என் மலர்
நீலகிரி
ஊட்டியில் நவம்பர், டிசம்பர் மாதங்களில் நிலவும் பனிக்காலம் இந்த ஆண்டு ஜனவரி மாதம் இறுதியில் தொடங்கியது. தற்போது பனிப்பொழிவு உச்சத்தை எட்டியுள்ளது. அது தற்போது தீவிரமடைந்து ஜீரோ டிகிரி செல்சியஸ் வெப்பநிலையாக குறைந்துள்ளது. இதனால் புல்வெளிகள் பனி படர்ந்து மினி காஷ்மீர்போல் காட்சி அளிக்கிறது.
குறிப்பாக தலைகுந்தா, காந்தள், அவலாஞ்சி, தலைகுந்தா, அப்பர் பவானி ஆகிய பகுதிகளில் அடர்ந்த பனியால் வெண்பட்டு போர்த்தியதுபோன்று புல் வெளிகள் காணப்படுகிறது.
கடும் பனிப்பொழிவால் பொதுமக்கள் பெரிதும் பாதிக்கப்பட்டுள்ளனர். அவர்கள் வீடுகளிலேயே முடங்கியுள்ளனர். இதனால் நீலகிரி மாவட்டத்தில் பொதுமக்களின் இயல்பு வாழ்க்கை பாதிக்கப்பட்டுள்ளது.
இதுகுறித்து இந்திய நீர் மற்றும் மண் ஆய்வு மைய முதன்மை விஞ்ஞானி கூறும்போது,
45 ஆண்டுகளுக்கு முன்பு நீலகிரியில் 1976-ம் ஆண்டு இதேபோல் மிக தாமதமாக பனிப்பொழிவு ஏற்பட்டது. அப்போது பிப்ரவரி மாதம் 2.9 டிகிரி செல்சியசாக வெப்பநிலை பதிவாகி இருந்தது.
தற்போது நிலவும் காலநிலை மாற்றத்துக்கு காரணம் கடந்த ஆண்டு நிலையற்ற காலநிலையே ஆகும். இதனால் வரும் மாதங்களில் கோடை மற்றும் பருவ மழை காலங்கள் சற்று தள்ளிப்போகும். இதேபோல வடகிழக்கு பருவமழை குறையவும் வாய்ப்பு உள்ளது என்றார்.
இதேபோன்று தாவரவியல் ஆய்வாளர் கூறும் போது, இந்த கடும்பொழிவால் கேரட், பீட்ரூட் உள்ளிட்ட மலைக்காய்கறிகள் நல்ல விளைச்சலை காணலாம். ஆனால் தேயிலை, உருளைக்கிழங்கு விளைச்சலில் பாதிப்பு ஏற்படும். மேலும் மண் வளமும் மாறுபடும். இந்த கடும் பனிப்பொழிவு மார்ச் மாதம் இறுதி வரை நிலவும் என்றார். 45 ஆண்டுகளுக்கு பின்னர் காலம் மாறி பொழியும் உறைபனியால் கோடை மற்றும் பருவமழை தள்ளிப்போகும் அபாயத்தால் விவசாயிகள் கவலையடைந்துள்ளனர்.
கடும் பனிப்பொழிவு குறித்து சுகாதாரத்துறை துணை இயக்குனர் கூறும்போது, நள்ளிரவு மற்றும் அதிகாலையில் பொதுமக்கள் வெளியே சுற்றுவதை தவிர்க்க வேண்டும். சுடு தண்ணீரை குடிக்க வேண்டும். பனியால் உடல் நலம் குறைந்தால் உடனே டாக்டரிடம் சென்று சிகிச்சைபெற வேண்டும் என்று அறிவுறுத்தியுள்ளார்.
