வேலூர்

வேலூர்:

தேர்தலையொட்டி வேலூர் மாவட்டத்தில் பறக்கும் படை, நிலை கண்காணிப்பு குழுவினர் வாக்காளர்களுக்கு பணம், பரிசு பொருட்கள் போன்றவை கார், வேன் உள்ளிட்ட வாகனங்களில் கொண்டு செல்லப்படுகிறதா? என கண்காணித்து வருகின்றனர்.

பொதுமக்கள் மற்றும் அரசியல் கட்சி பிரமுகர்கள் பணம் பட்டுவாடா செய்வது பற்றியோ, பரிசுப் பொருட்கள் கொடுப்பது பற்றியோ புகார் தெரிவிக்கும்போது பறக்கும் படையினர் சம்பந்தப்பட்ட பகுதிக்கு செல்கிறார்களா?, முறையாக சோதனை நடத்துகிறார்களா? என்பதை தேர்தல் ஆணையம் மற்றும் மாவட்ட தேர்தல் அலுவலர்கள் கண்காணிக்கும் வகையில் இந்த வாகனங்களுக்கு (ஜி.பி.எஸ்.) கண்காணிப்பு கருவிகள் பொருத்தும் பணி நேற்று நடந்தது. இதனையொட்டி கலெக்டர் அலுவலகத்திற்கு நேற்று வாகனங்கள் வரவழைக்கப்பட்டு அதில் கருவிகள் பொருத்தப்பட்டன. இந்தக் கருவிகள் மூலம் பறக்கும் படையினரின் செயல்பாட்டை கலெக்டர் அலுவலகத்தில் இருந்து அதிகாரிகள் கண்காணிக்கலாம். அவர்களுக்கு ஒதுக்கப்பட்ட இடத்தில் வாகன தணிக்கை செய்கிறார்களா? என்பதை கண்காணிக்கலாம் என தேர்தல் அதிகாரிகள் தெரிவித்தனர்.

வேலூர்:

கொரோனா தொற்று தடுப்பு பணியில் ஈடுபட்டு வரும் முன்கள பணியாளர்கள் தடுப்பூசி போட்டு கொள்ள வேண்டும் என்று தமிழக சுகாதாரத்துறை தெரிவித்தது. அதைத்தொடர்ந்து வேலூர் மாவட்டத்தில் சுகாதாரத்துறையினர், போலீசார், வருவாய்த்துறையினர், உள்ளாட்சி அமைப்பினருக்கு கொரோனா தடுப்பூசி கடந்த ஜனவரி மாதம் முதல் போடப்பட்டு வருகிறது. ஆனால் பெரும்பாலான முன்கள பணியாளர்கள் அச்சம் காரணமாக கொரோனா தடுப்பூசி போட்டு கொள்வதில் ஆர்வம் காட்டவில்லை.

இதற்கிடையே சட்டமன்ற தேர்தல் பணியில் ஈடுபடும் அனைத்து அரசு அலுவலர்கள் மற்றும் போலீசார் கொரோனா தடுப்பூசி போட்டு கொள்ள வேண்டும் என்று வேலூர் மாவட்ட தேர்தல் நடத்தும் அலுவலரும், கலெக்டருமான சண்முகசுந்தரம் உத்தரவிட்டார். அதற்காக 14 இடங்களில் தடுப்பூசி போடுவதற்கு ஏற்பாடு செய்யப்பட்டது.

வேலூர் மாவட்டத்தில் பணிபுரியும் பெரும்பாலான போலீசார் கொரோனா தடுப்பூசி போடவில்லை என்று மாவட்ட போலீஸ் சூப்பிரண்டு செல்வகுமாருக்கு தகவல் கிடைத்தது.

அதைத்தொடர்ந்து நேற்று வேலூர் நேதாஜி விளையாட்டு அரங்கில் சிறப்பு முகாம் ஏற்பாடு செய்யப்பட்டது. போலீஸ் சூப்பிரண்டு செல்வகுமார் உத்தரவின்பேரில் கொரோனா தடுப்பூசி போடாத அனைத்து போலீசாரும் அங்கு வரவழைக்கப்பட்டனர்.

முகாமில் 4 டாக்டர்கள் தலைமையில் குழு அமைக்கப்பட்டிருந்தது. அவர்கள் போலீசாரின் பெயர், பணிபுரியும் இடம் ஆகியவற்றை பதிவு செய்து கொண்டு வரிசையாக தடுப்பூசி செலுத்தினர்.

