அதே நிலையில்தான் தமிழக அரசும் உள்ளது. விதி விலக்கு கேட்டிருக்கிறோம்.

எனவே இந்த விசயத்தில் ஒத்த கருத்துள்ள முதல்- அமைச்சர்களுடன் கலந்து பேசி மாற்று ஏற்பாடாக என்ன செய்வது? என்று அரசு ஆலோசித்து வருகிறது. ஆனால் தவறான வாக்குறுதிகளை கொடுக்க நாங்கள் விரும்பவில்லை.

தற்போது வந்த சுப்ரீம் கோர்ட்டு தீர்ப்புதான் திடீர் குழப்பத்தை ஏற்படுத்திவிட்டது. நீட் தேர்வு விவகாரத்தில் மாணவர்களின் பிரச்சினைகளை உணர்ந்து அரசு செயல்படுகிறது.

எனவே மாணவர்கள் நீட் தேர்வுக்கு எதிரான போராட்டத்தை கைவிட வேண்டும். இவ்வாறு துணை சபாநாயகர் தம்பித்துரை கூறினார்.

முன்னதாக அவர் எம். ஜி.ஆர். புகைப்பட கண்காட் சியை தொடங்கி வைத்தார். அமைச்சர்கள் செங்கோட் டையன், ஓ.எஸ் மணியன், கடம்பூர் ராஜூ உள்பட பலர் கலந்து கொண்டனர்.

ஆப்பக்கூடல்:

அத்தாணி அருகே உள்ள குப்பாண்டபாளையத்தை சேர்ந்தவர் ஜெகநாதன். இவரது மகள் ஷோபனா (வயது 20). இவர் கோபி அரசு கல்லூரியில் 3-ம் ஆண்டு படித்து வந்தார். நேற்று இரவு அவர் வீட்டில் படுத்திருந்தார்.

திடீரென அவரது பெற்றோர் எழுந்து பார்த்தனர். அப்போது ஷோபனாவை காணவில்லை. அந்த பகுதியில் பெற்றோர் அவரை தேடி பார்த்தனர்.

தோழிகள், உறவினர்கள் வீடுகளுக்கும் தொடர்பு கொண்டு கேட்டனர். ஆனால் ஷோபனாவை பற்றி எந்த தகவலும் கிடைக்கவில்லை.

இரவு முழுவதும் தேடி பார்த்தும் ஷோபனா கிடைக்காததால் பெற்றோர் பயத்தில் இருந்தனர். இன்று காலை வீட்டில் உள்ள கிணற்றுப்பகுதிக்கு ஒருவர் சென்றார்.

எதேச்சையாக கிணற்றுக்குள் பார்த்தபோது உள்ளே ஷோபனா பிணமாக மிதப்பது தெரியவந்தது. இதை பார்த்து பெற்றோர் அதிர்ச்சி அடைந்தனர்.

இது குறித்து ஆப்பக்கூடல் போலீஸ் நிலையத்துக்கு தகவல் தெரிவிக்கப்பட்டது. தகவல் கிடைத்ததும் போலீசார் சம்பவ இடத்துக்கு விரைந்து சென்றனர்.

அக்கம் பக்கத்தினரின் உதவியுடன் கிணற்றுக்குள் இருந்து ஷோபனாவின் பிணம் மீட்கப்பட்டது. பின்னர் பிரேத பரிசோதனைக்காக அரசு ஆஸ்பத்திரிக்கு அனுப்பி வைக்கப்பட்டது.

ஷோபனாவுக்கு நோய் இருந்ததாகவும், அதற்காக சிகிச்சை பெற்று வருவதும், ஆனாலும் நோய் குணமடையவில்லையாம். இதனால் விரக்தி அடைந்த ஷோபனா கிணற்றில் குதித்து தற்கொலை செய்து கொண்டது விசாரணையில் தெரியவந்துள்ளது.

வேறு ஏதும் காரணம் உண்டா? என போலீசார் தொடர்ந்து விசாரணை நடத்தி வருகிறார்கள். இந்த சம்பவம் அந்த பகுதியில் பரபரப்பை ஏற்படுததி உள்ளது.

பவானி:

கோவையில் இருந்து புதுச்சேரி நோக்கி நேற்று இரவு சொகுசு பஸ் சென்று கொண்டிருந்தது. பஸ்சில் 40 பயணிகள் இருந்தனர்.

நள்ளிரவு நேரத்தில் அந்த பஸ் ஈரோடு மாவட்டம் பவானியை பகுதிக்கு வந்தது. சித்தோட்டில் உள்ள தனியார் என்ஜினீயரிங் கல்லூரி அருகே வந்தபோது அங்கு நின்ற இரு சக்கர வாகனம் மீது பஸ் மோதியதாக கூறப்படுகிறது.

சிறிது நேரத்தில் பஸ் தீப்பிடித்து எரியத் தொடங்கியது. பயணிகளில் பெரும்பாலானோர் தூங்கிக் கொண்டு இருந்தனர்.

பஸ் தீப்பிடித்து எரிந்ததும் பயணிகள் அனைவரும் எழுப்பி விடப்பட்டனர். பஸ் எரிவதை பார்த்த பயணிகள் அலறி அடித்துக்கொண்டு சூட்கேஸ், பைகளை தூக்கிக் கொண்டு விரைவாக கீழே இறங்கினர்.

இதன் காரணமாக அனைவரும் உயிர் தப்பினர். இது பற்றி ஈரோடு தீயணைப்பு நிலையத்துக்கு தகவல் தெரிவிக்கப்பட்டது. தகவல் கிடைத்ததும் தீயணைப்பு வீரர்கள் சம்பவ இடத்துக்கு விரைந்தனர்.

