கடலூர்

சிதம்பரம்:

கடலூர் மாவட்டம் சிதம்பரம் மற்றும் அதன் சுற்றுவட்டார பகுதிகளில் ஏராளமானோர் கொரோனா தொற்றினால் பாதிக்கப்பட்டுள்ளனர். கொரோனாவினால் பாதிக்கப்பட்ட குடும்பத்தினருக்கு சிதம்பரம் தொகுதி பாண்டியன் எம்.எல்.ஏ. தலைமையில் அ.தி.மு.க.வினர் நலத்திட்ட உதவிகள் வழங்கி வருகின்றனர்.

கடந்த 2 நாட்களாக சிதம்பரம் தொகுதி அ.தி.மு.க. எம்.எல்.ஏ பாண்டியன் உடல் சோர்வுடன் காணப்பட்டார். இதையடுத்து அவர் சிகிச்சைக்காக சென்னையில் உள்ள தனியார் ஆஸ்பத்திரியில் சேர்ந்தார். அங்கு அவருக்கு கொரோனா பரிசோதனை செய்யப்பட்டது. அதில் பாண்டியன் எம்.எல்.ஏ.வுக்கு கொரோனா தொற்று இருப்பது உறுதியானது.

இதையடுத்து டாக்டர்களின் ஆலோசனைபடி சென்னையில் உள்ள அவரது வீட்டில் பாண்டியன் எம்.எல்.ஏ. தனிமைப்படுத்திக் கொண்டார்.

அண்ணாமலைநகர்:

கடலூர் மாவட்டத்தில் கொரோனா தொற்று பரவலை கட்டுப்படுத்த பல்வேறு நடவடிக்கைகள் மேற்கொள்ளப்பட்டு வருகிறது. இந்த நோய் தொற்றால் பாதிக்கப்பட்டவர்களுக்கு மருத்துவமனைகளில் தரமான சிகிச்சை வழங்கப்பட்டு வருகிறது. இந்த நிலையில் சிதம்பரம் ராஜா முத்தையா மருத்துவக்கல்லூரி மருத்துவமனையில், மாவட்ட நிர்வாகத்தின் மூலம் ரூ.5 லட்சம் மதிப்பீட்டில் 15 நவீன தொலை கண்காணிப்பு கருவி அமைக்கப்பட்டுள்ளது.

இக்கருவி மூலம் நோயாளிகளின் இதயத் துடிப்பு அலை, இதயத்துடிப்பு விகிதம், சுவாச விகிதம், ஆக்சிஜன் செறிவு மற்றும் உடல் வெப்பநிலை ஆகியவற்றை கண்காணிக்கலாம்.

இந்த நவீன தொலை கண்காணிப்பு கருவி, கட்டுப்பாட்டு அறையில் அமைக்கப்பட்டுள்ள கணினி திரையுடன் இணைக்கப்பட்டிருக்கும். கட்டுப்பாட்டு அறையில் இருந்தவாரே, மருத்துவக்குழுவினர் இக்கருவி மூலம் கொரோனா தொற்று ஏற்பட்டு சிகிச்சை பெற்று வருபவர்களை தொடர்ந்து கண்காணிக்க முடியும். கொரோனா தொற்றால் பாதிக்கப்பட்டவர்களின் அருகில் செல்லாமல், இக்கருவி மூலம் நோயாளிகளின் உடல்நிலையை தொடர்ந்து கண்காணித்து உடனுக்குடன் சிகிச்சை அளிக்க மருத்துவ குழுவினருக்கு உதவியாக இருக்கும்.

இத்தகைய நவீன தொழில்நுட்ப கருவியின் பயன்பாட்டால், நோயாளிகளுக்கு தொந்தரவின்றி சிகிச்சையளிப்பதுடன், மருத்துவ குழுவினரும் நோய் தொற்றுக்கு ஆளாகாமல், அவர்களது உடல்நலனும் காக்கப்படும்.

மேற்கண்ட தகவலை கலெக்டர் சந்திரசேகர் சாகமூரி வெளியிட்டுள்ள செய்திக்குறிப்பில் தெரிவித்துள்ளார்.

கடலூர்:

கடலூர் மாவட்டத்தில் நேற்று முன்தினம் வரை 207,40 பேர் கொரோனா வைரசால் பாதிக்கப்பட்டிருந்தனர். இதில் 19,067 பேர் குணமடைந்து வீடு திரும்பி உள்ளனர். 237 பேர் பலியாகி உள்ளனர். இந்த நிலையில் நேற்று ஆயிரத்திற்கும் மேற்பட்டோருடைய உமிழ்நீர் பரிசோதனை முடிவு வெளியானது. இதில் 129 பேருக்கு தொற்று இருப்பது உறுதியாகியுள்ளது.

