பொது மருத்துவம்

பொதுவாக சாதம் வடித்தவுடன் அந்த கஞ்சியை கீழே ஊற்றிவிடுகிறோம். அதன் நன்மைகள் தெரிந்தவர்கள் மட்டும் தான் அந்த கஞ்சியை கீழே ஊற்ற மாட்டார்கள். நம் வீட்டில் உள்ள பெரியவர்கள் நீராகாரம் என சொல்லி அதை வீணாக்காமல் குடித்துவிடுவர். அவர்களைப் போல நீங்களும் வடித்த கஞ்சியில் உள்ள நன்மைகள் பற்றி தெரிந்துகொண்டால் அதை வீணாக கீழே ஊற்ற மாட்டீர்கள்.

சாதம் வடித்த கஞ்சியில் கார்போஹைட்ரேட்டுகள் அதிகமாக உள்ளது. சாதத்தில் எவ்வளவு ஆற்றல் இருக்கிறதோ அதே அளவு ஆற்றல் இந்த கஞ்சியிலும் உள்ளது. இளஞ்சூடான வடித்த கஞ்சியுடன் சிறிதளவு உப்பு சேர்த்து குடித்தால் வயிறும் நிறைந்துவிடும் தேவையான ஆற்றலும் கிடைத்துவிடும்.

சாதம் வடித்த இந்த கஞ்சியில் பி1,பி2,பி6 ஆகியவை உள்ளது. உங்கள் உடலுக்கு தேவையான பொட்டாசியம், மக்னீசியம் சத்தையும் அதிகரிக்கச் செய்கிறது. உடலை நீரேற்றமாக வைத்திருக்க உதவுகிறது. உடலில் எலக்ரோலைட்டுகளை சமநிலைப்ப்படுத்துகிறது. சரும பிரச்சனைகளை சரி செய்வதற்கும், சில நேரத்தில் சருமத்தில் எரிச்சலை போக்கவும், முகப்பருக்களை குறைப்பதற்கும் கூட பயன்படுகிறது.

இதிலுள்ள பொட்டாசியம் உடலில் உள்ள சோடியம் அளவை கட்டுப்படுத்தி இதய ஆரோக்கியத்தை ஒழுங்குபடுத்துகிறது. மேலும் ரத்த அழுத்தத்தையும் குறைக்கிறது. நோய் எதிர்ப்பு சக்தியையும் அதிகரிக்கிறது. மேலும் இதில் நிறைந்துள்ள நார்ச்சத்து குடல் இயக்கத்தை சீராக்கி மலச்சிக்கலைத் தடுக்கிறது.

காலையில் எழுந்தவுடன் வடித்த கஞ்சி குடித்தால் அந்த நாள் புத்துணர்ச்சி நிறைந்த நாளாக இருக்கும். அதுமட்டுமின்றி வயிறு நிறைந்த உணர்வையும் பெறுவதால் அதிகமாக சாப்பிட வேண்டும் என்ற எண்ணமும் தோன்றாது. அன்றைய நாளைக்கு தேவையான ஆற்றலும் கிடைத்து விடும்.

இன்றைய காலக்கட்டத்தில் காலையில் சீக்கிரம் எழுந்திருப்பது என்பது பலருக்கும் சவாலாகவே இருந்து வருகிறது. காலையில் சீக்கிரம் எழுந்திருக்க எத்தனை அலாரம் வைத்தாலும் அதனை அணைத்துவிட்டு மறுபடியும் தூங்குவதை பலரும் வாடிக்கையாக வைத்துள்ளனர். இதற்கு பல காரணங்கள் கூறப்பட்டாலும் முக்கிய காரணமாக இரவு உணவிற்கு நீங்கள் சாப்பிடுவது அடுத்த நாள் காலையில் நீங்கள் எவ்வளவு புத்துணர்ச்சியுடன் உணர்கிறீர்கள் என்பதில் குறிப்பிடத்தக்க மாற்றத்தை ஏற்படுத்தும்.

நீங்கள் உண்ணும் இரவு நேர உணவு செரிமானம், ஹார்மோன் கட்டுப்பாடு, தூக்கத்தின் தரம் மற்றும் நீரேற்றம் ஆகியவற்றை பாதிக்கிறது. இவை அனைத்தும் நிதானமான தூக்கம் மற்றும் உற்சாகமான தொடக்கத்திற்கான முக்கிய காரணிகளாகும்.

மெலடோனின் உற்பத்தியை ஆதரிக்கும், ரத்த சர்க்கரை அளவை உறுதிப்படுத்தும் மற்றும் கனமான தன்மையைத் தவிர்க்கும் சீரான இரவு உணவு ஆழ்ந்த தூக்கத்தை ஊக்குவிக்கும். மறுபுறம், கனமான, கொழுப்பு நிறைந்த அல்லது அதிக சர்க்கரை நிறைந்த உணவுகள் தூக்க சுழற்சிகளை சீர்குலைத்து, அடுத்த நாள் உங்களை சோர்வாகவோ அல்லது சோம்பலாகவோ உணர வைக்கும்.

இரவில் சரியான உணவுகளைத் தேர்ந்தெடுப்பது உடல் ஓய்வெடுக்கவும், மிகவும் திறமையாக சரிசெய்யவும் உதவும். நீங்கள் புத்துணர்ச்சியுடன் எழுந்திருக்க விரும்பினால், உங்கள் இரவு உணவில் சேர்க்க 5 சிறந்த உணவுகள் எவை என்பதை தொடர்ந்து பார்ப்போம்.

1. சால்மன் மீன்

ஒமேகா-3 கொழுப்பு அமிலங்கள் மற்றும் வைட்டமின் டி நிறைந்த சால்மன், மெலடோனின் உற்பத்தியை ஆதரிக்கிறது மற்றும் வீக்கத்தைக் குறைக்கிறது. இது ஆழ்ந்த தூக்கத்தை ஊக்குவிக்கிறது. இது மனநிலை மற்றும் தூக்கத்தின் தரத்தை மேம்படுத்தும் செரோடோனின் அளவைக் கட்டுப்படுத்தவும் உதவுகிறது. இது புத்துணர்ச்சியுடன் எழுவதற்கு முக்கியமாகும்.

