புதுச்சேரி

புதுச்சேரி:

பா.ஜ.க. சார்பில் நடந்த தாமரை எழுச்சி யாத்திரை நிறைவு விழா பொதுக்கூட்டத்தில் நடிகை கு‌‌ஷ்பு கலந்து கொண்டு பேசினார். அப்போது அவர் கூறியதாவது:-

இங்கு கூடியிருக்கும் மக்களின் எழுச்சியை பார்க்கும் போது புதுவையில் தாமரை மலர்ந்தே தீரும் என்பதில் சந்தேகமில்லை. பிரதமர் மோடியின் சிறப்பான திட்டங்களை உங்களுக்கு எடுத்து கூறுவதற்கு தான் நான் இங்கு வந்துள்ளேன். தமிழகம், புதுவையில் பா.ஜ.க. வெற்றி பெற்று விடுமோ என்ற பயம் காங்கிரஸ் மற்றும் தி.மு.க.விற்கு வந்துவிட்டது. நான் புதுவைக்கு எத்தனையோ முறை வந்துள்ளேன். அப்போது புதுவை அழகாக இருந்தது. மக்கள் சந்தோ‌‌ஷமாக இருந்தனர். எனக்கும் மகிழ்ச்சியாக இருந்தது. ஆனால் தற்போது மக்கள் வேதனையாக இருப்பது தெரிகிறது. காங்கிரஸ், தி.மு.க. ஆட்சியில் புதுவை சீரழிந்துள்ளது.

மக்கள் வேதனையில் உள்ளனர். இதற்கு காரணம் லஞ்சம், ஊழல், முறைகேடுகள் அதிகரித்துள்ளது. புதுவை மாநிலத்தில் கடந்த 3 ஆண்டுகளாக ரே‌‌ஷன்கடைகள் மூடப்பட்டுள்ளன. அரசு ஊழியர்களுக்கு சம்பளம் இல்லை. குறிப்பாக பெண்களுக்கு பாதுகாப்பு இல்லை. பெண்கள் வெளியே சென்றால் அவர்கள் எப்போது வீட்டிற்கு வருவார்கள் என்று குடும்பத்தினர் எதிர்பார்த்து காத்திருக்கின்றனர். போதைப்பொருட்கள் அதிகம் பயன்படுத்தும் பகுதியாக புதுவை உள்ளது.

ஒரே நாடு ஒரே ரே‌‌ஷன்கார்டு திட்டத்தின் மூலம் சாதி, மத, பாகுபாடு, ஏற்றத்தாழ்வுகள் இல்லாமல் அனைத்து மக்களுக்கும் அரிசி, கோதுமை போன்ற ரே‌‌ஷன் பொருட்களை பெற முடியும். ஆனால் புதுவையில் அந்த திட்டம் செயல்படுத்தப்படவில்லை. காங்கிரஸ், தி.மு.க.வினர் பா.ஜ.க. மீது தவறான பிரசாரம் செய்கின்றனர். பா.ஜ.க. மேல்சாதி காரர்களுக்கு சொந்தம் என்று. ஆனால் பா.ஜ.க.வில் சிறுபான்மையினர் எம்.பி., எம்.எல்.ஏ.க்களாகவும், பல முக்கிய பொறுப்புகளிலும் உள்ளனர். நான் கூட சிறுபான்மையினர் தான்.

விவசாயிகளை மேம்படுத்துவதற்காக மத்திய அரசு 3 வேளாண் சட்டங்களை கொண்டு வந்துள்ளது. இந்த சட்டம் தானாக கொண்டு வரப்படவில்லை. 1½ லட்சம் விவசாயிகளிடம் கலந்து பேசி ஆலோசனை நடத்திய பின்னர் தான் கொண்டு வரப்பட்டுள்ளது. காங்கிரஸ், தி.மு.க.வும் எதிர்க்கட்சிகள் என்பதற்காக இதனை எதிர்க்கின்றனர். 1970-ம் ஆண்டு தி.மு.க. ஆட்சியில் 5 விவசாயிகள் சுட்டுக்கொல்லப்பட்டது நினைவில் இல்லையா?

