விருதுநகர்

விருதுநகர்:

விருதுநகர் மாவட்டம், சாத்தூர் அண்ணாநகர் பகுதியைச் சேர்ந்தவர் பாண்டி சுப்புராஜ் (வயது 38). இவரது மனைவி இறந்து விட்டார். இதனால் குடிப்பழக்கத்துக்கு ஆளான இவர் தினமும் மது குடித்து வந்தார்.

இந்த நிலையில் சாத்தூரில் உள்ள அரசு ஆஸ்பத்திரியில் அவர் சிகிச்சை பெற்றார். கடந்த 2 நாட்களுக்கு முன்பு அவர் விருதுநகர் அரசு ஆஸ்பத்திரியில் அனுமதிக்கப்பட்டார். அங்கு அவருக்கு சிகிச்சை அளிக்கப்பட்டு வந்தது.

இந்த நிலையில் இன்று அதிகாலை சுமார் 5 மணியளவில் சிறப்பு சப்-இன்ஸ்பெக்டர் நாகராஜன் மற்றும் போலீசார் அரசு ஆஸ்பத்திரி பகுதியில் ரோந்து பணியில் ஈடுபட்டனர்.

அப்போது ஆஸ்பத்திரிக்கு வெளியே உடலில் காயங்களுடன் பாண்டி சுப்புராஜ் நின்று கொண்டிருந்ததை பார்த்தனர். திருடன் என சந்தேகப்பட்டு போலீசார் அவரை பிடித்து விசாரித்தனர்.

அப்போது அவர் அரசு ஆஸ்பத்திரியில் சிகிச்சை பெற்று வரும் நோயாளி என்பது தெரியவந்தது. உடனே போலீசார் அவரை ஆஸ்பத்திரிக்கு அழைத்துச் சென்றனர்.

திடீரென ஆவேசமடைந்த பாண்டி சுப்புராஜ் கொரோனா ரத்த பரிசோதனை செய்யும் வார்டுக்குள் புகுந்து அங்கிருந்த கம்ப்யூட்டர், பரிசோதனை கருவிகள் மற்றும் அறை கண்ணாடியை அடித்து நொறுக்கினார். இதைப்பார்த்து அதிர்ச்சியடைந்த போலீசார் அவரை மடக்கிப்பிடித்து விசாரணைக்காக போலீஸ் நிலையத்திற்கு அழைத்துச் சென்றனர். அங்கு அவரிடம் விசாரணை நடத்தி வருகின்றனர்.

இந்த சம்பவம் விருதுநகர் அரசு ஆஸ்பத்திரியில் பரபரப்பை ஏற்படுத்தியது.

விருதுநகர்:

விருதுநகர் மாவட்டத்தில் கடந்த மாதம் 16-ந் தேதி முதல் கொரோனா தடுப்பூசி போடப்பட்டு வருகிறது. 10 ஆயிரம் பேருக்கு முதல் கட்டமாக தடுப்பூசி போட திட்டமிடப்பட்டுள்ளது.

நேற்று வரை மாவட்டம் முழுவதும் 4,652 பேருக்கு மட்டுமே தடுப்பூசி போடப்பட்டுள்ளது. எதிர்பார்த்த வேகம் இல்லாத நிலையில் தடுப்பூசி போட தேவையான விழிப்புணர்வை ஏற்படுத்த வேண்டும் என வலியுறுத்தப்பட்டுள்ளது.

மேலும் 8 பேருக்கு கொரோனா தொற்று உறுதி செய்யப்பட்டுள்ள நிலையில் பாதிப்பு எண்ணிக்கை 16,602 ஆக உயர்ந்துள்ளது. மாவட்டத்தில் 4 லட்சத்து 2,891 பேருக்கு மருத்துவ பரிசோதனை செய்ததில் 16,594 பேருக்கு நோய் பாதிப்பு ஏற்பட்டிருந்தது. 16,334 பேர் சிகிச்சை முடிந்து வீடு திரும்பியுள்ளனர். 29 பேர் அரசு ஆஸ்பத்திரிகளில் சிகிச்சை பெற்று வருகின்றனர். வீடுகளில் யாரும் தனிமைப்படுத்தப்படவில்லை.

மாவட்ட சுகாதாரத் துறையினர் மருத்துவ பரிசோதனை எண்ணிக்கை மற்றும் சோதனை முடிவுகள் குறித்த விவரங்களை முழுமையாக தெரிவிக்காத நிலையே தொடர்கிறது.

தாயில்பட்டி:

வெம்பக்கோட்டை ஒன்றியத்தை சேர்ந்த தாயில்பட்டியில் மேம்படுத்தப்பட்ட அரசு ஆரம்ப சுகாதார நிலையமாக தரம் உயர்த்தப்பட்டது.

இதையடுத்து தாயில்பட்டி, வெற்றிலையூரணி, சுப்ரமணியபுரம், சல்வார் பட்டி, மீனாட்சிபுரம், வெம்பக்கோட்டை, கணஞ்சாம்பட்டி உள்ளிட்ட ஊராட்சிகளை சேர்ந்த கிராம மக்கள் தினமும் சிகிச்சைக்காக வந்து செல்கின்றனர்.

