நீலகிரி

ஊட்டி:

கொடநாட்டில் நடந்த கொலை, கொள்ளை தொடர்பாக போலீசார் மறு விசாரணை நடத்தி வருகின்றனர். குற்றம் சாட்டப்பட்ட சயான், ஜம்சீர் அலி மற்றும் எஸ்டேட் மேலாளர் நடராஜன் உள்ளிட்டோரிடம் விசாரித்து வாக்குமூலம் பதிவு செய்துள்ளனர்.

இதற்கிடையே கொடநாடு எஸ்டேட்டில் கணினி ஆபரேட்டர் தினேஷ் குமார் சம்பவம் நடந்த சில தினங்களில் தற்கொலை செய்து கொண்டார். இந்த வழக்கு முதலில் தற்கொலை வழக்காக பதிவு செய்யப்பட்டது. ஆனால் அவரது குடும்பத்தினர் அவரது சாவில் மர்மம் இருப்பதாக தெரிவித்து வந்தனர்.

இதன் காரணமாக கம்ப்யூட்டர் ஆபரேட்டர் மரணம் பற்றி மீண்டும் விசாரிக்க தனிப்படை போலீசார் திட்டமிட்டுள்ளனர்.

இதையும் படியுங்கள்... தஞ்சம் புகுந்த ஹைத்தி அகதிகளை விமானங்களில் ஏற்றி திருப்பி அனுப்பும் அமெரிக்கா

ஊட்டி:

நீலகிரி மாவட்டத்தில் கடந்த சில வாரங்களாகவே காலை நேரங்களில் மிதமான வெயிலும், மாலை மற்றும் இரவு நேரங்களில் மழையும் பெய்து வருகிறது. அவ்வப்போது காற்று, இடி, மின்னலுடன் கூடிய பலத்த மழையும் பெய்கிறது.

ஊட்டி மற்றும் அதன் சுற்றுவட்டார பகுதிகளான காந்தல், சேரிங்கிராஸ், கலெக்டர் அலுவலகம் உள்ளிட்ட பகுதிகளில் காலை முதலே வானம் மேக மூட்டத்துடன் மப்பும், மந்தாரமுமாக காணப்பட்டது.

அவ்வப்போது லேசாக தூறி கொண்டே இருந்தது. சனி, ஞாயிறு விடுமுறையால் ஊட்டியில் ஏராளமான சுற்றுலா பயணிகள் குவிந்திருந்னர். அவர்கள் நேற்று காலை முதல் தூறலில் நனைந்தபடியே சுற்றுலா தலங்களை கண்டு ரசித்து வந்தனர்.

இந்த நிலையில் மதியத்திற்கு பிறகு ஊட்டி மற்றும் சுற்றுவட்டார பகுதிகளில் கனமழை கொட்டி தீர்த்தது.

சுமார் ஒரு மணி நேரம் இடைவிடாமல் பெய்த மழை காரணமாக ஊட்டியில் உள்ள சேரிங்கிராஸ் சாலை, கமர்சியல் சாலை, கூட்செட் சாலை கலெக்டர் அலுவலக சாலை, குன்னூர் ரோடு, மத்திய பஸ் நிலையம், எட்டின்ஸ் சாலை, படகு இல்ல சாலைகளில் தண்ணீர் பெருக்கெடுத்து ஓடியது. இதனால் வாகன ஓட்டிகள் அவதியடைந்தனர். தாழ்வான இடங்களில் தண்ணீர் தேங்கி நின்றது. இதேபோல் பலத்த மழைக்கு ஊட்டி சேரிங்கிராஸ் பகுதியில் உள்ள பெட்ரோல் பங்க் ஒன்றில் மழை நீர் புகுந்தது. தொடர்ந்து ஒரு மணி நேரம் கொட்டி தீர்த்த கனமழையால் சேரிங்கிராஸ் பகுதி முழுவதும் தண்ணீர் தேங்கி அந்த பகுதியே வெள்ளக்காடாக காட்சியளித்தது.

தொடர் மழையால் ஊட்டி மார்க்கெட்டுக்கு காய்கறி வாங்க, விற்க வந்த பொதுமக்களும், வியாபாரிகளும் சிரமம் அடைந்தனர். மழையில் நனையாமல் இருக்க பொதுமக்கள் ஆங்காங்கே உள்ள பஸ் நிறுத்தம், ஒதுக்குப்புறமான இடங்களில் ஒதுங்கி நின்றனர்.

பலத்த மழை பெய்து கொண்டிருந்த போதும் ஊட்டிக்கு வந்திருந்த சுற்றுலா பயணிகள் தாவரவியல் பூங்கா, ரோஜா பூங்கா உள்ளிட்ட சுற்றுலா தலங்களை குடைகளை பிடித்தபடி கண்டு ரசித்தனர்.

இதேபோல் கூடலூர் பகுதிகளிலும் தொடர்ந்து மழை பெய்து வருகிறது. தொடர் மழை காரணமாக கூடலூர் சுற்றுவட்டார பகுதிகளில் பயிரிடப்பட்டுள்ள தேயிலை மகசூல் பாதிப்படைந்துள்ளது. இதனால் விவசாயிகள் கவலை அடைந்துள்ளனர். 

குன்னூர்:

நீலகிரி மாவட்டம் குன்னூர் அருகே உள்ள கரோலினா பகுதியில் 200-க்கும் மேற்பட்ட குடியிருப்புகள் உள்ளன. இங்கு தேயிலை தோட்ட தொழிலாளர்கள் அதிகளவில் வசித்து வருகின்றனர்.

