புதுச்சேரி

புதுச்சேரி:

கொரோனா ஊரடங்கு தளர்த்தப்பட்டதையடுத்து புதுவை மாநிலத்திற்குள் தற்போது அரசு மற்றும் தனியார் பஸ்கள் இயக்கப்பட்டு வருகின்றன. இதேபோல் தமிழக அரசு பஸ்கள் மாநில எல்லை வரை வந்து செல்கின்றன. புதுவையில் இருந்து தமிழகத்திற்கு பஸ்களை இயக்க அனுமதிக்க வேண்டும் என்று தனியார் பஸ் உரிமையாளர்களும், பொதுமக்களும் கோரிக்கை விடுத்து வருகின்றனர். இது தொடர்பாக தமிழக அரசுக்கு முதல்-அமைச்சர் நாராயணசாமி கடிதம் எழுதியுள்ளார். அதிகாரிகள் பேச்சுவார்த்தை நடத்தி வருகின்றனர்.

கர்நாடக அரசு அனுமதி அளித்துள்ளதையடுத்து வருகிற 28-ந் தேதி முதல் புதுவையில் இருந்து பெங்களூருக்கு புதுவை அரசு பஸ்கள் இயக்கப்பட உள்ளது. இதற்கான முன்பதிவு தற்போது தொடங்கியுள்ளது. இந்த பஸ் புதுவையில் இருந்து இரவு 11 மணிக்கு புறப்படும். அந்த பஸ் பெங்களூருவில் இருந்து மதியம் 12.30 மணிக்கு புறப்படும்.

இந்த பஸ்சில் அரசின் உத்தரவுப் படி சமூக இடைவெளி கடைபிடிக்க வேண்டும் என்பதால் 33 பயணிகள் மட்டுமே அனுமதிக்கப்படுவார்கள். கட்டணமாக ரூ.275-ம், முன் பதிவு கட்டணமாக ரூ.25 என மொத்தம் ரூ.300 வசூலிக்கப்படும். இந்த பஸ்சில் பயணம் செய்ய புதுவை பஸ்நிலையத்தில் உள்ள முன்பதிவு மையம் மற்றும் ஆன்லைனில் பதிவு செய்து கொள்ளலாம்.

மேற்கண்ட தகவலை பி.ஆர்.டி.சி. நிர்வாகம் தெரிவித்துள்ளது.

புதுச்சேரி:

புதுச்சேரி அரசிடமிருந்து கடந்த 18-ந் தேதி முதல் 24-ந் தேதி வரை 49 கோப்புகள் கவர்னர் மாளிகைக்கு அனுப்பி வைக்கப்பட்டது. இதில் பெரும்பாலான கோப்புகளுக்கு கவர்னர் கிரண்பேடி ஒப்புதல் அளித்துள்ளார். அதன் விவரம் வருமாறு:-

மாநில தேர்தல் ஆணையராக ஓய்வுபெற்ற ஐ.எப்.எஸ். அதிகாரி ராய் தாமஸ் 3 ஆண்டுகளுக்கு நியமனம், புதுச்சேரி மாநில விளையாட்டு குழுவுக்கு ஊழியர்கள் சம்பளம் மற்றும் நிர்வாக செலவுகளுக்காக ரூ.1.52 கோடி நிதி ஒதுக்கீடு,

புதுச்சேரி தெற்கு போலீஸ் சூப்பிரண்டாக ஐ.பி.எஸ். அதிகாரி லோகேஷ்வரன் நியமனம், காரைக்கால் நகராட்சிக்கு கழிவுநீர் சுத்தம் செய்வதற்காக ரூ.76.70 லட்சம் ஒதுக்கீடு ஆகியவற்றுக்கு ஒப்புதல் அளித்துள்ளார்.

புதுச்சேரி செயலாக்க முகமை (பிஐஏ) இணை திட்ட இயக்குனர் ஆஷிஷ் கோயலுக்கு குடியிருப்பு ஒதுக்கீடு, தேசிய விளையாட்டுகளில் சாம்பியன் பட்டத்தை வெல்லும் பள்ளி குழுக்களுக்கு ரொக்கப்பரிசு வழங்குவதற்கான வழிமுறைகள் வெளியீடு, புதுச்சேரியில் 2020-2021-ம் ஆண்டிற்கு மின்சார தேவைகளுக்காக பல்வேறு மின்உற்பத்தி நிலையங்களிடம் இருந்து மின்சாரம் கொள்முதல் செய்ததற்காக ரூ.245.77 கோடி செலவு ஒப்புதல் அளித்துள்ளார்.