வெகு நேரம் போராடி தீயை அணைத்தனர். எனினும் பஸ் முற்றிலும் எரிந்து நாசமானது. பஸ்சில் வந்த பயணிகள் வேறு பஸ்களில் அனுப்பி வைக்கப்பட்டனர்.

இந்த சம்பவம் அந்த பகுதியில்  பரபரப்பை ஏற்படுத்தியது. இரு சக்கர வாகனம் மீது மோதியதால்தான் பஸ் தீப்பிடித்து எரிந்ததா? அல்லது வேறு ஏதும் காரணமா? என்பது குறித்து விசாரணை நடக்கிறது.

ஈரோடு:

ஈரோடு, மூலப்பாளையம் பகுதியை சேர்ந்த 17 வயது கல்லூரி மாணவி ஓருவர் தனியார் கல்லூரியில் படித்து வந்தார்.

அந்த மாணவி தனது படிப்பிற்காக லேப்-டாப் வாங்கி தர வேண்டும் என்று பெற்றோரிடம் கேட்டதாகவும், அதற்கு அவர்கள் வாங்கி தர மறுத்ததாகவும் கூறப்படுகிறது.

இதனால் அந்த மாணவி மனவேதனையில் இருந்ததாக கூறப்படுகிறது. இந்நிலையில் நேற்று இரவு அந்த மாணவி வீட்டில் யாரும் இல்லாத நேரத்தில் தூக்குபோட்டு கொண்டார்.

சிகிச்சைக்காக அந்த மாணவியை ஈரோடு அரசு ஆஸ்பத்திரிக்கு கொண்டு சென்றனர். மாணவியை பரிசோதித்த டாக்டர் அவர் வரும் வழியிலேயே இறந்து விட்டதாக கூறினார்.

இது குறித்து தாலுகா போலீசார் வழக்குபதிவு செய்து விசாரணை நடத்தி வருகிறார்கள். மாணவியின் உடலை பார்த்து பெற்றோர் அழுதது பரிதாபமாக இருந்தது.

அம்மாபேட்டை:

அம்மாபேட்டை அருகே உள்ள நெரிஞ்சிப்பேட்டை மணியக்கார வீதியை சேர்ந்தவர் மாதையன் (வயது 64). விவசாயி. இவரது மனைவி மாதம்மாள் (60). இவர்கள் 2 பேரும் இன்று காலை மொபட்டில் நெரிஞ்சிப்பேட்டைக்கு சென்றனர். அங்குள்ள கூட்டுறவு சொசைட்டியில் பால் ஊற்றி விட்டு திரும்பினர்.

மேட்டூர்-பவானி மெயின் ரோட்டில் அவர்கள் ஏறினர். அப்போது மேட்டூர் பகுதியில் இருந்து அம்மாபேட்டை நோக்கி வந்த வேனும், மொபட்டும் மோதிக்கொண்டன.

இதில் மாதையனும், மாதம்மாளும் தூக்கி வீசப்பட்டனர். மாதம்மாள் அதே இடத்தில் கணவர் கண் முன்பு பரிதாபமாக இறந்தார். மாதையனின் வலது காலில் முறிவு ஏற்பட்டு பலத்த காயத்துடன் கிடந்தார். அக்கம் பக்கத்தினர் அவரை மீட்டு சிகிச்சைக்காக பவானியில் உள்ள தனியார் ஆஸ்பத்திரிக்கு அனுப்பி வைத்தனர்.

பின்னர் மேல் சிகிச்சைக்காக மாதையன் கோவையில் உள்ள தனியார் ஆஸ்பத்திரியில் சேர்க்கப்பட்டார். அங்கு அவருக்கு சிகிச்சை அளிக்கப்பட்டு வருகிறது.

இது குறித்து அம்மாபேட்டை போலீசார் வழக்குப் பதிவு செய்து விசாரணை நடத்தி வருகிறார்கள்.

ஈரோடு:

நீட் தேர்வுக்கு எதிராக வழக்கு தொடர்ந்த மாணவி அனிதா தற்கொலை கொண்டார். இதைத் தொடர்ந்து மத்திய-மாநில அரசுகளுக்கு எதிராக போராட்டம் வலுத்துள்ளது.

ஈரோட்டில் காளை மாட்டு சிலை அருகே தந்தை பெரியார் திராவிடர் கழகத்தினர் பிரதமர் மோடி உருவ பொம்மையை எரிக்க முயன்றனர்.

மாணவரணி கபிலன் தலைமையில் மாவட்ட செயலாளர் குமரகுருபரன் முன்னிலையில் தந்தை பெரியார் திராவிடர் கழகத்தினர் சுமார் 25 பேர் மோடி உருவ பொம்மையுடன் வந்தனர்.

அப்போது அவர்கள் நீட் தேர்வுக்கு எதிராகவும், பிரதமர் மோடிக்கு எதிராகவும் கோ‌ஷம் எழுப்பினர். அவர்களை சூரம்பட்டி போலீஸ் இன்ஸ்பெக்டர் ராஜ்குமார் தலைமையிலான போலீசார் தடுத்து நிறுத்தி மோடி உருவ பொம்மையை பறித்தனர்.

பின்னர் பிரதமர் உருவ பொம்மையை எரிக்க முயன்றதாக 5 பெண்கள் உள்பட 23 பேரை போலீசார் கைது செய்தனர். இந்த சம்பவத்தால் அந்த பகுதியில் பரபரப்பு ஏற்பட்டது.