அதிலும் குறிப்பாக கர்ப்பிணிகள், குழந்தைகள் பெற்ற தாய்மார்கள் அதிகம் வந்து செல்கின்றனர். அவர்களை அழைத்து சென்று வர ஆம்புலன்ஸ் வசதி இல்லாததால் சிகிச்சைக்கு வருபவர்கள் சிரமப்படுகின்றனர்.

குறிப்பாக வாடகை வாகனங்களில் வந்து செல்கின்றனர்.

ஆகையால் தாயில்பட்டியில் மேம்படுத்தப்பட்ட அரசு ஆரம்ப சுகாதார நிலையத்தில் 108 சேவை ஆம்புலன்சை இயக்க நடவடிக்கை எடுக்க வேண்டும்.

மேலும் வெம்பக்கோட்டை மற்றும் அதன் சுற்றுவட்டார பகுதியில் சாலை விபத்து ஏற்பட்டால் 108 ஆம்புலன்ஸ் சாத்தூர் அல்லது சிவகாசியி்ல் இருந்து வர தாமதம் ஆகிறது.

சமீபத்தில் வனமூர்த்திலிங்காபுரம் அருகே காயமடைந்தவரை மீட்க 108 ஆம்புலன்ஸ் வாகனம் வர தாமதம் ஆனது. ஆதலால் வெம்பக்கோட்டை தீயணைப்பு நிலையத்தில் இருந்து தீயணைப்பு வாகனம் மூலமாக காயம் அடைந்தவரை மீட்டு அரசு ஆஸ்பத்திரிக்கு அனுப்பி வைத்தனர் என்பது குறிப்பிடத்தக்கது.

எனவே வெம்பக்கோட்டை ஒன்றியத்திற்கு என 108 ஆம்புலன்ஸ் சேவை வசதி ஏற்படுத்தி தர வேண்டும் என பொதுமக்கள் கோரிக்கை விடுத்துள்ளனர்.

விருதுநகர்:

விருதுநகர் அரசு ஆஸ்பத்திரி வளாகத்தில் ஒருங்கிணைந்த சேவை மைய கட்டிடம் கட்டப்பட்டு உள்ளது. இந்த மையத்தை திறந்து வைத்து கலெக்டர் கண்ணன் கூறியதாவது:-

இந்த மையமானது சூலக்கரை அன்னை சத்யா குழந்தைகள் காப்பகவளாகத்தில் இயங்கி வந்த நிலையில் தற்போது அரசு ஆஸ்பத்திரி வளாகத்தில் ரூ.48லட்சம் மதிப்பில் புதிதாக கட்டப்பட்டு திறக்கப்பட்டு உடனடியாக பயன்பாட்டிற்கு வந்துள்ளது.

இந்த மையத்தின் நோக்கமானது தனிப்பட்ட இடத்திலோ அல்லது பொது இடத்திலோ வன்முறையால் பாதிக்கப்பட்ட பெண்களுக்கு சட்ட ரீதியாகவும், மருத்துவ ரீதியாகவும், உளவியல் ரீதியாகவும் தேவைப்படும் ஆலோசனைகளை உடனடியாக அவசர கால அடிப்படையில் எளிதாக பெற ஏற்பாடு செய்வது ஆகும். பாதிக்கப்பட்ட பெண்கள் 181 என்ற கட்டணமில்லா தொலைபேசியை தொடர்பு கொண்டு உதவி பெற்றுக்கொள்ளலாம்.

மேலும் மையத்தின் மூலம் பெண்கள் பாதுகாப்புக்கான அவசர சேவை மற்றும் ஆலோசனைகள், அவசரகால மருத்துவ வசதி, போலீசாரின் சட்ட உதவி மற்றும் ஆலோசனை தற்காலிகமாக தங்கும் வசதி ஆகிய சேவைகள் வழங்கப்படுகிறது.

இவ்வாறு அவர் கூறினார்.

இதில் கூடுதல் மாவட்ட நீதிபதி சரண், சார்பு நீதிபதி சதீஷ், மாவட்ட உரிமையியல் நீதிபதி சண்முக கனி, குற்றவியல் நீதித்துறை நடுவர் மருதுபாண்டி நிஷாந்தி, மாவட்ட வருவாய் அலுவலர் மங்கள ராமசுப்பிரமணியன், சுகாதாரத்துறை இணை இயக்குனர் டாக்டர் மனோகரன், மருத்துவக் கல்லூரி முதல்வர் டாக்டர் திருவாசகமணி, சமூகநலத்துறை அலுவலர் இந்திரா, ஒருங்கிணைந்த குழந்தைகள் வளர்ச்சி திட்ட அலுவலர் ராஜம், ஒருங்கிணைந்த சேவை மைய அலுவலர் ரேச்சல்அருமை மற்றும் அரசு அலுவலர்கள் கலந்து கொண்டனர்.