நாகப்பட்டினம்

நாகப்பட்டினம்:

நாகை மாவட்டம் சீர்காழியை அடுத்த கண்டமங்கலம் கிராமத்தைச் சேர்ந்தவர் சாமிதுரை (வயது45) கார் டிரைவர். இவரது மனைவி ஜெயக்கொடி. இவர்களுக்கு 2 மகள்களும், ஒரு மகனும் உள்ளனர். அதே பகுதியைச் சேர்ந்தவர் சண்முகம்(40).இவரது மனைவி ராஜேஸ்வரி(36). இருதரப்பினருக்கும் இடையே குடிநீர் குழாய் அமைத்தது தொடர்பாக முன்விரோதம் இருந்து வந்தது. இந்நிலையில், சாமிதுரையிடம் கோபித்துக் கொண்டு, தனது தங்கை வீட்டுக்க ஜெயக்கொடி சென்று விட்டார். இதனால் வீட்டில் 2 குழந்தைகளை வைத்துக் கொண்டு சிரமப் பட்ட சாமிதுரை, நேற்று தன்மனைவியை திட்டிக் கொண்டிருந்தார்.

இதைக் கேட்ட ராஜேஸ்வரி, தன்னைத் தான் சாமிதுரை திட்டுவதாக நினைத்து அவரிடம் வாக்குவாதத்தில் ஈடுபட்டார். இதையடுத்து, சாமிதுரை தன் வயலுக்குச் சென்றுவிட்டார். பின்னர், அவர் வயலில் இருந்து திரும்பிய போது சண்முகமும், ராஜேஸ்வரியும் அவரை வழிறித்து தாக்கினர். இதில், சண்முகம் கத்தியால் குத்தியதில் சாமிதுரை படுகாய மடைந்தார். உடனே அருகிலிருந்தவர்கள் அவரை மீட்டு, சீர்காழி அரசு மருத்துவமனைக்கு கொண்டு சென்றனர். ஆனால் சாமிதுரை செல்லும் வழியிலேயே உயிரிழந்தார்.

இது குறித்து பாகசாலை போலீசார் வழக்குபதிவு செய்து சண்முகம், ராஜேஸ்வரி ஆகியோரை கைது செய்து விசாரணை நடத்தி வருகின்றனர்.

நாகப்பட்டினம்:

நாகை காடம்பாடி சவேரியார் கோவில் தெருவில் உள்ள ராணி என்பவரின் குடிசை வீட்டில் பகுருதீன் என்பவர் வசித்து வருகிறார். இந்த நிலையில் பகுருதீன் நேற்று வீட்டை பூட்டிவிட்டு வேலைக்கு சென்று விட்டார்.

நேற்று மதியம் வீட்டில் திடீரென தீப்பிடித்தது. இதைப்பார்த்த அக்கம் பக்கத்தினர் நாகை தீயணைப்பு நிலையத்துக்கு தகவல் தெரிவித்தனர். உடனே 2 தீயணைப்பு வாகனங்களில் வந்த தீயணைப்பு வீரர்கள் தண்ணீரைப் பீய்ச்சி அடித்து தீ மேலும் பரவாமல் தடுத்து அணைத்தனர்.

அதில் வீட்டில் இருந்து கட்டில், பீரோ உள்ளிட்ட வீட்டு உபயோகப் பொருட்கள் தீயில் எரிந்து சேதமடைந்தன. இதன் மதிப்பு ரூ.50 ஆயிரம் இருக்கலாம் என கூறப்படுகிறது.

இதுகுறித்து வெளிப்பாளையம் போலீசார் வழக்குப்பதிவு செய்து விசாரித்து வருகின்றனர்.

வேதாரண்யம்:

வேதாரண்யம் நகராட்சிக்குட்பட்ட சாமியார் குட்டையில் சுமார் 55 வயது மதிக்கத்தக்க முதியவர் உடல் மிதந்தது. இதுபற்றி கிடைத்த தகவலின் பேரில் கிராம நிர்வாக அலுவலர் சுரேஷ், போலீஸ் இன்ஸ்பெக்டர் செந்தில்குமரன் மற்றும் போலீசார் சம்பவ இடத்திற்கு விரைந்து சென்று, குட்டையில் மிதந்த முதியவர் உடலை மீட்டு கரைக்கு கொண்டு வந்தனர்.

இறந்த முதியவர் யார்? எந்த ஊரை சேர்ந்தவர்? என்பது தெரியவில்லை. இதுகுறித்து கிராம நிர்வாக அலுவலர் கொடுத்த புகாரின் பேரில் வேதாரண்யம் போலீசார் வழக்குபதிவு செய்து, முதியவர் உடலை கைப்பற்றி பிரேத பரிசோதனைக்கு வேதாரண்யம் அரசு மருத்துவமனைக்கு அனுப்பி வைத்து விசாரணை நடத்தி வருகின்றனர்.

நாகப்பட்டினம்:

15 ஆண்டு ஆகியும் சுனாமி சோகம் மாறவில்லை. சுனாமி 15-வது ஆண்டு நினைவு தினம் நேற்று கடைப்பிடிக்கப்பட்டது. இதில் உயிரிழந்தவர்களுக்கு ஏராளமானோர் கண்ணீர் மல்க அஞ்சலி செலுத்தினர்.

கடந்த 2004-ம் ஆண்டு டிசம்பர் 26-ந் தேதி ஏற்பட்ட சுனாமி பேரலை நாகை மாவட்டத்தில் ஆறாத வடுவை உண்டாக்கியது. இதில் 6 ஆயிரத்து 60 பேர் உயிரிழந்தனர். நீங்காத சோகத்தின் நினைவு நாள் 15-வது ஆண்டாக நேற்று நாகை மாவட்டம் முழுவதும் அனுசரிக்கப்பட்டது.