2. சர்க்கரைவள்ளிக் கிழங்கு

இவை கார்போஹைட்ரேட், பொட்டாசியம் மற்றும் மெக்னீசியம் ஆகியவற்றால் நிரம்பியுள்ளன. அவை தசைகளை தளர்த்தி ஆழ்ந்த தூக்கத்தை ஆதரிக்க உதவுகின்றன. இனிப்பு சர்க்கரைவள்ளி கிழங்கு மெதுவாக வெளியிடும் ஆற்றலையும் வழங்குகிறது. இது இரவில் உங்களை எழுப்பக்கூடிய ரத்த சர்க்கரை குறைவதைத் தடுக்கிறது.

3. கீரைகள்

மெக்னீசியம், கால்சியம் மற்றும் நார்ச்சத்து நிறைந்த இலைக் கீரைகள், ஓய்வை ஊக்குவிக்கின்றன. மற்றும் இரவில் செரிமானத்தை உதவுகின்றன. இந்த ஊட்டச்சத்துக்கள் உடல் அமைதியாக இருக்க உதவுகின்றன மற்றும் இரவு நேர விழிப்பு அல்லது அமைதியற்ற தூக்கத்தின் வாய்ப்புகளைக் குறைக்கின்றன.

4. கொண்டைக்கடலை அல்லது பருப்பு

சிறந்த தாவர அடிப்படையிலான புரத மூலங்களான கொண்டைக்கடலை மற்றும் பயறு வகைகளில் வைட்டமின் B6 உள்ளது, இது மெலடோனின் உற்பத்தியில் பங்கு வகிக்கிறது. அவற்றின் நார்ச்சத்து செரிமானத்திற்கும் உதவுகிறது. மற்றும் இரவு முழுவதும் ரத்த சர்க்கரை அளவை சீராக வைத்திருக்கிறது.

5. கிரேக்க தயிர்

டிரிப்டோபன் மற்றும் கால்சியத்தின் நல்ல மூலமாகும் கிரேக்க தயிர், மூளை டிரிப்டோபனைப் பயன்படுத்தி மெலடோனின் மற்றும் செரோடோனின் உற்பத்தி செய்ய உதவுகிறது. இது எடையை ஏற்படுத்தாமல் இரவு முழுவதும் உங்களை நிறைவாக வைத்திருக்கும் புரதத்தையும் வழங்குகிறது.

6. பாதாம்

பாதாமில் மெக்னீசியம் மற்றும் ஆரோக்கியமான கொழுப்புகள் நிறைந்துள்ளன, அவை தரமான தூக்கத்தை ஆதரிக்கின்றன. இரவு உணவில் ஒரு சிறிய பகுதியை சாப்பிடுவது உடல் ஓய்வெடுக்கவும் ஓய்வுக்குத் தயாராகவும் உதவும், அதே நேரத்தில் மூளைக்கு ஊட்டமளிக்கும்.

7. பிரவுன் ரைஸ் அல்லது குயினோவா

பழுப்பு அரிசி அல்லது குயினோவா போன்ற முழு தானியங்கள் குறைந்த கிளைசெமிக் குறியீட்டைக் கொண்டுள்ளன, இன்சுலின் வெளியீட்டை ஊக்குவிக்கின்றன. இது மூளையில் டிரிப்டோபனை அதிகரிக்கிறது. இந்த சிக்கலான கார்போ-ஹைட்ரேட்டுகள் நிலையான ஆற்றல் மட்டங்களையும் பராமரிக்கின்றன.

8. வாழைப்பழத் துண்டுகள்

இரவு உணவிலோ அல்லது இனிப்புப் பண்டத்திலோ சிறிது வாழைப்பழத்தைச் சேர்ப்பது பொட்டாசியம் மற்றும் மெக்னீசியத்தை வழங்குகிறது. இவை இரண்டும் இயற்கையான தசை தளர்த்திகளாகும். அவற்றின் இயற்கையான சர்க்கரைகள், மிதமாகச் சாப்பிடும்போது, ரத்த சர்க்கரையை அதிகரிக்காது. ஆனால் தூக்கத்திற்கு மென்மையான மாற்றத்தை ஆதரிக்கின்றன.

9. மூலிகை தேநீர்

இது ஒரு உணவாக இல்லாவிட்டாலும், இரவு உணவை முடிக்கும்போது கெமோமில் போன்ற அமைதியான தேநீர் குடிப்பது சிறந்த தூக்கத்தை ஊக்குவிக்கும். இந்த தேநீர்கள் லேசான மயக்க பண்புகளைக் கொண்டுள்ளன. பதட்டத்தைக் குறைக்கின்றன. மேலும் நீங்கள் புத்துணர்ச்சியுடன் எழுந்திருக்க நிம்மதியான தூக்கத்தைத் தூண்ட உதவுகின்றன.

10. பூசணி விதைகள்

மெக்னீசியம், துத்தநாகம் மற்றும் டிரிப்டோபான் நிறைந்த பூசணி விதைகள் ஒரு சிறந்த இரவு நேர சிற்றுண்டியாகும். அவை நரம்பியக்கடத்தி செயல்பாடு மற்றும் ஹார்மோன் சமநிலையை ஆதரிக்கின்றன, அவை நிம்மதியான தூக்கத்திற்கும் உற்சாகமான காலைக்கும் அவசியமானவை.

இரவு உணவிற்கு லேசான, ஊட்டச்சத்து நிறைந்த மற்றும் குறைவான உணவுகளைத் தேர்ந்தெடுப்பது தரமான தூக்கத்தையும், புத்துணர்ச்சியூட்டும், துடிப்பான காலையையும் உங்களுக்கு அமைக்கும்.

இந்தியாவில் உடல் பருமன் கொண்டவர்களின் எண்ணிக்கை அதிகரித்து வருகிறது. 2050-ம் ஆண்டுக்குள் 44.9 கோடிக்கும் அதிகமான இந்தியர்கள் அதிக எடை அல்லது உடல் பருமனாக இருப்பார்கள் என்று கணிக்கப்பட்டுள்ளது.

ஏற்கனவே, நகர்ப்புறங்களில் வசிப்பவர்களில் 5-ல் ஒருவர் உடல் பருமனாக இருப்பதாக ஆய்வில் கண்டறியப்பட்டு உள்ளது. உடலுக்கு தீங்கு விளைவிக்கும் மோசமான உணவு வகைகள் மற்றும் உடல் செயல்பாடு இல்லாமை ஆகியவற்றால் குழந்தைகளுக்கும் உடல் பருமன் அதிகரித்து வருகிறது.

