நீலகிரி

கூடலூர்:

தேனி, திண்டுக்கல் உள்பட 17 மாவட்டங்களில் கன மழை பெய்யும் என வானிலை ஆராய்ச்சி மையம் அறிவித்தது. அதன்படி நேற்று பகல் பொழுதில் தேனி மாவட்டத்தில் வெயில் சுட்டெரித்தபோதும் மாலை நேரத்தில் கருமேகங்கள் சூழ்ந்து மழை பெய்தது. சாரலாக தொடங்கிய மழை விடிய விடிய கொட்டியது. இதனால் வெப்பம் தணிந்து குளிர்ச்சியான சூழல் ஏற்பட்டது. நீண்ட நாட்களுக்கு பிறகு தொடர்ந்து மழை பெய்தது பொதுமக்கள் மற்றும் விவசாயிகளுக்கு மகிழ்ச்சியை ஏற்படுத்தி உள்ளது.

முல்லைப்பெரியாறு அணையின் நீர்மட்டம் 127.55 அடியாக உள்ளது. 686 கன அடி நீர் வருகிறது. அணையில் இருந்து 1300 கன அடி நீர் திறக்கப்படுகிறது. இன்று முதல் போடி, உத்தமபாளையம் பகுதி பாசனத்திற்காக 95 கன அடி தண்ணீர் திறந்துவிடப்படுகிறது. 15 நாட்கள் திறக்கப்படும் தண்ணீர் மூலம் சுமார் 4,794 ஏக்கர் விவசாய நிலங்கள் பாசன வசதி பெறுகிறது.

வைகை அணையின் நீர்மட்டம் 53.05 அடியாக உள்ளது. 1048 கன அடி நீர் வருகிறது. நேற்று வரை 1819 கன அடி நீர் திறக்கப்பட்டது. இன்று காலை 150 கன அடி குறைக்கப்பட்டு 1669 கன அடி நீர் மதுரை மாநகர குடிநீர் மற்றும் பாசனத்திற்காக திறக்கப்படுகிறது.

மஞ்சளாறு அணையின் நீர்மட்டம் 55 அடி. சோத்துப்பாறை அணையின் நீர்மட்டம் 119.72 அடியாக உள்ளது. வரத்து இல்லாத நிலையில் 3 கன அடி நீர் திறக்கப்படுகிறது.

பெரியாறு 10, தேக்கடி 18, கூடலூர் 17.5, சண்முகாநதி அணை 7.2, உத்தமபாளையம் 11.3, வீரபாண்டி22, வைகை அணை 14.6, மஞ்சளாறு 15, மருதாநதி 20, சோத்துப்பாறை 10, கொடைக்கானல் 8.6 மி.மீ. மழை அளவு பதிவாகி உள்ளது.

ஊட்டி:

நீலகிரி மாவட்டம் கோத்தகிரி அடுத்த கொடநாடு பங்களாவில் கடந்த 2017-ல் நடந்த கொலை, கொள்ளை தொடர்பாக சயான், வாளையார் மனோஜ் உள்பட 10 பேர் கைது செய்யப்பட்டனர்.

மனோஜை தவிர மற்ற அனைவரும் ஜாமீனில் வெளியில் உள்ள நிலையில் கொடநாடு வழக்கில் மறு விசாரணை கோரப்பட்டது. கோர்ட்டின் அனுமதியின் படி நடந்த மறுவிசாரணையில் முதல் ஆளாக சயான் போலீசில் ஆஜராகி மறு வாக்குமூலம் அளித்தார்.

இதில் முக்கிய பிரமுகர்கள் சிலரின் பெயரையும் அவர் தெரிவித்ததாக கூறப்பட்டது. அவரது மறுவாக்குமூலத்திற்கு பின்பே கொடநாடு வழக்கு சூடுபிடிக்க தொடங்கியது.