இவர்களில் சிதம்பரத்தை சேர்ந்த டாக்டர் ஒருவருக்கும், திருப்பூரில் இருந்து குறிஞ்சிப்பாடி வந்தவருக்கும், பரங்கிப்பேட்டையை சேர்ந்த கர்ப்பிணிக்கும், சளி, காய்ச்சலால் பாதிக்கப்பட்டு மருத்துவமனைகளில் சிகிச்சை பெற்று வந்த 43 பேருக்கும், கொரோனாவால் பாதிக்கப்பட்டவர்களுடன் தொடர்பில் இருந்த 83 பேருக்கும் தொற்று இருப்பது உறுதியானது. இதன் மூலம் மாவட்டத்தில் பாதிப்பு எண்ணிக்கை 20,869 ஆக உயர்ந்துள்ளது. நேற்று மட்டும் 188 பேர் குணமடைந்து வீடுகளுக்கு திரும்பி உள்ளனர். மேலும் 1824 பேருடைய உமிழ்நீர் பரிசோதனை முடிவு வரவேண்டியுள்ளது. இதுதவிர மாவட்டத்தில் கட்டுப்பாட்டு பகுதிகளின் எண்ணிக்கையும் 62-ல் இருந்து 56 ஆக குறைந்துள்ளது.

நெய்வேலி:

நெய்வேலி டவுன்ஷிப் போலீஸ் சப்-இன்ஸ்பெக்டர் சிவராமன், சிறப்பு சப்-இன்ஸ்பெக்டர் செல்வக்குமார் மற்றும் போலீசார் தீவிர ரோந்துப்பணி மேற்கொண்டனர். அப்போது நெய்வேலி 6-வது வட்டத்தில் உள்ள முனீஸ்வரன் கோவில் அருகில் கஞ்சா விற்றுக்கொண்டிருந்த கள்ளக்குறிச்சி மாவட்டம் சங்கராபுரம் தாலுகா பாவந்தார் ராஜவீதியை சேர்ந்த சுரேஷ்(வயது 33), நெய்வேலி 6-வது வட்டத்தை சேர்ந்த சத்தியசீலன் மகன் ஜெயசூர்யா(22) ஆகிய 2 பேரையும் போலீசார் கைது செய்தனர்.

மேலும் அவர்களிடம் இருந்த ரூ.9 ஆயிரத்து 700 பறிமுதல் செய்யப்பட்டது. இவர்கள் கொடுத்த தகவலின்படி திருக்கோவிலூர் தாலுகா வட மருதூர் மாரியம்மன் கோவில் தெருவை சேர்ந்த ஜெயபால்(59), திருப்பத்தூர் பொம்மிகுப்பம் அண்ணா நகரை சேர்ந்த மாது மகன் ராஜவேல்(37), ராஜ்குமார் மனைவி ஜோதி(28) ஆகியோரும் கஞ்சா விற்றதாக போலீசார் கைது செய்தனர். கைதானவர்களிடம் இருந்து மொத்தம் 10 கிலோ கஞ்சா மற்றும் கஞ்சா விற்க பயன்படுத்திய ஒரு கார், 2 மோட்டார் சைக்கிள்கள் ஆகியவை பறிமுதல் செய்யப்பட்டன.

கடலூர்:

கடலூர் தேவனாம்பட்டினத்தில் பெரியார் அரசு கலைக்கல்லூரி உள்ளது. இந்த கல்லூரி வளாகத்தில் கொரோனா தொற்றினால் பாதிக்கப்பட்டவர்களுக்கு சிகிச்சை அளிக்க சித்தா சிகிச்சை மையம் அமைக்கப்பட்டுள்ளது. இங்கு 80-க்கும் மேற்பட்டவர்கள் சிகிச்சை பெற்று வருகிறார்கள்.

அவர்களுக்கு இன்று காலை உணவாக இட்லி வழங்கப்பட்டது. இதில் ஒரு கொரோனா நோயாளிக்கு வழங்கப்பட்ட இட்லியில் பல்லி இருந்தது. இதை பார்த்து அவர் அதிர்ச்சியடைந்தார். உடனே அங்கிருந்த மற்றவர்களிடம் காலை உணவை சாப்பிட வேண்டாம். அதில் பல்லி உள்ளது என கூறி அவருக்கு வழங்கப்பட்ட உணவை மற்றவர்களிடம் காண்பித்தார்.

உடனே அங்கிருந்த ஊழியர்களிடம் சென்று இட்லியில் பல்லி கிடந்த விபரத்தை கூறினர். அதற்கு அவர்கள் சரிவர பதில் கூறவில்லை. இதனால் ஆத்திரம் அடைந்த கொரோனா நோயாளிகள் 30-க்கும் மேற்பட்டோர் அந்த சிகிச்சை மையத்தில் இருந்து வெளியே வந்தனர்.

பின்னர் பெரியார் அரசு கலைக்கல்லூரி வளாகத்தில் ஒன்றுதிரண்டு போராட்டத்தில் ஈடுபட முயன்றனர். இதுகுறித்து தகவல் அறிந்த சித்தா டாக்டர் செந்தில்குமார் மற்றும் கடலூர் மாவட்ட துணை போலீஸ் சூப்பிரண்டு சாந்தி தலைமையிலான போலீசார் சம்பவ இடத்துக்கு விரைந்து சென்றனர்.

