விளையாட்டு

புதுடெல்லி:

இந்திய கிரிக்கெட் அணியின் முன்னணி வேகப்பந்து வீச்சாளர் 26 வயதான ஜஸ்பிரித் பும்ரா, முன்னாள் வீரர் யுவராஜ்சிங்குடன் ‘இன்ஸ்டாகிராம்’ மூலம் நேரடியாக கலந்துரையாடினார். அப்போது, கேள்விகளுக்கு அதிவேகமாக பதில் அளிக்க வேண்டும் என்ற அடிப்படையில் யுவராஜ்சிங் தொடுத்த கேள்விகளும், அதற்கு பும்ரா திக்கித் திணறி அளித்த பதில்களும் வருமாறு:-

யுவராஜ்: விராட் கோலி (இந்திய கிரிக்கெட் அணி கேப்டன்), இப்ராகிமோவிச் (சுவீடன் கால்பந்து வீரர்) ஆகியோரில் உங்களது உடல்தகுதி முன்மாதிரி (ரோல் மாடல்) யார்?

பும்ரா: இப்ராகிமோவிச். அவர் எனது உடல்தகுதி முன்மாதிரி மட்டும் அல்ல. பொதுவாகவே அவரை எனது முன்மாதிரியாக வைத்திருக்கிறேன்.

யுவராஜ்: சச்சின் தெண்டுல்கர், விராட் கோலி ஆகியோரில் சிறந்த பேட்ஸ்மேனாக யாரை நினைக்கிறீர்கள்?

பும்ரா: இங்க பாருங்க யுவி....நான் வெறும் 4 ஆண்டுகள் தான் சர்வதேச கிரிக்கெட்டில் விளையாடி வருகிறேன். அவர்களில் யார் சிறந்தவர் என்பதை கணிக்கும் அளவுக்கு எனக்கு போதுமான அனுபவம் கிடையாது. விராட்-தெண்டுல்கர் அல்லது சச்சின்-கோலி. இந்த கேள்விக்கு பதில் அளிக்கக்கூடிய நிலையில் நான் இல்லை. ஏனெனில் அவர்கள் என்னை விட மிக அதிக சர்வதேச போட்டிகளை விளையாடி இருக்கிறார்கள்.

யுவராஜ்: நான் உனது (பும்ரா) சுயசரிதையை இங்கு கேட்கவில்லை. உனக்கு உரையாடலின் விதிமுறையை தெளிவாக சொல்லி இருக்கிறேன். ஒவ்வொரு கேள்விக்கும் 5 வினாடிகளுக்குள் பதில் சொல்ல வேண்டும். எனக்கு தெளிவான பதில் தேவை. அவர்களில் உனக்கு பிடித்தமானவர் யார்?

பும்ரா: எனக்கு எல்லோரும் சமம் தான். உங்கள் அனைவர் மீதும் ஒரே மாதிரியான மதிப்பு, மரியாதை வைத்திருக்கிறேன். நீங்கள் அடுத்த கேள்வியை கேளுங்கள்?

(ஆனாலும் யுவராசிங் தொடர்ந்து கிடுக்குபிடி போட்டதால் இந்த கேள்விக்கு பும்ரா மழுப்பலாக பதில் அளித்தார்.)

பும்ரா: தெண்டுல்கருக்கு உலகம் முழுவதும் ஏராளமான ரசிகர்கள் உள்ளனர். கோலியும் அவரது ரசிகர் தான். அதனால் தெண்டுல்கரை தேர்வு செய்கிறேன்.

யுவராஜ்: சுழற்பந்து வீச்சாளர்கள் ஹர்பஜன்சிங், அஸ்வின் ஆகியோரில் சிறந்த ஆப்-ஸ்பின்னர் யார்?

பும்ரா: ஏன் இப்படி சர்ச்சைக்குரிய கேள்விகளாக கேட்கிறீர்கள். நான் அஸ்வினுடன் இணைந்து விளையாடி இருக்கிறேன். ஹர்பஜன்சிங்கின் பந்து வீச்சை சிறுவயதில் இருந்தே பார்த்து உள்ளேன். எனது தேர்வு ஹர்பஜன்சிங்.