ஊட்டிக்கு சுற்றுலா வந்த பயணிகள் கடும் உறைபனியால் பாதிக்கப்பட்டுள்ளனர். மேலும் நீலகிரிக்கு சுற்றுலா வர பொதுமக்கள் தயக்கம் காட்டி வருகிறார்கள். இதனால் பெரும்பாலான சுற்றுலா தலங்களில் கூட்டம் குறைவாகவே இருந்தது.
நீலகிரி மாவட்டத்தில் 9, 10, பிளஸ்-1, பிளஸ்-2 ஆகிய மாணவர்களுக்கு பள்ளிகள் திறக்கப்பட்டு உள்ளன. அதுபோன்று கல்லூரிகளும் திறக்கப்பட்டு விட்டன. இதையடுத்து பள்ளிகள் மற்றும் கல்லூரிகளில் கொரோனா பரவுவதை தடுக்க முன்னெச்சரிக்கை நடவடிக்கை மேற்கொள்ளப்பட்டு வருகிறது.
பள்ளிகளில் உள்ள கைப்பிடிச்சுவர், படிக்கட்டுகள் உள்பட பல்வேறு பகுதிகளில் கிருமி நாசினி மூலம் சுத்தம் செய்யப்பட்டு வருகிறது. மேலும் பள்ளிகளில் சுகாதாரத்துறையினர் முகாமிட்டு அங்கு பணிபுரியும் ஆசிரியர்களுக்கு கொரோனா பரிசோதனை செய்து வருகிறார்கள்.
இதுகுறித்து சுகாதார பணிகள் துணை இயக்குனர் டாக்டர் பாலுசாமி கூறியதாவது:-
பள்ளி, கல்லூரிகள் திறக்கப்பட்டு உள்ளதால் கொரோனா பரவலை தடுக்க சுகாதார ஆய்வாளர், டாக்டர், பணியாளர்கள் பள்ளிகளுக்கு சென்று காய்ச்சல் உள்ளதா என்று சோதனை செய்து வருகிறார்கள். இதில் காய்ச்சல் இருப்பது கண்டறியப்பட்டால், உடனே சம்பந்தப்பட்ட நபர்களுக்கு கொரோனா பரிசோதனை மேற்கொள்ளப்படுகிறது.
அந்த வகையில் பள்ளிகளில் பணிபுரியும் ஆசிரியர்கள் 1,780 பேருக்கு கொரோனா பரிசோதனை செய்யப்பட்டு உள்ளது. அதுபோன்று கல்லூரிகளில் பணியாற்றி வரும் பேராசிரியர்களுக்கும் கொரோனா பரிசோதனை மேற்கொள்ளப்பட உள்ளது.
மாணவர்களுக்கு காய்ச்சல், சளி இருந்தால் பள்ளிக்கு வர வேண்டாம். அவர்கள் அருகே உள்ள அரசு மருத்துவமனைக்கு சென்று பரிசோதனை மேற்கொள்ள வேண்டும் என்று அறிவுறுத்தப்பட்டு உள்ளது. நீலகிரியில் முன்கள பணியாளர்கள் 5,200 பேர் தடுப்பூசி போட்டுக்கொள்ள கோவின் என்ற இணையதளத்தில் பதிவு செய்தனர்.
அதில் இதுவரை 4 ஆயிரத்து 89 பேர் தடுப்பூசி போட்டு உள்ளனர். கர்ப்பிணி மற்றும் பாலூட்டும் தாய்மார்களுக்கு தடுப்பூசி போடவில்லை. 2-ம் கட்டமாக பதிவு செய்து இருந்த 4 ஆயிரத்து 832 பேரில், இதுவரை 412 பேருக்கு கொரோனா தடுப்பூசி போடப்பட்டு உள்ளது.
இவ்வாறு அவர் கூறினார்.