திட்டங்களை செயல்படுத்தாத முதல்-அமைச்சர் நாராயணசாமி கவர்னரை குற்றம் சாட்டி வருகிறார். மத்திய அரசு பல்வேறு மக்கள் நலத்திட்டங்களை செயல்படுத்தி வருகிறது. பெண்கள் வங்கி கணக்கில் நிதி செலுத்தப்படுகிறது. மக்கள் அனைவரும் சொந்த வீட்டில் வாழும் வாய்ப்பை ஏற்படுத்தி தருவேன் என்று பிரதமர் மோடி உறுதி அளித்துள்ளார்.

எனது அரசியல் பயணம் தி.மு.க.வில் தான் தொடங்கியது. அப்போது தி.மு.க. தலைவராக இருந்த கருணாநிதி எதிர்க்கட்சி தலைவர்களை மரியாதையுடன் பேச வேண்டும் என்பார். ஆனால் தற்போது தி.மு.க. தலைவர் மு.க.ஸ்டாலின் தமிழக முதல்-அமைச்சர் எடப்பாடி பழனிசாமியை எடுபிடி முதல்-அமைச்சர் என்று மரியாதை குறைவாக பேசுகிறார். உதயநிதி ஸ்டாலின் கூட்டத்திற்கு அனுமதியில்லை என்று போலீசார் தடுத்தபோது, அவர் அங்கு இருந்த போலீசாரிடம், உங்கள் பெயர் எனக்கும் தெரியும், இன்னும் 5 மாதத்தில் எங்கள் ஆட்சி தான். அப்போது நான் உங்களை என்ன செய்கிறேன் என்று பாருங்கள் என்று மிரட்டியுள்ளார். தாத்தா எங்கே? பேரன் எங்கே?

கொரோனா காலத்தில் உலக அளவில் சிறப்பாக செயல்பட்ட தலைவராக பிரதமர் மோடி தேர்வு செய்யப்பட்டுள்ளார். நாட்டில் ஊழல், முறைகேடு குறித்து யார் வேண்டுமானாலும் பேசலாம். ஆனால் காங்கிரஸ், தி.மு.க.விற்கு அதனை பற்றி பேச அருகதையில்லை. ஊழல் என்றால் என்ன என்று நாட்டிற்கு எடுத்து காட்டியது காங்கிரஸ், தி.மு.க. தான்.

காங்கிரஸ், தி.மு.க.வின் காலம் முடிந்து விட்டது. நடைபெற உள்ள சட்டமன்ற தேர்தலில் புதுவையில் பா.ஜ.க. கூட்டணி ஆட்சி அமைவது உறுதி. தாமரை மலர்ந்தே தீரும். இனியும் நாம் அடிமைகள் இல்லை. மக்களை யாரும் ஏமாற்ற முடியாது. பெண்களை பாதுகாப்பாகவும், சுதந்திரமாகவும் வாழ வைப்பது பா.ஜ.க. தான். எனவே மக்கள் பா.ஜ.க.வுக்கு வாக்களிக்க வேண்டும். நான் தேர்தல் பிரசாரத்திற்கும் புதுவைக்கு வருவேன். வெற்றிக்கூட்டத்திற்கும் வருவேன்.

இவ்வாறு அவர் கூறினார்.

புதுச்சேரி:

புதுச்சேரியில் பா.ஜ.க. சார்பில் தாமரை எழுச்சி யாத்திரையின் நிறைவு விழா நேற்று நடந்தது. நிகழ்ச்சிக்கு பா.ஜ.க. மாநில தலைவர் சாமிநாதன் எம்.எல்.ஏ. தலைமை தாங்கினார்.