இந்த நிலையில் நாக்பூர் எய்ம்ஸ் உட்பட அனைத்து மத்திய அரசு மருத்துவமனைகளிலும், உணவுப்பொருட்களில் இருக்கும் எண்ணெய் மற்றும் சர்க்கரை அளவுகளை பட்டியலிட்டு பலகைகள் வைக்க மத்திய சுகாதார அமைச்சகம் உத்தரவிட்டுள்ளது.

இதில் நாம் தினமும் உண்ணும் அன்றாட சிற்றுண்டி உணவுகளில் எவ்வளவு கொழுப்பு மற்றும் சர்க்கரை இருக்கிறது என்பதை விளக்கும் பட்டியல்கள் இடம்பெறுகின்றன. உடலுக்கு தேவையில்லாத உணவை நீக்குவதற்கான முதல் படி இதுவாகும்.

சமோசா, ஜிலேபி ஆகியவை அனைவரும் விரும்பி சாப்பிடும் உணவு வகைகள் ஆகும். ஆனால் இந்த 2 உணவுகளும் உடலுக்கு தீங்கானது என்று கூறப்படுகிறது. இதன் மூலம் சமோசா, ஜிலேபி ஆகியவை விரைவில் சுகாதார எச்சரிக்கை பட்டியலில் சேரலாம் என்று கருதப்படுகிறது.

சிகரெட்டுகளில் எச்சரிக்கை வாசகம் இருப்பது போல சமோசா, ஜிலேபி அடைத்து விற்கப்படும் பாக்கெட்டுகளில் உள்ள லேபிளில் இந்த எச்சரிக்கை வாசகம் விரைவில் இடம்பெற உள்ளது என்று இந்திய இருதயவியல் சங்கத்தின் நாக்பூர் பகுதி தலைவர் அமர் அமலே கூறினார்.

நீரிழிவு, இதய நோய் மற்றும் உயர் ரத்த அழுத்தம் போன்ற நோய்களுக்கு எதிரான நடவடிக்கையின் ஒரு பகுதியாக மருத்துவர்கள் மற்றும் சுகாதார ஆதரவாளர்கள் இதை பார்க்கிறார்கள். இந்த எச்சரிக்கை வாசகம் இடம்பெறும் பட்டியலில் மேலும் பல உணவுகளும் சேர உள்ளன.

உடலின் அனைத்து உறுப்புகளின் செயல்பாட்டுக்கும் சிறுநீரகங்கள் முக்கிய பங்கு வகிக்கின்றன. ஒவ்வொரு நிமிடமும் சுமார் அரை கப் ரத்தத்தை வடிகட்டுவதுடன் கழிவுகளை வெளியேற்றும் பணியை செய்கின்றன. அத்துடன் உடலில் தேங்கியிருக்கும் கூடுதல் நீரை அகற்றி சிறுநீரை உருவாக்குகின்றன. மது அருந்துதல், உடல் பருமன் போன்ற பிரச்சனைகள் சிறுநீரகங்களின் செயல்பாட்டுக்கு இடையூறு ஏற்படுத்தி அவை சரியாக செயல்பட விடாமல் சிறுநீரக நோய்களுக்கு வழிவகுக்கின்றன. அவற்றை தவிர்ப்பதுடன் சரியான உணவுப்பழக்கங்களை பின்பற்றுவதன் மூலம் சிறுநீரகங்களின் ஆரோக்கியத்தை வலுப்படுத்தலாம். அதற்கு சாப்பிட வேண்டிய உணவுகளின் பட்டியல் இது...

1. காலிபிளவர்

இதில் பொட்டாசியம் குறைவாகவும், வைட்டமின்கள் சி, கே மற்றும் ஆன்டி ஆக்சிடென்டுகள் நிறைவாகவும் உள்ளன. அத்துடன் போலேட், நார்ச்சத்தும் நிறைந்துள்ளன. கல்லீரலில் உள்ள நச்சுகளை நடுநிலையாக்க உதவும் சேர்மங்களும் காலிபிளவரில் உள்ளன. நோய் எதிர்ப்பு சக்தியை அதிகரிக்க உதவுவதோடு சிறுநீரகங்களுக்கும் நன்மை பயக்கின்றன.

காலி பிளவரை பொரித்தோ, வேகவைத்து மசித்தோ உட்கொள்ளலாம். அரை கப் வேகவைத்த காலிபிளவரில் மிகக் குறைந்த அளவே சோடியம் மற்றும் பொட்டாசியம் உள்ளன. இது சிறுநீரகங்களுக்கு பாதுகாப்பானது. அதிலிருக்கும் நார்ச்சத்து செரிமானத்திற்கு உதவும். மலச்சிக்கலைத் தடுக்கும். இதுவும் சிறுநீரக ஆரோக்கியத்திற்கு முக்கியமானது. காலிபிளவரை தவறாமல் உணவில் சேர்ப்பது சிறுநீரகங்களின் பணிச்சுமையைக் குறைத்து, நச்சுகளால் ஏற்படும் சேதத்தில் இருந்து பாதுகாக்கும்.

2. புளூபெர்ரி

புளூபெர்ரி பழங்கள் அளவில் சிறியவை, ஆனால் சிறுநீரகங்களுக்கு ஆரோக்கியமானவை. அவற்றில் சோடியம், பொட்டாசியம் மற்றும் பாஸ்பரஸ் குறைவாக உள்ளன. இவை சிறுநீரகங்களைப் பாதுகாக்க ஏற்றவை. அத்துடன் புளூபெர்ரியில் அந்தோசயினின்கள் எனப்படும் ஆன்டி ஆக்சிடென்டுகள் நிறைந்துள்ளன. அவை வீக்கத்தை குறைக்கவும், செல்களை சேதத்தில் இருந்து பாதுகாக்கவும் உதவுகின்றன.

புளூபெர்ரியை தவறாமல் சாப்பிடுவது இதய நோய் மற்றும் நீரிழிவு நோயின் அபாயத்தைக் குறைக்க உதவும். இந்த இரு நோய்கள்தான் சிறுநீரகங்களுக்கு தீங்கு விளைவிப்பவை.

3. சிவப்பு குடைமிளகாய்

சிவப்பு நிற குடைமிளகாய் சிறுநீரக ஆரோக்கியதிற்கு பலம் சேர்க்கும். அதில் பொட்டாசியம் குறைவாக இருப்பதோடு, வைட்டமின்கள் ஏ, சி, பி6, போலிக் அமிலம் மற்றும் நார்ச்சத்து போன்ற முக்கியமான ஊட்டச்சத்துகள் நிரம்பியுள்ளன. இந்த வைட்டமின்கள் நோய் எதிர்ப்பு சக்தியை அதிகரிக்கும். சிறுநீரகப் பாதுகாப்பிற்கு உதவிடும்.

