கடலூர்

விருத்தாசலம்:

வடகிழக்கு பருவமழை தீவிரம் அடைந்து உள்ளதால் கடலூர் மாவட்டத்தில் பரவலாக மழை பெய்து வருகிறது. விருத்தாசலத்தில் நேற்று இரவு பலத்த மழை கொட்டி தீர்த்தது. இந்த மழை இன்று காலை வரை நீடித்தது. இதனால் தாழ்வான பகுதியில் உள்ள வீடுகளை மழை வெள்ளம் சூழ்ந்து உள்ளது.

விருத்தாசலம் பஸ் நிலையத்தில் மழை நீர் குளம் போல் தேங்கி உள்ளது. மழை நீருடன் சாக்கடையும் கலந்து நிற்பதால் பயணிகள் அவதிப்பட்டனர். செம்பலாக்குறிச்சி ரெயில்வே சுரங்கப்பாதையில் மழை நீர் தேங்கி உள்ளது. இதனால் சித்தேரிக்குப்பம் மற்றும் அந்த வழியாக செல்லும் அனைத்து கிராமங்களுக்கும் போக்குவரத்து துண்டிக்கப்பட்டு உள்ளது. இதே போல கம்மாபுரம், மங்கலம் பேட்டை, ஆலடி மற்றும் அதனை சுற்றி உள்ள பகுதியிலும் மழை பெய்தது.

பண்ருட்டி, திருவதிகை, எல்.என்.புரம், அண்ணாகிராமம் மற்றும் அதனை சுற்றி உள்ள பகுதியில் மழை நீடித்து வருகிறது.

கடலூர் நகர் பகுதியில் கடந்த 5 நாட்களாக மழை பெய்தது. இன்று 6-வது நாளாக கனமழை பெய்து வருகிறது. காலை முதலே மழை பெய்து வருவதால் பள்ளிகளுக்கு செல்லும் மாணவ- மாணவிகள் குடைபிடித்த படி சென்றனர். திருப்பாதிரிப்புலியூர், திருவந்திபுரம், கோண்டூர், நெல்லிக்குப்பம், மேல்பட்டாம்பக்கம், நடுவீரப்பட்டு, பாலூர், தூக்கணாம்பாக்கம் மற்றும் அதனை சுற்றி உள்ள பகுதியில் மழை பெய்து வருகிறது

கன மழையால் கடலூர் சித்தூர் சாலை சேதம் அடைந்து உள்ளது. இதனால் வாகன ஓட்டிகள், பொதுமக்கள் கடும் சிரமத்தை சந்தித்தனர்.

சிதம்பரம் பகுதியில் மழை வெளுத்து வாங்கியது. ஒரே நாளில் 51.90 மழை பதிவாகி உள்ளது.

மாவட்டம் முழுவதும் பெய்து உள்ள மழை அளவு மில்லி மீட்டரில் வருமாறு:-

சிதம்பரம்-51.90, மே.மாத்தூர்-45, பெலாந்துறை-4.80, வேப்பூர்-38, காட்டுமைலூர்-36, கலெக்டர் அலுவலகம்-29.60, குப்பாநத்தம்-29.40, விருத்தாசலம்- 25.40, வானமாதேவி- 25, குடிதாங்கி-24.90, குறிஞ்சிப்பாடி-24, அண்ணாமலை நகர் - 21,60, லால்பேட்டை-21, கடலூர் -18.90, பண்ருட்டி-17, காட்டு மன்னார்கோவில்-16.30, புவனகிரி-16, ஸ்ரீமுஷ்ணம் -11.10, கொத்த வாச்சேரி-9, வடகுத்து-8, சேத்தியா தோப்பு-5, லக்கூர்-4.20, தொழுதூர்-4, பரங்கிப்பேட்டை-3, கீழச்செருவாய்-2 மொத்தத்தில் மாவட்டம் முழுவதும் 527.10 மில்லி மீட்டர் மழை பதிவாகி உள்ளது.

