விளையாட்டு

புதுடெல்லி:

இந்திய கிரிக்கெட் அணியின் முன்னாள் வேகப்பந்து வீச்சாளர் ஆஷிஷ் நெஹரா டெலிவிஷன் நிகழ்ச்சி ஒன்றில் கலந்து கொண்டு உரையாடுகையில் கூறியதாவது:-

இந்திய கிரிக்கெட் அணியில் நிறைய திறமையான வீரர்கள் உள்ளனர். ஆனால் அவர்களுக்கு நீண்ட காலம் வாய்ப்பு அளிக்கப்பட வேண்டும். இந்திய ஒருநாள் கிரிக்கெட் அணியின் பேட்டிங்கில் 5-வது மற்றும் 6-வது இடம் குறித்து பேசுகையில், அந்த இடத்துக்கு யார் களம் இறங்குவார்கள் என்பது இன்னும் உறுதியாக தெரியவில்லை. 5-வது இடத்தில் லோகேஷ் ராகுல் விளையாடுகிறார். ஆனால் டோனிக்கு மாற்று வீரராக கருதப்படும் ரிஷாப் பண்ட் தண்ணீர் கொடுக்க மட்டுமே பயன்படுத்தப்படுகிறார். ரிஷாப் பண்ட் தனக்கு கிடைத்த வாய்ப்புகளை தவற விட்டு இருக்கிறார் என்பதில் எந்தவித சந்தேகமும் கிடையாது. இருப்பினும் அவர் அணியில் தொடர்ந்து நீடிக்கிறார் என்றால் 22 வயதிலேயே அவரிடம் இருக்கும் திறமையை பார்க்கின்றனர்.

ஒரு வீரராக விராட்கோலிக்கு எந்தவித அங்கீகாரமும் தேவையில்லை. பேட்டிங் சாதனைகளே அவரை பற்றிய முழுமையான கதையையும் சொல்லும். வீரராக விராட்கோலி வியப்பூட்டும் வகையில் சிறப்பாக செயல்பட்டு இருக்கிறார். கேப்டன் பதவியை பொறுத்தமட்டில் அவர் இன்னும் முன்னேற்றம் காண வேண்டியது இருக்கிறது என்று நான் கருதுகிறேன். அவர் சற்று உணர்ச்சிவசப்படக்கூடிய கேப்டன் என்று என்னால் சொல்ல முடியும்.

1990 மற்றும் 2000-ம் களில் இருந்த ஆஸ்திரேலிய அணிக்கும், தற்போதைய இந்திய அணிக்குமான வித்தியாசம் ரொம்ப அதிகமானதாகும். அந்த அணியோடு தற்போதைய இந்திய அணியை ஒப்பிடமுடியாது. அந்த காலக்கட்டத்தில் ஆஸ்திரேலிய அணி தொடர்ச்சியாக 3 முறை உலக கோப்பையை வென்றது. 1996-ம் ஆண்டு உலக கோப்பையில் இறுதிப்போட்டிக்கு முன்னேறியது. அத்துடன் உள்ளூர் மற்றும் வெளிநாடுகளில் நடந்த டெஸ்ட் போட்டிகளில் அதிக வெற்றிகளை குவித்து ஆதிக்கம் செலுத்தியது. அந்த நிலையை தற்போதைய இந்திய அணியால் எட்ட முடியாது என்று சொல்ல முடியாது. ஆனால் அணியின் கலவை மிகவும் முக்கியமானதாகும். குழப்பம் இல்லாமல் சிறந்த வீரர்களை தேர்வு செய்ய வேண்டியதும் அவசியமானதாகும்.

இந்த ஆண்டு தொடக்கத்தில் நடந்த நியூசிலாந்துக்கு எதிரான ஒருநாள் போட்டி தொடரை (0-3) இழந்தபிறகு இந்திய அணி கேப்டன் விராட்கோலி, ‘நாங்கள் இந்த ஆண்டில் 20 ஓவர் மற்றும் டெஸ்ட் போட்டிக்கு தான் முக்கியத்துவம் கொடுத்துள்ளோம். அதனால் ஒருநாள் போட்டி முடிவை பெரிதாக எடுத்து கொள்ள வேண்டியதில்லை’ என்று சொன்னதை ஏற்றுக்கொள்ள முடியாது. அந்த தொடரை வென்று விட்டு அப்படி சொல்லி இருந்தால் அது வித்தியாசமானதாக இருந்து இருக்கும். தோல்வி கண்ட பிறகு இதுபோல் சாக்கு போக்கு சொல்லுவது தவறானதாகும்.

இவ்வாறு அவர் கூறினார். 