4. பூண்டு

பூண்டு உணவுக்கு சுவையை அதிகரிக்கச் செய்யும் என்பதை விட சிறுநீரக ஆரோக்கியத்திற்கு சிறந்தது. இதில் ஆக்சிஜனேற்ற அழுத்தத்தால் ஏற்படும் சிறுநீரக சேதத்தை குறைக்க உதவும் ஆன்டி ஆக்சிடென்டுகள் மற்றும் அழற்சி எதிர்ப்பு சேர்மங்கள் உள்ளன. பூண்டு ரத்த அழுத்தத்தைக் குறைக்கவும் உதவும். உயர் ரத்த அழுத்தம் சிறுநீரகங்களின் செயல்பாட்டுக்கு சிரமங்களை ஏற்படுத்தும். எனவே சமையலில் பூண்டு சேர்த்துக்கொள்வது சிறுநீரகங்களுக்கு பாதுகாப்பானது.

5. முட்டையின் வெள்ளைக்கரு

உடலுக்கு புரதம், பாஸ்பரஸ் அவசியமானவை. அதேவேளையில் அதிகப்படியான பாஸ்பரஸ் சிறுநீரகங்களுக்கு சிரமத்தை உண்டாக்கும். முட்டையின் வெள்ளைக்கருவில் பாஸ்பரஸ் குறைவாகவும், புரதம் போதுமானதாகவும் உள்ளது. முட்டையின் வெள்ளைக்கருவை தொடர்ந்து சாப்பிடுவது சிறுநீரகங்களுக்கு அதிக சுமை கொடுக்காமல் செயல்பட வழிவகை செய்யும். உணவில் முட்டையின் வெள்ளைக்கருவைச் சேர்ப்பது சிறுநீரகங்களின் அழுத்தத்தைக் குறைக்கும். அதே வேளையில் புரத உட்கொள்ளலை சமநிலைப்படுத்த உதவும். முட்டை சாப்பிட விருப்பமில்லை என்றால் பாலாடைக்கட்டி, டோபு வடிவில் உட்கொள்ளலாம்.

சிலருக்கு உடம்பின் சில பகுதிகளில் முகம், கை, கால்களில் மருக்கள் அதிகமாக இருக்கும். அந்த மருக்களை அகற்றிவிட வேண்டும் என தோன்றினாலும் அதனால் ஏற்படும் வலியை நினைத்து அந்த எண்ணத்தை கைவிட்டு விடுவார்கள். மருக்களை இயற்கையான முறையில் வீட்டில் உள்ள பொருட்களை வைத்து எப்படி அகற்றலாம் என்று பார்க்கலாம்...

சாலிசிலிக் அமிலம், அல்லிசின், என்சைம்கள் முதலானவை நம் வீட்டில் உள்ள பொருட்களிலேயே நிறைந்து உள்ளன. இவற்றை பயன்படுத்தி மருக்களை எளிமையாக அகற்றி விடலாம்.

அல்லிசின் பூண்டில் அதிகமாக உள்ளது. இந்த அல்லிசின் மருக்களை உண்டாக்கும் வைரசுடன் போராடும் தன்மை பெற்றது. அதனால் பூண்டு சாறை தினமும் மருக்களின் மீது தடவலாம்.

அன்னாசியில் உள்ள என்சைம்கள் மருக்களை எரித்து அழிக்கும் தன்மை கொண்டது. அதனால் சில வாரங்களுக்கு தொடர்ந்து அன்னாசி பழத்தை பிழிந்து அதன் சாறை மருக்களின் மீது தடவலாம்.

மருக்களை வேரோடு அகற்ற ஆப்பிள் சைடர் வினிகரை பயன்படுத்தலாம். ஒரு காட்டன் பஞ்சு அல்லது துணியில் ஆப்பிள் சைடர் வினைகரை நனைத்து மருக்களின் மீது தொடர்ந்து 3 முறை வைக்க வேண்டும். இப்படி தொடர்ந்து செய்துவர, நாளடைவில் மருக்கள் கருமை நிறமாக மாறும். பின்னர் அதை சுற்றியுள்ள தோல் வறண்டு பின்னர் மரு வேரோடு விழுந்து விடும்.

உருளைக்கிழங்கு சாறு மற்றும் எலுமிச்சை சாறை மருக்களின் மீது தேய்ப்பதன் மூலம் மருக்கள் நாளடைவில் விழுந்து விடும். உருளைக்கிழங்கு சாறை மட்டும் இரவில் மருக்களின் மீது தடவி அடுத்த நாள் காலையில் கழுவ வேண்டும். அப்போது அதன் வீரியம் அதிகமாக இருக்கும்.

வெங்காயத்தின் மீது உப்பு தடவி அதன் சாறை மருக்கள் மீது தடவி வரலாம். அதேபோல் கற்றாழை ஜெல்லையும் மரு உள்ள இடத்தில் தொடர்ந்து தேய்த்துவர நாளடைவில் மருக்கள் உதிர்ந்துவிடும்.

சாலிசிலிக் அமிலம் இயற்கையாகவே மருக்களைப் போக்க உதவுகிறது. ஆனால், தோல் எரிச்சல், சிவத்தல் போன்ற பக்க விளைவுகள் ஏற்படவும் வாய்ப்பு உள்ளது. அதனால் முறையாக சரும மருத்துவரை அணுகி அவரது பரிந்துரையின் பேரில் பயன்படுத்துவது நல்லது.

முகத்தில் உள்ள மருக்களை நீக்கும் போது கவனமாக இருக்க வேண்டும், ஏனென்றால் நீங்கள் தொடர்ந்து மருக்களை கிள்ளுவது, சொரிவது போன்ற செயல்களில் ஈடுபட்டால், அது மேலும் பரவ வாய்ப்புள்ளது. மருக்களை தொட்டுவிட்டு கைகளை கழுவுவது மிகவும் நல்லது. மருக்களை அகற்ற எடுத்தவுடன் நீங்களாகவே எதையும் செய்யாமல் மருத்துவரின் ஆலோசனை பெறுவது மிகவும் நல்லது.