இந்த பகுதியையொட்டி ஏராளமான தேயிலை தோட்டங்களும், வனப்பகுதியும் உள்ளது. இதனால் அடிக்கடி காட்டெருமை, கரடி உள்ளிட்ட வனவிலங்குகள் குடியிருப்பு பகுதிக்குள் புகுந்து அட்டகாசத்தில் ஈடுபடுவதை வழக்கமாக வைத்துள்ளது.

இந்த நிலையில் கடந்த சில மாதங்களாக அந்த பகுதியில் உள்ள வீடுகளில் வளர்க்க கூடிய நாய், கோழி, ஆடு உள்ளிட்ட விலங்குகள் இரவு நேரத்தில் திடீர் திடீரென காணமால்போவது வாடிக்கையாக இருந்தது. இதனால் மக்களுக்கு சந்தேகம் ஏற்பட்டது.

இதையடுத்து அப்பகுதி பொதுமக்கள் அந்த பகுதியில் உள்ள ஒரு கடையில் பொருத்தப்பட்டிருந்த கண்காணிப்பு காமிரவில் பதிவாகி இருந்த காட்சிகளை ஆய்வு செய்தனர்.

அப்போது அதில், இரவு நேரத்தில் சிறுத்தை ஒன்று தேயிலை தோட்டம் வழியாக குடியிருப்பு பகுதிக்குள் வருவதும், நீண்ட நேரமாக அங்கேயே சுற்றி திரியும் சிறுத்தை, பின்னர் வீட்டில் வளர்க்க கூடிய செல்லப்பிராணிகளை வாயால் கவ்வி செல்லும் காட்சிகளும் பதிவாகி இருந்தது.

காட்டெருமை, கரடிகளின் நடமாட்டம் மட்டுமே இருப்பதாக நினைத்த மக்களுக்கு சிறுத்தை இரவில் சுற்றி திரிவது அதிர்ச்சியை ஏற்படுத்தியுள்ளது.

இதுகுறித்து அவர்கள் வனத்துறையினருக்கு தகவல் கொடுத்தனர். வனத்துறையினர் விரைந்து வந்து கண்காணிப்பு பணியை தீவிரப்படுத்தியுள்ளனர். இதற்கிடையே தங்கள் பகுதியில் சுற்றி திரியும் சிறுத்தையால் மக்களுக்கு ஆபத்து ஏற்படும் முன்பு கூண்டு வைத்து பிடிக்க வேண்டும் என அப்பகுதி மக்கள் கோரிக்கை விடுத்துள்ளனர்.

கூடலூர்:

நீலகிரி மாவட்டம் அதனை சுற்றியுள்ள வனப்பகுதிகளில் காட்டு யானைகள் அதிகளவில் வசித்து வருகின்றன. இவை அவ்வப்போது உணவு மற்றும் தண்ணீர் தேடி வனத்தை விட்டு வெளியேறி தேயிலை தோட்ட பகுதிகளில் சுற்றி திரிகின்றன. சில நேரங்களில் குடியிருப்பு பகுதிக்குள்ளும் புகுந்து அட்டகாசத்தில் ஈடுபட்டு வருகிறது. இதனை தடுக்க வனத்துறையினர் தீவிர நடவடிக்கை எடுத்து வருகின்றனர்.

ஊட்டியில் இருந்து மாயாறு பகுதிக்கு தினந்தோறும் அரசு பஸ் ஒன்று இயக்கப்பட்டு வருகிறது. இன்று காலை 8.30 மணியளவில் ஊட்டியில் இருந்து மாயாறுக்கு அரசு பஸ் ஒன்று 10-க்கும் மேற்பட்ட பயணிகளுடன் புறப்பட்டது.

இந்த பஸ் மசினகுடி அடுத்த அடர்ந்த வனப்பகுதி வழியாக சென்ற போது 3 காட்டு யானைகள் அந்த சாலையை மறித்து கொண்டு நின்றிருந்தன.

இதனை பார்த்ததும் பஸ் டிரைவர் சிறிது தூரத்திலேயே பஸ்சை நிறுத்தி விட்டார். அப்போது அந்த வழியாக ஒரு மோட்டார் சைக்கிள் வந்தது. யானை நிற்பது தெரியாமல் வந்த வாகனத்தை யானை லேசாக தட்டி விட்டது. அதிர்ஷ்டவசமாக அவர் அங்கிருந்து தப்பியோடி உயிர் பிழைத்தார்.

சிறிது நேரத்தில் 3 யானைகளில் 2 யானைகள் வனப்பகுதிக்குள் சென்று விட்டது. ஒரு யானை மட்டும் செல்லாமல் சாலையிலேயே நின்று பயணிகளை அச்சுறுத்தி வந்தது.

திடீரென அந்த யானை ஆக்ரோ‌ஷத்துடன் அரசு பஸ்சை நோக்கி வேகமாக வந்தது.

இதனால் பஸ்சில் டிரைவர், கண்டக்டர் பயணிகள் உள்பட பயணிகள் அனைவரும் அச்சம் அடைந்து கூச்சலிட்டனர். சிறிது நேரம் அந்த பகுதியிலேயே சுற்றி திரிந்த யானை பின்னர் அங்கிருந்து அடர்ந்த வனத்திற்குள் சென்று விட்டது. அதன்பின்னரே பயணிகள் நிம்மதி பெருமூச்சு விட்டனர். அரசு பஸ்சை காட்டு யானை வழிமறித்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது.