நாகப்பட்டினம்

நாகப்பட்டினம்:

நாகை மாவட்டம், நாகூர் போலீஸ் நிலைய சப்-இன்ஸ்பெக்டர் மோகன்ராஜ் மற்றும் போலீசார் நேற்று ரோந்துப் பணியில் ஈடுபட்டபோது நாகூர் வெட்டாறு பாலம் அருகில் 2 பேர் மோட்டார் சைக்கிளில் வந்தனர்.

போலீசார் அவர்களை நிறுத்தி சோதனை செய்யும்போது பாண்டி சாராயம் கடத்தி வந்தது தெரியவந்தது. இதையடுத்து சாராயத்தை பறிமுதல் செய்தனர்.

விசாரணையில் பனங்குடி சன்னமங்கலம் ஓடை மேடு தெருவை சேர்ந்த ராஜு (வயது 30) அதே பகுதி செவ்வந்தி வீதி தெருவை சேர்ந்த ரஞ்சித் (22) என்பதும் தெரியவந்தது இது குறித்து வழக்குப்பதிவு செய்த போலீசார் 2 பேரையும் கைது செய்தனர்

தொடர்ந்து வாழ ஒக்கூர் பகுதியில் நடத்திய சோதனையில் பாண்டி சாராயம் கடத்தி வந்த திருவாரூர் மாவட்டம் வலங்கைமான் வடக்கு தெரு ஆனந்தகுமார் (25) அதே பகுதி பெருக்கு தெருவைச் சேர்ந்த சுமன் (24) ஆகிய 2 பேரையும் கைது செய்து 110 லிட்டர் பாக்கெட் சாராயத்தையும் பறிமுதல் செய்தனர்.

வேதாரண்யம்:

வேதாரண்யம் தாலுக்கா நாலுவேதபதி, கோவில்பத்து வெள்ளம்பள்ளம், வேட்டைக்காரனிருப்பு, மணக்குடி உள்ளிட்ட 10-க்கும் மேற்பட்ட கிராமங்களில் பனை மற்றும் தென்னை மரங்கள் லட்சக்கணக்கில் இருந்தன. இவை அணைத்தும் கஜா புயலில் விழுந்து விட்டது.

இதனால் கோடையின் வெப்பத்தை தணிக்க பனைநுங்குகளையும் இளநீரையும் மக்கள் அதிகம் பயன்படுத்தும் வேளையில் அதற்கு தட்டுப்பாடு ஏற்பட்டுள்ளது. இதனால் கூடுதல் விலைகொடுத்து பனை நுங்கையும், இளநீரும் வாங்கி சாப்பிடுகின்றனர்.

கஜா புயலின் கோரதாண்டவத்தால் பனை, தென்னை போன்ற மரங்கள் முற்றிலும் பாதிக்கப்பட்டது. இந்த கோடை வெப்பத்திலிருந்து தங்களை பாதுகாத்து கொள்ள அதிக அளவில் இயற்கையாக இப்பகுதியில் கிடைக்கும் பனைநுங்கு மற்றும் இளநீரை விரும்பி சாப்பிடுகின்றனர். தற்போது பனைநுங்கு மற்றும் இளநீர் போதிய அளவு கிடைக்கவில்லை. இதனால் வெளியூரிலிருந்து வியாபாரிகள் இளநீர் மற்றும் பனைநுங்கை கொண்டு வந்து இளநீர் ரூ.40க்கும், பனைநுங்கு ரூ.10-க்கு மூன்றும் என விற்பனை செய்கிறார்கள்.

இயற்கையாக இப்பகுதியில் சிறுவர்கள் முதல் பெரியவர்கள் வரை இலவசமாக சாப்பிட்ட பனைநுங்கை தற்போது காசு கொடுத்து வாங்கி சாப்பிடும் நிலைக்கு தள்ளப்பட்டுள்ளனர். காசு கொடுத்தாலும் அதிக அளவில் இளநீர் மற்றும் நுங்கு கிடைக்காமல் ஏமாற்றம் அடைகின்றனர்.

சீர்காழி:

சீர்காழி அருகே வேட்டங்குடி ஊராட்சி கேவரோடை கிராமத்தில் தபல ஏக்கரில் முந்திரி தோப்புகள் உள்ளன.இந்த முந்திரி காட்டில் நேற்று மதியம் திடீரென தீப்பற்றியது. கடும் வெயிலால் தீ மளமளவென பரவியது.

இதுகுறித்து அப்பகுதி மக்கள் சீர்காழி தீயணைப்பு நிலையத்திற்கு தகவல் அளித்தனர்.தீயணைப்பு நிலைய வீரர்கள் விரைந்து சென்று சுமார் 3மணிநேரம் போராடி தீயை கட்டுப்படுத்தினர்.இந்த தீவிபத்தில் சுமார் 7ஏக்கரில் முந்திரி தோட்டமும், 160பனை மரங்களும் எரிந்து சாம்பலாயின. புதுப்பட்டினம் போலீசார் விசாரணை நடத்துகின்றனர்.

மயிலாடுதுறை:

நாகைமாவட்டம் மயிலாடுதுறை அருகே உள்ள வடமட்டம் கீழத்தெருவை சேர்ந்தவர் சுதாகர் (வயது 34). இவருக்கு சுருதி (23) என்ற மனைவியும் பாலசுதர்‌ஷன் (4) என்ற மகனும் சுதர்ஷினி என்ற பெண் குழந்தையும் உள்ளனர்.

