கடலூர்

சேத்தியாத்தோப்பு:

கடலூர் மாவட்டம் சேத்தியாத்தோப்பு அருகே பூதங்குடி கிராமத்தை சேர்ந்தவர் சாமிநாதன் (வயது 70) இவர் சம்பவத்தன்று சேத்தியாதோப்பு தனியார் வங்கியில் ரூ. 39 ஆயிரம் எடுத்து கொண்டு வெளியே வந்தார்.

அப்போது அங்கு நின்று கொண்டிருந்த போது மர்ம நபர் கவனித்தார். உடனே அந்த நபர் சாமிநாதனிடம் பணத்தை எண்ணி தருவதாக கூறி வாங்கி ரூ. 20 ஆயிரம் பணத்துடன் ஓடினார். மீதம் ரூ. 19 ஆயிரம் மட்டுமே சாமிநாதனிடம் இருந்தது.

அதிர்ச்சி அடைந்த சாமிநாதன் இதுபற்றி சேத்தியாத்தோப்பு போலீஸ் நிலையத்தில் புகார் செய்தார். போலீசார் வழக்குப்பதிவு செய்து மர்ம நபரை தேடிவந்தனர்.

இந்த நிலையில் சேத்தியாதோப்பு சப்-இன்ஸ்பெக்டர் ராஜாராமன், குற்றப் பிரிவு சப்- இன்ஸ்பெக்டர் வீரபாண்டியன் மற்றும் போலீசார் ரோந்து பணியில் ஈடுபட்டனர்.

குமாரக்குடி அருகே சந்தேகத்திற்கிடமாகநின்ற நபரை மடக்கி பிடித்து விசாரணை நடத்தினர்.

விசாரணையில் அந்த நபர், தான் சாமிநாதனிடம் பணத்தை பறித்து சென்றதை ஒப்புகொண்டார். உடனே போலீசார் அவரை கைது செய்தனர். அவரது பெயர் கொளஞ்சி (50) என தெரிய வந்தது.

கடலூர்:

கடலூர் மாவட்டத்தில் அவ்வப் போது காலைப் பொழுதில் கடும் பனி மூட்டம் ஏற்படுகிறது. இந்த பனி மூட்டத்தால் சாலைகளில் கடும் பனி சூழ்ந்து சாலைகளில் வரும் வாகனங்கள் தெரியாத அளவிற்கு பனி மழை பொழிகிறது. இதனால் எதிரே வரும் வாகனங்கள் தெரியாமல் வாகன ஓட்டிகள் பெரும் சிரமத்திற்கு ஆளாகினர்.

இந்த கடும் பனிப்பொழிவால் வாகன ஓட்டிகள் தங்களின் முகப்பு விளக்குகளை எரிய விட்ட வண்ணம் வாகனங்களை ஓட்டிச் சென்றனர். பங்குனி மாதம் தொடங்கி நான்காவது நாளில் பங்குனி உத்திரத் திருவிழாவான இன்று காலை முதலே கடும் பனிப்பொழிவு இருந்தது.

இந்த கடும் பனிப்பொழிவால் மோட்டார் வாகனங்களில் செல்பவர்கள் கடும் குளிரில் நடுங்கியபடி மோட்டார் வாகனங்களை ஓட்டிச் சென்றனர். கடலூர் மாவட்டத்தில் நடுவீரப்பட்டு, வான்பாக்கம், மேல் பட்டாம்பாக்கம், வெள்ளக்கரை பில்லாலிதொட்டி திருவந்திபுரம், நெல்லிகுப்பம், போன்று பெரிய கங்கனாங்குப்பம், நகர் பகுதியான கூத்தப்பாக்கம், பாதிரிக்குப்பம், வண்டிப்பாளையம், புதுப் பாளையம், மஞ்ச குப்பம் மற்றும் அதனை சுற்றியுள்ள பகுதிகளில் மிகவும் அதிகமான கடும் பனிப் பொழிவு ஏற்பட்டது.

கடலூர்:

கடலூர் அருகே நெல்லிக்குப்பம் மந்தகரையை சேர்ந்தவர் அய்யனார். அவரது மகன் அருண் (வயது 22). தனியார் நிறுவன ஊழியர்.

