வேலூர்

வாலாஜா:

ஆற்காடு இளைஞர் முன்னேற்ற கைபந்து கிளப் சார்பில் ஏழை எளிய மக்கள் 300 குடும்பத்தினருக்கு அரிசி வழங்கும் நிகழ்ச்சி அரசு கலைக்கல்லூரி முன்பு நடைபெற்றது.

நிகழ்ச்சிக்கு கிளப் தலைவர் ஜெயமுருகன் தலைமை தாங்கினார். செயலாளர் சரவணன், துணை சேர்மன் தங்கதுரை, பொருளாளர் பாலசந்தர் ஆகியோர் முன்னிலை வகித்தனர். நிகழ்ச்சியில் சிறப்பு அழைப்பாளராக வாலாஜா போலீஸ் இன்ஸ்பெக்டர் பாலு கலந்து கொண்டு பெல்லியப்பா நகர், விசி.மோட்டூர், அனந்தலை, குடிமல்லூர் ஆகிய பகுதிகளை சேர்ந்த வாழ்வாதாரம் இழந்து வாடும் 300குடும்பத்தினருக்கு 5கிலோ அரிசியை வழங்கினார்.

நிகழ்ச்சியில் கிளப் பயிற்சியாளர் மல்லிகேஷ்வர் குமார், உறுப்பினர் குமரேசன் உள்பட பலர் கலந்து கொண்டனர்.

வாணியம்பாடி:

அமைச்சர் நிலோபர் கபில் வெளியிட்டுள்ள அறிக்கையில் கூறியிருப்பதாவது:-

உலகம் முழுவதும் கொரானா வைரஸ் தொற்று நோய் காரணமாக பல்லாயிரக்கணக்கான மக்கள் பாதிக்கப்பட்டு சிகிச்சை பெற்று வருகின்றனர். ஆயிரக்கணக்கான மக்கள் இறந்துள்ளனர். இத்தகைய சூழ்நிலையில் இந்த ஆண்டு ரம்ஜான் மாதம் வந்துள்ளது.

இந்த நிலையில் நோய்த்தொற்று பரவாமல் இருக்க சமூக இடைவெளியை அனைவரும் கடைபிடிக்க வேண்டிய இக்கட்டான சூழ்நிலையில் நாம் இருக்கிறோம்.

மற்ற மாநிலங்களில் உள்ளது போல் நாமும் பள்ளிவாசல்களுக்கு செல்லாமல் வீட்டிலேயே தொழுது வருகின்றோம்.

எனவே நாளை (வெள்ளிக்கிழமை) முதல் பிறை தென்பட்டால் ரம்ஜான் நோன்பு ஆரம்பிக்க உள்ளது. இதில் ஏற்கனவே நாம் பின்பற்றிவரும் நடைமுறையை இப்போதும் பின்பற்றி நோன்பு சகஹர், இப்தார் வீட்டிலேயே இருந்து செய்து தாராவீஹ் வீட்டிலேயே தொழுது இந்த நோயிலிருந்து அனைவரும் மீண்டு வர இறைவனை கையேந்தி துவா செய்ய வேண்டுமாய் கேட்டுக் கொள்கிறேன்.

2020-ம் ஆண்டு தமிழக அரசு சார்பில் நோன்பு காலத்தில் அளிக்கப்படும் ரம்ஜான் அரிசி உள்ளிட்ட அனைத்தையும் பள்ளிவாசல்களுக்கு வழங்க, முதல் அமைச்சர் எடப்பாடி பழனிசாமி முடிவு எடுத்து, சிறுபான்மை மக்களுக்கு வழங்கிட ஆணையிட்டுள்ளார்.

இவற்றை அளிக்கும் போது ஒரே இடத்தில் கூட்டம் கூட கூடாது என்பதற்காகவும், பள்ளி வாசல்களில் எக்காரணத்தை கொண்டும் நோன்பு கஞ்சி காய்ச்ச கூடாது என்பதற்காக, அதனை ஏழை, எளிய மக்களுக்கு பிரித்து அளிக்க ஏற்பாடு செய்து வருகின்றனர்.