சாப்பிடும்போது டி.வி., ஸ்மார்ட்போன் பார்க்கும் பழக்கம் பல இளைஞர்களுக்கும் உண்டு. அப்படி டி.வி. அல்லது ஸ்மார்ட்போனை பார்த்துக் கொண்டே சாப்பிடுவது சிலரது அன்றாட பழக்கமாகமாறிவிட்டது. ஆனால், டி.வி., ஸ்மார்ட்போன் பார்த்துக்கொண்டே சாப்பிடுவது உடல்நலக் கோளாறுகளுக்கு வழிவகுக்கும் என மருத்துவர்கள் அறிவுறுத்துகிறார்கள். அதிலும் பத்து வயதுக்குட்பட்ட குழந்தைகள், டி.வி., ஸ்மார்ட்போன் பார்த்துக்கொண்டே சாப்பிடுவதால், உடல் பருமன் ஏற்படும் அபாயம் உள்ளதாகவும் கூறுகின்றனர். இவை மட்டுமல்ல இன்னும் பல பிரச்சனைகளுக்கு இந்த பழக்கம் காரணமாகிறது. அதுகுறித்து விரிவாக இங்கு பார்க்கலாம்...

* பல சிக்கல்கள்

ஸ்மார்ட்போன், டி.வி. பார்க்கும் பழக்கத்தை குறைக்காவிட்டால், நாளடைவில் பல பிரச்சனைகளை சந்திக்க வேண்டியிருக்கும். பெரியவர்கள் மற்றும் குழந்தைகள் இருவரும் இந்தப் பழக்கத்தை உடனடியாக நிறுத்த வேண்டும் என்று நிபுணர்கள் பரிந்துரைக்கின்றனர். இதனால் கண் பலவீனம், உடல் பருமன், வயிற்று பிரச்சனைகள், வாயு பிரச்சனைகள், மன அழுத்தம் மற்றும் டென்ஷன் போன்ற பல பிரச்சனைகள் ஏற்படுகின்றன.

* கவனம்

இப்படி டி.வி. அல்லது ஸ்மார்ட்போனை பார்ப்பதால் அவர்களால் சாப்பிடுவதில் கவனம் செலுத்த முடியாமல் போகும். இதனால் உணவை மென்று சாப்பிடாமல், விழுங்கி சாப்பிடுவார்கள். இதனால், செரிமான பிரச்சனை ஏற்படுகிறது. மேலும் இரவில் இப்படி சாப்பிட்டால் தூக்கம் சீர்குலையும்.

* அதிகம்

டி.வி. அல்லது ஸ்மார்ட்போனை பார்த்துக்கொண்டே சாப்பிடும்போது வழக்கத்தை விட கூடுதலாக உணவு உண்ண நேரிடும். இதனால் உண்ட உணவு எளிதாக ஜீரணமாகாது. சில சமயங்களில், அதிகப்படியான உணவினால் மூச்சுவிடக்கூட முடியாத சூழ்நிலைகள் கூட ஏற்படும்.

* உறவு பாதிப்பு

சாப்பிடும்போது டி.வி., செல்போன் பார்க்கும் பழக்கத்தால் தங்கள் பிரச்சனைகளை குடும்ப உறுப்பினர்களிடம் பகிர்ந்து கொள்ள நேரம் இருக்காது. சாப்பிட்ட பிறகும் அந்த பழக்கத்தை தொடரும்போது அவர்கள் தனி உலகத்தில் இருப்பது போன்ற நிலை ஏற்பட்டுவிடும். இதனால் குடும்பத்தினருடன் கருத்து வேறுபாடுகள் ஏற்படலாம். இந்த விளைவு டீன் ஏஜ் பருவத்தினரை அதிகமாக பாதிக்கிறது. சாப்பிடும்போது, சில நேரங்களில் ஸ்மார்ட்போனில் அதிகமாக கவனத்தை வைப்பதால், உங்களைச் சுற்றி என்ன நடக்கிறது என்பதை பற்றி நீங்கள் கவலைப்படுவதில்லை. இது உளவியல் ரீதியாகவும் மன அழுத்தத்தை ஏற்படுத்தும் என நிபுணர்கள் தெரிவிக்கின்றனர். எனவே முடிந்தவரை சாப்பிடும் போது டி.வி., போன் பார்க்காமல் இருப்பதை தவிர்க்கவும். அதுதான் நல்லதும் கூட.

உடல் ஆரோக்கியம், டயட் போன்றவற்றில் புதுப்புது விஷயங்கள் 'டிரெண்ட்' ஆன வண்ணம் இருக்கின்றன. அப்படி, இப்போது டயட் பிரியர்களின் புதிய டிரெண்ட் ஆக மாறியிருப்பது, 'வாட்டர் டயட்'.

உணவுகளைவிட, அதிகளவு தண்ணீர் பருகுவதுதான், வாட்டர் டயட்டின் அடிப்படை. இதை முறையாக கடைப்பிடித்தால் ஆரோக்கியமாக உடல் எடையை குறைக்க முடியும் என்கிறார்கள். சரி, வாட்டர் டயட்டை பின்பற்றுவதற்கான சில வழிமுறைகளை தெரிந்துகொள்வோம்...

* அதிகமாக நீர் பருகுங்கள்

நம் ஒட்டுமொத்த உடல் நலத்திற்கும் நீர் மிகவும் இன்றியமையாதது என்பது நம் எல்லோருக்கும் தெரியும். ஆனால் நம்முடைய பரபரப்பான வாழ்க்கை முறையில் தண்ணீர் குடிப்பதையே மறந்து விடுகிறோம். ஏன், ஒரு பாட்டில் தண்ணீரை அடைத்து குடிக்கக்கூட நம் எல்லோருக்கும் சோம்பேறித்தனம் தொற்றிக் கொள்கிறது. உங்கள் உடல் உறுப்புகள் எல்லாம் சீராக இயங்க தண்ணீர் மிகவும் அவசியமான ஒன்று.

ஒரு நாளைக்கு 8-10 டம்ளர் தண்ணீர் குடிப்பதாக உறுதி செய்து கொள்ளுங்கள். இதுதான், வாட்டர் டயட்டின் அடிப்படை.

* அடிக்கடி பருகுங்கள்

அதிகாலை எழுந்ததும் 2-3 டம்ளர் தண்ணீர் குடியுங்கள். அதில் கொஞ்சம் எலுமிச்சைச் சாறு அல்லது லவங்கப்பட்டை பொடி சேர்த்து கொண்டால் இன்னும் கூடுதல் பலன் கிடைக்கும். அதே மாதிரி நீங்கள் எங்கு சென்றாலும் ஒரு பாட்டில் முழுவதும் தண்ணீர் நிரப்பி எடுத்துச் செல்லுங்கள். முடிந்தால் வாட்டர் ஆப் போன்றவற்றை ஸ்மார்ட்போனில் தரவிறக்கம் செய்து அடிக்கடி அலாரம் வைத்து ஞாபகப்படுத்திக் கொள்ளலாம். அலுவலக வேலையில் இருக்கும் போது கூட 1-2 மணி நேரத்துக்கு ஒரு முறை வாட்டர் கூலர் இருக்கும் இடம் வரை நடந்து செல்லுங்கள். இது நீங்கள் தண்ணீர் குடிக்க வேண்டும் என்பதை ஞாபகப்படுத்தும்.

