விருதுநகர்

விருதுநகர்:

விருதுநகர் மாவட்டத்தில் நேற்று முன்தினம் வரை 3 லட்சத்து 18 ஆயிரத்து 62 பேருக்கு மருத்துவ பரிசோதனை செய்யப்பட்டதில் 15 ஆயிரத்து 912 பேருக்கு நோய் பாதிப்பு ஏற்பட்டது. இதில் 15 ஆயிரத்து 579 பேர் சிகிச்சை முடிந்து வீடு திரும்பி உள்ளனர். 3,329 பேரின் மருத்துவ பரிசோதனை முடிவுகள் தெரிவிக்கப்படவில்லை. 88 பேர் அரசு ஆஸ்பத்திரிகளில் சிகிச்சை பெற்று வருகின்றனர்.

8 பேர் வீடுகளில் தனிமைப்படுத்தப்பட்டு உள்ளனர். மாவட்டத்தில் நேற்று மேலும் 16 பேருக்கு கொரோனா பாதிப்பு ஏற்பட்டுள்ளது. இதனால் பாதிக்கப்பட்டவர்களின் எண்ணிக்கை 15,928 ஆக உயர்ந்துள்ளது.

மாவட்ட சுகாதாரத்துறை பாதிக்கப்பட்டோரின் விவரங்களை முழுமையாக தெரிவிக்கவில்லை. மாவட்ட நிர்வாகமும் தொடர்ந்து நோய் பாதிப்படைந்தவர்கள் விவரங்கள் முழுமையாக தெரிவிக்கப்படாத நிலை நீடித்த போதும் அதுபற்றி சுகாதாரத் துறையினருக்கு உரிய அறிவுறுத்தல் வழங்காத நிலையே தொடர்கிறது.

மேலும் மாநில சுகாதாரத்துறை வெளியிடும் பாதிப்படைந்தவர்கள் பட்டியலுக்கும், மாவட்ட சுகாதாரத்துறை வெளியிடும் பட்டியல்களுக்கும், முரண்பாடு தொடர்கிறது. இந்த முரண்பாடுகளை தவிர்க்க மாவட்ட நிர்வாகம் உரிய நடவடிக்கை எடுக்க வேண்டும். இல்லையேல் மாவட்ட மக்களுக்கு மாவட்ட சுகாதாரத்துறை மீதான நம்பிக்கை குறையும் நிலை ஏற்படும்.

மேலும் மாவட்ட சுகாதாரத்துறை நேற்று முன்தினம் 1,990 பேருக்கு மருத்துவ பரிசோதனை செய்ததில் இதுவரை 3,329 பேருக்கு மருத்துவ பரிசோதனை முடிவுகளை அறிவிக்கவில்லை. தமிழக அரசு மருத்துவ பரிசோதனை முடிவுகளை உடனுக்குடன் அறிவிக்கவேண்டும் என அறிவுறுத்தி இருந்தபோதிலும் மாவட்ட சுகாதாரத்துறை தொடர்ந்து அதற்கான நடவடிக்கைகளை எடுக்காத நிலையில் தினசரி ஆயிரக்கணக்கான பேரின் மருத்துவ பரிசோதனை முடிவுகள் தெரிவிக்கப்படாத நிலையே நீடிக்கிறது.

மருத்துவ பரிசோதனைகளும் தினசரி சீராக செய்வதற்கு நடவடிக்கை எடுக்கப்படுவதில்லை. மேலும் அரசு அறிவுறுத்தியுள்ளபடி நோய்த்தடுப்பு விதிமுறைகளும் முறையாக பொது இடங்களில் பின்பற்றப்படுவதில்லை.

அதனை கண்காணிக்க சம்பந்தப்பட்ட அதிகாரிகள் நடவடிக்கை எடுக்காத நிலையே நீடிக்கிறது. மாவட்ட நிர்வாகம் அவ்வப்போது ஆய்வு கூட்டம் நடத்தி நோய் தடுப்பு நடவடிக்கைகளை தீவிரப்படுத்த வேண்டும் என்றும் பொது இடங்களில் விதிமுறைகள் பின்பற்றப்படுவது உறுதி செய்யப்பட வேண்டும் என்றும் அரசு வழிகாட்டல்கள் முறையாக பின்பற்றப்பட நடவடிக்கை எடுக்க வேண்டும் என்றும் அதிகாரிகளுக்கு அறிவுறுத்தியும் அதிகாரிகள் அதனை செயல்படுத்த தயாராக இல்லாத நிலையே நிலவுகிறது.

