வேலூர்

ராணிப்பேட்டை:

ராணிப்பேட்டையில் உள்ள மாசுக் கட்டுப்பாட்டு வாரிய பொறியாளர் வீட்டில் லஞ்ச ஒழிப்புத்துறையினர் நடத்திய சோதனையில் ரூ.2½ கோடி பறிமுதல் செய்யப்பட்டது. மேலும் 3½ கிலோ தங்கம், 6½ கிலோ வெள்ளிப்பொருட்களும் கைப்பற்றப்பட்டது.

வேலூர் காட்பாடியில் உள்ள தமிழ்நாடு மாசு கட்டுப்பாட்டு வாரிய அலுவலகத்தில் வேலூர் மண்டல இணை முதன்மை பொறியாளராக பணிபுரிபவர் பன்னீர்செல்வம் (வயது 45). வேலூர், வாணியம்பாடி, திருவண்ணாமலை, தருமபுரி, விழுப்புரம், ஓசூர் ஆகிய பகுதிகள் இவருடைய கட்டுப்பாட்டில் வருகிறது. இந்தப்பகுதிகளில் தொழிற்சாலைகள் தொடங்க உரிமம் வழங்குவது, பழைய உரிமங்களை புதுப்பிப்பது போன்ற பணிகளை இவர் கவனித்து வந்தார். இந்த பணிகளுக்கு லஞ்சம் பெறுவதற்காக இவர் மாதந்தோறும் கூட்டம் நடத்தி பணம் பெற்று வந்ததாக புகார்கள் வந்தது. இந்த நிலையில் நேற்று முன்தினம் காட்பாடியில் அவருடைய தலைமையில் கூட்டம் நடப்பதாகவும், அதில் பண பரிமாற்றம் நடப்பதாகவும் வேலூர் லஞ்ச ஒழிப்பு போலீசாருக்கு தகவல் கிடைத்தது.

அதன்பேரில் வேலூர் லஞ்ச ஒழிப்பு போலீசார் அங்கு சென்றனர். அதற்குள் கூட்டம் முடிந்து பன்னீர்செல்வம்காரில் வீட்டுக்கு புறப்பட்டு விட்டார். அவரை பின்தொடர்ந்து சென்ற போலீசார் காட்பாடியில் உள்ள வீட்டிலும், காரிலும் சோதனை நடத்தினர். அப்போது ரூ.33 லட்சத்து 73 ஆயிரத்தை அவர்கள் கைப்பற்றினர்.

தொடர்ந்து நேற்று ராணிப்பேட்டை அருகே, ராணி பெல் நகரில், வளையாபதி தெருவில் உள்ள பன்னீர்செல்வத்தின் வீட்டில் வேலூர் லஞ்ச ஒழிப்புத்துறை துணை சூப்பிரண்டு ஹேமசித்ரா தலைமையில் இன்ஸ்பெக்டர்கள் விஜய், ரஜினி, விஜயலட்சுமி உள்ளிட்ட 14 பேர் கொண்ட குழுவினர் அதிரடி சோதனை நடத்தினர் மாலை சுமார் 6.30 மணிவரை சோதனை நடந்தது.

இந்த சோதனையில் பன்னீர்செல்வம் வீட்டில் இருந்து ரூ2½ கோடி அளவுக்கு பணம், சுமார் 3½ கிலோ தங்கமும், 6½ கிலோ வெள்ளி கைப்பற்றப்பட்டதாக லஞ்ச ஒழிப்புத்துறை அதிகாரிகள் தெரிவித்தனர். மேலும் சொத்து பத்திரங்களும் கைப்பற்றப்பட்டுள்ளன. ரூபாய் எண்ணும் 4 எந்திரங்கள் கொண்டுவரப்பட்டு பணம் எண்ணப்படுவதாகவும் லஞ்ச ஒழிப்பு அதிகாரிகள் தெரிவித்தனர்.

தொடர்ந்து சோதனை நடைபெற்று வருவதாகவும், சோதனையின் முடிவில் பணத்தின் அளவும், தங்கம் மற்றும் வெள்ளி ஆகியவற்றின் அளவும் மேலும் கூடும் என்றும் அதிகாரிகள் தெரிவித்தனர்.

காட்பாடி:

காட்பாடியில் நடந்த அரசு நிகழ்ச்சிக்கு வந்த தமிழக பள்ளி கல்வித்துறை அமைச்சர் கே.ஏ.செங்கோட்டையன் நிருபர்களுக்கு பேட்டியளித்தார். அப்போது அவர் கூறியதாவது:-


அரசு பள்ளியில் பயிலும் மாணவர்களுக்கு மருத்துவ படிப்பில் 7.5 சதவீதம் இடஒதுக்கீடு வழங்க தமிழக அரசு முடிவெடுத்து சட்டம் இயற்றி அதனை இந்த ஆண்டே செயல்படுத்த முழு முயற்சியுடன் நடவடிக்கை எடுக்கப்பட்டு வருகிறது.