ஊட்டி:
நீலகிரி மாவட்டம் பந்தலூர் அருகே கடந்த 1½ மாதத்துக்கு முன்பு ஒற்றை கொம்பன் எனும் காட்டுயானை 3 பேரை அடித்துக்கொன்றது. வனத்துறையினர் மயக்க ஊசி செலுத்திபிடிக்க முயன்றபோது அது கேரளா தப்பி விட்டது.தமிழக- கேரள வனத்துறையினர் தொடர்ந்து கண்காணித்தனர்.
நிலம்பூர் வனப்பகுதியில் இருந்து யானை கடந்த வாரம் மீண்டும் நீலகிரி மாவட்டம் சப்பந்தோடு குடியிருப்பு அருகே வந்தது.இதனால் பொதுமக்கள் அச்சம் அடைந்து ஒற்றை கொம்பன் யானையை உடனே பிடித்து முகாமில் வைத்து பராமரிக்க வேண்டும் என்று கோரிக்கை விடுத்தனர். இதனையடுத்து உதவிவனப் பாதுகாவலர்கள் தினேஷ், ராஜேஷ் தலைமையில் 11 பேர் கொண்ட சிறப்பு குழுவினர் கடந்த 4 நாட்களுக்கு முன்பு காட்டுயானையை பிடிக்கும் பணியில் இறங்கினர்.
ஒரே பிரசவத்தில் பிறந்த விஜய், சுஜய் என்ற கும்கிகள் உள்ளபட பொம்மன், ஸ்ரீனிவாஸ், கலீம், முதுமலை ஆகிய 6 கும்கி வரவழைக்கப்பட்டன. மயக்க ஊசி செலுத்த கால்நடை மருத்துவர்களான சுகுமாறன், மனோகரன், ராஜேஷ்குமார் மற்றும் வன ஊழியர்கள் அடங்கிய குழு கடந்த 4 நாள்களாக தொடர்ந்து முயற்சி செய்தனர்.
இதனிடையே பிடிபடும் அபயாரணம் யானைகள் முகாமில் கற்பூர மரங்களை கொண்டு கரால் எனும் மரக்கூண்டு தயாரானது.
கடந்த ஞாயிற்றுக்கிழமை மயக்க ஊசி செலுத்த முயற்சி மேற்கொள்ளப்பட்டது. ஆனால் கொம்பன் யானை மற்ற காட்டு யானைகளுடன் கலந்து விட்டது. வனத்துறையினர் கண்காணிக்காத இடங்களில் தனியாகவும், வனத்துறை நெருங்கும்போது காட்டுயானைகளுடன் சேர்ந்து கொள்கிறது. இதனால் யானையை பிடிப்பதில் பின்னடைவு ஏற்பட்டது. புத்தி கூர்மையுள்ள இந்த யானை வனத்துறையினருக்கு சவால் ஏற்படுத்தும் வகையில் நடந்துகொள்கிறது. இதனிடையே காட்டுயானையை உடனே பிடிக்க வேண்டும் என்று அந்த பகுதி மக்கள் போராட்டம் நடத்தினர்.
இந்த நிலையில் சேரம்பாடி பகுதியில் நடமாடி வந்த யானை காப்பிக்காடு பகுதிக்கு இடம் பெயர்ந்தது. இதனையடுத்து அங்கு வனத்துறையினர் சென்றனர். அங்கு சென்று பார்த்தபோது பத்துலைன் என்ற பகுதிக்கு இடம் மாறிவிட்டது. இதனையடுத்துபத்துலைன் பகுதியில் தேயிலைத் தோட்டங்களுக்கு நடுவே உள்ள சோலைக்காடுகள் இருக்கும் பகுதிக்கு வனத்துறையினர் சென்று பார்த்தனர். மாலை நேரமாகிவிட்டதால் யானையை தேடும் பணி கைவிடப்பட்டது.
