விளையாட்டு

புதுடெல்லி:

இந்தியா-பாகிஸ்தான் அணிகள் இடையிலான கிரிக்கெட் போட்டி தொடரின் போது களத்தில் அடிக்கடி வாக்குவாதத்தில் ஈடுபடும் அப்ரிடி, கவுதம் கம்பீர் இடையிலான மோதல் ஓய்வுக்கு பிறகும் தொடர்ந்து வருகிறது. பாகிஸ்தான் கிரிக்கெட் அணியின் முன்னாள் கேப்டனும், ஆல்-ரவுண்டருமான அப்ரிடி தனது சுயசரிதை புத்தகத்தில், இந்திய கிரிக்கெட் அணியின் முன்னாள் வீரர் கவுதம் கம்பீர் குறித்து குறிப்பிட்டு வம்புக்கு இழுத்து இருக்கிறார். அதில் ‘கவுதம் கம்பீருக்கு குணநலனில் கோளாறு இருக்கிறது. அவருடைய எண்ணங்கள் சரியில்லை. அவருக்கென்று ஒரு தனித்தன்மை கிடையாது. அவரை போன்ற கிரிக்கெட் வீரர்கள் எப்போதாவது தான் இருப்பார்கள். அவர் கிரிக்கெட்டில் சிறந்த சாதனை எதுவும் செய்ததில்லை. ஆனால் மனதில் டான் பிராட்மேனும், ஜேம்ஸ்பாண்டும் கலந்து செய்யப்பட்ட கலவை போல அவர் தன்னைத் தானே நினைத்து கொள்வார்’ என்று குறிப்பிட்டுள்ளார்.

இதற்கு கவுதம் கம்பீர் தனது டுவிட்டர் மூலம் பதிலடி கொடுத்துள்ளார். அந்த பதிவில், ‘தனது வயதையே நினைவு வைத்து கொள்ள முடியாத ஒருவருக்கு, எனது சாதனையை எப்படி நினைவில் வைத்து கொள்ள முடியும். சரி பரவாயில்லை, அப்ரிடிக்கு ஒன்றை நினைவுப்படுத்த விரும்புகிறேன். 2007-ம் ஆண்டு நடந்த 20 ஓவர் உலக கோப்பை கிரிக்கெட் இறுதிப் போட்டியில் பாகிஸ்தானுக்கு எதிரான ஆட்டத்தில் நான் 54 பந்துகளில் 75 ரன்கள் அடித்தேன். அந்த போட்டியில் நீங்கள் (அப்ரிடி) முதல் பந்திலேயே டக்-அவுட். மிக முக்கியமாக நாங்கள் கோப்பையை கைப்பற்றினோம். ஆம் பொய்யர்கள் மற்றும் சந்தர்ப்பவாதிகளுக்கு எதிராக எனது நடத்தை இப்படி தான் இருக்கும்’ என்று தெரிவித்துள்ளார். 

மும்பை:

இந்திய கிரிக்கெட் அணியின் முன்னாள் கேப்டனும், விக்கெட் கீப்பருமான மகேந்திர சிங் டோனி கடந்த ஆண்டு ஜூலை மாதம் நடந்த உலக கோப்பை கிரிக்கெட் போட்டிக்கு பிறகு எந்த போட்டிகளிலும் பங்கேற்கவில்லை. எதிர்காலத் திட்டம் குறித்து எதுவும் சொல்லாமல் மவுனம் காத்து வரும் டோனி ஐ.பி.எல். கிரிக்கெட் போட்டிக்கு தன்னை தீவிரமாக தயார்படுத்தி வந்தார். ஆனால் கொரோனா அச்சத்தால் கடந்த மாதம் தொடங்க இருந்த 13-வது ஐ.பி.எல். கிரிக்கெட் திருவிழா காலவரையின்றி தள்ளிவைக்கப்பட்டு உள்ளது. ஐ.பி.எல். தொடரில் விளையாடுவதை பொறுத்தே அவர் மீண்டும் இந்திய அணிக்கு தேர்வு செய்யப்படுவார் என்று தலைமை பயிற்சியாளர் ரவிசாஸ்திரி கூறியிருந்தார். ஐ.பி.எல். போட்டிகளும் நடக்காததால் 38 வயதான டோனி மீண்டும் இந்திய அணிக்கு திரும்புவது கேள்விக்குறியாகி இருக்கிறது. முன்னாள் வீரர்கள் ஸ்ரீகாந்த், ஆகாஷ் சோப்ரா உள்ளிட்டோர் டோனி இந்திய அணிக்கு மறுபிரவேசம் செய்வதற்கான வாய்ப்பு மங்கி போய் விட்டதாக கூறியுள்ளனர்.

இந்த நிலையில் டோனி விவகாரம் குறித்து இந்திய அணியின் முன்னாள் கேப்டனும், ஐதராபாத் கிரிக்கெட் சங்கத் தலைவருமான முகமது அசாருதீனிடம் கேட்ட போது, ‘டோனி அடுத்து என்ன செய்ய விரும்புகிறார் என்பதை என்னை விட அவர் விளக்குவதே நன்றாக இருக்கும். இது அவருடைய சொந்த விருப்பம். கொரோனா பரவலால் இப்போதைக்கு நாட்டின் சூழ்நிலை சரியவில்லை. அதனால் ஐ.பி.எல். போட்டிகளும் திட்டமிட்டபடி நடக்கவில்லை. இத்தகைய பிரச்சினை எல்லாம் சரியாக கொஞ்சம் நாள் பிடிக்கும். அதே நேரத்தில் டோனியை பொறுத்தவரை இது அவருடைய தனிப்பட்ட முடிவு தான். அவர் இந்திய அணிக்கு திரும்புவது எளிதான விஷயமல்ல.

அப்படியே வாய்ப்பு அளிப்பதாக இருந்தாலும் தேர்வாளர்கள் நிச்சயம் அவரது திறனை பரிசோதித்து பார்ப்பார்கள். ஏனெனில் அவர் நீண்ட காலம் விளையாடாமல் இருக்கிறார். பயிற்சி பெறும் விதமாக போட்டிகளில் விளையாடுவது (உள்ளூர் மற்றும் ஐ.பி.எல். போன்றவை) உண்மையிலேயே மிகவும் முக்கியம். நீங்கள் எவ்வளவு பெரிய வீரராக இருந்தாலும் தொடர்ந்து ஓரளவு கிரிக்கெட் விளையாட வேண்டும். பயிற்சி மேற்கொள்வது என்பது வேறு, களத்தில் இறங்கி போட்டிகளில் விளையாடி அதன் மூலம் பயிற்சி எடுப்பது என்பது வேறு என்பதை புரிந்து கொள்ள வேண்டும்’ என்றார்.

புதுடெல்லி:

கொரோனா வைரஸ் தாக்கம் காரணமாக ஊரடங்கு அமலில் இருப்பதால் ஏழைகள் மற்றும் கூலி தொழிலாளர்களின் குடும்பத்தினர் மிகுந்த சிரமத்தை எதிர்கொண்டு வருகிறார்கள். சாப்பாட்டுக்கு கூட வழியில்லாத நிலையில் பலர் பரிதவிக்கிறார்கள். இத்தகைய ஏழைக்கூலி தொழிலாளர்களின் குடும்பத்தினருக்கு உதவுவதற்காக நிதி திரட்ட இந்திய பெண்கள் ஆக்கி அணியினர் வித்தியாசமான முயற்சியில் ஈடுபட்டுள்ளனர். அதாவது 18 நாட்கள் உடல் தகுதி பயிற்சி குறித்த வெவ்வேறு விதமான சவால்களை இந்திய ஆக்கி அணி வீராங்கனைகள் ஆன்லைன் மூலம் அறிவித்து அதனை செய்து காட்டும்படி ரசிகர்களுக்கு அழைப்பு விடுப்பார்கள். அந்த சவாலை ஏற்பவர்கள் குறைந்தபட்சம் ரூ.100 செலுத்தி இந்த ஜாலியான போட்டியில் பங்கேற்கலாம். இந்த உடற்பயிற்சி சவால் மூலம் திரட்டப்படும் நிதி டெல்லியில் உள்ள தன்னார்வ தொண்டு நிறுவனமான உதய் பவுண்டேசனிடம் வழங்கப்படும்.

இது குறித்து இந்திய பெண்கள் ஆக்கி அணியின் கேப்டன் ராணி ராம்பால் விடுத்துள்ள செய்திக்குறிப்பில், ‘கொரோனா பாதிப்பு காரணமாக இந்த தருணத்தில் நிறைய மக்கள் உணவு கிடைக்காமல் தவித்து வருவதாக செய்தித்தாள்கள் மற்றும் சமூக ஊடகங்கள் மூலமாக நாங்கள் தினசரி படித்து வருகிறோம். இந்த ஏழை மக்களுக்கு, அணியாக ஏதாவது உதவி செய்ய வேண்டும் என்று நாங்கள் முடிவு செய்து இருக்கிறோம். அதற்காக ஆன்லைன் மூலம் உடல் தகுதி சவால் போட்டி நடத்தி நிதி திரட்டுவது சரியான வழியாக இருக்கும் என்ற முடிவுக்கு வந்துள்ளோம். இந்த முயற்சியின் மூலம் மக்களையும் தொடர்ந்து சுறுசுறுப்பாக வைத்து கொள்ள முடியும் என்று நாங்கள் நினைக்கிறோம். குறைந்தபட்சம் 1,000 குடும்பத்தினருக்கு தேவையான அத்தியாவசிய பொருட்களையாவது வழங்க வேண்டும் என்பதே எங்கள் நோக்கமாகும்’ என்று தெரிவிக்கப்பட்டுள்ளது.