புதுக்கோட்டை

அறந்தாங்கி:

புதுக்கோட்டை மாவட்டம் அறந்தாங்கியை அடுத்த பட்டுக்கோட்டை சாலையில் எருக்கனகோட்டை பகுதியில் மணிகண்டன் என்பவருக்கு சொந்தமான பெட்ரோல் பங்க் செயல்பட்டு வருகிறது.

இங்கு நேற்று இரவு பணியில் சுவாதிராஜன், அருள், கார்த்தி ஆகியோர் இருந்தனர். நள்ளிரவில் அவர்கள் விற்பனை முடிந்ததும் விளக்குகளை அணைத்து விட்டு பங்க் அருகே உள்ள அறையில் தூங்க சென்றனர்.

இந்த நிலையில் இன்று அதிகாலை சுமார் 4 மணியளவில் மர்ம நபர்கள் சிலர் மோட்டார் சைக்கிளில் பெட் ரோல் பங்கிற்கு வந்தனர். அவர்கள் கையில் இரும்பு பொருட்கள் வைத்திருந்தனர். கண்ணிமைக்கும் நேரத்தில் பங்கின் அலுவலக அறை கண்ணாடிகளை உடைத்தனர்.

அருகில் இருந்த அறையில் தூங்கி கொண்டிருந்த ஊழியர்களுக்கு இது தெரியவில்லை. இதற்கிடையே அந்த மர்ம நபர்கள் அலுவலக அறைக்குள் புகுந்து அங்கு கல்லாவில் இருந்த விற்பனை பணம் ரூ.1½ லட்சம் மற்றும் கம்ப்யூட்டர் சி.பி.யு.வையும் திருடிக்கொண்டு அங்கிருந்து தப்பிச்சென்றனர்.

இன்று காலை ஊழியர்கள் எழுந்து பார்த்தபோதுதான் கொள்ளை நடந்திருப்பதை உணர்ந்தனர். பின்னர் இது குறித்து அவர்கள் அறந்தாங்கி போலீசில் புகார் கொடுத்தனர். அதன்பேரில் விரைந்து வந்த போலீசார் வழக்குப்பதிவு செய்து கொள்ளையர்களை தேடி வருகிறார்கள்.

மேலும் பெட்ரோல் பங்கில் வைக்கப்பட்டுள்ள சி.சி.டி.வி. காமிராவில் பதிவான காட்சிகளை கொண்டு விசாரணையை தொடங்கியுள்ளனர். கைரேகை நிபுணர்களும் வந்து கொள்ளையர்களின் கைரேகைகளை பதிவு செய்தனர்.

இதேபோல் அறந்தாங்கி அருகே ஆவணத்தான் கோட்டை கிராமத்தில் உச்சி மாகாளி அம்மன் கோவில் அமைந்துள்ளது. நள்ளிரவில் இந்த பகுதியில் மர்ம நபர் ஒருவரின் நடமாட்டம் இருப்பதை மக்கள் உணர்ந்தனர்.

உடனே உஷாரடைந்த அவர்கள் திரண்டு சென்று பார்த்தனர். அப்போது அங்கு விழுப்புரம் மாவட்டம் அரசூரை சேர்ந்த வெங்கடேசன் என்பவர் நின்று கொண்டிருந்தார். அவரை விசாரித்தபோது மது போதையில் இருந்தார். மேலும் முன்னுக்குப்பின் முரணான தகவல்களை கூறினார்.

அதே சமயம் கோவிலில் சென்று பார்த்தபோது அங்கு, உண்டியல் உடைக்கப்பட்டு திறந்து கிடந்தது. உடனே இதுபற்றி பொதுமக்கள் போலீசாருக்கு தகவல் கொடுத்தனர். அதன்பேரில் அங்கு வந்த அறந்தாங்கி போலீசார் உண்டியலை உடைத்து பணத்தை திருடிய வெங்கடேசனை கைது செய்தனர்.

மேலும் அதே பகுதியில் நடந்த பெட்ரோல் பங்க் கொள்ளையிலும் வெங்கடேசனுக்கு தொடர்பு உள்ளதா? என்ற கோணத்திலும் போலீசார் விசாரணை நடத்தி வருகிறார்கள். ஒரே பகுதியில் அடுத்தடுத்து நடந்த இந்த கொள்ளை சம்பவம் அப்பகுதியில் பெரும் பரபரப்பை ஏற்படுத்தியது.