* தாகம்

தாகம் எடுக்கும்போது சோம்பேறித்தனம் பார்க்காமல் தண்ணீர் பருகுங்கள். தாகத்தையும், பசியையும் குழப்பிக் கொள்ளாதீர்கள். பலரும் தாகத்தை தவறாக புரிந்து கொண்டு நொறுக்குத் தீனிகளை சாப்பிட்டு எடையை கூட்டிக் கொண்டு இருக்கிறார்கள். அவ்வாறு செய்யாமல் தாகம் எடுக்கும் போது தண்ணீர் மட்டும் அருந்துங்கள். நீங்கள் உடல் எடையை குறைக்க நினைத்தால் அதில் முதன்மையானது தண்ணீர் பருதுவதுதான்.

* பசியின்மை

சாப்பிடுவதற்கு சில நிமிடங்களுக்கு முன்பாக, தண்ணீர் குடித்தால் பசியின்மையைத் தவிர்க்க முடியும். சாப்பிட்டதும் உணவு சாப்பிட்ட திருப்தி உண்டாகும். இது தேவையற்ற உணவுகளையும், கலோரிகளையும் எடுத்துக் கொள்ளாமல் இருக்க உதவும். குறிப்பாக காலை உணவுக்கு முன்பாக தண்ணீர் குடித்தால் கிட்டத்தட்ட நீங்கள் சாப்பிடும் உணவின் அளவில் இருந்து 13 கலோரிகள் குறைவதாக ஆய்வில் நிரூபிக்கப்பட்டுள்ளது.

* தண்ணீர் அளவு

குறைந்தபட்சம் ஒரு நாளைக்கு 8 முதல் 10 டம்ளர் (2 லிட்டருக்கு) மேல் குடிக்க வேண்டியது கட்டாயம். ஆனால் பொதுவாக நாம் ஒன்றை மனதில் கொள்ள வேண்டும். தண்ணீர் குடிப்பது என்பது ஒவ்வொருவருக்கும் அவரவர் உடலுக்கு ஏற்ப மாறிக் கொண்டே இருக்கும். எடுத்துக்காட்டாக, ஒரு சிலருக்கு மிக அதிகமாக வியர்வை உண்டாகும். அவர்கள் வெறுமனே 2 லிட்டர் தண்ணீர் குடித்தால் போதாது. நிச்சயம் அதிகமாகக் குடிக்க வேண்டும்.

அடிக்கடி ஏப்பம் வருகிறது. எதற்கு வருகிறது ஏன் வருகிறது என்றே தெரியவில்லை எரிச்சலாக இருக்கிறது என்று புலம்புகிறீர்களா? கவலையை விடுங்கள். இந்த பதிவில் ஏப்பம் ஏன் ஏற்படுகிறது, ஏப்பம் ஏற்படுவதற்கான காரணம் என்ன? அதை தடுப்பதற்கான எளிய வழிகளைப் பற்றி தான் பார்க்கப் போகிறோம்.

ஏப்பம் ஏன் ஏற்படுகிறது?

நாம் உணவு உண்ணும் போது காற்றையும் விழுங்கி விடுகிறோம். அந்த காற்றானது வயிற்றையும் தொண்டையையும் இணைக்கும் உணவுக்குழாய் பகுதியில் அதிகமாக இருக்கும். நீங்கள் வேகவேகமாக சாப்பிடும் போது, தண்ணீர் குடிக்கும் போது அந்த காற்றானது ஏப்பமாக வெளியேறுகிறது.

ஏப்பம் ஏற்படுவதற்கான காரணம் என்ன?

உணவுக்குழாயில் உள்ள காற்று ஏப்பமாக வெளியேறுவது இயற்கையானது. ஆனால், சிலருக்கு எப்போதும் ஏப்பம் வந்துகொண்டே இருக்கும். அதற்கு அவர்கள் அன்றாட வாழ்வில் மேற்கொள்ளும் பழக்க வழக்கங்கள் தான் காரணமாக அமையும். மதுபானங்கள், புகை பழக்கம் உள்ளவர்களுக்கு அதிகமாக ஏப்பம் வரும். கார்பனேற்றப்பட்ட பானங்களை குடிக்கும் போதும் புகை பிடிக்கும் போதும் வாயுவானது அதிகமாக உள்ளிழுக்கப்பட்டு அதனால் ஏப்பம் ஏற்படுகிறது.

செரிமான பிரச்சனையும் ஏப்பம் ஏற்பட ஒருவகையில் காரணமாக அமைகிறது. சிலருக்கு செரிமான பிரச்சனை இருக்கும். அப்படிப்பட்டவர்கள் பால் போன்றவற்றை அதிகமாக எடுத்துக்கொள்ளும் போது ஏப்பம் ஏற்படும். அதேபோல், மன அழுத்தம் கூட செரிமான அமைப்பை பாதித்து ஏப்பம் வர காரணமாக இருக்கும் என கூறப்படுகிறது.

'ஏப்பம் 'வராமல் தடுப்பதற்கான எளிய வழிகள்:

ஏப்பம் வராமல் தடுப்பதற்கு உங்கள் அன்றாட வாழ்வில் சில பழக்க வழக்கங்களை முறைபடுத்தினாலே போதும். தினமும் நீங்கள் உட்கொள்ளும் உணவை வேகவேகமாக சாப்பிடாமல், மெதுவாக மென்று விழுங்க வேண்டும்.

இரவில் தாமதமாக சாப்பிட நேரிட்டால் மசாலா அதிகமான உணவுகளை தவிர்த்து விடுங்கள்.

செரிமான பிரச்சனைகளை தவிர்க்க அதிக அளவில் கீரை வகைகள், சோம்பு, இஞ்சி, மிளகு, சீரகம், புதினா, பெருங்காயம், தயிர், பூண்டு முதலானவற்றை உணவில் சேர்த்துகொள்ள வேண்டும்.