5-வது நாளாக யானைக்கு மயக்க ஊசி செலுத்தி பிடிக்கும் பணி இன்று காலை தொடர்ந்தது. அடர்ந்த வனப்பகுதிக்கு யானை சென்றுவிட்டால் அது மீண்டும் கேரள வனப்பகுதிக்கு இடம்பெயர வாய்ப்புள்ளது.கேரளா வனப்பகுதிக்கு சென்றுவிட்டால் அதனை பிடிக்க முடியாது. இதனால் மனித- யானை மோதல் ஏற்பட வாய்ப்புள்ளது. எனவே நீலகிரி வனப்பகுதியிலேயே யானைக்கு மயக்க ஊசி செலுத்தி பிடிக்க வேண்டும் என்று அந்த பகுதி மக்கள் வலியுறுத்தி வருகிறார்கள்.
அட்டகாசம் செய்த மற்ற காட்டுயானைகள் ஒரே இடத்தில் முகாமிட்டிருக்கும். அதற்கு மயக்க ஊசி செலுத்தி கும்கிகள் உதவியுடன் வாகனத்தில் ஏற்றி முகாமில் அடைத்துவிடுவார்கள். ஆனால் ஒற்றை கொம்பன் யானை வனத்துறைக்கு பெரும் சவாலாக உள்ளது. இன்று மாலைக்குள் மயக்க ஊசி செலுத்தி பிடித்துவிடுவோம் என்று வனத்துறையினர் நம்பிக்கை தெரிவித்துள்ளனர்.
கொடநாடு எஸ்டேட்டில் கடந்த 2017-ம் ஆண்டு நடந்த கொலை, கொள்ளை தொடர்பான வழக்கின் விசாரணை ஊட்டியில் உள்ள மாவட்ட நீதிமன்றத்தில் நடந்து வருகிறது.
இதில் நேற்று நடந்த விசாரணையின்போது குற்றம் சாட்டப்பட்ட 10 பேரில் சயன், மனோஜ் உள்பட 5 பேர் ஆஜர் ஆனார்கள்.
மாவட்ட மகளிர் நீதிமன்ற நீதிபதி அருணாசலம் முன்னிலையில் நடந்த இந்த விசாரணையின்போது குற்றம் சாட்டப்பட்டவர்கள் தரப்பில் ஆஜரான வக்கீல் ஆனந்தன், பெங்களூர் ஜெயிலில் இருந்து விடுதலையாகி உள்ள சசிகலா, விரைவில் கொடநாடு எஸ்டேட்டுக்கு வந்து தங்க உள்ளதாகவும், அதற்காக கொடநாடு எஸ்டேட் பங்களாவில் பராமரிப்பு பணிகள் நடைபெற்று வருவதாகவும் தகவல்கள் வெளியாகி உள்ளன. எனவே கொடநாடு எஸ்டேட் தொடர்பான வழக்கு விசாரணை நடைபெற்று வரும் சூழலில் அதற்கு அனுமதி அளிக்கக் கூடாது என குறிப்பிட்டார்.
இதற்கு எதிர்ப்பு தெரிவித்த அரசு வக்கீல் பாலநந்தகுமார், தற்போதைய சூழலில் இந்த பிரச்சினை குறித்து பேச வேண்டியது இல்லை என்றார். இதையடுத்து வழக்கு விசாரணையை வருகிற 16-ந் தேதிக்கு நீதிபதி ஒத்திவைத்தார்.
நீலகிரி மாவட்டத்தில் கடந்த சில நாட்களாக கொரோனா பாதிப்பு 10-க்கும் கீழ் உள்ளது. தொற்று பாதித்து சிகிச்சை பெற்று குணமடைந்து வீடு திரும்புபவர்களின் எண்ணிக்கை அதிகரித்து உள்ளதால், அரசு மருத்துவமனைகளில் தற்போது 51 பேர் மட்டுமே சிகிச்சை பெற்று வருகின்றனர்.