பிப்மேட் ஊழியர்களின் சம்பளத்திற்காக ரூ.9.15 கோடி நிதி ஒதுக்கீடு, புதுச்சேரி மகளிர் மற்றும் மாற்றுத்திறனாளிகள் மேம்பாட்டு கழக ஊழியர்களின் சம்பளம் மற்றும் நிர்வாக செலவுக்காக ரூ.13.47 கோடி ஒதுக்கீடு, புதுவை பொறியியல் கல்லூரி ஊழியர் சம்பளத்துக்காக ரூ.17.46 கோடி ஒதுக்கீடு, காரைக்கால் காமராஜர் பொறியியல் கல்லூரி ஊழியர் சம்பளத்துக்காக ரூ.3.16 கோடி ஒதுக்கீடு,

புதுச்சேரி ராஜீவ்காந்தி விளையாட்டு பள்ளி ஊழியர் சம்பளத்துக்காக ரூ.34.83 லட்சம் ஒதுக்கீடு, புதுச்சேரி புதுப்பிக்கவல்ல எரிசக்தி முகமை ஊழியர் சம்பளத்துக்காக ரூ.54.70 லட்சம் ஒதுக்கீடு, ஏ.எப்.டி.யில் 676 ஊழியர்களுக்கு பகுதி இழப்பீட்டுக்காக ரூ.6.65 கோடி வழங்குதல், ரூ.742 கோடி ஜி.எஸ்.டி. இழப்பீட்டுக்கு பதிலாக மத்திய அரசிடமிருந்து கடன்பெறுவது தொடர்பான கடிதம் உள்ளிட்ட பல கோப்புகளுக்கு கவர்னர் அனுமதி அளித்துள்ளார்.

இந்த தகவலை கவர்னரின் சிறப்பு அதிகாரி தேவநீதிதாஸ் தெரிவித்துள்ளார்.

காரைக்கால்:

காரைக்காலில் இருந்து 75 கடல் மைல் தூரத்தில் நேற்று முன்தினம் இரவு இந்திய எல்லையில், இலங்கை மீனவர்கள் 6 பேர், ஒரு விசைப்படகில் எல்லை தாண்டி மீன்பிடித்து கொண்டிருந்தனர். அப்போது ரோந்து பணியில் ஈடுபட்டிருந்த இந்திய கடலோர காவல் படையினர், அவர்களை விசாரித்தபோது இலங்கை மீனவர்கள் என தெரியவந்தது. எல்லைதாண்டி மீன்பிடித்த குற்றத்திற்காக 6 மீனவர்களையும் கைது செய்த இந்திய கடலோர காவல்படையினர், அவர்களின் படகையும் பறிமுதல் செய்து, அவர்களை காரைக்கால் தனியார் துறைமுகத்திற்கு நேற்று இரவு அழைத்து வந்தனர். 6 மீனவர்களிடம், இந்திய கடலோர காவல்படை உயர் அதிகாரிகள் விசாரணை நடத்தி வருகின்றனர்.

புதுச்சேரி:

புதுச்சேரி வில்லியனூர் அருகே கீழ்சாத்தமங்கலம் கிராமத்தில் வாத்து மேய்க்கும் தொழிலில் ஈடுபடுத்துவதற்காக ஒரு வீட்டில் பெண் சிறுமிகள் கொத்தடிமையாக அடைத்து வைக்கப்பட்டு இருப்பதாக குழந்தைகள் நல மையத்துக்கு தகவல் கிடைத்தது.

இதனை தொடர்ந்து குழந்தைகள் நலக்குழு தலைவர் ராஜேந்திரன் தலைமையில் அதிகாரிகள் அங்கு சென்று ஆய்வு செய்தனர். அப்போது கீழ்சாத்தமங்கலம் ஏரிக்கரையோரம் இருந்த குடிசையில் 7 வயது முதல் 13 வயது வரையில் 5 சிறுமிகள் இருப்பது தெரியவந்தது. இதனை தொடர்ந்து அதிகாரிகள் அந்த குழந்தைகள் 5 பேரையும் பத்திரமாக மீட்டு தனியார் காப்பகத்தில் தங்க வைத்துள்ளனர்.

இந்த குழந்தைகளை அடைத்து வைத்தது யார்? என்பது குறித்து விசாரித்ததில் அந்த பகுதியில் வாத்துப் பண்ணை நடத்தும் 3 பேர் என்பது தெரியவந்தது. அவர்கள் மீது நடவடிக்கை எடுக்க வேண்டும் என்று சீனியர் போலீஸ் சூப்பிரண்டு பிரதிக்‌ஷா கோத்ராவிடம் குழந்தைகள் நலக்குழு தலைவர் ராஜேந்திரன் புகார் செய்தார். இதுதொடர்பாக விசாரித்து நடவடிக்கை எடுக்கும்படி கோர்க்காடு போலீசாருக்கு உத்தரவிட்டுள்ளார். அதன்பேரில் விசாரணை நடந்து வருகிறது.