சுனாமி எனும் ஆழிப்பேரலையால் நாகை மாவட்டத்தின் 64 மீனவ கிராமங்கள் கடுமையாக பாதிக்கப்பட்டன. கடலையே கடவுளாக வழிபட்டு, நண்பனாக நினைத்து விளையாடி மகிழ்ந்த கடலோர மக்கள், அந்த கடலிலேயே தங்கள் உறவுகளை பறிகொடுத்த சோகத்தை ஒவ்வொரு ஆண்டும் நினைவுகூரும் வகையில் நாகை மாவட்ட கடலோர பகுதிகளில் தர்ப்பணம் செய்து கண்ணீர் மல்க அஞ்சலி செலுத்தினர். பின்னர் கடலோர பகுதிகளில் மெழுவர்த்தி ஏற்றி அஞ்சலி செலுத்தினர்.

நாகையை அடுத்த கீச்சாங்குப்பம் கிராமம் சார்பில் அங்குள்ள நினைவு சின்னத்தில் பொதுமக்கள் சார்பில் ஆத்மசாந்தி யாகம் வளர்க்கப்பட்டது. தொடர்ந்து கீச்சாங்குப்பம் பொதுமக்கள் நினைவு தூணில் மலர்தூவி அஞ்சலி செலுத்தினர். மேலும் கீச்சாங்குப்பம் ஊராட்சி ஒன்றிய நடுநிலைப்பள்ளி சார்பில் மாணவ- மாணவிகளின் மவுன ஊர்வலம் நடந்தது.

பின்னர் பள்ளியில், சுனாமியில் உயிரிழந்த மாணவ, மாணவிகளின் உருவப்படத்திற்கு மலர்தூவி குத்துவிளக்கு ஏற்றி வைத்து அஞ்சலி செலுத்தப்பட்டது. அதேபோல் அக்கரைப்பேட்டை மீனவ கிராமம் சார்பில் டாடா நகர் சுனாமி குடியிருப்பில் இருந்து மவுன ஊர்வலம் தொடங்கியது. இந்த ஊர்வலம் முக்கிய வீதிகளின் வழியாக சென்று அக்கரைப்பேட்டை கடற்கரையில் நிறைவடைந்தது. பின்னர் அங்குள்ள நினைவு தூணுக்கு மலர் தூவி அஞ்சலி செலுத்தப்பட்டது.

கிறிஸ்துமஸ் கொண்டாட வேளாங்கண்ணி வந்த சுற்றுலா பயணிகளில் ஏராளமானவர்கள் சுனாமியில் சிக்கி உயிரிழந்தனர். அவர்கள் நினைவாக ஆண்டுதோறும் வேளாங்கண்ணி கிழக்கு கடற்கரைச்சாலை அருகே அமைக்கப்பட்டுள்ள நினைவு தூணில் நேற்று அஞ்சலி செலுத்தப்பட்டது. முன்னதாக வேளாங்கண்ணி பஸ் நிலையத்தில் இருந்து பேராலய அதிபர் பிராபகர் தலைமையில் பொதுமக்கள் மவுன ஊர்வலமாக சென்று நினைவு தூணில் மலர் வளையம் வைத்து அஞ்சலி செலுத்தினர். பின்னர் மெழுகுவர்த்தி ஏற்றி பிரார்த்தனை செய்தனர்.

சுனாமி நினைவு நாளான நேற்று மீனவ பெண்கள் கடலை பார்த்து கதறி அழுதது கல் நெஞ்சையும் கரைய வைப்பதாகவே இருந்தது. சுனாமி பேரலை தாக்கி 15 ஆண்டுகள் கடந்து இருந்தாலும், மீனவர்கள் தங்களது உறவினர்களை இழந்த தாக்கதில் இருந்து இன்னும் மீளவில்லை என்றே சொல்லலாம்.

சீர்காழி:

சீர்காழி ஊராட்சியில் உள்ள 21 ஒன்றிய கவுன்சிலர்கள், 37 ஊராட்சி தலைவர்கள், 2 மாவட்ட ஊராட்சிக் குழு உறுப்பினர்கள், 309 ஊராட்சி உறுப்பினர்களுக்கான ஊரக உள்ளாட்சி தேர்தல் வரும் 27-ந் தேதி நடைபெறுகிறது. இதற்காக 192 வாக்குசாவடிகள் அமைக்கப்பட்டுள்ளன.

இதையொட்டி தேர்தல் முன்னேற்பாடுகள் குறித்து மாவட்ட கலெக்டர் பிரவீன் பி.நாயர் சீர்காழி ஊராட்சி ஒன்றிய அலுவலகத்திற்கு நேரில் வந்து ஆய்வு செய்தார்.

அனைத்து வாக்குசாவடிகளுக்கும் கொண்டு செல்லப்படும் வாக்கு சீட்டுக்கள், மை ஆகியவை தயார் நிலையில் உள்ளதா எனவும் மற்ற ஏற்பாடுகள் குறித்து அதிகாரிகளுடன் கேட்டறிந்தார்.

அப்போது சீர்காழி ஒன்றிய ஆணையர் ரெஜினா ராணி,வட்டார வளர்ச்சி அலுவலர் கஜேந்திரன்,மேலாளர் கலிராஜ், பொறியாளர்கள் முத்துக்குமார், தாரா ஆகியோர் உடனிருந்தனர்.

இதே போல் கொள்ளிடம் ஊராட்சி ஒன்றிய அலுவலகத்திலும் மாவட்ட கலெக்டர் பிரவீன்.பி.நாயர் தேர்தல் பணிகள் குறித்து ஆய்வு மேற்கொண்டார்.