கொரோனா பரவல் கட்டுப்படுத்தப்பட்டதால் மாவட்ட எல்லையில் உள்ள சோதனைச்சாவடிகளில் சுற்றுலா பயணிகள் உள்ளிட்டோருக்கு கொரோனா பரிசோதனை செய்வது நிறுத்தப்பட்டது. இருப்பினும், கொரோனா பரவாமல் இருக்க பாதித்தவர்களுடன் தொடர்பில் இருந்தவர்களிடம் இருந்து சளி மாதிரி சேகரித்து தினமும் 1,000 பேருக்கு கொரோனா பரிசோதனை மேற்கொள்ள நடவடிக்கை எடுக்கப்பட்டு உள்ளது.
நீலகிரியில் இதுவரை 3 லட்சத்து 16 ஆயிரத்து 500 பேருக்கு கொரோனா பரிசோதனை மேற்கொள்ளப்பட்டு இருக்கிறது என்று சுகாதாரத்துறை அதிகாரிகள் தெரிவித்தனர்.
நீலகிரி மாவட்டத்தில் உள்ள சிறு விவசாயிகள் தங்கள் தேயிலை தோட்டத்தில் பறிக்கும் பச்சை தேயிலையை சிறு தேயிலை தொழிற்சாலை களுக்கு வழங்கி வருகிறார்கள். அந்த தொழிற்சாலைகள் உற்பத்தி செய்யும் தேயிலை தூள் குன்னூர் தேயிலை வர்த்தகர் அமைப்பினர் நடத்தும் தேயிலை ஏலம் மூலம் விற்பனை செய்யப்பட்டு வருகிறது.
இந்த ஏலம் வாரந்தோறும் வியாழன், வெள்ளி ஆகிய 2 நாட்கள் நடக்கிறது. அதன்படி விற்பனை எண் 5-க்கான ஏலம் நடந்தது. ஏலத்திற்கு மொத்தம் 13 லட்சத்து 64 ஆயிரம் கிலோ தேயிலை தூள் வந்தது.
இதில் 9 லட்சத்து 59 ஆயிரம் கிலோ இலை ரகமாகவும், 4 லட்சத்து 5 ஆயிரம் கிலோ தேயிலை தூள் டஸ்ட் ரகமாகவும் இருந்தது. ஏலத்தில் 90 சதவிகித தேயிலை தூள் விற்பனையானது. அதன் அளவு 12 லட்சத்து 19 ஆயிரம் கிலோ ஆகும். இதன் ரொக்க மதிப்பு ரூ.16 கோடியே 35 லட்சம் ஆகும்.
விற்பனையான அனைத்து ரக தேயிலை தூள்களுக்கும் கிலோ ரூ.1 விலையேற்றம் இருந்தது. சி.டி.சி. தேயிலை தூளின் உயர்ந்த பட்ச விலை கிலோ ஒன்று ரூ.301- என்றும், ஆர்தோடக்ஸ் தேயிலை தூளின் உயர்த்தபட்ச விலை கிலோ ரூ.256 என்றும் விற்பனையானது.
சராசரி விலையாக இலை ரகத்தின் சாதாரண வகை 1 கிலோ ரூ.109-ல் இருந்து ரூ.114 என்ற விலையில் ஏலம் சென்றது. விலை உயர்ந்த தேயிலை தூள் கிலோ ரூ.118-ல் இருந்து ரூ.125 என்ற விலையில் ஏலம் சென்றது.
டஸ்ட் ரகத்தின் சாதாரண வகை கிலோ ரூ.161-ல் இருந்து ரூ.226 வரையும், விலை உயர்ந்த தேயிலை தூள் கிலோ ரூ.165-ல் இருந்து ரூ.208 என்ற விலையில் ஏலம் சென்றது. அடுத்த ஏலம் வருகிற 11, 12 ஆகிய தேதிகளில் நடக்கிறது. இந்த ஏலத்திற்கு மொத்தம் 15 லட்சத்து 93 ஆயிரம் கிலோ தேயிலை தூள் வருகிறது.