இதுகுறித்து குழந்தைகள் நலக்குழுவின் தலைவர் ராஜேந்திரன் கூறுகையில், ‘காஞ்சீபுரம் மாவட்டம் செய்யாறை சேர்ந்த ஆறுமுகம் கரும்பு வெட்டும் கூலித்தொழிலுக்காக புதுச்சேரி கிராமப் பகுதிக்கு வந்துள்ளார். அப்போது வாத்து மேய்க்கும் பணிக்காக தனது 5 பெண் குழந்தைகளையும் தலா ரூ.3 ஆயிரம் வீதம் ரூ. 15 ஆயிரம் வாங்கிக் கொண்டு வாத்து மேய்க்கும் பண்ணையில் கொத்தடிமைகளாக விட்டுள்ளார். அந்த குழந்தைகளை தனியாக வீட்டில் அடைத்து வைத்திருந்தனர். இரவில் வீட்டில் பூட்டி வைத்து விடுவார்களாம். தற்போது அந்த குழந்தைகளை மீட்டு தனியார் காப்பகத்தில் வைத்துள்ளோம். அவரது தந்தை ஆறுமுகத்திடம் விசாரித்து வருகிறோம். இது தொடர்பாக வாத்து மேய்க்கும் பண்ணை முதலாளி, அவரது மனைவி மற்றும் மகன் மீது புகார் செய்யப்பட்டுள்ளது’ என்றார்.

புதுச்சேரி:

புதுச்சேரி மாவட்ட கலெக்டர் அருண் வெளியிட்டுள்ள செய்திக்குறிப்பில் கூறியிருப்பதாவது:-

பொதுமக்கள் யாருக்காவது கொரோனா அறிகுறி இருந்தால் உடனடியாக அரசு மருத்துவக்கல்லூரி மருத்துவமனை அல்லது கொரோனா சிகிச்சை மையங்களில் பரிசோதனை செய்து கொள்ள வேண்டும். அவ்வாறு பரிசோதனை செய்யாமலும், மருத்துவர்களை சந்திக்காமலும் நேராக மருந்துக் கடைகளுக்கு சென்று சுயமாக மருந்து, மாத்திரைகள் வாங்கிச் சாப்பிட்டால் அது கொரோனா பரவலை மேலும் அதிகரிக்கக் கூடும்.

எனவே பேரிடர் மேலாண்மை சட்டத்தின்படி கொரோனா தொற்று பரவுவதை தடுக்க மருந்துக் கடைகளுக்கு ஒரு உத்தரவு பிறப்பிக்கப்பட்டு உள்ளது. இருமல், காய்ச்சல், சளி, சுவாச பிரச்சினையுடன் வரும் பொதுமக்களுக்கு சுயமாக மருந்து வழங்கக் கூடாது. டாக்டர்கள் பரிந்துரைத்த மருந்து சீட்டுகளுடன் வந்தால் மட்டுமே மருந்து, மாத்திரைகள் வினியோகிக்க வேண்டும்.

அனைத்து மருந்துக்கடைகள், கிளினிக்குகளில் அருகில் உள்ள கொரோனா பரிசோதனை மையங்கள் குறித்த விவரங்களை பொதுமக்களின் பார்வையில் தெரியும்படி எழுதி வைக்க வேண்டும். கொரோனா விழிப்புணர்வு பேனர்கள் வைக்கப்பட வேண்டும். மருந்து வாங்குபவர்களின் பெயர், விவரங்களை சேகரிப்பதும் அவசியம். புதுச்சேரியில் உள்ள மருந்து கட்டுப்பாட்டு துறை இதனை கண்காணித்து நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.

புதுச்சேரி:

புதுவையில் கடந்த சில நாட்களாக வெங்காயத்தின் விலை கடுமையாக உயர்ந்து வருகிறது. கிலோ ரூ.30-க்கு விற்ற வெங்காயம் கடந்த ஒரு வாரத்தில் கிடுகிடுவென உயர்ந்து நேற்று ரூ.80 வரை விற்பனையானது. சாம்பார் வெங்காயம் ரூ.120க்கு விற்கப்பட்டது.