இதில், வேலூர் சரக டி.ஐ.ஜி. காமினி, போலீஸ் சூப்பிரண்டு செல்வகுமார், துணை போலீஸ் சூப்பிரண்டுகள், இன்ஸ்பெக்டர்கள் உள்ளிட்ட அனைவரும் தடுப்பூசி போட்டு கொண்டனர்.

இந்த சிறப்பு முகாமில் 695 பேருக்கும், அதைத்தொடர்ந்து வி.ஐ.டி. பல்கலைக்கழகத்தில் நடந்த முகாமில் 30 போலீசாருக்கும் என்று ஒரே நாளில் 725 போலீசாருக்கு கொரோனா தடுப்பூசி போடப்பட்டது என்று வேலூர் மாநகராட்சி நல அலுவலர் சித்ரசேனா தெரிவித்தார்.

இதே போல் வேலூர் தீயணைப்பு நிலைய அலுவலர் கார்த்திகேயன் நேற்று வேலூர் பென்ட்லேன்ட் அரசு மருத்துவமனையில் கொரோனா தடுப்பூசி போட்டுக்கொண்டார்.

அதைத்தொடர்ந்து வேலூர் தீயணைப்பு நிலையத்தில் பணிபுரியும் வீரர்களுக்கும் தடுப்பூசி போடப்பட்டது.

அணைக்கட்டு:

ஒடுகத்தூரை அடுத்த ஓ.ராஜபாளையம் கிராமத்தை சேர்ந்தவர் சூரியபிரகாஷ், கட்டிட தொழிலாளி. இவரது மகன் யுவராஜ் (வயது 14). ஒடுகத்தூர் அரசினர் மேல்நிலைப் பள்ளியில் 8-ம் வகுப்பு படித்து வந்தான். இந்த நிலையில் நேற்று யுவராஜ் தனது நண்பர்களுடன் ஒடுகத்தூர் அருகே உள்ள உத்திரகாவிரி ஆற்றில் கட்டப்பட்டுள்ள தடுப்பணையில் குளிக்கச் சென்றான்.

தடுப்பணை மீது நடந்து செல்லும்போது யுவராஜ் உள்பட 2 மாணவர்கள் தண்ணீரில் வழுக்கி விழுந்தனர். இதையறிந்த அக்கம்பக்கத்தில் இருந்தவர்கள், 2 மாணவர்களையும் தேடினர். இதில் ஒரு மாணவன் மட்டும் உயிருடன் மீட்கப்பட்டான்.

யுவராஜை மீட்க முடியாததால் அருகிலுள்ள ஒடுகத்தூர் தீயணைப்புத் துறைக்கு தகவல் தெரிவித்தனர் உடனடியாக தீயணைப்பு நிலைய அலுவலர் பாலாஜி தலைமையில் 10-க்கும் மேற்பட்ட தீயணைப்பு வீரர்கள் சம்பவ இடத்திற்கு வந்து அணையில் இறங்கி தேடினர்.

சுமார் 3 மணி நேரம் தேடியும் யுவராஜ் கிடைக்காததால் தடுப்பணையை சிறிய அளவில் உடைத்து சிறிதளவு தண்ணீரை வெளியேற்றி யுவராஜை பிணமாக மீட்டனர்.

இது குறித்து தகவல் அறிந்ததும் வேப்பங்குப்பம் போலீசார் சம்பவ இடத்திற்கு விரைந்து சென்று யுவராஜின் உடலை பிரேத பரிசோதனைக்காக வேலூர் அடுக்கம்பாறை அரசு மருத்துவமனைக்கு அனுப்பி வைத்தனர். மேலும் இது சம்பந்தமாக போலீசார் வழக்குப் பதிவு செய்து விசாரணை மேற்கொண்டு வருகின்றனர்.

வேலூர்:

வேலூர் அலமேலுமங்காபுரம் பஜனை கோவில்தெருவை சேர்ந்தவர் வடிவேலன் (வயது 40), ஆட்டோ டிரைவர். இவர் நேற்று முன்தினம் எஸ்.வி.சி. காந்திநகரில் சென்றபோது ஆட்டோவை வழிமறித்த ஒரு வாலிபர் கத்தியை காட்டி மிரட்டி வடிவேலன் சட்டை பையில் வைத்திருந்த ரூ.5 ஆயிரத்தை பறித்து சென்றார்.