இதையடுத்து மாவட்ட போலீஸ் சூப்பிரண்டு ஆஷிஷ் ராவத் உத்தரவுப்படி ஏ.டி.எஸ்.பி கிருஷ்ணமூர்த்தி மேற்பார்வையில் 5 தனிப்படைகள் அமைக்கப்பட்டு விசாரணை நடந்தது. இதற்கிடையே இந்த வழக்கில் மேல் விசாரணை நடத்த வேண்டி இருப்பதால் கடந்த மாதம் 2-ந் தேதி வழக்கு விசாரணைக்கு வந்த போது போலீசார் 4 வார கால அவகாசம் கேட்டது. அதற்கு கோர்ட்டு அனுமதி அளித்தது.

இதையடுத்து தனிப்படையினர் கடந்த ஒரு மாதத்திற்கும் மேலாக முக்கிய குற்றவாளியான சாலை விபத்தில் இறந்த கனகராஜின் சகோதரர் தனபால், கனகராஜ் மனைவி, நண்பர்கள், வழக்கில் தொடர்புடைய சம்சீர் அலி, மனோஜ்சாமி, சந்தோஷ் சாமி, சதீ‌ஷன், பிஜின்குட்டி, எஸ்டேட் மேலாளர் நடராஜன், தற்கொலை செய்து கொண்ட கம்ப்யூட்டர் ஆபரேட்டர் தினேசின் தந்தை, தாய், சகோதரி அரசு சாட்சிகள் என பலரிடமும் விசாரணை நடத்தி, அவர்கள் அளித்த தகவல்களை வாக்கு மூலமாக பதிவு செய்து கொண்டனர்.

மேற்கு மண்டல ஐ.ஜி. சுதாகரும் ஊட்டியிலேயே முகாமிட்டு குற்றம் சாட்டப்பட்ட நபர்களிடம் நேரில் விசாரணை மேற்கொண்டார். மேலும் எஸ்டேட்டில் வேலை பார்த்த நபர்கள், அவர்களது வீடுகளுக்கு சென்று விசாரித்தார்.


இந்த நிலையில் போலீசாருக்கு கோர்ட்டு வழங்கிய கால அவகாசம் இன்றுடன் முடிவடைகிறது. இதையடுத்து நாளை ஊட்டி மாவட்ட அமர்வு நீதிமன்றத்தில் கொடநாடு வழக்கு விசாரணைக்கு வருகிறது.

அப்போது குற்றம் சாட்டப்பட்ட அனைவரும் நேரில் ஆஜராவார்கள் என எதிர்பார்க்கப்படுகிறது.

மேலும் போலீசார் தாங்கள் இதுவரை மேற்கொண்ட விசாரணையில் கிடைத்த அனைத்து தகவல்களையும் அறிக்கையாக தயாரித்து வைத்துள்ளதாக கூறப்படுகிறது. இதனை நாளை அவர்கள் கோர்ட்டில் தாக்கல் செய்யலாம் எனவும் எதிர்ப்பார்க்கப்படுகிறது. அல்லது மேற்கொண்டு விசாரணை நடத்த காலஅவசாகம் கேட்கலாம் எனவும் தெரிகிறது.

ஊட்டி:

நீலகிரி மாவட்டத்தில் மொத்த மக்கள் தொகை 7 லட்சத்து 24 ஆயிரத்து 748 ஆகும். இதில் 18 வயதுக்கு மேற்பட்டவர்கள் 5 லட்சத்து 21 ஆயிரத்து 60 பேர் உள்ளனர். கொரோனா பாதித்தவர்களை தவிர்த்து 18 வயதுக்கு மேல் தகுதி வாய்ந்த அனைவருக்கும் முதல் டோஸ் செலுத்தப்பட்டது. தொடர்ந்து அனைவருக்கும் 2-வது டோஸ் செலுத்தும் பணி தீவிரமாக நடந்து வருகிறது. முழு ஊரடங்கு தளர்வை தொடர்ந்து கடந்த மாதம் 23-ந் தேதி முதல் அனைத்து சுற்றுலாத் தலங்களும் திறக்கப்பட்டன. வெளிமாநிலங்களில் இருந்து வர கொரோனா நெகட்டிவ் சான்றிதழ் அல்லது 2 டோஸ் தடுப்பூசி கட்டாயம் என்று கட்டுப்பாடுகள் விதிக்கப்பட்டது.