இதில் மத்திய மந்திரி கிஷன் ரெட்டி கலந்து கொண்டு பேசியதாவது:-

புதுச்சேரி சிறந்த ஆன்மிக பூமி. கடந்த 6 ஆண்டுகளாக பிரதமர் மோடி கொண்டு வந்த பல்வேறு திட்டங்களால் இந்தியா வளர்ச்சியடைந்து வருகிறது. ஆனால் புதுவை மாநிலத்தில் மத்திய அரசின் எந்த ஒரு திட்டமும் செயல்படுத்தப்படவில்லை. புதுவையில் உள்ள காங்கிரஸ் அரசு மத்திய அரசின் திட்டங்கள் எதையும் இங்கு நிறைவேற்றவில்லை.

நடைபெற உள்ள சட்டமன்ற தேர்தலில் பா.ஜ.க. கூட்டணி ஆட்சி தான் புதுவையில் அமையும். அப்போது மத்திய அரசின் திட்டங்கள் அனைத்தும் புதுவை மக்களுக்கு கிடைக்கும். மத்திய அரசின் சிறப்பான திட்டங்களை காங்கிரஸ் எதிர்ப்பதால் மக்கள் காங்கிரஸ் கட்சியை வெறுக்க தொடங்கி விட்டனர். அதனால் தான் கடந்த நாடாளுமன்ற தேர்தலில் பா.ஜ.க. அமோக வெற்றி பெற்றது.

புதுச்சேரி முதல்-அமைச்சர் நாராயணசாமி தொடர்ந்து ஒரே பொய்யை கூறி வருகிறார். யூனியன் பிரதேசமான புதுவையை அண்டை மாநிலத்துடன் இணைக்க மத்திய அரசு முயற்சி செய்து வருகிறது என்று கூறி வருகிறார்.

புதுச்சேரி யூனியன் பிரதேசமாகவே நீடிக்கும். தொடர்ந்து பொய்களை கூறி வரும் முதல்-அமைச்சர் நாராயணசாமிக்கு புதுவை மக்கள் தகுந்த பாடம் புகட்ட வேண்டும். புதுவை மக்கள் அனைவருக்கும் கொரோனா தடுப்பூசியை மத்திய அரசு இலவசமாக வழங்கும்.

இவ்வாறு அவர் கூறினார்.

கூட்டத்தில் நடிகை குஷ்பு உள்பட பலர் கலந்து கொண்டனர்.

புதுச்சேரி:

புதுவை மாநிலத்தில் கொரோனா பரவல் குறைந்து வரும் நிலையில், கொரோனா தடுப்பு பணிகளில் உறுதுணையாக இருந்த சுகாதார இயக்ககத்தின் இயக்குனர் ஸ்ரீராமலுக்கு கொரோனா தொற்று உறுதி செய்யப்பட்டுள்ளது.

இவர் சில நாட்களாக சோர்வுடன் காணப்பட்டார். இதனையடுத்து அவரை பரிசோதனை செய்ததில் தொற்றினால் பாதிக்கப்பட்டுள்ளது உறுதி செய்யப்பட்டது. இதனையடுத்து அவர் ஜிப்மர் மருத்துவமனையில் தனிமைப்படுத்தப்பட்டு சிகிச்சை பெற்று வருகிறார். அவரது அலுவலகம் கிருமிநாசினி கொண்டு சுத்தம் செய்யப்பட்டது.

அவருடன் தொடர்பில் இருந்தவர்களும் தங்களை தாங்களே தனிமைப்படுத்திக் கொள்ள சுகாதாரத்துறை அறிவுறுத்தி உள்ளது. தொடர்ந்து அனைத்து சுகாதாரத்துறை அதிகாரிகளும் கொரோனா பரிசோதனை செய்ய உள்ளனர்.

புதுச்சேரி:

உலகையே மிரட்டிய கொரோனா இந்தியாவுக்குள்ளும் புகுந்ததால் தடுப்பு நடவடிக்கையாக ஊரடங்கு பிறப்பிக்கப்பட்டது. அதன்படி கடந்த ஆண்டு (2020) மார்ச் மாதம் புதுச்சேரியில் பள்ளி, கல்லூரிகள் உள்ளிட்ட கல்வி நிறுவனங்கள், பொதுமக்கள் கூடும் இடங்கள் மூடப்பட்டன. போக்குவரத்து உள்ளிட்ட மாமூல் வாழ்க்கை அனைத்தும் முடங்கின. இதையடுத்து அறிவிக்கப்பட்ட தளர்வுகளால் இயல்பு வாழ்க்கை படிப்படியாக திரும்பியது.