இவர் கடந்த 8.8.2013 அன்று தனது நண்பர் கவுதமுடன் மோட்டார் சைக்கிளில் கடலூர் நோக்கி வந்து கொண்டிருந்தார். அவர்கள் அங்குள்ள பெட்ரோல் பங்க் அருகில் வந்த போது, எதிரே வந்த அரசு பஸ் அவர்கள் மீது மோதியது. இந்த விபத்தில் ரோட்டோரம் தூக்கி வீசப்பட்ட 2 பேரும் பலத்த காயமடைந்தனர். இதில் அருண் சம்பவ இடத்திலேயே உயிரிழந்தார். கவுதம் காயத்துடன் உயிர் தப்பினார்.

இது பற்றி நெல்லிக்குப்பம் போலீசார் வழக்குப்பதிவு செய்து விசாரணை நடத்தினர். இதற்கிடையில் இந்த விபத்தில் நஷ்ட ஈடு கேட்டு அருணின் தாய் லட்சுமி, அக்கா ஆனந்தி, தங்கை அனிதா ஆகிய 3 பேரும் மூத்த வக்கில் சிவமணி. வக்கீல்கள் சரவணன், முகுந்தன், சத்யா ஆகியோர் மூலம் மாவட்ட முதன்மை நீதிமன்றத்தில் வழக்கு தொடர்ந்தனர்.

இந்த வழக்கை விசாரித்த நீதிபதி ஜவஹர், இந்த விபத்தில் விழுப்புரம் அரசு போக்குவரத்து கழகம் பாதிக்கப்பட்ட குடும்பத்துக்கு நஷ்டஈடாக, வட்டியுடன் சேர்த்து ரூ.24 லட்சத்து 37 ஆயிரத்து 9வழங்க உத்தரவிட்டார். ஆனால் இதுவரை அரசு போக்குவரத்து கழகம் நஷ்ட ஈடு தொகையை வழங்காததால் அரசு பஸ்சை ஜப்தி செய்ய கோர்ட்டு உத்தரவிட்டது.

அதன்படி நேற்று கடலூர் பஸ் நிலையத்தில் நின்ற அரசு பஸ்சை கோர்ட் ஊழியர்கள் ஜப்தி செய்து கோர்ட்டில் ஒப்படைத்தனர்.

காட்டுமன்னார்கோவில்:

காட்டுமன்னார்கோவில் அருகே உள்ள ஸ்ரீமுஷ்ணம் கடை வீதியில் பேன்சி ஸ்டோர் ஒன்று உள்ளது. நேற்று இரவு 9 மணி அளவில் மின்கசிவு காரணமாக இந்த கடையில் தீ விபத்து ஏற்பட்டது.

தீ மளமளவென பரவியதில் கடையில் இருந்த பொருட்கள் அனைத்தும் எரிந்து சாம்பலாகின. இதுகுறித்து ஸ்ரீமுஷ்ணம் தீயணைப்பு துறையினருக்கு தகவல் தெரிவிக்கப்பட்டது. அவர்கள் விரைந்து வந்து சுமார் 30 நிமிடம் போராடி தீயை அணைத்தனர்.

மேலும் அருகில் உள்ள கடைகளுக்கு தீ பரவாமல் தடுக்கப்பட்டது. இந்த தீ விபத்தில் பேன்சி ஸ்டோரில் உள்ள ரூ.5 லட்சம் மதிப்பிலான பொருட்கள் நாசமானது.

இந்த தீ விபத்து குறித்து ஸ்ரீமுஷ்ணம் போலீசார் விசாரணை நடத்தி வருகின்றனர்.

பண்ருட்டி:

கடலூர் மாவட்டம் பண்ருட்டி அருகே உள்ள முத்தாண்டிகுப்பத்தை சேர்ந்தவர் தனசேகர் (வயது 34). இவர் தனியார் பால் விற்பனை நிலையத்தில் வேன் ஓட்டி வருகிறார். இவருக்கு திருமணமாகி கருத்து வேறுபாடு காரணமாக மனைவியை பிரிந்து தனது பெற்றோருடன் வசித்து வருகிறார்.