கடந்த 21-ம் தேதி சுதாகர் தனது வீட்டிற்கு சென்றபோது பாலசுதர்‌ஷன் மட்டும் அழுதுகொண்டே இருந்துள்ளான். சுருதி மற்றும் சுதர்ஷினி ஆகிய இருவரையும் காணவில்லை. எங்கு தேடியும் கிடைக்கவில்லை. இதனால் அதிர்ச்சி அடைந்த சுதாகர் பாலையூர் போலீசில் புகார் அளித்தார். அதன்பேரில் பாலையூர் போலீசார் வழக்குப்பதிவுசெய்து விசாரணை செய்துவருகின்றனர்.

மயிலாடுதுறை அருகே உள்ள தத்தங்குடி கீழத்தெருவை சேர்ந்தவர் பிரவீன் (வயது 28). இவருக்கு அகல்யாதேவி (23) என்ற மனைவியும் ஹர்சன் என்ற ஆண் குழந்தையும் உள்ளனர். பிரவீன் வெளிநாட்டில் வேலை பார்த்து வருகிறார்.

கடந்த மாதம் 8-ம் தேதி மகன் ஹர்சனுடன் தாய் வீட்டிற்குச் செல்வதாகக்கூறி சென்ற அகல்யா தேவி மாயமாகி விட்டார். இதுபற்றி பிரவீனின் தாய் லலிதா பெரம்பூர் போலீசில் புகார் அளித்தார். அதன்பேரில் போலீசார் வழக்குப்பதிவு செய்து விசாரணை மேற்கொண்டுள்ளனர்.

வேதாரண்யம்:

நாகை மாவட்டம் வேதாரண்யம் கடற்பகுதியில் இருந்து மிக அருகாமையில் இலங்கை அமைந்துள்ளது. இதனால் அடிக்கடி கடல்வழியாக தங்கம் மற்றும் கஞ்சா கடத்தல் நடைபெற்று வருகிறது.

இந்நிலையில் கடந்த சில நாட்களுக்கு முன்பு இலங்கையில் பயங்கரவாதிகள் வெடிகுண்டு தாக்குதல் நடத்தினர். இதைதொடர்ந்து வேதாரண்யம் கடல்வழியாக பயங்கரவாதிகள் வரக்கூடும் என தகவல் வெளியானதால் அங்கு போலீசார் உஷார்படுத்தப்பட்டு தீவிர கண்காணிப்பில் ஈடுபட்டு வருகின்றனர்.

வேதராண்யம் கடலோர காவல்குழும டி.எஸ்.பி கலிதீர்த்தான், இன்ஸ்பெக்டர் ஜோதிராமலிங்கம் ஆகியோருக்கு வேதாரண்யம் பகுதியில் இருந்து இலங்கைக்கு படகில் கஞ்சா கடத்தப்பட இருப்பதாக ரகசிய தகவல் கிடைத்தது. அதன்பேரில் போலீசார் இன்று காலை வேதாரண்யம், ஆறுகாட்டுத்துறை உள்ளிட்ட மீனவ கிராமங்களில் அதிரடி சோதனை நடத்தினர்.

அப்போது ஆறுகாட்டுத்துறை கடற்கரை பகுதியில் கஞ்சாவுடன் பதுங்கியிருந்த வாலிபர் ஒருவர் சிக்கினார். அவரிடம் போலீசார் நடத்திய விசாரணையில் அவர் தஞ்சை மாவட்டம் தம்பிக்கோட்டை சுந்தரம் காலனியை சேர்ந்த செல்லதுரை மகன் பாலமுருகன் (வயது 32) என்பது தெரியவந்தது.

அவர் இலங்கைக்கு படகில் கடத்தி செல்ல வைத்திருந்த 17 கஞ்சா மூட்டைகளை போலீசார் பறிமுதல் செய்தனர். அதில் 34 கிலோ கஞ்சா இருந்தது.

இதுதொடர்பாக பாலமுருகனை போலீசார் கைது செய்து அவருடன் இந்த கடத்தலில் ஈடுபட இருந்த நபர்கள் யார்? யார்? என்பது குறித்து விசாரணை நடத்தி வருகின்றனர்.

வேதாரண்யம்:

வேதாரண்யம் அருகே உள்ள அண்டர்காடு கிராமத்தை சேர்ந்தவர் சுப்பிரமணியன் மகன் அருண் (வயது 35) இவருக்கு திருமணமாகி அமராவதி என்ற மனைவியும் 4 வயதில் ஒரு ஆண்குழந்தையும் உள்ளனர். சம்பவத்தன்று அருணுக்கும் அவரது குடும்பத்தினருக்கும் இடையே தகராறு ஏற்பட்டது. இதனால் அவரது மனைவி தாய் வீட்டுக்கு சென்று விட்டார். இதில் மனமுடைந்த அருண் தனது வீட்டை விட்டு வெளியே வந்து உடலில் மண்எண்ணெய் ஊற்றி தீ வைத்துக் கொண்டார்.

உடல்கருகிய அவரை அக்கம்பக்கத்தினர் மீட்டு சிகிச்சைக்காக வேதாரண்யம் அரசு மருத்துவ மனையில் சேர்த்தனர். பின்னர் அவர் மேல் சிகிச்சைக்காக திருவாரூர் அரசு மருத்துவ கல்லூரி மருத்துவமனையில் அனுமதிக்கப்பட்டார். அங்கு சிகிச்சை பலனின்றி அருண் இறந்தார். இதுகுறித்து வேதாரண்யம் போலீசார் வழக்குப் பதிவு செய்து விசாரணை நடத்தி வருகிறார்கள்.