ஸ்ரீமுஷ்ணம்:

கடலூர் மாவட்டம் காட்டுமன்னார்கோவில் அருகே லால்பேட்டையில் வீராணம் ஏரி உள்ளது. இந்த ஏரி, டெல்டா விவசாயிகளுக்கு மிகப்பெரிய நீர் ஆதாரமாக இருந்து வருகிறது. 47.50 அடி கொள்ளளவு கொண்ட இந்த ஏரியின் மூலம் சுமார் 45 ஆயிரம் ஏக்கர் நிலம் பாசனம் பெற்று வருகிறது.

இது தவிர சென்னை மக்களின் குடிநீர் தேவையை பூர்த்தி செய்வதிலும் முக்கிய பங்கு வகித்து வருகிறது.

கடந்த 4 நாட்களுக்கு முன்பாக 44.50 அடியாக ஏரியின் நீர் இருப்பு குறைந்தது. இந்த சூழ்நிலையில் தற்போது வடகிழக்கு பருவமழை தொடங்கி விட்டதால், ஏரியில் நீர் மட்டம் உயர்ந்து வருகிறது.

அதே நேரத்தில், கீழணையில் இருந்து கடந்த 2 நாட்களுக்கு முன்பு ஏரிக்கு தண்ணீர் திறக்கப்பட்டது. வினாடிக்கு 2 ஆயிரத்து 200 கனஅடி வீதம் தண்ணீர் வந்து கொண்டிருந்தது. இதனால் ஏரியின் நீர்மட்டம் உயர தொடங்கி உள்ளது. நேற்றைய நிலவரப்படி நீர்மட்டம் 46.50 அடியாக இருந்தது. இந்நிலையில் கீழணையில் இருந்து திறக்கப்பட்ட நீரின் அளவு நேற்று மதியம் முதல் வினாடிக்கு 1,800 கனஅடியாக குறைக்கப்பட்டது. இன்று 1,200 கன அடிதண்ணீர் வந்து கொண்டிருக்கிறது. வீராணம் ஏரி பகுதியில் தொடர்ந்து மழை பெய்துவருவதாலும் கீழணையில் இருந்து தண்ணீர் வருவதாலும் ஏரியின் நீர் மட்டம் தொடர்ந்து உயர்ந்து வருகிறது. வீராணம் ஏரியின் இன்றைய நீர் மட்டம் 46.53 அடியாகும் .

சென்னை மக்களின் குடிநீர் தேவைக்காக வீராணம் ஏரியிலிருந்து 56 கன அடி தண்ணீர் அனுப்பிவைக்கப்பட்டு வந்தது. இன்று 57 கன அடிதண்ணீர் அனுப்பிவைக்கப்பட்டது. வீராணம் ஏரியிலிருந்து விவாசாயத்திற்கு 66 கன அடி தண்ணீர் அனுப்பப்படுகிறது.

குறிஞ்சிப்பாடி:

குள்ளஞ்சாவடி கருமாச்சிபாளையத்தை சேர்ந்தவர் ராமதாஸ். இவருடைய மகன் தினேஷ்குமார்(வயது 14). இவன், குள்ளஞ்சாவடி அரசு மேல்நிலைப்பள்ளியில் 9-ம் வகுப்பு படித்து வந்தான். உடல்நலக்குறைவால் பாதிக் கப்பட்ட தினேஷ்குமார் அம்பலவாணன்பேட்டை அரசு ஆரம்ப சுகாதார நிலையத்திற்கு சென்று, சிகிச்சை பெற்றான். பின்னர் வீட்டிற்கு செல்வதற்காக குள்ளஞ்சாவடியில் நடந்து சென்றான். அப்போது ஒரு வங்கியின் முன்பு வைத்திருந்த வங்கியின் மின்சார பெயர் பலகையை தினேஷ்குமார் தொட்டான். அப்போது திடீரென மின்சாரம் தாக்கியதில் தூக்கி வீசப்பட்ட அவன், மயங்கி விழுந்தான். அவனை அக்கம்பக்கத்தினர் மீட்டு சிகிச்சைக்காக கடலூர் அரசு மருத்துவமனைக்கு கொண்டு சென்றனர்.