இவரது தம்பி நீலமேகம் (32). இவருக்கு திருமணம் ஆகவில்லை. வேலை எதற்கும் செல்லாமல் பலரிடம் கடன் வாங்கி குடித்துவிட்டு தகராறில் ஈடுபடுவார். இவருக்கு கடன் கொடுத்தவர்கள் வீட்டில் வந்து தினசரி பணத்தை திருப்பிகேட்டு தொந்தரவு கொடுப்பார்கள்.

இந்த நிலையில் கடந்த சில தினங்களுக்கு முன்பு ஒருவரிடம் ரூ.1 லட்சம் கடன் வாங்கிய நீலமேகம் அந்த பணத்தை வைத்துக்கொண்டு குடித்துவிட்டு தினசரி வீட்டில் வந்து தகராறில் ஈடுபட்டுள்ளார்.

நேற்று இரவு இதேபோல குடிபோதையில் வீட்டுக்கு வந்த நீலமேகம் தனது பெற்றோரிடமும், தனசேகரிடமும் தகராறில் ஈடுபட்டார். இதில் ஆத்திரமடைந்த தனசேகர் அருகே கிடந்த கத்தியை எடுத்து நீலமேகத்தை சரமாரியாக குத்தினார். இதில் படுகாயமடைந்த நீலமேகம் சம்பவ இடத்திலேயே ரத்தவெள்ளத்தில் பிணமானார்.

இதுகுறித்து அக்கம் பக்கத்தினர் போலீசாருக்கு தகவல் தெரிவித்தனர். சம்பவ இடத்துக்கு போலீசார் விரைந்து வந்து உடலை கைப்பற்றி பிரேத பரிசோதனைக்கு அனுப்பிவைத்தனர்.

தம்பியை குத்திக் கொன்ற தனசேகரை கைது செய்த போலீசார் இந்த கொலை தொடர்பாக வழக்குபதிவு செய்து விசாரணை நடத்தி வருகின்றனர். தம்பியை அண்ணன் குத்தி கொன்ற சம்பவம் அந்த பகுதியில் பரபரப்பை ஏற்படுத்தி உள்ளது.

விருத்தாச்சலம்:

சேலத்தில் இருந்து சிதம்பரம் நோக்கி அரசு பஸ் ஒன்று நேற்று இரவு சென்றது. இந்த பஸ் விருத்தாசலம் கொளஞ்சியப்பர் கோவில் அருகே வந்த போது டிரைவரின் கட்டுப்பாட்டை இழந்து ரோட்டில் புதிதாக அமைக்கப்பட்டுள்ள தடுப்பு கட்டை மீது மோதியது. இதனால் பஸ்ஸின் முன்பகுதி பெரிதும் சேதமானது. இந்த விபத்தில் பஸ்ஸில் இருந்த கண்டக்டர் உட்பட 15க்கும் மேற்பட்ட பயணிகள் படுகாயமடைந்தனர்.

இதைப் பார்த்து அந்த வழியாகச் சென்ற அக்கம்பக்கத்தினர் படுகாயம் அடைந்த பயணிகளை மீட்டு சிகிச்சைக்காக விருத்தாசலம் அரசு மருத்து வமனைக்கு அனுப்பி வைத்தனர். பின் மேல் சிகிச்சைக்காக சிதம்பரம் அண்ணாமலை பல்கலைக்கழக மருத்துவமனைக்கு அனுப்பி வைக்கப்பட்டனர். அங்கு அவர்களுக்கு சிகிச்சை அளிக்கப்பட்டு வருகிறது. இந்த விபத்து குறித்து விருதாச்சலம் போலீஸாருக்கு தகவல் தெரிவிக்கப்பட்டது தகவலறிந்த விருத்தாசலம் போலீஸ் இன்ஸ்பெக்டர் விஜயரங்கன், சப்-இன்ஸ்பெக்டர் கிருஷ்ணமூர்த்தி தலைமையிலான போலீசார் சம்பவ இடத்திற்கு விரைந்து வந்து விபத்து நடந்த பஸ்சை மீட்டு போக்குவரத்தை சரி செய்தனர். விபத்து குறித்து போலீசார் விசாரணை நடத்தி வருகின்றனர்.