மேலும் ஒவ்வொரு ஆண்டும் தமிழக அரசு சார்பில் இப்தார் விருந்து அளித்து வந்தது. தற்போது இந்த ஆண்டு அதனை நடத்த முடியாத ஒரு சூழ்நிலையையும் ஏற்பட்டு இருப்பதால், இவை அனைத்தையும் கருத்தில் கொண்டு இஸ்லாமிய மக்கள் அனைவரும் ஒரே குறிக்கோளுடன் இருந்து தொழுகைகளை வீட்டிலேயே நடத்தி சமூக இடைவெளியை கடைபிடிக்க வேண்டும்.

இவ்வாறு அவர் கூறியுள்ளார்.

குடியாத்தம்:

ஆற்காடு அடுத்த விளாப்பாக்கம் கிராமத்தைச் சேர்ந்தவர் எம். ஜெயபிரகாஷ். இவரது மனைவி கீதாம்பிகை. இவர்கள் தற்போது குடியாத்தம் ராஜா கோவில் முத்து நகர் பகுதியில் சொந்தமாக வீடு கட்டி வசித்து வருகின்றனர்.

ஜெயபிரகாஷ் குடியாத்தம் அரசினர் திருமகள் ஆலைக் கல்லூரியில் லேப் டெக்னீசியன் பிரிவில் பயிற்றுநராக பணியாற்றி வருகிறார்.

தற்போது ஊரடங்கு உத்தரவால் ஜெயப்பிரகாஷ் தனது மனைவியுடன் சொந்த ஊரான விளாப்பாக்கம் கிராமத்திற்கு கடந்த மாதம் 24-ந்தேதி சென்றுவிட்டார்.

மர்ம நபர்கள் வீட்டில் பூட்டை உடைத்து பிரோ இருந்த 55 பவுன் தங்க நகைகளும், வெள்ளி பொருட்களும், ரூ.5 ஆயிரம் பணத்தை திருடி சென்று விட்டனர்.

இந்நிலையில் இன்று ஜெயபிரகாஷ் தனது மனைவியுடன் வீடு திரும்பினார். அப்போது வீட்டில் கொள்ளை நடந்ததை கண்டு திடுக்கிட்டார்.

இதனையடுத்து ஜெயபிரகாஷ் குடியாத்தம் டவுன் போலீசில் புகார் செய்தார்.

சம்பவ இடத்திற்கு டி.எஸ்.பி. சரவணன், டவுன் போலீஸ் இன்ஸ்பெக்டர் சீனிவாசன் உள்ளிட்ட போலீசார் விரைந்து வந்து விசாரணை நடத்தினர். மேலும் வேலூரில் இருந்து கைரேகை நிபுணர்கள் திருட்டு நடைபெற்ற வீட்டில் ரேகைகளை பதிவு செய்தனர்.

கல்லூரி ஊழியர் வீட்டில் திருட்டு சம்பவம் அப்பகுதியில் பெரும் பரபரப்பை ஏற்படுத்தி உள்ளது.

வேலூர்:

சென்னையை சேர்ந்த ஆசிப்அகமது திருக்கோவிலூர் தெளிபகுதியை சேர்ந்த நவீன்குமார் அதே பகுதியைச் சேர்ந்த சூர்யா. இவர்களை ராணிப்பேட்டை சிப்காட்டை சேர்ந்த வழிப்பறி கொள்ளையர்கள் யுவராஜ், அரவிந்தன், வாசு, ஜெயபிரகாஷ் மற்றும் சென்னை திருவொற்றியூரை சேர்ந்த அண்ணன் தம்பியான சூர்யா, சதீஷ், இளங்கோ, சாரு ஆகிய 8 பேர் சேர்ந்து கடந்த ஆண்டு ஜூன் மாதம் வெட்டி கொலை செய்தனர். பின்னர் அவர்களை வேலூர் மாவட்டம் திருவலம் பொன்னை ஆற்றில் ஒரே குழியில் புதைத்தனர்.

காட்பாடி டி.எஸ்.பி துரைபாண்டியன் தாசில்தார் பாலமுருகன் தலைமையில் நேற்று கொன்று புதைக்கப்பட்டவர்களின் உடல்கள் தோண்டி எடுக்கப்பட்டன. மண்டை ஓடு எலும்புகள் என தனித்தனியாக கிடந்தன சூர்யா ஆசிப் அகமது ஆகியோரின் பிணத்தை அவரது பெற்றோர்களும் நவீன் குமார் பிணத்தை அவரின் மனைவி அடையாளம் காட்டினர். அப்போது அவர்கள் கதறி அழுதனர்.