அங்கு பரிசோதனை செய்த டாக்டர்கள், ஏற்கனவே தினேஷ்குமார் இறந்து விட்டதாக தெரிவித்தனர். இதையடுத்து அவனது உடல், பிரேத பரிசோதனைக்காக பிணவறையில் வைக்கப்பட்டது.

இதுபற்றி தகவல் அறிந்ததும் தினேஷ்குமாரின் பெற்றோர், உறவினர்கள் மற்றும் விடுதலை சிறுத்தைகள் கட்சியினர் குள்ளஞ்சாவடியில் உள்ள வங்கி முன்பு சாலை மறியலில் ஈடுபட்டனர். இந்த போராட்டம் பற்றி தகவல் அறிந்ததும் நெய்வேலி துணை போலீஸ் சூப்பிரண்டு லோகநாதன், குறிஞ்சிப்பாடி தாசில்தார் கீதா ஆகியோர் விரைந்து சென்று, போராட்டத்தில் ஈடுபட்டவர்களுடன் பேச்சுவார்த்தை நடத்தினர். அப்போது உறவினர்கள் கூறுகையில், தினேஷ்குமாரின் உயிர் இழப்புக்கு காரணமான வங்கி அதிகாரிகள் மீது நடவடிக்கை எடுக்க வேண்டும், தினேஷ்குமாரின் குடும்பத்திற்கு உரிய நஷ்டஈடு வழங்க வேண்டும் என்றனர். அதற்கு தாசில்தார் கீதா, உயர் அதிகாரிகளிடம் பேசி நடவடிக்கை எடுப்பதாக கூறினார். இதை யடுத்து போராட்டத்தை கைவிட்டு அனைவரும் கலைந்து சென்றனர். இந்த சம்பவத்தால் அந்த சாலையில் போக்குவரத்து பாதிக்கப்பட்டதோடு, பரபரப்பும் ஏற்பட்டது. 

பண்ருட்டி:

கடலூர் மாவட்டம் பண்ருட்டி அருகே உள்ள காடாம்புலியூர் புதுப்பாளையத்தை சேர்ந்தவர் விஜயகாந்த் (வயது 28). இவர் செங்கல்பட்டில் உள்ள தனியார் கம்பெனியில் வேலை பார்த்து வருகிறார்.

இவருக்கும், சென்னை அண்ணாநகர் நெல்லிக்குப்பத்தை சேர்ந்த நித்யா (28) என்பவருக்கும் இடையே பழக்கம் ஏற்பட்டது. நித்யா சென்னையில் உள்ள ஒரு வங்கியில் அதிகாரியாக பணியாற்றி வருகிறார்.

இருவரும் அடிக்கடி சந்தித்து பேசினர். நாளடைவில் அது காதலாக மாறியது. கடந்த 4 ஆண்டுகளாக இருவரும் தீவிரமாக காதலித்து வந்தனர்.

அப்போது, உன்னைதான் திருமணம் செய்து கொள்வதாக காதலி நித்யாவிடம் காதலன் விஜயகாந்த் கூறினார். இதனை தொடர்ந்து அவர்கள் அடிக்கடி சந்தித்து வந்தனர். அப்போது உல்லாசமாக இருந்துள்ளனர்.

அதன் பின்னர் விஜயகாந்த், காதலி நித்யாவை சந்திப்பதை தவிர்த்து வந்தார். ஆனாலும் நித்யா விடவில்லை. தன்னை திருமணம் செய்து கொள்ளும்படி வற்புறுத்தி வந்தார். அதனை விஜயகாந்த் ஏற்க மறுத்து விட்டார்.

காதலனை நம்பி மோசமடைந்து விட்டோமே என்று நித்யா மனவேதனையடைந்தார். இதைத்தொடர்ந்து அவர் பண்ருட்டி அனைத்து மகளிர் போலீசில் புகார் மனு கொடுத்துள்ளார்.

அதில், நானும், எனது காதலன் விஜயகாந்த்தும் கடந்த 4 ஆண்டுகளாக காதலித்து வந்தோம். அவர் என்னிடம் உல்லாசமாக இருந்து விட்டு தற்போது திருமணம் செய்து கொள்ள மறுக்கிறார். அவர் மீது நடவடிக்கை எடுக்க வேண்டும் என்று கூறியிருந்தார்.

அந்த புகாரின் பேரில் இன்ஸ்பெக்டர் வனஜா, சப்-இன்ஸ்பெக்டர் சுகன்யா ஆகியோர் வழக்குப்பதிவு செய்து, காதலியை திருமணம் செய்து கொள்வதாக கூறி ஏமாற்றிய விஜயகாந்த்தை கைது செய்தனர்.

பின்னர் அவரை பண்ருட்டி கோர்ட்டில் ஆஜர்படுத்தினர். அவரை காவலில் வைக்க மாஜிஸ்திரேட்டு உத்தரவிட்டார். அதனை தொடர்ந்து விஜயகாந்த் கடலூர் மத்திய சிறையில் அடைக்கப்பட்டார்.

கடலூர்:

கடலூர் மாவட்டத்தில் கடந்த 2 வாரகாலமாக இரவு நேரத்தில் பரவலாக மழை பெய்து வருகிறது. இதனால் சீதோ‌ஷ்ண நிலை மாறி உள்ளது. இதன் காரணமாக ஏராளமானோருக்கு காய்ச்சல் மற்றும் தலைவலி ஏற்பட்டது.

இதனால் அவர்கள் அரசு ஆஸ்பத்திரி மற்றும் தனியார் ஆஸ்பத்திரிகளில் சிகிச்சை பெற்று செல்கின்றனர்.

இந்தநிலையில் கடந்த 3 நாட்களாக காய்ச்சலால் பாதிக்கப்பட்டவர்களின் எண்ணிக்கை அதிகரித்துள்ளது.

கடலூர், சிதம்பரம், நெய்வேலி, பண்ருட்டி, விருத்தாசலம், குறிஞ்சிப்பாடி உள்பட மாவட்டத்தில் உள்ள அரசு ஆஸ்பத்திரிகளில் காய்ச்சலால் பாதிக்கப்பட்டவர்கள் வந்த வண்ணம் உள்ளனர்.

காய்ச்சலால் அவதிப்பட்ட 493 பேருக்கு ரத்தபரிசோதனை செய்யப்பட்டது. இதில் 35 பேருக்கு டெங்கு காய்ச்சல் அறிகுறி இருப்பது தெரியவந்தது.

கடலூர் அரசு ஆஸ்பத்திரியில் காய்ச்சலால் பாதிக்கப்பட்டவர்களுக்கு ரத்த பரிசோதனை செய்யப்பட்டது. அவர்களில் 7 பேருக்கு டெங்கு காய்ச்சல் இருப்பது கண்டுபிடிக்கப்பட்டது.

குறிஞ்சிபாடியை சேர்ந்த கலா (வயது 48), கீழ்மாம்பழம்பட்டு அர்ச்சனா (13), காட்டுமன்னார்கோவில் சரவணன் (27), பாளையங்கோட்டை பரசுராமன் (20), நாராயணபுரம் பிரித்தா(15), வாழப்பட்டு சரோஜா(65), பணிக்கன்குப்பம் முருகன் (37) ஆகியோர் கடலூர் அரசு ஆஸ்பத்திரியில் தனிவார்டில் அனுமதிக்கப்பட்டுள்ளனர். அவர்களுக்கு தீவிர சிகிச்சை அளிக்கப்பட்டு வருகிறது.