புதுக்கோட்டை:

புதுக்கோட்டை மாவட்டம் கந்தர்வக்கோட்டையை அடுத்துள்ள வடுகப்பட்டி பகுதியில் இன்று காலை தேர்தல் பறக்கும் படை அதிகாரி சந்தனலட்சுமி தலைமையில் அதிகாரிகள் மற்றும் போலீசார் தீவிர வாகன சோதனையில் ஈடுபட்டனர்.

அப்போது அந்த வழியாக மோட்டார் சைக்கிளில் வந்த வாலிபரை மறித்து அவர் வைத்திருந்த பையில் சோதனையிட்டனர். அப்போது அதில் ரூ.17 லட்சத்து 47 ஆயிரத்து 800 இருந்தது.

அந்த வாலிபரிடம் விசாரணை நடத்தும் போது அவர் வீரடிப்பட்டியை சேர்ந்த அய்யப்பன் என்பதும், அந்த பணத்தை கந்தர்வக்கோட்டையை சேர்ந்த அ.தி.மு.க. பிரமுகர் அருள் என்பவரிடம் இருந்து வாங்கி வந்ததாகவும் கூறினார்.

மேலும் அவர் கூறும்போது, வெளிநாட்டு பணத்தை பண பரிமாற்றம் செய்து, அதனை உரியவரிடம் ஒப்படைத்து கமி‌ஷன் பெறுவதற்காக பணத்தை கொண்டு சென்றதாகவும் கூறினார்.

இருப்பினும் அதற்கு உரிய ஆவணங்கள் இல்லாததால் அந்த பணத்தை அதிகாரிகள் பறிமுதல் செய்தனர். ரூ.10 லட்சத்துக்கு மேல் இருந்ததால் அந்த பணத்தை வருமான வரித்துறையிடம் அதிகாரிகள் ஒப்படைத்தனர். அ.தி.மு.க. பிரமுகர் அருளிடமும் விசாரணை நடத்த உள்ளனர். #LSPolls

அறந்தாங்கி:

திண்டுக்கல் மாவட்டம் வேடசந்தூர் அருகே உள்ள செல்லக்குட்டி என்ற ஊரை சேர்ந்த மகாலிங்கம், ஆறுமுகம், செல்வம், ராஜசேகர், ராஜேஷ், காளியப்பன், சுந்தரம், செந்தில்குமார் மற்றும் 4 பெண்கள் அடங்கிய ஒரு குழுவினர் அறந்தாங்கியை அடுத்த ஆவணத்தான்கோட்டை கடைவீதியில் தங்கியிருந்து அப்பகுதியில் உள்ள கிராமங்களுக்கு சென்று குறி சொல்லி வந்தனர்.

இந்நிலையில் மாங்குடி கிராமத்திற்கு 8 ஆண்கள் மற்றும் 4 பெண்கள் சென்று, அங்குள்ள பொது மக்களிடம் குறி சொல்லினர்.

பின்னர் பொதுமக்களிடம் ஆசை வார்த்தைகள் கூறி, அவர்களை ஏமாற்றி பணம், மோதிரம், செல்போன் போன்றவற்றை வாங்கிக் கொண்டு, ஆவணத்தான் கோட்டைக்கு சென்று விட்டனர்.

இதைத் தொடர்ந்து பணம், நகை, செல்போன் போன்றவற்றை குறிசொல்பவர்கள் பறித்துச் சென்றதை அறிந்த குடும்பத்தினர் அதிர்ச்சி அடைந்தனர். பின்னர் அவர்கள்ஆவணத்தான்கோட்டைக்கு சென்று, பணம், நகை,செல்போன்களை பறித்துச் சென்றவர்களை பிடித்து அறந்தாங்கி போலீஸ் நிலையத்தில் ஒப்படைத்தனர். அவர்களிடமிருந்து பணம், நகை, செல்போன் மீட்கபட்டது.

இது குறித்துஅறந்தாங்கி போலீசார் விசாரணை நடத்தி வருகின்றனர். #tamilnews