பின்னர் இந்த கட்டுப்பாடுகள் தளர்த்தப்பட்டு நெகட்டிவ் சான்றிதழ் இன்றி வரலாம் என்று அறிவிக்கப்பட்டது. தற்போது நீலகிரியில் கொரோனா பாதிப்பு குறைவாக உள்ள சூழ்நிலையில், வெளியிடங்களில் இருந்து வரும் சுற்றுலாப் பயணிகளால் தொற்று பரவும் அபாயம் உள்ளது. இதை கருத்தில் கொண்டு சுற்றுலா தலங்களுக்கு வரும் தடுப்பூசி செலுத்தாத சுற்றுலாப் பயணிகளுக்கு தடுப்பூசி செலுத்தும் முகாம்கள் செயல்பட தொடங்கி உள்ளது.

அதன்படி ஊட்டி அரசு தாவரவியல் பூங்கா, படகு இல்லம், குன்னூர் சிம்ஸ் பூங்கா, டால்பின் நோஸ் ஆகிய இடங்களில் சுற்றுலா பயணிகளுக்கு சுகாதார குழுவினர் முகாமிட்டு கொரோனா தடுப்பூசி செலுத்தி வருகின்றனர். முதல் மற்றும் 2-வது டோஸ் செலுத்தாதவர்கள் தங்களது விவரங்களை பதிவு செய்து செலுத்திக் கொள்ளலாம். இதுகுறித்து சுகாதாரத் துறையினர் கூறும்போது, சுற்றுலா பயணிகள் மூலம் உள்ளூர் மக்கள், சுற்றுலாத் தலங்களில் பணிபுரிபவர்கள் மற்றும் வியாபாரிகளுக்கு கொரோனா பரவலை தடுக்க முன்னெச்சரிக்கை நடவடிக்கை எடுக்கப்பட்டு இருக்கிறது.

அங்கு தடுப்பூசி முகாம்கள் அமைக்கப்பட்டு, தடுப்பூசி இருப்பை பொறுத்து தினமும் செலுத்த நடவடிக்கை எடுக்கப்படும். சுற்றுலா பயணிகள் மட்டுமின்றி தடுப்பூசி செலுத்தாத பிற மக்களும் போட்டுக்கொள்ளலாம். நீலகிரியில் இதுவரை 2 லட்சத்து 4 ஆயிரத்து 348 பேருக்கு 2-வது டோஸ் செலுத்தப்பட்டு உள்ளது என்றனர்.

ஊட்டி:

ஊட்டி அரசு கலைக் கல்லூரியில் பணியாற்றும் விரிவுரையாளர் ஒருவருக்கு கொரோனா தொற்று நேற்று முன்தினம் உறுதி செய்யப்பட்டது. இதையடுத்து அந்த விரிவுரையாளர் சென்று வந்த வகுப்புகளில் படித்து வந்த 140-க்கும் மேற்பட்ட மாணவ, மாணவிகளுக்கு கொரோனா பரிசோதனை மேற்கொள்ளப்பட்டுள்ளது.

இதற்கான முடிவுகள் வெளிவராத நிலையில் ஊட்டி அரசு கலைக்கல்லூரிக்கு விடுமுறை அறிவிக்கப்பட்டுள்ளது.

அதேபோல ஊட்டியில் கலெக்டர் அலுவலகம் அருகே உள்ள ஒரு அரசு உதவி பெறும் பள்ளியில் பணியாற்றும் ஒரு ஆசிரியர், 5 மாணவர்களுக்கு கொரோனா தொற்று உறுதிப்படுத்தப்பட்டது.

