காஞ்சிபுரம்

காஞ்சிபுரம்:

மாகறல் அடுத்த மேல் பேரமநல்லூர் கிராமம் ரோட்டுத் தெருவைச் சேர்ந்தவர் ரமேஷ். அதே பகுதியில் இவருக்கு சொந்தமான கோழிப்பண்ணை உள்ளது.

இந்த பண்ணையில் எரிசாராயம் பதுக்கி வைக்கப்பட்டுள்ளதாக விழுப்புரம் மண்டல சி.ஐ.யு.க்கு கிடைத்த தகவலின் பேரில் இன்ஸ்பெக்டர் கோவிந்தராஜ் மற்றும் போலீசார் இன்று அதிகாலை கோழிப்பண்ணையில் திடீர் சோதனை நடத்தினர்.

இதில் 35 லிட்டர்கொள்ளளவு கொண்ட 425 கேன்களில் எரிசாராயம் பதுக்கி வைக்கப்பட்டு இருப்பது தெரிந்தது. அவற்றை பறிமுதல் செய்து காஞ்சிபுரம் மதுவிலக்கு போலீசாரிடம் ஒப்படைத்தனர்.

மேலும் கோழிப்பண்ணை உரிமையாளர் ரமேசை கைது செய்து விசாரணை நடத்தி வருகின்றனர்.

காஞ்சிபுரத்தை அடுத்த அஞ்பாக்கம் அருகே காஞ்சிபுரம் - உத்திரமேரூர் சாலையில் மினி வேன் ஒன்று சென்று கொண்டிருந்தது. திடீரென அந்த வேன் டிரைவரின் கட் டுப்பாட்டை இழந்து சாலையோர பள்ளத்தில் கவிழ்ந்தது.

இதனை கண்ட அவ்வழியாக வந்தவர்கள் அங்கு திண்டனர். உடனே மினி வேன் டிரைவர் அங்கிருந்து தப்பி ஓடிவிட்டார். அந்த வாகனத்தை பொது மக்கள் சோதனையிட்டபோது அதில் எரிசாராயம் கடத்தி செல்வது தெரியவந்தது.

இதுகுறித்து மாகறல் போலீசாருக்கு தகவல் தெரிவிக்கப்பட்டது. போலீசார் விரைந்து வந்து வேனை சோதனை செய்ததில் 35 லிட்டர் அளவு கொண்ட 25-க்கும் மேற்பட்ட கேன்களில் இருந்த எரிசாராயத்தை பறிமுதல் செய்தனர்.

மேலும் தப்பி ஓடிய வேன் டிரைவர் மற்றும் வேன் உரிமையாளரை தேடி வருகின்றனர். கடந்த சில நாட்களுக்கு முன்பு இதே சாலையில் 150 கேனில் எரிசாராயம் கடத்திய லாரி சிக்கியது குறிப்பிடத்தக்கது.

இது குறித்து பொது மக்கள் கூறும்போது, ‘இப்பகுதிகளில் சோதனைசாவடிகள் ஏதும் இல்லாததால் எரிசாராயம் கடத்தல் எளிதாக நடை பெறுகிறது. எனவே போலீசார் சோதனை சாவடி அமைத்து இதனை தடுக்க வேண்டும்’ என்று கோரிக்கை விடுத்துள்ளனர்.

ஸ்ரீபெரும்புதூர்:

ஓசூரை அடுத்த அவள பிள்ளை பகுதியைச் சேர்ந்தவர் குடவின் ராஜ் குமார் (55). ஓசூரில் உள்ள அசோக் லேலண்ட் அதிகாரியாக இருந்தார். இவரது மனைவி சொப்னா செல்வகுமாரி (50).

இவர்கள் இருவரும் நேற்று இரவு ஓசூரில் இருந்து காரில் ஸ்ரீபெரும்புதூர்- தாம்பரம் சாலையில் சென்று கொண்டிருந்தனர்.

நாவலூர் என்ற இடத்தில் வந்தபோது சாலையில் நிறுத்தி வைக்கப்பட்டு இருந்த லாரி மீது திடீரென கார் பயங்கரமாக மோதி விபத்துக்குள்ளானது.

இதில் காரில் இருந்த குடவின் ராஜ், அவரது மனைவி சொப்னா செல்வகுமாரி ஆகிய இருவரும் சம்பவ இடத்திலேயே உடல் நசுங்கி பலியானார்கள்.

விபத்து குறித்து தகவல் அறிந்ததும் ஸ்ரீபெரும்புதூர் போலீஸ் இன்ஸ்பெக்டர் விநாயகம் மற்றும் போலீசார் விரைந்து வந்து பலியானவர்கள் உடல்களை மீட்டு ஸ்ரீபெரும்புதூர் அரசு ஆஸ்பத்திரிக்கு அனுப்பி வைத்தனர்.

இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

தாம்பரம்:

தாம்பரத்தை அடுத்த சிட்லபாக்கம் சாரங்கன் அவென்யூ கல்யாண சுந்தரம் தெருவைச் சேர்ந்தவர் சேது (42). அதே பகுதியில் மினி ஆட்டோ மூலம் தண்ணீர் கேன் வியாபாரம் செய்து வந்தார்.

நேற்று இரவு அவர் வீட்டில் உணவு சாப்பிட்டார். பின்னர் மீதி இருந்த உணவை வீட்டின் வெளியே உள்ள தெரு நாய்களுக்கு வைப்பதற்காக சென்றார்.

அப்போது தெருவில் இருந்த சேதமடைந்த மின் கம்பம் திடீரென முறிந்து சேதுவின் மீது விழுந்தது. மின்கம்பத்தில் இருந்த வயர்கள் அறுந்ததால் அவர் மீது மின்சாரம் பாய்ந்தது.

