விருதுநகர்

விருதுநகர்:

விருதுநகரில் இன்று நடைபெற்ற எம்.ஜி.ஆர். பிறந்தநாள் விழாக்களில் முன்னாள் அமைச்சர் மா.பா.பாண்டியராஜன் கலந்து கொண்டார். அப்போது அவர் நிருபர்களிடம் கூறியதாவது:-

உள்ளாட்சி தேர்தலில் விருதுநகர் மாவட்டத்தில் அ.தி.மு.க அனைத்து இடங்களிலும் வெற்றி பெறும். இன்று நடைபெற்ற நிகழ்ச்சிகளில் தொண்டர்களின் கண்களில் இதனை காணமுடிந்தது.

தி.மு.க. அரசு பொங்கல் பரிசு தொகுப்பு வழங்குவதில் சரியாக செயல்படவில்லை. கொடுக்கப்பட்ட பொருட்களில் தரம் இல்லை. முறைகேடு நடந்துள்ளது. இதனால் அவர்களுக்கு உள்ளாட்சி தேர்தலில் தோல்வி நிச்சயம்.

ஜல்லிக்கட்டு போட்டியில் கொரோனா தடுப்பு விதிமுறைகள் கடைபிடிக்கப்படவில்லை. மேலும் விவசாயிகள் மீது தடியடி நடத்தப்பட்டு இருப்பது கண்டிக்கத்தக்கது. ஜல்லிக்கட்டை மீட்டது அ.தி.மு.க. தான்.

முன்னாள் அமைச்சர் கே.டி.ராஜேந்திரபாலாஜி கைது விவகாரத்தில் அரசியல் காழ்ப்புணர்ச்சிதான் காரணம் என சுப்ரீம் கோர்ட்டு தெரிவித்துள்ளது. எனவே அதில் நான் சொல்வதற்கு ஒன்றும் இல்லை. அரசியல் காழ்ப்புணர்ச்சியால்தான் இது நடந்துள்ளது.

இவ்வாறு அவர் கூறினார்.

சிவகாசி:

விருதுநகர் மாவட்டம் தாயில்பட்டி அருகே பேர்நாயக்கன்பட்டி ஊருணி உள்ளது. நேற்று அருந்ததியர் காலனியை சேர்ந்த சுந்தர்ராஜ் என்பவரின் மனைவி சந்தனமாரி (வயது 27) அந்த ஊருணியில் குளித்து கொண்டு இருந்தார். அப்போது அவர் திடீரென ஆழமான பகுதிக்கு சென்று விட்டார்.

உடனே அதிர்ச்சி அடைந்த அங்கு குளித்து கொண்டு இருந்த காளியம்மாள், சுந்தரம்மாள், ஆகியோர் நீரில் மூழ்கிய சந்தன மாரியை மீட்க முயற்சி செய்தனர். அவர்களால் மீட்க முடியவில்லை. பெண்கள் சத்தம் போடுவதை கேட்ட அந்த வழியாக சென்றவர்கள் தண்ணீரில் இறங்கி நீண்ட நேர தேடுதலுக்கு பின்னர் சந்தனமாரியின் உடலை மீட்டனர். இந்த சம்பவம் குறித்து சுந்தர்ராஜ் அளித்த புகாரின் பேரில் வெம்பக்கோட்டை போலீசார் வழக்குப்பதிவு செய்து விசாரணை நடத்தி வருகின்றனர்.


சாத்தூர் அருகே என்.வெங்கடேஸ்வரபுரத்தை சேர்ந்த சண்முகையா மகள் அபிநயா (வயது 19). இவர் சாத்தூரில் உள்ள தனியார் கல்லூரியில் 2-ம் ஆண்டு படித்து வந்தார். இவருடைய தோழி பொன்மாடன் மகள் மனோரஞ்சிதம் (17). இவர் பிளஸ்-2 படித்து வருகிறார். இவர்கள் இருவரும் நேற்று என்.வெங்கடேஸ்வரபுரத்திற்கு அருகில் உள்ள குவாரிக்கு குளிக்க சென்றனர்.

இருவரும் குளித்து கொண்டு இருந்த போது திடீரென நீரில் மூழ்கினர். உடனே அருகில் இருந்தவர்கள் அவர்கள் இருவரையும் மீட்டு கோவில்பட்டி அரசு ஆஸ்பத்திரிக்கு சிகிச்சைக்காக அனுப்பி வைத்தனர்.

இதில் அபிநயாவை பரிசோதித்த டாக்டர்கள், அவர் ஏற்கனவே இறந்துவிட்டதாக கூறினர். மனோரஞ்சிதத்திற்கு முதலுதவி அளிக்கப்பட்டது. பின்னர் அவர் மேல் சிகிச்சைக்காக தூத்துக்குடி அரசு ஆஸ்பத்திரிக்கு அனுப்பி வைக்கப்பட்டார். இந்த சம்பவம் தொடர்பாக சாத்தூர் தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.