இதையடுத்து அந்த பள்ளிக்கும் வெள்ளிக்கிழமை வரை விடுமுறை அறிவிக்கப்பட்டுள்ளது. மேலும் ஊட்டியில் உள்ள ஒரு தனியார் சி.பி.எஸ்.இ பள்ளியில் 2 மாணவர்களுக்கு கொரோனா தொற்று உறுதியானது. அந்த பள்ளிக்கு நாளை வரை விடுமுறை அறிவிக்கப்பட்டுள்ளது.

மஞ்சூரில் உள்ள அரசு மேல்நிலைப் பள்ளியில் படிக்கும் 2 மாணவர்களுக்கு கொரோனா தொற்று உறுதிப்படுத்தப்பட்டு உள்ளது. குன்னூர் வட்டாரத்தில் மேலும் 2 தனியார் பள்ளிகளுக்கும் விடுமுறை அறிவிக்கப்பட்டுள்ளது.

இதையடுத்து அனைத்து பள்ளி மற்றும் கல்லூரி வகுப்பறைகளில் கிருமி நாசினி தெளிக்கப்பட்டது.

ஊட்டி:

ஆண்டுதோறும் செப்டம்பர் 27-ந் தேதி உலக சுற்றுலா தினமாக கடைபிடிக்கப்பட்டு வருகிறது. நடப்பாண்டில் சமூக வளர்ச்சிக்கு சுற்றுலா என்ற கருப்பொருளை மையமாக கொண்டு உலக சுற்றுலா தினம் நேற்று கொண்டாடப்பட்டது. கொரோனா பாதிப்பு காரணமாக ஆண்டுதோறும் கோடை சீசனையொட்டி ஊட்டி படகு இல்லத்தில் சுற்றுலா பயணிகளுக்காக நடைபெறும் படகு போட்டி ரத்து செய்யப்பட்டது. 2 ஆண்டுகளுக்கு பின்னர் தமிழ்நாடு சுற்றுலா வளர்ச்சி கழகம் சார்பில், உலக சுற்றுலா தினத்தை முன்னிட்டு படகு போட்டி நேற்று நடைபெற்றது.

ஆண்கள் இரட்டையர், கலப்பு இரட்டையர் ஆகிய 2 பிரிவுகளில் போட்டி நடத்தப்பட்டது. இதில் வெளிமாநிலங்கள், பிற மாவட்டங்களில் இருந்து வந்த சுற்றுலா பயணிகள் ஆர்வமுடன் கலந்துகொண்டனர். படகு போட்டியை கலெக்டர் இன்னசென்ட் திவ்யா கொடியசைத்து தொடங்கி வைத்தார். சுற்றுலா பயணிகள் மிதி படகுகளில் குறிப்பிட்ட எல்லை வரை வேகமாக சென்று கடந்தனர். 2-வது பிரிவு போட்டியின் போது கொட்டும் மழையின் நடுவே நனைந்தபடி சுற்றுலா பயணிகள் படகில் சென்றனர். ஆண்கள் இரட்டையர் பிரிவில் ஊட்டியை சேர்ந்த திலீப், சுவாமிநாதன் முதல் இடம் பிடித்தனர்.

ஊட்டியை சேர்ந்த மற்ற 2 பேர் 2-வது இடம், கேரளா மாநிலம் திருச்சூரை சேர்ந்த பிரசாத், சனோக் 3-வது இடத்தை பிடித்தனர். அவர்களுக்கு கலெக்டர் நினைவு பரிசுகளை வழங்கினார். கலப்பு இரட்டையர் பிரிவில் சென்னையை சேர்ந்த ராகவேந்திரன், பவானி ஆகியோருக்கு முதல் பரிசு, கோவையை சேர்ந்த சாகுல் ஹமீது, பால்சிஸ் 2-ம் பரிசு, கேரளாவைச் சேர்ந்த பிரவீன், திசா ஆகியோருக்கு 3-ம் பரிசு வழங்கப்பட்டது. உலக சுற்றுலா தினத்தையொட்டி பாரம்பரிய உணவு திருவிழா நடந்தது. இதில் ஊட்டச்சத்து உணவுகள் காட்சிக்கு வைக்கப்பட்டு இருந்தன.