சோடா கலந்த பானங்கள், மது வகைகள், புகைப்பழக்கம் முதலானவற்றை முற்றிலும் கைவிட வேண்டும்.

செரிமான பிரச்சனை உள்ளவர்கள் லாக்டோஸ் இல்லாத பால் பொருட்களை முயற்சிக்கலாம்.

மனதை ஒருநிலைப்படுத்த தினமும் யோகா, தியானம் அல்லது உங்கள் மன விரும்பும் செயல்களில் ஈடுபடலாம்.

சாப்பிட்டவுடன் அதிக சத்தத்துடன், ஒருவித வாடையுடன் ஏப்பம் வருகிறது என்றால் அது வயிற்று புண், அஜீரணம், குமட்டல், நெஞ்செரிச்சலுக்கான அறிகுறியாகவும் இருக்கலாம். இந்த அறிகுறிகள் இருந்தால் உடனடியாக மருத்துவரை அணுகி, பரிசோதனை செய்து கொள்வது நல்லது.

அரிய பல மருத்துவ குணங்களை கொண்ட நாவல் மரம் சாலை ஓரங்களில், குளக்கரை, ஆற்றங்கரைகளில் காணப்படுகின்றன. தென்னிந்திய காடுகளிலும் இதனை காணலாம். நாவல் மரத்திற்கு நாக மரம், சாதலம், ஆருகதம், நேரேடு, நேரேடம் என்று பல பெயர்கள் உண்டு.

ஆங்கிலத்தில் 'ஜம்பலம்' என்றும் அழைக்கப்படுகிறது. நாவல் மரம் இந்தியாவில் வறண்ட நிலங்களை தவிர மற்ற அனைத்து இடங்களிலும் வளர்கிறது. இலங்கை, மியான்மர், மலேசியா ஆகிய நாடுகளிலும் பரவலாக காணப்படுகிறது. இலங்கையில் புத்த கோவில்களை சுற்றி நாவல் மரங்களை காணலாம். நாவல் பழங்கள் ஜூலை, ஆகஸ்டு, செப்டம்பர் மாதங்களில் கிடைக்கின்றன.

துவர்ப்பு கலந்த இனிப்பாகவும், ருசியாகவும் இருக்கும். காய் பச்சையாகவும் பழம் கருநீல நிறத்திலும் இருக்கும். நாவல் பழம் மூளைக்கு பலம் தரும் பழம் என்கிறார்கள், இயற்கை டாக்டர்கள்.

இது கல்லீரல் நோயை குணமாக்கும். சிறுநீரகங்களை நன்கு இயங்க செய்து சிறுநீர் வெளியேறுவதை அதிகமாக்கும். பழத்தை உண்ண குடல் நன்கு இயங்கி ஜீரண சக்தி அதிகரிக்கும்.

பழத்தை கசாயமாக பிழிந்து குடித்து வந்தால் வாயுத்தொல்லை நீங்கும். மண்ணீரல் வீக்கம், நாள்பட்ட கழிச்சல் குணமாகும். பழச்சாறுடன் தேன் கலந்து குடித்தால் வயிற்றுக்கடுப்பு நீங்கும்.

பழம் உடலுக்கும் கண்ணுக்கும் குளிர்ச்சியைத்தரும். ரத்தத்தை சுத்தம் செய்யும். பழத்தை அதிக அளவில் உண்டால் சளி, காய்ச்சல் மற்றும் தொண்டைக்கட்டுதல் ஏற்படலாம். நாவல் பழத்தை உப்பில் போட்டு சாப்பிட்டால் தொண்டைக்கட்டு ஏற்படும் வாய்ப்பு குறைவு. நாவல்பழம் கர்ப்பிணிக்கு ஒவ்வாமையை ஏற்படுத்தும் என்று கூறப்படுகிறது. நாவல் விதை பொடி நீரிழிவு பாதிப்பை குறைக்க உதவுகிறது என்பதால் இதனை ஏராளமானோர் பயன்படுத்தி வருகின்றனர்.

காலையில் எழுந்திருக்கும் போதே வயிறு உப்புசமாக இருப்பதாக உணர்கிறீர்களா? இனி கவலையே வேண்டாம். உங்கள் வீட்டில் இந்த 5 பொருட்கள் இருந்தாலே போதும் வயிறு உப்புசம், வயிறு வீக்கம் குணமாகும். உடல் எடை இழப்பிற்கு கூட பயனுள்ளதாக இருக்கும்.

தேவையான பொருட்கள்:

சீரகம் - 1 கப்

பெருஞ்சீரகம் - 1 கப்

வெந்தயம் - 1 கப்

கேரம் விதைகள் ( அஜ்வைன்) - 1 கப்

கடுகு - 1 கப்

செய்முறை:

கனமான பாத்திரத்தில் சீரகம், பெருஞ்சீரகம்,வெந்தயம், கேரம் விதைகள் மற்றும் கடுகு முதலானவற்றை சேர்த்து, நறுமனம் வரும்வரை லேசாக வறுத்துக்கொள்ள வேண்டும். பின்னர் அவற்றை நன்கு ஆற வைத்து, நைசாக அரைத்துக்கொள்ள வேண்டும். அரைத்துவைத்த பொடியை ஒரு கண்ணாடி ஜாடியில் காற்று புகா வண்ணம் மூடி வைத்துக்கொள்ளுங்கள்.

அரைத்து வைத்த இந்த பொடியை தினமும் காலை வெறும் வயிற்றில் ஒரு டம்ளர் வெதுவெதுப்பான தண்ணீரில் கலந்து குடிக்க வேண்டும். இப்படி தொடர்ந்து குடித்துவர வயிறு உப்புசம், வயிறு வீக்கம் குணமாகும். செரிமான ஆரோக்கியத்தை மேம்படுத்தி எடை இழப்பிற்கும் வழிவகுக்கும்.

சீரகமானது செரிமானத்தை தூண்டுகிறது. அஜ்வைன் மற்றும் பெருஞ்சீரகம் வாயுத்தொல்லையை நீக்க உதவுகிறது. வெந்தயம் பசியை கட்டுப்படுத்துவதாகவும் உடல் எடையை குறைப்பதில் முக்கிய பங்காற்றுவதாக ஆய்வுகள் கூறுகின்றன. கடுகு விதைகள் கலோரிகளை எரிக்கவும் கல்லீரலில் உள்ள நச்சுகளை நீக்கவும் வளர்சிதை மாற்றத்திற்கான செயல்பாட்டையும் அதிகரிக்கிறது. மொத்தத்தில் இந்த 5 பொருட்களும் இயற்கையான அழற்சி எதிர்ப்பு மற்றும் டையூரிக் பண்புகளைக் கொண்டுள்ளதால் தாராளமாக நீங்கள் எடுத்துக்கொள்ளலாம் என்று மேக்ரோபயாடிக் சுகாதார பயிற்சியாளரும் ஊட்டச்சத்து நிபுணருமான ஷில்பா அரோரா கூறுகிறார்.