யுவராஜ்: டோனி அல்லது யுவராஜ்சிங் ஆகியோரில் பிடித்த மிடில் வரிசை பேட்ஸ்மேன் யார்?

பும்ரா: ஏன் இப்படி.....அப்பா, அம்மா ஆகிய இருவரில் யாரை பிடிக்கும் என கேட்பது போல் உள்ளது. இந்திய அணிக்காக நீங்களும், டோனியும் இணைந்து வெற்றியை தேடித்தந்த ஆட்டங்களை பார்த்து வளர்ந்தவன் நான். ஏன் இந்த மாதிரியான கேள்விகளை எல்லாம் கேட்கிறீர்கள். நீங்கள் இங்கே குறிப்பிட்ட அனைத்து வீரர்களும் எனக்கு பிடித்தமானவர்கள் தான். இருவரில் ஒருவரை என்னால் தேர்வு செய்ய முடியாது. இளம் வயதில் நான் உங்கள் இருவரின் ரசிகன்.

இவ்வாறு உரையாடல் நடந்தது.

உரையாடலின் போது பும்ராவை வெகுவாக பாராட்டிய யுவராஜ்சிங், ‘உலகின் நம்பர் ஒன் பந்து வீச்சாளர் நீ என்று நம்ப வேண்டிய அவசியம். உன்னை பற்றி வெளியில் என்ன நினைக்கிறார்கள் என்பது பற்றி கவலைப்படாதே. மூன்று வடிவிலான போட்டிகளிலும் நம்பர் ஒன் பந்து வீச்சாளர் அஸ்தஸ்தை எட்டுவதற்குரிய திறமை உன்னிடம் இருக்கிறது. அடுத்த 2 ஆண்டுகள் நம்பர் ஒன் பவுலராக இருக்க வேண்டும் என்பதில் கவனம் செலுத்த வேண்டும். அணியில் இப்போது நீ பக்குவமடைந்த ஒரு பவுலர். பழகுவதில் இனிமையான வீரர்களில் ஒருவர்’ என்றார்.

புதுடெல்லி:

இந்திய கிரிக்கெட் அணியின் முன்னாள் அதிரடி ஆல்-ரவுண்டர் யுவராஜ்சிங் ஊரடங்கு அமலில் உள்ள இந்த காலக்கட்டத்தில் தனது முந்தைய ருசிகர அனுபவங்களை சமூக வலைதளம் மூலம் பகிர்ந்து வருகிறார்.

2007-ம் ஆண்டு தென்ஆப்பிரிக்காவில் நடந்த 20 ஓவர் உலக கோப்பை கிரிக்கெட் போட்டியில் இங்கிலாந்து வேகப்பந்து வீச்சாளர் ஸ்டூவர்ட் பிராட்டின் ஒரே ஓவரில் 6 சிக்சர் நொறுக்கி சரித்திர சாதனை நிகழ்த்தினார். அச்சாதனையை நினைவு கூர்ந்துள்ள யுவராஜ்சிங் கூறியதாவது:-

அந்த ஆட்டத்தில் முந்தைய ஓவரில் இங்கிலாந்து ஆல்-ரவுண்டர் பிளின்டாப் என்னை சீண்டி வெறுப்பேற்றினார். அவர் ஏதோ சொல்ல, நானும் சில வார்த்தைகளை உதிர்த்தேன். இதனால் கூடுதல் உத்வேகத்தில் இருந்த நான் ஸ்டூவர்ட் பிராட் வீசிய அடுத்த ஓவரில் 6 பந்துகளையும் சிக்சருக்கு பறக்கவிட்டு அசத்தினேன். இங்கிலாந்துக்கு எதிராக ஒரே ஓவரில் 6 சிக்சர் விளாசியது எனக்கு மிகவும் மகிழ்ச்சி அளித்தது. ஏனெனில் முந்தைய வாரத்தில் தான் ஒருநாள் கிரிக்கெட் போட்டியில் இங்கிலாந்து வீரர் மாஸ்கரனாஸ் எனது பந்து வீச்சில் ஒரே ஓவரில் 5 சிக்சர் அடித்திருந்தார். இந்த ஆட்டத்தில் நான் 6-வது சிக்சர் தூக்கியதும் முதலில் பிளின்டாப்பை தான் நோக்கினேன். அடுத்து மாஸ்கரனாஸ் பக்கம் திரும்பினேன். அவர் என்னை பார்த்து சிரித்தார்.