கல்லூரி வளாகத்தில் திரண்டிருந்த கொரோனா நோயாளிகளிடம் சமாதான பேச்சுவார்த்தையில் ஈடுபட்டனர். அப்போது போராட்டத்தில் ஈடுபட்டவர்கள், தங்களுக்கு வழங்கிய இட்லியில் பல்லி கிடந்தது. இது தொடர்பாக ஊழியர்களிடம் தெரிவித்தால் அவர்கள் அலட்சியமாக பதில் கூறுகிறார்கள் அவர்கள் மீது உரிய நடவடிக்கை எடுக்க வேண்டும் என்று கூறினர்.

அதற்கு டாக்டர் செந்தில்குமார் இந்த சம்பவம் தொடர்பாக உரிய விசாரணை நடத்தி நடவடிக்கை எடுக்கப்படும். உங்களுக்கு வழங்குவதற்காக மாற்று உணவு தயார் செய்யப்பட்டு வருகிறது. எனவே நீங்கள் போராட்டத்தில் ஈடுபடாமல் சித்தா சிகிச்சை மையத்துக்கு செல்லுங்கள் நாங்களுக்கு உங்களுக்கு உரிய சிகிச்சை அளிக்கிறோம் என்றார்.

இதையேற்று கொரோனா நோயாளிகள் சித்தா சிகிச்சை மையத்துக்கு சென்றனர். இந்த சம்பவத்தால் அந்த பகுதியில் சிறிது நேரம் பரபரப்பு ஏற்பட்டது.

கடலூர் :

கடலூர் மாவட்டம் பண்ருட்டி அருகே உள்ள ஒதியடிக்குப்பத்தை சேர்ந்தவர் ஜானகிராமன்(வயது 39). இவர் புதுச்சேரியில் உள்ள ஒரு ஓட்டலில் புரோட்டா மாஸ்டராக வேலை பார்த்து வருகிறார். இவருக்கும், அதே பகுதியை சேர்ந்த ஒரு பெண்ணுக்கும் கடந்த சில ஆண்டுகளுக்கு முன்பு திருமணம் நடந்தது.

கணவரை இழந்த ஜானகிராமனின் மாமியார், அதே பகுதியில் உள்ள ஒரு வீட்டில் தனியாக வசித்து வருகிறார். சம்பவத்தன்று இரவு அவர் இயற்கை உபாதை கழிப்பதற்காக வீட்டின் கதவை பூட்டாமலே அருகில் உள்ள காட்டுப்பகுதிக்கு சென்றார். இதை பார்த்த ஜானகிராமன், அவரது வீட்டுக்குள் நைசாக நுழைந்து அங்குள்ள ஒரு அறையில் பதுங்கிக் கொண்டார்.

இந்த நிலையில் இயற்கை உபாதை கழித்து விட்டு வீட்டுக்கு திரும்பி வந்த அவரது மாமியார் கதவை பூட்டி விட்டு, தூங்க சென்றார். அந்த சமயத்தில் ஜானகிராமன், தனது மாமியாரை கற்பழிக்க முயன்றார்.

இதில் திடுக்கிட்ட அவர் காப்பாற்றுங்கள்... காப்பாற்றுங்கள்... என கூச்சலிட்டார். உடனே ஜானகிராமன், தனது மாமியாரை தாக்கி, வாயை பொத்தி அவரை கற்பழித்து விட்டார்.

பின்னர் அவர் அங்கிருந்து தப்பி ஓடிவிட்டார். இதற்கிடையே காயமடைந்த ஜானகிராமனின் மாமியாரை அக்கம் பக்கத்தினர் மீட்டு சிகிச்சைக்காக கடலூர் அரசு மருத்துவமனையில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்து வருகின்றனர். மேலும் இதுகுறித்து அவர் பண்ருட்டி அனைத்து மகளிர் காவல் நிலையத்தில் புகார் கொடுத்தார்.

அதன் பேரில் போலீஸ் இன்ஸ்பெக்டர் வனஜா வழக்குப்பதிவு செய்து ஜானகிராமனை தேடி வந்தார். போலீசார் தேடுவதை அறிந்த ஜானகிராமன் பயந்து விட்டார். எப்படியும் போலீசார் கைது செய்து விடுவார்கள் என்று அச்சமடைந்த ஜானகிராமன், ஒதியடிக்குப்பம் சாலையோரம் உள்ள ஒரு மரத்தில் தூக்குப்போட்டுக் கொண்டு தற்கொலை முயற்சியில் ஈடுபட்டார்.

இதை பார்த்து அதிர்ச்சி அடைந்த அந்த வழியாக சென்ற வாகன ஓட்டிகள், தூக்கில் தொங்கிய அவரை மீட்டு சிகிச்சைக்காக கடலூர் அரசு மருத்துவமனையில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.