ஊட்டி:
நீலகிரி மாவட்டம் பந்தலூர் அருகே உள்ள சேரம்பாடி வனப்பகுதியில் சுற்றிதிரிந்த காட்டு யானை ஒன்று கடந்த டிசம்பர் மாத இறுதியில் ஊராட்சி கவுன்சிலர் உள்பட 3 பேரை அடித்து கொன்றது. அந்த யானையை மக்கள் கொம்பன் என பெயரிட்டு அழைத்தனர். இதையடுத்து ஆட்கொல்லி யானையை மயக்க ஊசி செலுத்தி பிடிக்க வனத்துறையினர் தீவிர நடவடிக்கை மேற்கொண்டனர். இதற்காக கும்கி யானைகளும் வரவழைக்கப்பட்டன. ஆனால் அந்த யானை அங்கிருந்து தப்பி கேரள வனப்பகுதிக்குள் சென்றுவிட்டது.
இதன் காரணமாக அச்சத்தில் இருந்த பொதுமக்கள் சற்று நிம்மதியடைந்தனர். இந்த நிலையில் கடந்த 4-ந் தேதி மீண்டும் கொம்பன் யானை சேரம்பாடி வனப் பகுதிக்குள் நுழைந்தது.
இதை கேள்விப்பட்ட அப்பகுதி மக்கள் அச்சம் அடைந்து யானையை உடனடியாக பிடிக்க வேண்டும் என வனத்துறையினரிடம் கோரிக்கை வைத்தனர். இதையடுத்து நேற்று காலை, கூடலூர் வன கோட்டத்தை சேர்ந்த வனத்துறையினர் மற்றும் கோவையை சேர்ந்த சிறப்பு குழுவினர், 3 டாக்டர்களை கொண்ட மருத்துவ குழுவினர் யானை பிடிக்கும் பணியில் ஈடுபட்டனர். மதியம் சப்பந்தோடு, குடியிருப்பையொட்டி யானை நிற்பதை கண்டுபிடித்த வனத்துறையினர் உடனடியாக மயக்க ஊசி செலுத்த மருத்துவர்களிடம் கேட்டு கொண்டனர்.
ஆனால் அதற்கு சற்று தாமதம் ஆனது. இதனால் வனத்துறையினருக்கும், டாக்டர்களுக்கும் இடையே வாக்கு வாதம் ஏற்பட்டது. யானை அங்கேயே நின்று வெகு நேரமாக மயக்க ஊசி செலுத்தி பிடிக்காததால் பொதுமக்கள் ஆத்திரம் அடைந்தனர்.
அவர்கள் வனத்துறையினரையும், மருத்துவ குழுவினரையும் கண்டித்து சேரம்பாடி சுங்கம் பகுதியில் ஆர்ப்பாட்டத்தில் ஈடுபட்டனர்.
ஆர்ப்பாட்டத்தில் ஈடுபட்டவர்கள் கூறும்போது, இந்த யானை ஏற்கனவே 3 பேரை அடித்து கொன்றுள்ளது. மேலும் இந்த யானையால் யாருக்கும் அசம்பாவிதம் ஏற்பட்டு விடக் கூடாது என்பதற்காக யானை உடனடியாக பிடிக்க வேண்டும் என்றோம். ஆனால் யானை இருக்கும் இடத்தை கண்டுபிடித்த பின்னரும் மயக்க ஊசி செலுத்தி பிடிக்காமல் அவர்களுக்குள் சண்டை போட்டு கொள்கின்றனர். எனவே அவர்களுக்கு இடையேயான சண்டையை மறந்து விரைந்து அந்த காட்டு யானையை மயக்க ஊசி செலுத்தி பிடிக்க நடவடிக்கை எடுக்க வேண்டும். இல்லையென்றால் தொடர் போராட்டத்தில் ஈடுபடுவோம் என்றனர்.