இதனை பார்த்து அதிர்ச்சி அடைந்த அப்பகுதி மக்கள் சேதுவை மீட்டு அருகில் உள்ள தனியார் ஆஸ்பத்திரியில் சேர்த்தனர். அங்கு சிகிச்சை பலனின்றி சேது பரிதாபமாக இறந்தார். அவரது உடல் பிரேத பரிசோதனைக்காக குரோம்பேட்டை அரசு ஆஸ்பத்திரியில் வைக்கப்பட்டுள்ளது.

இதுகுறித்து சிட்லபாக்கம் போலீசார் வழக்குப்பதிவு செய்து விசாரணை நடத்தி வருகிறார்கள்.

இதுகுறித்து அப்பகுதி மக்கள் கூறும்போது, ‘இந்த பகுதியில் பல வருடங்களாக மின்கம்பங்கள் சேதமடைந்த நிலையிலேயே உள்ளன. இதே போல் அதிக அளவு மின் கம்பங்கள் காட்சியளிக்கிறது.

இந்த மின் கம்பங்களை அகற்றுமாறு பலமுறை கோரிக்கை விடுத்தோம். ஆனால் மின்வாரியம் எந்த நடவடிக்கையும் எடுக்கவில்லை.

சேது உயிரிழப்புக்கு மின் வாரியத்தின் அலட்சியமே காரணம். மேலும் உயிர் பலி ஏற்படாமல் இருக்க சேதமடைந்த மின் கம்பங்களை உடனடியாக அகற்ற நடவடிக்கை எடுக்க வேண்டும்’ என்றனர்.

முகலிவாக்கத்தில் நேற்று முன்தினம் இரவு, பூமிக்கு அடியில் சரிவர மின் கம்பி புதைக்கப்படாததால் தேங்கிய மழை நீரில் மின்சாரம் பாய்ந்து 9-ம் வகுப்பு மாணவன் பலியானார் என்பது குறிப்பிடத்தக்கது.

சோழிங்கநல்லூர்:

செம்மஞ்சேரி, குடிசை மாற்று வாரிய குடியிருப்பில் வசித்து வந்தவர் வெங்கடேசன் (வயது 32). வாட்டர் கேன் சப்ளை செய்யும் தொழில் செய்து வந்தார்.

இவரது உறவினர் மஞ்சள் நீராட்டு விழா துரைப்பாக்கம் கண்ணகி நகரில் நடந்தது. அப்போது வெங்கடேசன் மற்றும் அதே பகுதியை சேர்ந்த செந்தில், குகன் ஆகியோருக்கு இடையே மோதல் ஏற்பட்டது.

இதில் ஆத்திரம் அடைந்த செந்தில் அருகில் கிடந்த கட்டையால் வெங்கடேசனை தாக்கினார். இதில் பலத்த காயம் அடைந்த வெங்கடேசன் பரிதாபமாக இறந்தார்.

இது குறித்து போலீசார் வழக்குப்பதிவு செய்து, செந்தில், குகன் ஆகியோரை பிடித்து விசாரணை நடத்தி வருகிறார்கள்.

மாமல்லபுரம்:

பிரதமர் மோடியும், சீன அதிபர் ஜின்பிங்கும் அடுத்த மாதம் (அக்டோபர்) மாமல்லபுரத்தில் சந்தித்து பேசுகின்றனர். இந்த சந்திப்பின் போது பல்வேறு முக்கிய ஒப்பந்தங்கள் கையெழுத்தாகும் என்று எதிர்பார்க்கப்படுகிறது.

இந்த சந்திப்பு அக்டோபர் 11-ந்தேதி முதல் 13-ந்தேதிவரை நடைபெறலாம் என்று கூறப்படுகிறது. தலைவர்கள் வருகையையொட்டி மாமல்லபுரத்தில் பாதுகாப்பு வசதி மற்றும் அங்குள்ள இடங்களை உயர் பாதுகாப்பு அதிகாரிகள் பார்வையிட்டு ஆய்வு செய்து வருகிறார்கள்.

இந்த நிலையில் தமிழக உயர் பாதுகாப்பு அதிகாரிகள் நேற்று மாமல்லபுரத்திற்கு வந்தனர். அவர்கள் பிரதமர் மோடியும் சீன அதிபரும் ஹெலிகாப்டரில் வந்து இறங்க இருக்கும் திருவிடந்தை ஹெலிபேடு பகுதியை ஆய்வு செய்தனர்.

பின்னர் அங்கிருந்து கிழக்கு கடற்கரை சாலை வழியாக அவர்கள் காரில் செல்லும் சாலை எப்படி இருக்கிறது? அவர்கள் தங்குவதற்கு வசதியாக மாமல்லபுரத்தில் ‘ரிசார்ட்’ உள்ளதா? இருவரும் நின்று புகைப்படம் எடுக்க உள்ள கடற்கரை கோவில் பகுதி எப்படி உள்ளது? அங்கு எந்தெந்த இடங்களில் இருநாட்டு நவீன ரேடார்கள் அமைக்க வேண்டும் என்று ஆய்வுகள் மேற்கொண்டனர்.

இவர்களின் உறுதிக்கு பின்னர் சீனாவில் இருந்து அங்குள்ள அதிபரின் பாதுகாப்பு படையினர் மாமல்லபுரத்திற்கு வந்து ஆய்வு நடத்த உள்ளதாக தெரிகிறது.

தற்போது மத்திய மாநில அனைத்து துறை உயர் அதிகாரிகளும் மாமல்லபுரம் வந்து ஆய்வுகள் நடத்தி வருவது குறிப்பிடத்தக்கது.