வெங்காய விலையை கட்டுப்படுத்த தமிழக அரசு கடும் நடவடிக்கை எடுத்து வருகிறது. அரசு சார்பில் கிலோ ரூ.45 விலைக்கு வெங்காய விற்பனையை தொடங்கியுள்ளது. அதேநேரத்தில் புதுச்சேரியில் வெங்காய விலை குறையவில்லை. வியாபாரிகள் சிலர் வெங்காயத்தை பதுக்கி வைத்திருப்பதாக புகார்கள் வந்தன.

இதைத்தொடர்ந்து நேற்று கூட்டுறவு மற்றும் குடிமைப்பொருள் வழங்கல்துறை அமைச்சரான கந்தசாமி ரங்கப்பிள்ளை வீதியில் உள்ள வெங்காய விற்பனை கடைகளில் ஆய்வு செய்தார். குடோன்களில் உள்ள வெங்காயத்தையும் பார்வையிட்டார்.

அப்போது வெங்காயத்தை அதிக விலைக்கு விற்கக் கூடாது என வியாபாரிகளை அவர் கேட்டுக்கொண்டார். கனமழை காரணமாக புதுவைக்கு வெங்காயம் வரத்து குறைந்துள்ளதால் விலை உயர்ந்துள்ளதாக அவரிடம் வியாபாரிகள் தெரிவித்தனர்.

ஆய்வின்போது அமைச்சர் கந்தசாமி நிருபர்களிடம் கூறியதாவது:-

கொரோனா காரணமாக தற்போது மக்கள் வருமானமின்றி கஷ்டப்பட்டு வருகின்றனர். தட்டுப்பாடு ஏற்பட்டுள்ளதை பயன்படுத்தி வெங்காயத்தை பதுக்கி வைத்து அதிக விலைக்கு விற்கக் கூடாது என்று அறிவுறுத்தி உள்ளேன். யாராவது பதுக்கி வைத்திருந்தால் அவர்கள் மீது கடும் நடவடிக்கை எடுக்கப்படும். கடைகளில் விலைப்பட்டியலை வைக்கவும், அதை அதிகாரிகள் கண்காணிக்கவும் உத்தரவிடப்பட்டுள்ளது.

புதுவை அரசு நிறுவனங்களான பாசிக், பாப்ஸ்கோ மூலம் வெங்காயத்தை வாங்கித்தர முடியாத நிலை உள்ளது. ஏனெனில் இதற்காக தமிழகத்தில் ரூ.100 கோடி ஒதுக்கப்பட்டுள்ளது. ஆனால் புதுவைக்கு இதுபோல் கோப்பு அனுப்பினால் வெங்காய விலை குறைந்த பின்னர்தான் கவர்னரிடமிருந்து ஒப்புதல் வரும்.

கடந்த 6 மாதங்களாக குடிநீருக்காக ஆழ்குழாய் கிணறுகூட அமைக்க முடியவில்லை. ஏதாவது ஏரி சங்கத்திடம் புகார் பெற்று ஆழ்குழாய் கிணறு அமைப்பதை நிறுத்தி விடுகிறார். அங்கன்வாடிகள் மூலம் கர்ப்பிணிகளுக்கு உதவிகள் செய்ய முடியவில்லை. இலவச வேட்டி-சேலை வழங்க முடியவில்லை. அனைத்து உதவிகளையும் பணமாக வழங்குங்கள் என்று கவர்னர் கூறுகிறார்.

பணத்தை சாப்பிட முடியுமா? கவர்னர் பணத்தை சாப்பிடுவாரா? உணவைத்தான் சாப்பிட வேண்டும். முதியோரின் வங்கிக் கணக்கிற்கு செல்லும் பணத்தை குடும்பத்தினர் எடுத்து செலவு செய்து விடுகிறார்கள். அரசு சார்பு நிறுவன ஊழியர்கள் 10 ஆயிரம் பேருக்கு சம்பளம் இல்லை. 9,500 காலிப் பணியிடங்களை நிரப்ப முடியவில்லை.

பல மாநிலங்களில் ரேஷன் கடைகள் மூலம் பொருட்கள் வழங்கப்படுகிறது. ஆனால் புதுவையில் மட்டும் நிலைமை தலைகீழாக உள்ளது. வெங்காயத்துக்காக மத்திய அரசிடம் மானியம் பெறலாம். அரசின் திட்டங்களுக்கு நிதியுதவி பெறலாம். ஆனால் இவை எதையும் கவர்னர் செய்யமாட்டார். இதனால் புதுவை அரசால் வெங்காயத்தை நேரடியாக கொள்முதல் செய்து வழங்க முடியாத நிலை உள்ளது.

இவ்வாறு அமைச்சர் கந்தசாமி கூறினார்.