தோண்டி எடுக்கப்பட்ட 3 பேரின் பிணங்களும் வேலூர் தடய அறிவியல் துறை அலுவலர் சொக்கநாதன் தலைமையிலான மருத்துவ குழுவினர் அங்கேயே பிரேத பரிசோதனை செய்தனர். பின்னர் 3 பேரின் பிணங்களும் அவருடைய உறவினர்களிடம் ஒப்படைக்கப்பட்டன.

கொலைக்கான காரணம் குறித்து கைதான சென்னை சகோதரர்கள் சூர்யா, சதீஷ் போலீசாரிடம் அளித்துள்ள வாக்குமூலத்தில் கூறியதாவது:-

நாங்கள் சென்னையைச் சேர்ந்த இளங்கோ சாரு தலைமையிலும் ஆஷிப், நவீன்குமார் ஆகியோர் என இரு குழுக்களாக பைக் மற்றும் செயின் பறிப்பு சம்பவங்களில் ஈடுபட்டு வந்தோம். இதில் எங்கள் தரப்பைச் சேர்ந்த இளங்கோ உள்பட 4 பேரும் அடிக்கடி கைது செய்யப்பட்டோம். ஆசிப் போலீசாரிடம் தகவல் கூறியதன் பேரில் தான் நாங்கள் கைது செய்யப்பட்டதாக தகவல் கிடைத்தது.

இதனால் ஆசிப்பை கொலை செய்ய திட்டமிட்டோம். இளங்கோ விற்கும் ராணிப்பேட்டையை சேர்ந்த பிரகாசுக்கும் ஜெயிலில் பழக்கம் இருந்தது. இதனால் ஜெயபிரகாஷ் மூலம் ஆசிப்பை தீர்த்துக்கட்ட முடிவு செய்தோம்.

சம்பவத்தன்று ஆசிப், நவீன்குமார் பிறந்த நாள் கொண்டாட்டத்திற்காக திருக்கோவிலூர் தெளி கிராமத்திற்கு சென்றிருப்பது தெரியவந்தது. அவரிடம் இளங்கோ செல்போனில் தொடர்பு கொண்டு வேலூர் மாவட்டம் திருவலத்தில் மதுவிருந்து இருப்பதாகவும் உடனே வரும்படியும் தெரிவித்தார். இதனையடுத்து இளங்கோ உள்பட நாங்கள் 4 பேரும் ஜெயப்பிரகாஷ் உட்பட அவரது கூட்டாளிகள் 4 பேரும் என 8 பேரும் தயார் நிலையில் இருந்தோம். ஆசிப் தனியாக வருவார் என எதிர்பார்த்தோம்.

ஆனால் அவருடன் நவீன்குமார் அதே ஊரை சேர்ந்த உறவினர் சூர்யா ஆகியோரும் 2 மோட்டார் சைக்கிளில் வந்தனர். அவர்களை பொன்னையாற்று பகுதிக்கு அழைத்து சென்று அனைவரும் மது குடித்தோம். அப்போது திட்டமிட்டது போல இளங்கோ ஆசிப்பை திடீரென தலையில் கத்தியால் வெட்டி சாய்த்தார்.

மேலும் நவீன் குமாரை இரும்பு கம்பியால் அடித்துக் கொன்றோம். அவருடன் வந்திருந்த மாணவர் சூர்யாவை விட்டு விடலாம் என நினைத்தோம். ஆனால் அவர் வெளியே கூறி விடுவார் என்ற பயத்தில் அவரையும் வெட்டி கொலை செய்தோம்.

பின்னர் தயாராக வைத்திருந்த மண்வெட்டி மூலம் குழி தோண்டி ஒரே குழியில் 3 பேரையும் புதைத்தோம். அவர்கள் வந்த 2 மோட்டார் சைக்கிளை எடுத்துக்கொண்டு சென்று விட்டோம்.

இவ்வாறு அவர்கள் கூறியுள்ளனர்.

இந்த வழக்கில் தலைமறைவாக உள்ள இளங்கோ, சாரு, ஜெயபிரகாஷ் ஆகியோரை போலீசார் தேடி வருகின்றனர்.