இவ்வாறு அவர் கூறினார்.

அடுக்கம்பாறை:

வேலூர் அடுக்கம்பாறை அரசு மருத்துவக் கல்லூரி மருத்துவமனையில் கொரோனா அறிகுறியுடன் வரும் நோயாளிகளுக்கு சிகிச்சை அளிக்க சிறப்பு தனி வார்டு அமைக்கப்பட்டுள்ளது. சுமார் 350 படுக்கைகள் உள்ள இந்த வார்டில் மருத்துவ குழுவினர் 24 மணி நேரமும் சுழற்சி முறையில் பணியில் உள்ளனர். அதன்படி இங்கு தற்போது வேலூர், திருவண்ணாமலை, சென்னை உள்ளிட்ட சுற்றுவட்டார மாவட்டங்களில் இருந்தும் ஏராளமான நோயாளிகள் அனுமதிக்கப்பட்டு, சிகிச்சை அளிக்கப்பட்டு வருகிறது.

இந்த நிலையில் வேலூர் அடுக்கம்பாறை அரசு மருத்துவமனையில் உள்ள கொரோனா தனி வார்டில் சிகிச்சை பெற்று வந்த 25 பேர் நேற்று பூரண குணமடைந்து வீடு திரும்பினர்.

காட்பாடி:

காட்பாடி வண்டறந்தாங்கல் அம்பேத்கர் நகரை சேர்ந்தவர் ரகு (வயது 48). இவர், வேலூரில் உள்ள ஒரு தனியார் மருத்துவமனையில் ஊழியராக பணிபுரிந்து வந்தார். அவர் நேற்று காலை வீட்டில் இருந்து புறப்பட்டு மோட்டார்சைக்கிளில் மருத்துவமனையை நோக்கி சென்று கொண்டிருந்தார்.

காட்பாடி தாராபடவேடு கிராம நிர்வாக அலுவலகம் எதிரில் சென்றபோது, அந்த வழியாக பின்னால் வந்த ஒரு வேன் திடீரென அவரின் மோட்டார்சைக்கிள் மீது மோதியது. அதில் ரகு தூக்கி வீசப்பட்டு தலை நசுங்கி சம்பவ இடத்திலேயே பரிதாபமாக உயிரிழந்தார்.

விபத்து குறித்து காட்பாடி போலீசில் ரகுவின் மனைவி லிசிமேரி புகார் செய்தார். சப்-இன்ஸ்பெக்டர் மனோகரன் சம்பவ இடத்துக்கு வந்து பிணத்தைப் கைப்பற்றி பிரேதப் பரிசோதனைக்காக வேலூர் அடுக்கம்பாறை அரசு மருத்துவமனைக்கு அனுப்பி வைத்தார். விபத்து குறித்து வழக்குப்பதிவு செய்து விசாரணை நடத்தி வருகிறார்.

வேலூர்:

வேலூர் ஓட்டேரி அருகே உள்ள பள்ளஇடையம்பட்டி கிராமத்தில் சாலையோரம் ராதாருக்மணி சமேத வேணுகோபால சுவாமி கோவில் உள்ளது. இக்கோவிலில் புரட்டாசி மாதம் சனிக்கிழமைகளில் சிறப்பு பூஜைகள் நடைபெறும். அப்பகுதி பொதுமக்கள் கோவிலுக்கு சென்று வழிபடுவார்கள். நேற்று முன்தினம் புரட்டாசி மாத கடைசி ஞாயிற்றுக்கிழமை என்பதால் பூஜைகள் நடைபெற்றன. பக்தர்கள் பலர் கலந்து கொண்டு சாமி தரிசனம் செய்தனர். அதைத்தொடர்ந்து இரவு வழக்கம்போல் கோவிலை பூட்டிச் சென்றனர். இதையடுத்து நள்ளிரவில் மர்மநபர்கள் கோவிலுக்குள் புகுந்து உண்டியலை உடைத்து அதில் இருந்த பணத்தை திருடிச் சென்றனர்.

நேற்று காலை அந்த வழியாக சென்றவர்கள் உண்டியல் உடைக்கப்பட்டும், அதில் இருந்த நாணயங்கள் சிதறி கிடந்ததையும் பார்த்து அதிர்ச்சி அடைந்தனர். இதுகுறித்து பாகாயம் போலீசுக்கு தகவல் தெரிவிக்கப்பட்டது. அதன்பேரில் போலீசார் சம்பவ இடத்துக்கு விரைந்து சென்று விசாரணை நடத்தினர்.