சிவகாசி அருகே உள்ள அம்மாபட்டி தெற்கு தெருவை சேர்ந்தவர் முத்துப்பாண்டி (40). டிரைவர். இவருக்கு தங்கத்தாய் என்ற மனைவியும், முனீஸ்வரி, பிரியதர்ஷினி, கருப்பசாமி ஆகிய 3 குழந்தைகளும் உள்ளனர். கணவன், மனைவிக்கு இடையே தகராறு ஏற்பட்டு கடந்த 6 மாதங்களுக்கு முன்னர் தங்கதத்தாய் சரஸ்வதி பாளையத்தில் உள்ள தனது தாய் வீட்டிக்கு குழந்தைகளுடன் சென்று விட்டார்.

இந்தநிலையில் முத்துப்பாண்டி, அம்மாபட்டி கண்மாயில் குளித்தபோது திடீரென மாயமானார். பின்னர் அப்பகுதி மக்கள் சிவகாசி தீயணைப்பு நிலையத்துக்கு தகவல் தெரிவித்து முத்துப்பாண்டியின் உடலை மீட்டனர். இந்த சம்பவம் குறித்து முத்துப்பாண்டியின் தந்தை வேலாயுதம், மாரனேரி போலீசில் புகார் கொடுத்தார். அந்த புகாரின் பேரில் போலீசார் வழக்குபதிவு செய்து விசாரணை நடத்தி வருகிறார்கள்.

விருதுநகர்:

விருதுநகர் மாவட்டம், சிவகாசி அருகே உள்ள வேண்டுவராயபுரத்தை அடுத்த மாலையூரணிப்பட்டியைச் சேர்ந்தவர் காளிமுத்து (வயது 55). இவர் திருத்தங்கல் பாண்டியன் நகரைச் சேர்ந்த சீமைச்சாமி (52) என்பவருக்கு கடந்த 3 ஆண்டுகளுக்கு முன்பு ரூ.3 லட்சம் கடன் கொடுத்துள்ளார்.

இதனை திருப்பி கேட்டபோது சீமைச்சாமி விரைவில் தருவதாக கூறி வந்தார்.

இந்த நிலையில் அவர் நேற்று காளிமுத்துவை சந்தித்து ரூ.3 லட்சத்தை கொடுத்தார். அவர் கொடுத்தது அனைத்தும் புத்தம் புதிய 500 ரூபாய் நோட்டுகள் ஆகும். சீமைச்சாமி கொடுத்த ரூபாய்கள் குறித்து காளிமுத்துவுக்கு சந்தேகம் ஏற்பட்டது. இது குறித்து அவர் திருத்தங்கல் போலீசில் புகார் கொடுத்தார். போலீசார் சீமைச்சாமியை பிடித்து விசாரித்த போது முன்னுக்கு பின் முரணாக பேசினார்.

மேலும் அங்கு நின்ற காரை சோதனை செய்தபோது அதில் 500 ரூபாய் நோட்டுகள் இருந்தது தெரியவந்தது. அந்த ரூபாய் நோட்டுகளில் “சில்ரன்ஸ் பேங்க் ஆப் இந்தியா” என குறிப்பிடப்பட்டிருந்தது. ஆய்வில் அவை அனைத்தும் கள்ள நோட்டுகள் என தெரியவந்தது.

இதனைத் தொடர்ந்து சீமைச்சாமியை போலீசார் கைது செய்தனர். மேலும் அவருக்கு உடந்தையாக கள்ள நோட்டுகளை புழக்கத்தில் விட்ட தேனி மாவட்டம், காஞ்சிபட்டியைச் சேர்ந்த சரவணன் (42), உத்தமபாளையம், சிலையம்பட்டி காளிராஜன் (31), உசிலம்பட்டியைச் சேர்ந்த சங்கர் என்ற சங்கரபாண்டி (40), மதுரை தத்தனேரி மருது (33) ஆகியோரை போலீசார் கைது செய்தனர். கள்ள நோட்டு இருந்த காரும் பறிமுதல் செய்யப்பட்டது.

இவர்கள் கள்ள நோட்டுகளை எங்கிருந்து கொண்டு வந்தார்கள்? வேறு எங்காவது புழக்கத்தில் விட்டுள்ளார்களா? என்பது குறித்து போலீசார் தீவிர விசாரணை நடத்தி வருகின்றனர்.

விருதுநகர் மாவட்டம் ஸ்ரீவில்லிபுத்தூர் ஸ்ரீ ஆண்டாள் கோவில் 108 திவ்யதேசங்களில் ஒன்றாகும். இக்கோவிலில் மார்கழி உற்சவமானது கடந்த 3-ந் தேதி பச்சை பார்த்தல் நிகழ்ச்சியுடன் தொடங்கியது.