மேலும் தோடர், படுகர் இன மக்களின் நடனம் நடந்தது. உலக சுற்றுலா தினத்தையொட்டி ஊட்டி அரசு கலைக் கல்லூரி மாணவ-மாணவிகளுக்கு கட்டுரை, ஓவியப் போட்டிகள் நடத்தப்பட்டது இதில் 3 இடங்களை பிடித்தவர்களுக்கு பரிசுகள் வழங்கப்பட்டன. நிகழ்ச்சியில் சுற்றுலா வளர்ச்சி கழக மண்டல மேலாளர் வெங்கடேசன், மாவட்ட சுற்றுலா அலுவலர் உமா சங்கர், ஊட்டி படகு இல்ல மேலாளர் சாம்சன் மற்றும் ஊழியர்கள் கலந்துகொண்டனர். படகு போட்டியில் சுற்றுலா பயணிகள் பங்கேற்று குதூகலம் அடைந்தனர்.

கூடலூர்:

தமிழகத்தில் கொரோனா தொற்று குறைந்து விட்டதால் 9-ம் வகுப்பு முதல் பிளஸ் 2 வரையில் பள்ளிக்கூடங்களும் மற்றும் கல்லூரிகள் திறக்கப்பட்டுள்ளது. இதனால் மாணவர்கள் தினமும் பள்ளிக்கூடம், கல்லூரிகளுக்கு சென்று வீடு திரும்புகின்றனர். வகுப்பறைகளில் அரசின் வழிகாட்டு நெறிமுறைகளை பின்பற்றினாலும் வீட்டிலிருந்து பள்ளிக்கூடங்களுக்கு பஸ்கள் மற்றும் பிற வழிகளில் சென்று வரும் போது சமூக இடைவெளியை கடைபிடிக்க முடியாத நிலை ஏற்பட்டு வருகிறது.

இதையொட்டி சில மாணவர்களுக்கு பாதிப்பு ஏற்பட்டு வருகிறது. கூடலூரில் கடந்த வாரம் தனியார் பள்ளிக்கூட நிர்வாகிக்கு கொரோனா தொற்று உறுதி செய்யப்பட்டது.

இதைத் தொடர்ந்து பள்ளி கட்டிடங்கள் மற்றும் வகுப்பறைகளில் சுகாதாரத்துறையினர் கிருமி நாசினி தெளித்தனர். தொடர்ந்து மாணவ- மாணவிகள் மற்றும் ஆசிரியர்களிடம் மாதிரி சேகரிக்கப்பட்டு பரிசோதனைக்கு அனுப்பப்பட்டது. பின்னர் பள்ளிக்கூடம் மூடப்பட்டது.

இதன் பரிசோதனை அறிக்கையில் வேறு மாணவர்கள் ஆசிரியர்களுக்கு வைரஸ் தொற்று பாதிப்பு உறுதி செய்யப்படவில்லை. இதைத் தொடர்ந்து தனியார் பள்ளிக்கூடம் மீண்டும் திறக்கப்பட்டுள்ளது. இந்த நிலையில் கூடலூர் செம்பாலா பகுதியில் செயல்பட்டு வரும் தனியார் பள்ளிக்கூட மாணவி ஒருவருக்கு வைரஸ் தொற்று நேற்று கண்டறியப்பட்டது. இதையொட்டி சுமார் 750-க்கும் மேற்பட்ட மாணவ- மாணவிகளிடம் பரிசோதனை மேற்கொள்ளப்பட்டது.

ஊட்டி:

நீலகிரி மாவட்டம் கூடலூர் அடுத்துள்ள ஸ்ரீமதுரை ஊராட்சிக்கு உட்பட்ட பல்வேறு கிராமங்களில் கடந்த சில மாதங்களாக ஒற்றை புலியின் நடமாட்டம் அதிகரித்துள்ளது. இதுவரை 30-க்கும் மேற்பட்ட மாடுகளையும், 2 மனிதர்களையும் அந்த புலி அடித்து கொன்றுள்ளது.