இதைத்தொடர்ந்து புதுச்சேரியில் கடந்த அக்டோபர் மாதம் 9 முதல் 12-ம் வகுப்பு வரையிலான மாணவர்களுக்கு பாடங்களில் சந்தேகங்களை தீர்க்கும் வகையில் வகுப்புகள் தொடங்கி செயல்பட்டு வருகின்றன. கடந்த (டிசம்பர்) மாதம் 17-ந் தேதி முதல் இளங்கலை, முதுகலை படித்து வரும் இறுதியாண்டு மாணவர்களுக்கான வகுப்புகள் தொடங்கப்பட்டன.

இந்தநிலையில் பள்ளிகள் எப்போது திறக்கப்படும்? என்ற எதிர்பார்ப்பு மாணவர்கள் மற்றும் பெற்றோர்கள் மத்தியில் இருந்து வந்தது. இதையொட்டி பள்ளிகள் திறக்கப்பட்டு 1 முதல் 12-ம் வகுப்பு வரை வகுப்புகள் நடைபெறும் என்று புதுவை அரசு சார்பில் அறிவிக்கப்பட்டது.

அதன்படி நாளை (திங்கட்கிழமை) பள்ளிகள் திறக்கப்பட உள்ளன. அதாவது, காலை 10 மணி முதல் மதியம் 1 மணி வரை பள்ளிகள் செயல்படும். அரசு விதிகளின்படி அப்போது கொரோனா தடுப்பு நடவடிக்கைகள் கடைப்பிடிக்கப்படும்.

1, 3, 5, 7-ம் வகுப்புகள் திங்கள், புதன், வெள்ளிக்கிழமைகளிலும், 2, 4, 6, 8-ம் வகுப்புகள் செவ்வாய், வியாழன், சனிக்கிழமைகளிலும் நடைபெறும். இந்த நாட்களில் மாணவர்களுக்கு வருகை பதிவேடு கிடையாது. ஏற்கனவே 9 முதல் 12 வரை வகுப்புகள் சுழற்சி முறையில் இயங்கி வருவது குறிப்பிடத்தக்கது.

விருப்பமுள்ள மாணவர்கள் மட்டும் பள்ளிகளுக்கு சென்று பாடங்களில் தங்களுக்கு உள்ள சந்தேகங்களை ஆசிரியர்களிடம் கேட்டு தெரிந்து கொள்ளலாம். ஆனால் ஆசிரியர்கள் முழுவதும் பணியில் இருப்பார்கள்.

வருகிற 18-ந் தேதி முதல் பள்ளிகள் வழக்கம் போல் செயல்படும். அதற்கான வழிகாட்டு நெறிமுறைகள் புதுவை அரசின் கல்வித்துறை சார்பில் ஏற்கனவே வெளியிடப்பட்டுள்ளது.

9 மாதங்களுக்குப் பிறகு பள்ளிகள் முழுமையாக திறக்கப்பட உள்ளதையொட்டி அரசு மற்றும் தனியார் பள்ளிகள் சார்பில் தீவிர ஏற்பாடுகள் செய்யப்பட்டு வருகின்றன.

கொரோனா விதிமுறைகள் பின்பற்றப்படுவதுடன் பள்ளி வளாகம், வகுப்பறை முழுவதும் கிருமி நாசினி தெளித்து, சமூக இடைவெளியுடன் மாணவர்களை வகுப்பறையில் அமர வைப்பதற்கு தேவையான நடவடிக்கைகளில் பள்ளி நிர்வாகங்கள் மும்முரமாக ஈடுபட்டுள்ளன.