எனவே மாவட்ட நிர்வாகம் இந்த பிரச்சினையில் கண்காணிப்பு நடவடிக்கையை தீவிரப்படுத்த வேண்டும் என கோரப்பட்டுள்ளது.

ராஜபாளையம்:

விருதுநகர் மாவட்டம் ராஜபாளையம் தெற்கு மலையடிபட்டியைச் சேர்ந்தவர் ராமர் (வயது52), எலக்ட்ரீசியன். இவருக்கு திருமணமாகி மனைவி மற்றும் ஒரு மகன், ஒரு மகள் உள்ளனர்.

இவரது பக்கத்து வீட்டில் வசிப்பவர் மாடசாமி. இவரது மனைவி மாரியம்மாள் (45). இவர்களுக்கு மாடசாமி மதன் (25) உள்பட 4 மகன்கள் உள்ளனர்.

மாடசாமி பெங்களூருவில் வேலை பார்த்து வருகிறார். இதனால் மாரியம்மாள் மகன்களுடன் இங்கு வசித்து வருகிறார்.

இந்த நிலையில் அவருக்கு ராமருடன் பழக்கம் ஏற்பட்டது. இது நாளடைவில் கள்ளத்தொடர்பாக மாறியது. இருவரும் அடிக்கடி தனிமையில் பேசி வந்தார். இது தெரியவந்ததும் மாரியம்மாளின் மகன் மாடசாமி மதன் மற்றும் உறவினர்கள் கண்டித்தனர்.

இருப்பினும் மாரியம்மாளுடன் உள்ள தொடர்பை ராமர் துண்டிக்கவில்லை. பலமுறை கண்டித்தும் அவர் கேட்காததால் மாடசாமி மதன் ஆத்திரம் அடைந்தார்.

இந்த நிலையில் நேற்று இரவு ராமர் தனது வீட்டின் வாசலில் உட்கார்ந்திருந்தார். அப்போது அங்கு மாடசாமி மதன் வந்தார். ராமரை பார்த்ததும் அவருக்கு ஆத்திரம் ஏற்பட்டது.

பலமுறை கண்டித்தும் ஏன் எனது தாயாருடன் பழகுகிறாய் என கேட்டார். இதனால் அவர்களுக்குள் வாக்குவாதம் ஏற்பட்டது.

இதில் ஆத்திரம் அடைந்த மாடசாமி மதன் தான் மறைத்து வைத்திருந்த கத்தியை எடுத்து ராமரை சரமாரியாக குத்தினார். அவரது அலறல் சத்தம் கேட்டதும் வீட்டிற்குள் இருந்தவர்கள் வெளியே ஓடி வந்தனர். அங்கு ராமர் ரத்த வெள்ளத்தில் கிடப்பதை பார்த்து அதிர்ச்சி அடைந்தனர்.

அவரது உடலில் 15 இடங்களில் கத்திக்குத்து விழுந்திருந்தது. அவரை உடனடியாக அரசு ஆஸ்பத்திரிக்கு கொண்டு செல்ல முயன்றனர். ஆனால் அதற்குள் ராமர் பரிதாபமாக இறந்தார்.

இதுகுறித்து ராஜபாளையம் தெற்கு போலீசாருக்கு தகவல் கொடுக்கப்பட்டது. இன்ஸ்பெக்டர் கணேஷ் தாஸ் மற்றும் போலீசார் சம்பவ இடம் விரைந்து வந்தனர்.

அப்போது சாலையில் பிரமை பிடித்ததுபோல் கத்தியுடன் மாடசாமி மதன் நின்று கொண்டிருந்தார். அவரை போலீசார் கைது செய்தனர். தொடர்ந்து ராமர் உடலை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

கள்ளக்காதல் விவகாரத்தில் எலக்ட்ரீசியன் கொலை செய்யப்பட்ட விவகாரம் அந்த பகுதியில் பரபரப்பை ஏற்படுத்தி உள்ளது.