கடலூர்:

கடலூர் நத்தப்பட்டு துணை மின்நிலையம் மற்றும் நல்லாத்தூர் துணை மின்நிலையத்தில் நாளை(செவ்வாய்க்கிழமை)மாதாந்திர மற்றும் சிறப்பு பராமரிப்பு பணிகள் நடைபெற உள்ளது. இதன் காரணமாக கடலூர் புதுநகர், பாரதிசாலை, செம்மண்டலம், கோண்டூர், சாவடி, நெல்லிக்குப்பம், நத்தப்பட்டு, குமராபுரம், கங்கணாங்குப்பம், வரக்கால்பட்டு, ராமாபுரம், பில்லாலி, அழகியநத்தம், திருவந்திபுரம், எஸ்.புதூர், அருங்குணம், நத்தம், திருமாணிக்குழி, சுந்தரவாண்டி, பெத்தாங்குப்பம், களையூர், இரண்டாயிரம் விளாகம், திருப்பணாம்பாக்கம், எம்.பி.அகரம் மற்றும்

அதை சுற்றியுள்ள பகுதிகளிலும், நல்லாத்தூர், செல்லஞ்சேரி, கீழ்குமாரமங்கலம், நல்லவாடு, காட்டுப்பாளையம், ராசாப்பாளையம், புதுபூஞ்சோலைகுப்பம், தென்னம்பாக்கம், சந்திக்குப்பம், ரெட்டிச்சாவடி, காரணப்பட்டு, புதுக்கடை, குட்டியாங்குப்பம், மதலப்பட்டு, இருசாம்பாளையம், கிளிஞ்சிக்குப்பம், புதுக்குப்பம், தூக்கணாம்பாக்கம், சிங்கிரிகுடி ஆகிய பகுதிகளிலும் நாளை காலை 9 மணி முதல் மாலை 5.30 மணி வரை மின்சாரம் நிறுத்தப்படும். மேற்கண்ட தகவலை தமிழ்நாடு மின் உற்பத்தி மற்றும் பகிர்மான கழகத்தின் செயற்பொறியாளர்கள் நெல்லிக்குப்பம் லீனா, கடலூர் ராமலிங்கம் ஆகியோர் வெளியிட்டுள்ள செய்திக்குறிப்பில் கூறப்பட்டுள்ளது.

பரங்கிப்பேட்டை:

பரங்கிப்பேட்டை அருகே உள்ள வல்லம் கிராமத்தை சேர்ந்தவர் ராமதாஸ் (வயது 38), தொழிலாளி. இவரது மனைவி மஞ்சுளா(32). காதலித்து திருமணம் செய்து கொண்ட இவர்களுக்கு 2 குழந்தைகள் உள்ளனர். கடந்த சில நாட்களாக கணவன்– மனைவி இடையே குடும்ப பிரச்சினை காரணமாக அடிக்கடி தகராறு ஏற்பட்டு வந்தது. இந்த நிலையில் சம்பவத்தன்று ராமதாசுக்கும், மஞ்சுளாவுக்கும் இடையே மீண்டும் தகராறு ஏற்பட்டதாக கூறப்படுகிறது.

இதில் மனமுடைந்த மஞ்சுளா, வீட்டில் தூக்குப்போட்டு தற்கொலை செய்து கொண்டார். இதுபற்றி தகவல் அறிந்த பரங்கிப்பேட்டை போலீசார் சம்பவ இடத்துக்கு விரைந்து வந்து, தற்கொலை செய்து கொண்ட மஞ்சுளாவின் உடலை பார்வையிட்டு அங்கிருந்தவர்களிடம் விசாரணை நடத்தினர். பின்னர் அவரது உடலை கைப்பற்றி பிரேத பரிசோதனைக்காக சிதம்பரம் அரசு மருத்துவமனைக்கு அனுப்பி வைத்தனர்.

இதுகுறித்து ராமதாஸ், பரங்கிப்பேட்டை போலீஸ் நிலையத்தில் புகார் கொடுத்தார். அதன் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.