தொடர்ந்து வீட்டு விலங்குகள் மற்றும் மனிதர்களை தாக்கி வரும் புலியை கூண்டு வைத்து பிடித்து அடர்ந்த வனப்பகுதிக்குள் விட வேண்டும் என அப்பகுதி மக்கள் தொடர் போராட்டத்தில் ஈடுபட்டு வருகின்றனர்.

நேற்று முன்தினம் கூட ஸ்ரீமதுரை மற்றும் சுற்றுவட்டார கிராமங்களை சேர்ந்த பொதுமக்கள் கன்றுகுட்டியின் உடலை வனத்துறை அலுவலகம் முன்பு போட்டு ஆர்ப்பாட்டம் நடத்தினர். உடனடியாக கூண்டு வைத்து புலியை பிடிக்க வேண்டும் என கோ‌ஷம் எழுப்பினர்.

போராட்டத்தில் ஈடுபட்டவர்களிடம் வனத்துறையினர் பேச்சுவார்த்தை நடத்தி புலியை பிடிக்க கூண்டு வைப்பதாக உறுதி அளித்தனர்.

அதன்படி நேற்று அதிகாலை மண்வயல் அடுத்த அம்பலமூலா பகுதியில் கூண்டு வைத்து அதனுள் இறந்த கன்றுகுட்டியை வைத்து புலியின் நடமாட்டத்தை கண்காணித்து வருகின்றனர்.

இதுதவிர ஸ்ரீமதுரை மற்றும் அதனை சுற்றியுள்ள கிராமங்களில் கடந்த 2 நாட்களுக்கும் மேலாக வனத்துறையினர் தீவிர ரோந்து பணியில் ஈடுபட்டு வருகின்றனர்.

இந்த நிலையில் புலியின் நடமாட்டத்தை அறிந்து கொள்ளும் வகையில் அந்த பகுதிகளில் தானியங்கி கேமராக்கள் பொருத்த வனத்துறையினர் முடிவு செய்தனர்.

இதையடுத்து ஸ்ரீமதுரை, மண்வயல், அம்பலமூலா உள்ளிட்ட சுற்றுப்புற கிராமங்களில் புலி வந்து செல்லக் கூடியதாக 20 இடங்களை தேர்வு செய்து, அங்கு 40 தானியங்கி கேமராக்களை வனத்துறையினர் பொருத்தியுள்ளனர். தொடர்ந்து கேமராக்களில் பதிவாக கூடிய காட்சிகளையும், புலியின் நடமாட்டத்தையும் கண்காணித்து வருகின்றனர்.

புலி நடமாட்டம் இருப்பதால் குறிப்பிட்ட கிராமங்களை சேர்ந்த மக்கள் தனியாக எங்கும் செல்ல வேண்டாம் என்றும், இரவு நேரங்களில் வெளியில் செல்வதை தவிர்க்க வேண்டும் எனவும், பாதுகாப்பாக இருக்கவும் வனத்துறையினர் அறிவுறுத்தியுள்ளனர்.

புலி நடமாட்டம் மட்டுமின்றி இந்த பகுதியில் விநாயகன் என்ற யானையும் ஊருக்குள் புகுந்து வீடுகளை சேதப்படுத்தி வருகிறது. இதையடுத்து இந்த யானையையும் டிரோன் கேமரா மூலம் வனத்துறையினர் கண்காணித்தனர். அப்போது விநாயகன் யானை நெல்லிக்கரை கிராமத்தை ஒட்டிய வனப்பகுதியில் இருப்பு தெரியவந்தது.

இதையடுத்து யானை அகழியைக் கடந்து ஊருக்குள் வரும் பகுதிகளில் கும்கி யானைகளை நிறுத்தி காட்டு யானையை ஊருக்குள் வரவிடாமல் தடுக்கும் பணி நடந்து வருகிறது.