இந்த தொடரில் ஸ்டூவர்ட் பிராட்டின் தந்தை கிறிஸ் பிராட் போட்டி நடுவர்களில் ஒருவராக பணியாற்றினார். அவர் மறுநாள் என்னிடம் வந்து, ‘ஏறக்குறைய நீ எனது மகனின் கிரிக்கெட் வாழ்க்கையை முடித்து வைத்துவிட்டாய். இப்போது அவனுக்கு நீ கையெழுத்திட்டு ஒரு பனியனை தருவாயா?’ என்று கேட்டார்.

நான் இந்திய அணிக்குரிய சீருடையை அவரிடம் வழங்கினேன். அதில், ‘ஸ்டூவர்ட் பிராட்டுக்காக சில வாசகங்களை எழுதினேன். எனது பந்து வீச்சில் ஒரே ஓவரில் 5 சிக்சர் அடிக்கப்பட்டிருக்கிறது. எனவே அந்த வேதனை எனக்கு புரியும். இங்கிலாந்து கிரிக்கெட்டில் சிறப்பான எதிர்காலம் அமைய வாழ்த்துகள்’ என்று அதில் எழுதியிருந்தேன்.

இப்போது உலகின் சிறந்த பந்து வீச்சாளர்களில் ஒருவராக ஸ்டூவர்ட் பிராட் திகழ்கிறார். இந்திய வீரர்களின் பந்து வீச்சில் ஒரே ஓவரில் 6 சிக்சர் அடிக்கப்படக்கூடும் என்று நான் நினைக்கவில்லை.

இவ்வாறு யுவராஜ் சிங் கூறினார்.

புதுடெல்லி:

இந்திய கிரிக்கெட் அணியின் வேகப்பந்து வீச்சாளரும், ஐ.பி.எல். போட்டியில் கடந்த ஆண்டு சென்னை சூப்பர் கிங்ஸ் அணிக்காக விளையாடியவருமான 31 வயதான மொகித் ஷர்மா, இந்த சீசனில் டெல்லி கேப்பிட்டல்ஸ் அணியில் இடம் பிடித்துள்ளார். கொரோனா வைரஸ் அச்சுறுத்தல் காரணமாக இந்த ஆண்டுக்கான ஐ.பி.எல். போட்டி காலவரையின்றி தள்ளி வைக்கப்பட்டு இருக்கும் நிலையில் டெல்லி கேப்பிட்டல்ஸ் அணி நிர்வாகம் சார்பில் நடந்த இன்ஸ்டாகிராம் உரையாடலில் கலந்து கொண்ட மொகித் ஷர்மா கூறியதாவது:-

நான் விளையாடிய வீரர்களுடன் ஒப்பிட்டு பார்க்கையில் டோனியின் பணிவு மற்றும் நன்றியுணர்வு அவரை மற்ற வீரர்களிடம் இருந்து தனித்து காட்டுகிறது. மனிதநேயம் மிக்க அவர் மிகவும் எளிமையானவர். விளையாட்டில் கேப்டனுக்கும், தலைவருக்கும் வித்தியாசம் உண்டு. டோனி ஒரு உண்மையான தலைவர் என்று நான் நம்புகிறேன். அணி எப்பொழுது வெற்றி பெற்றாலும், அதில் தனக்கு முக்கிய பங்கு இருப்பதாக அவர் ஒருபோதும் காட்டிக் கொள்ளமாட்டார். வெற்றி பெற்ற போட்டியில் சிறந்து விளங்கிய வீரரை தான் பத்திரிகையாளர் சந்திப்புக்கு அனுப்புவார். ஆனால் அணி தோல்வியை சந்தித்தால், தயங்காமல் எப்பொழுதும் அதற்கான பொறுப்பை முன்னின்று அவர் ஏற்றுக்கொள்வார். அதுவே ஒரு தலைவருக்குரிய நல்ல அறிகுறியாகும். அது அவரிடம் என்னை அதிகம் கவர்ந்த விஷயமாகும். டோனியின் தலைமையின் கீழ் நான் விளையாடி இருக்கிறேன். உலகில் உள்ள எல்லா கிரிக்கெட் வீரர்களும் டோனியின் கேப்டன்ஷியில் விளையாட விரும்புவார்கள்.

முதுகுவலி பிரச்சினையை சரிப்படுத்த ஆபரேஷன் செய்வது சரியானது என்று முடிவெடுத்து அதனை செய்த பிறகு நல்ல நிலைக்கு திரும்பி உள்ளேன். இந்த சீசனில் டெல்லி கேப்பிட்டல்ஸ் அணிக்காக விளையாடுவதை ஆவலுடன் எதிர்நோக்கி இருக்கிறேன். இந்த முறை வெற்றி வாகை சூட எங்கள் அணிக்கு நல்ல வாய்ப்பு இருப்பதாக நான் நினைக்கிறேன். வலுவான இந்திய வீரர்கள் உள்பட அருமையான வீரர்கள் எங்கள் அணியில் இடம் பிடித்துள்ளனர். எல்லா துறைகளிலும் சரியான வீரர்கள் எங்கள் அணியில் இடம் பெற்று இருப்பதாக நான் நம்புகிறேன். அவர்கள் கோப்பையை வெல்லும் சவாலுக்கு எங்களுக்கு உதவுவார்கள். எனவே எங்கள் ரசிகர்கள் அணியிடம் இருந்து பெரிய விஷயங்களை எதிர்பார்க்கலாம் என்று நான் நினைக்கிறேன்.

டெல்லி கேப்பிட்டல்ஸ் அணிக்காக விளையாட உற்சாகமாக இருக்கிறேன். இது இளம் வீரர்களை அதிகம் கொண்ட அணியாகும். அணியில் இடம் பெற்றுள்ள ஷிகர் தவான், இஷாந்த் சர்மா, அமித் மிஸ்ரா, ஹர்ஷல் பட்டேல் உள்ளிட்ட பெரும்பாலான வீரர்களை எனக்கு நன்றாக தெரியும். பயிற்சியாளர் ரிக்கி பாண்டிங்குடன் (ஆஸ்திரேலியா) இணைந்து பணியாற்றுவதற்கும், அவரிடம் இருந்து கற்றுக்கொள்வதற்கும் இது பொன்னான வாய்ப்பாகும். எல்லா வீரர்களும் அவரை பாராட்டி வருகிறார்கள். ஐ.பி.எல். போட்டி எப்பொழுது நடந்தாலும், இந்த அணி மிகவும் சிறப்பாக செயல்படும் என்று நான் நம்புகிறேன். டெல்லி அணியின் ரசிகர்களுக்கு நாங்கள் சிறந்த மகிழ்ச்சியை கொடுப்போம்.

பவுலர்கள் பந்தை பளபளக்க செய்ய சிறிய பொருளை வைத்து தேய்த்து கொள்ள சர்வதேச கிரிக்கெட் கவுன்சில் அனுமதி அளிக்க திட்டமிட்டு இருப்பதாக கூறப்படும் விஷயத்தில் என்ன முடிவு எடுக்கப்படுகிறது என்பதை பார்க்க ஆர்வமாக இருக்கிறேன். இந்த விஷயத்தில் ஒவ்வொரு பவுலருக்கும் தனிப்பட்ட விருப்பம் இருக்கும். பந்தை பளபளக்க செய்ய நான் எச்சிலை அதிகம் பயன்படுத்தமாட்டேன். மேலும் இந்த நாட்களில் எச்சிலை அதிகம் பயன்படுத்த நடுவர்கள் அனுமதிக்கமாட்டார்கள். பந்தை பளபளக்க செய்ய வியர்வையை பயன்படுத்துவதில் எனக்கு எந்த பிரச்சினையும் இல்லை.

இவ்வாறு அவர் கூறினார்.