மும்பை:

இந்திய டெஸ்ட் கிரிக்கெட் அணியின் துணை கேப்டன் அஜிங்யா ரஹானே நேற்று ஆன்லைன் மூலம் பத்திரிகையாளர்களுக்கு அளித்த பேட்டியில் கூறியதாவது:-

கொரோனா தாக்கம் முடிந்து எத்தகைய கிரிக்கெட் (சர்வதேச அல்லது உள்ளூர்) போட்டிகளில் விளையாடுவது என்றாலும், அதற்கு முன்பாக வீரர்கள் முறையாக பயிற்சி எடுத்து தயாராவதற்கு குறைந்தது 3 அல்லது 4 வாரங்கள் அவசியமாகும். ஆனால் கொரோனா வைரசுக்கு எதிரான தடுப்பூசி கண்டுபிடிக்கப்பட்ட பிறகு மட்டுமே கிரிக்கெட் போட்டிகள் தொடங்கப்பட வேண்டும்.

அணியின் டிரெய்னர் வழங்கும் ஆலோசனைப்படி வீட்டிலேயே தினமும் பயிற்சி மேற்கொள்கிறேன். தொடர்ந்து நல்ல உடல்தகுதியுடனும், நேர்மறை எண்ணத்துடனும் இருக்க வேண்டியது முக்கியமாகும். எனது மனைவிக்கு சமையலிலும், வீட்டை சுத்தப்படுத்துவதிலும் உதவுகிறேன். எனது மகளுடன் அதிக நேரத்தை செலவிடுகிறேன். அவளுடன் உற்சாகமாக விளையாடுகிறேன். நான் ஜூடோவில் கருப்பு பெல்ட் வாங்கியவன். அதனால் வாரத்துக்கு 3-4 தடவை கராத்தே பயிற்சியில் ஈடுபடுகிறேன்.

மறுபடியும் கிரிக்கெட் எப்போது ஆரம்பிக்கும் என்பது தெரியாது. களம் காண ஆர்வமுடன் காத்திருக்கிறேன். இந்திய அணிக்காக மூன்று வடிவிலான போட்டிகளிலும் எனது பங்களிப்பை அளிக்க விரும்புகிறேன். எது எப்படி என்றாலும் நமது வாழ்க்கை முறையில் இனி நிச்சயம் சில மாற்றங்கள் இருக்கும். அதே சமயம் கிரிக்கெட் களத்தில் பெரிய அளவில் மாற்றம் இருக்காது.

வழக்கமாக விக்கெட் வீழ்த்தியதும் கைகுலுக்கியும், கட்டிப்பிடித்தும் கொண்டாடுவோம். இனி இந்த பாணியை தவிர்க்க (கொரோனா வைரஸ் பரவும் ஆபத்து உள்ளதால்) வேண்டியது வரும். விக்கெட்டை வீழ்த்தியதும் நமஸ்தே (இருகரம்கூப்பி வணக்கம் தெரிவிப்பது) சொல்வது போன்று ஏதாவது ஒன்றை செய்து மகிழ்ச்சியை வெளிப்படுத்துவோம்.

முந்தைய காலத்தில் விக்கெட் சரிந்ததும் பீல்டர்கள் அங்கிருந்து ஓடிவராமல் தனது பகுதியில் நின்றபடியே கைதட்டுவார்கள். அந்த பழைய நடைமுறையை நாம் பின்பற்றுவோம் என்று நினைக்கிறேன். கைகுலுக்குவதற்கு பதிலாக நமஸ்தே சொல்லலாம். எந்த விஷயத்தையும் நாம் எளிதாக எடுத்துக் கொள்ள முடியாது. எல்லாவற்றுக்கும் மேலாக ரசிகர்களின் பாதுகாப்பு மிகவும் முக்கியமானது.

இந்திய கேப்டன் விராட் கோலியும், ஆஸ்திரேலியாவின் ஸ்டீவன் சுமித்தும் மிகச்சிறந்த வீரர்கள். இருவரின் ஸ்டைலும், ஆட்ட அணுகுமுறையும் முற்றிலும் வித்தியாசமானது. அவர்கள் வேகப்பந்து வீச்சிலும், சுழற்பந்து வீச்சிலும் திறம்பட விளையாடக்கூடியவர்கள்.

ராஜஸ்தான் ராயல்ஸ் அணிக்காக சுமித்துடன் இணைந்து மிகவும் ரசித்து அனுபவித்து விளையாடி இருக்கிறேன். கோலியுடன் இணைந்து பேட்டிங் செய்வது எப்போதும் வேடிக்கையானது. ஒருவருக்கொருவர் சாதனையை மகிழ்ச்சியுடன் பகிர்ந்து கொள்வோம். எங்களிடையே நல்ல புரிந்துணர்வு உள்ளது. பேட்டிங் போது ஒருவருக்கொருவர் நம்பிக்கை வைத்து ஆடுவோம்.

இவ்வாறு ரஹானே கூறினார்.