இதுகுறித்து வடிவேலன் சத்துவாச்சாரி போலீசில் புகார் அளித்தார். அதன்பேரில் போலீசார் வழக்குப்பதிந்து விசாரணை நடத்தினர். அதில், ஆட்டோ டிரைவரிடம் வழிப்பறியில் ஈடுபட்டது எஸ்.வி.சி. காந்திநகரை சேர்ந்த பிரபு (26) என்பது தெரிய வந்தது. அதையடுத்து போலீசார் அவரை கைது செய்தனர்.

வேலூர்:

தமிழக சட்டமன்ற தேர்தலையொட்டி வேலூர் மாவட்டத்தில் உள்ள 5 சட்டமன்ற தொகுதிகளுக்கு தலா 3 பறக்கும் படைகள் மற்றும் நிலை கண்காணிப்பு குழுக்கள் என்று மொத்தம் 15 பறக்கும் படைகள், நிலை கண்காணிப்பு குழுக்கள் அமைக்கப்பட்டன. பறக்கும்படைகள், நிலை கண்காணிப்பு குழுக்கள் சுழற்சி முறையில் 24 மணி நேரமும் முக்கிய பகுதிகளில் வாகன சோதனையில் ஈடுபட்டு வருகின்றனர்.

வேலூர் சட்டமன்றதொகுதிக்கு உட்பட்ட நிலை கண்காணிப்புக்குழு அலுவலர் கணேசன் தலைமையிலான குழுவினர் நேற்று மதியம் 12 மணியளவில் வேலூர் அலமேலுமங்காபுரம் பகுதியில் வாகன தணிக்கையில் ஈடுபட்டனர். அப்போது அந்த வழியாக வந்த காரை நிறுத்தி சோதனை செய்தனர். காரில், ரூ.3½ லட்சம் இருந்தது. இதுகுறித்து நிலை கண்காணிப்புக்குழுவினர் விசாரித்தனர். அப்போது காரை ஓட்டி வந்தவர் வேலூர் சத்துவாச்சாரி பேங்க் மேன் நகரை சேர்ந்த சரவணன் (வயது 45) என்பதும், வேலூரில் இரும்புக் கடை வைத்திருப்பதும் தெரிய வந்தது.

மேலும் அவர் சத்துவாச்சாரியில் உள்ள வங்கியில் ரூ.3½ லட்சத்தை செலுத்துவதற்காக கொண்டு சென்றதும் தெரிய வந்தது. ஆனால் அந்த பணத்திற்கு உரிய ஆவணங்கள் இல்லாததால் அவை பறிமுதல் செய்யப்பட்டது. பின்னர் அந்த பணத்தை நிலை கண்காணிப்பு குழுவினர், வேலூர் சட்டமன்ற தொகுதி தேர்தல் நடத்தும் அலுவலரும், வேலூர் உதவி கலெக்டருமான கணேசிடம் ஒப்படைத்தனர். அப்போது வேலூர் தாசில்தார் ரமேஷ் மற்றும் அலுவலர்கள் உடனிருந்தனர்.

வேலூர்:

வேலூர் மாநகர் மாவட்ட தே.மு.தி.க. சார்பில் சட்டமன்ற தேர்தல் ஆலோசனை கூட்டம் அங்குள்ள திருமண மண்டபத்தில் நேற்று முன்தினம் நடைபெற்றது. இதில் கலந்து கொண்ட தே.மு.தி.க. துணை செயலாளர் எல்.கே.சுதீசுக்கு வரவேற்பு அளித்த தே.மு.தி.க.வினர் மோட்டார் சைக்கிள், கார்களில் ஊர்வலமாக சென்றனர். இதைக்கண்ட வேலூர் மாவட்ட தேர்தல் அலுவலரும், கலெக்டருமான சண்முகசுந்தரம் தே.மு.தி.க.வினர் ஊர்வலம் செல்ல அனுமதி வாங்கி உள்ளார்களா என்று விசாரித்தார். அப்போது தே.மு.தி.க.வினர் அனுமதி பெறாமல் தேர்தல் விதியை மீறி ஊர்வலம் சென்றது தெரிய வந்தது. இதையடுத்து கலெக்டரின் உத்தரவின் பேரில் சத்துவாச்சாரி போலீஸ் நிலையத்தில் தே.மு.தி.க. வேலூர் மாவட்ட செயலாளர் கோபிநாத் உள்பட 63 பேர் மீது வழக்குப்பதிவு செய்யப்பட்டு உள்ளது.