இந்த திருட்டு சம்பவம் குறித்து அப்பகுதியில் காட்டுத்தீ போல் பரவியது. இதனால் சுற்றுவட்டார பகுதியை சேர்ந்த பொதுமக்கள் அங்கு குவிந்தனர். போலீசார் கூறுகையில், உண்டியலில் இருந்து ரூ.50 ஆயிரம் வரை திருடப்பட்டிருக்கலாம் என்பது தெரியவந்துள்ளது. திருடிச் சென்ற மர்மநபர்கள் குறித்து விசாரணை நடத்தி வருகிறோம் என்றனர்.

புகாரின் பேரில் போலீசார் வழக்குப்பதிவு செய்து, மேல் விசாரணை நடத்தி வருகின்றனர். இந்த சம்பவம் அந்தப்பகுதியில் பரபரப்பை ஏற்படுத்தி உள்ளது.

குடியாத்தம்:

வேலூர் மாவட்டம் குடியாத்தம், செதுக்கரை அசோக்நகர் பகுதியை சேர்ந்தவர் சம்பத் (வயது 60), கூலித்தொழிலாளி. இவரது மனைவி சுலோச்சனா (55). இவர்களுக்கு மோகன் (38) என்ற மகன் உள்ளார். இவர் திருமணமாகி எம்.வி.குப்பம் கிராமத்தில் வசித்து வருகிறார். சம்பத் தனது மனைவியுடன் கடந்தசில ஆண்டுகளாக குடியாத்தம் கள்ளூர் காந்திநகர் பகுதியில் வாடகை வீட்டில் வசித்து வந்தார்.

சுலோச்சனாவுக்கு சில மாதங்களுக்கு முன்பு பக்கவாதம் ஏற்பட்டுள்ளது. இதனால் அவர் வீட்டிலேயே படுத்தப்படுக்கையாக இருந்துள்ளார். சம்பத் மட்டும் கூலி வேலைக்கு சென்று வந்துள்ளார். இந்த நிலையில் நேற்று முன்தினம் காலையிலிருந்து சம்பத் வீட்டில் விளக்கு எரியாமல் இருந்துள்ளது. மேலும் அந்த வீட்டில் இருந்து துர்நாற்றம் வீசியுள்ளது.

இரவு 10 மணி ஆகியும் இருட்டாக இருந்ததால், சந்தேகமடைந்த அக்கம்பக்கத்தினர் கதவை திறந்துபார்த்தபோது அங்கு சுலோச்சனா தரையில் பிணமாக கிடந்தார். சம்பத் தூக்கில் பிணமாக தொங்கினார். இதனால் அதிர்ச்சியடைந்த பொதுமக்கள் இதுகுறித்து உடனடியாக எம்.வி.குப்பத்தில் உள்ள அவரது மகன் மோகனுக்கு தகவல் தெரிவித்தனர். சம்பவ இடத்திற்கு வந்த அவர் இதுபற்றி குடியாத்தம் டவுன் போலீசாருக்கு தகவல் தெரிவித்தார்.

தகவலறிந்ததும் இன்ஸ்பெக்டர் சீனிவாசன், சப்-இன்ஸ்பெக்டர்கள் மணிகண்டன், கார்த்திகேயன், தனிப்பிரிவு ஏட்டு அரிதாஸ் உள்ளிட்டோர் சம்பவ இடத்திற்கு விரைந்து சென்று விசாரணை நடத்தினர். சுலோச்சனா மற்றும் சம்பத்தின் சடலங்களை பிரேத பரிசோதனைக்காக வேலூர் அடுக்கம்பாறை அரசு மருத்துவக்கல்லூரி மருத்துவமனைக்கு அனுப்பி வைத்தனர். மேலும் இந்த சம்பவம் தொடர்பாக வழக்கு பதிவு செய்து விசாரணை நடத்தி வருகின்றனர்.

இது குறித்து போலீசார் கூறுகையில் சம்பத்தும் அவர் மனைவி சுலோச்சனாவும் கடந்த 7 ஆண்டுகளாக கள்ளூர் காந்தி நகரில் வசித்து வருகின்றனர். இவர்களுக்கு வேறு எந்த ஆதரவும் இல்லாமல் இருந்துள்ளனர். சுலோச்சனா புற்றுநோய்க்கு சிகிச்சை பெற்று வந்துள்ளார். இந்த நிலையில் சில மாதங்களுக்கு முன்பு பக்கவாதத்தாலும் படுத்த படுக்கையாகி விட்டார். அதனால் சம்பத் மனவருத்தத்தில் இருந்துள்ளார்.

இந்த நிலையில் 2 நாட்களுக்கு முன்னதாகவே சுலோச்சனா இறந்துள்ளார். இதனால் தனக்கு ஆதரவு யாரும் இல்லாததால் இது குறித்து யாருக்கும் தகவல் சொல்லாமல் சம்பத் இருந்துள்ளார். தனது மனைவி இறந்த பிறகு தனக்கு ஆதரவு யாருமில்லையே என்று நினைத்த சம்பத் தூக்கிட்டு தற்கொலை செய்து கொண்டதாக தெரிவித்தனர்.