அன்று முதல் பகல்பத்து உற்சவம் நடைபெற்று வந்த நிலையில் பகல்பத்து உற்சவம் நேற்று நிறைவு பெற்றது. ராப்பத்து உற்சவம் இன்று ஆரம்பமான நிலையில் வைகுண்ட ஏகாதசியை முன்னிட்டு பரமபத வாசல் எனும் சொர்க்கவாசல் திறக்கப்பட்டது.

முன்னதாக அதிகாலை 4.30 மணியளவில் ஆண்டாள், ரங்கமன்னாருக்கு சிறப்பு பூஜைகள் செய்யப்பட்டது. தொடர்ந்து காலை 7.35 மணிக்கு பரமபத வாசல் எனும் சொர்க்கவாசல் திறக்கப்பட்டு அதன் வழியாக ஆழ்வார்கள் எதிர்கொள்ள முதலில் பெரியபெருமாள் பின்பு ஆண்டாள்- ரெங்கமன்னார் வந்தனர். இதில் கோவில் பட்டாசாரியார்கள், அதிகாரிகள், ஊழியர்கள் மட்டும் கலந்து கொண்டனர்.

கொரோனா நோய் பரவலை கட்டுப்படுத்தும் விதமாக இன்று காலை 4 மணி முதல் 8 மணி வரை பக்தர்கள் யாருக்கும் கோவிலில் சாமி தரிசனம் செய்ய அனுமதி வழங்கப்படவில்லை. இருப்பினும் ஏராளமான பக்தர்கள் கோவில் வெளியே நின்றிருந்து ஆண்டாள் -ரெங்கமன்னாரை தரிசித்தனர். 8 மணிக்கு மேல் பக்தர்கள் கோவிலில் சாமி தரிசனம் செய்ய அனுமதிக்கப்பட்டனர். .

இதையும் படிக்கலாம்....தைதிருநாள் நாளை மாலை பிறக்கிறது: பொங்கல் வைக்கும் நேரம் எப்போது?

விருதுநகர்:

விருதுநகர் மாவட்டம் சிவகாசி தாலுகா புதுப்பட்டி அருகே உள்ள மேட்டுப்பட்டியை சேர்ந்தவர் வழிவிடுமுருகன். இவர் ஸ்ரீவில்லிபுத்தூர் அருகே களத்தூர் நாகலாபுரத்தில் பட்டாசு ஆலை நடத்தி வந்தார்.

அவரது ஆலையில் 500-க்கும் மேற்பட்டோர் பணிபுரிந்து வந்தனர். இந்த நிலையில் அவரது பட்டாசு ஆலையில் கடந்த 1-ந்தேதி வெடிவிபத்து ஏற்பட்டது. ரசாயன மருந்து கலந்தபோது ஏற்பட்ட உராய்வால் வெடிவிபத்து நடந்தது.

இதில் அந்த ஆலையில் இருந்த 7 அறைகள் இடிந்து தரைமட்டமாயின. புத்தாண்டு தினம் என்பதால் 15 பேர் மட்டுமே பணியில் இருந்தனர். அவர்கள் இடிபாடுகளுக்குள் சிக்கினர். இதையடுத்து தீயணைப்பு வீரர்கள் மற்றும் போலீசார் சம்பவ இடம் சென்று மீட்பு பணியில் ஈடுபட்டனர்.

இந்த வெடிவிபத்தில் குமார், பெரியசாமி, வீரகுமார் ஆகிய 3 பேர் சம்பவ இடத்திலேயே பலியானார்கள். 10 பேர் காயம் அடைந்தனர். அவர்களில் முருகேசன் என்பவர் ஆஸ்பத்திரி செல்லும் வழியிலேயே இறந்தார். காயம் அடைந்து ஆஸ்பத்திரியில் சிகிச்சை பெற்று வந்த மற்றொருவரும் இறந்தார்.

இதனால் பலி எண்ணிக்கை 5 ஆக உயர்ந்தது. இதையடுத்து அந்த பட்டாசு ஆலைக்கு அதிகாரிகள் சீல் வைத்தனர். இந்த வெடிவிபத்து குறித்து நத்தம்பட்டி போலீசார் வழக்குப்பதிவு செய்து விசாரணை நடத்தினர்.

பட்டாசு ஆலையின் உரிமையாளரான வழிவிடுமுருகன் மீது வெடிபொருட்களை அஜாக்ரதையாக கையாளுதல், மனித உயிருக்கு ஆபத்து ஏற்படும் வகையில் செயல்படுதல், இறப்பு ஏற்படுத்துதல் உள்ளிட்ட பிரிவுகளின் கீழ் போலீசார் வழக்குப்பதிவு செய்தனர்.

தலைமறைவாக இருந்த அவரை போலீசார் வலைவீசி தேடி வந்தனர். அவரை பிடிக்க 3 தனிப்படைகள் அமைக்கப்பட்டன. தனிப்படை போலீசார் தீவிர தேடுதல் வேட்டையில் ஈடுபட்டும் அவர் சிக்கவில்லை. இந்நிலையில் வழிவிடுமுருகனை போலீசார் இன்று கைது செய்தனர்.