பலருக்கும் சிரமம் தரும் நோயாக இருப்பது சுவாச அலர்ஜி மற்றும் ஆஸ்துமா நோய். உலக அளவில் சுமார் 18 முதல் 20 விழுக்காடு மக்கள் இந்நோயால் பாதிக்கப்பட்டுள்ளனர். இந்நோயால் பாதிக்கப்பட்டவர்களுக்கு மூச்சு செல்லும் பாதையானது வீக்கமடைந்து, அப்பகுதியில் உள்ள தசைகள் இறுகுகின்றன. இதனால் நுரையீரலுக்கு பிராணவாயு செல்வது குறைகிறது. சுவாச அலர்ஜி (ஒவ்வாமை) இதற்கு முக்கியக் காரணமாக உள்ளது.

அலர்ஜி தடுப்பு முறைகள்

நுரையீரலில் வைரஸ், பாக்டீரியா, பூஞ்சைத் தொற்று இருந்தால், முதலில் தொற்றிற்கான மருந்தைக் கொடுத்து குணப்படுத்த வேண்டும். ஒவ்வாமையை உண்டுபண்ணுகின்ற உணவுப் பொருட்களைத் தவிர்க்க வேண்டும்.

வீடு, வேலை பார்க்கும் இடங்களைத் தூய்மையாய் வைத்திருப்பதோடு தூசி, புகை உள்ள இடங்களில் நடக்கும் போது மாஸ்க் (முகமூடி) அணிவது நல்லது.

சித்த மருத்துவத் தீர்வுகள்

* 'உணவே மருந்து, மருந்தே உணவு' என்ற சித்தர்களின் அடிப்படையில் ரத்தத்தில் உள்ள ஆக்சிஜன் அளவை அதிகரிக்கச் செய்யும் கிராம்புக் குடிநீரை காலை, மாலை இருவேளை குடித்துவர ரத்தச் சுற்றோட்டம் நன்கு நடைபெற்று ஆக்சிஜன் அளவு அதிகரித்து புத்துணர்ச்சியுடன் இருக்கலாம். (கிராம்பு, லவங்கப்பட்டை, மிளகு, மஞ்சள், சுக்கு இவற்றுடன் தண்ணீர் சேர்த்து நன்றாக காய்ச்சி ஓரளவு சூடு ஆறியதும் பனங்கற்கண்டு அல்லது தேன் சேர்த்து தயாரிக்கப்படுவது தான் கிராம்பு குடிநீர்)

* துளசி, கற்பூரவள்ளி, ஆடாதோடை இலைச் சாற்றைத் தேனில் காய்ச்சி 5 முதல் 10 மி.லி. வரை எடுத்துக் கொள்ளலாம்.

* நெல்லிக்காய் லேகியம் எடுத்துக்கொள்வதன் மூலம் நோய் எதிர்ப்புச் சக்தியுடன் இருமல், சளிப் பிரச்சனையும் நீங்கும்.

* நுரையீரலை வலுப்படுத்த தினமும் 10 துளசி இலைகளை சாப்பிடலாம்.

* தூதுவளை இலைகளை வைத்து ரசம் செய்து உணவுடன் உண்ண வேண்டும்.

* சிற்றரத்தைப் பொடியை தேன் அல்லது பனங்கற்கண்டு சேர்த்து உண்ண நுரையீரல் வலுப்படும்.

* தாளிபத்திரி சூரணம் 1 கிராம், கஸ்தூரி கருப்பு 100 மி.கி., சிவனார் அமிர்தம் 100 மி.கி.,பலகரை பற்பம் 200 மி.கி. இவைகளை தேன் அல்லது வெந்நீரில் இருவேளை சாப்பிட்டு வர வேண்டும்.

* சுவாச குடோரி மாத்திரை 1 அல்லது 2 வீதம் மூன்று வேளை சாப்பிட வேண்டும்.

* ஆடாதோடை நெய் ஐந்து மி.லி. வீதம் இரு வேளை சாப்பிட வேண்டும்.

உடல் உடையை குறைக்க முயற்சிப்பவர்கள் உணவுக்கட்டுப்பாடு விஷயத்தில் கூடுதல் கவனமாக இருக்க வேண்டும். அதிலும் இரவு உணவை உண்ணும் விஷயத்தில் நேரக்கட்டுப்பாட்டையும் பின்பற்ற வேண்டும். ஏனெனில் இரவு தூக்கத்திற்கு எவ்வளவு நேரத்திற்கு முன்பு சாப்பிடுகிறீர்கள் என்பதும் முக்கியமானது. உடல் பருமனாக இருப்பவர்கள் இரவு 7 மணிக்கு சாப்பிடுவது நல்லதா? இரவு 9 மணிக்கு சாப்பிடுவது ஏற்புடையதா? இந்த இரண்டு மணி நேர வித்தியாசம் உடலில் என்னென்ன மாற்றங்கள், பிரச்சனைகளை ஏற்படுத்தும் என்பது பற்றி பார்ப்போம்.

இரவு உணவு ஏன் முக்கியமானது?

நமது உடல் சர்க்காடியன் ரிதம் எனப்படும் உள் அட்டவணையை கொண்டு செயல்படுகிறது. அதுதான் தூக்கம், உடல் ஆற்றல், ஹார்மோன்கள், வளர்சிதை மாற்றம், செரிமானம் என ஒட்டுமொத்த உடலமைப்பையும் நிர்வகிக்கிறது.

இரவில் தாமதமாகவோ அல்லது அதிகமாகவோ சாப்பிடும்போது அதனை ஜீரணமாக்குவதற்கு உடல் அதிக நேரம் போராட வேண்டியிருக்கும். குறிப்பாக இரவில் தூக்கத்தின்போது ஓய்வெடுக்க வேண்டிய நேரத்தில் உடல் இந்த வேலையை செய்ய வேண்டிய நிர்பந்தம் ஏற்படும்.

அதேவேளையில் மற்ற நேரங்களை விட இரவு நேரத்தில் உடல் கொழுப்பை வேகமாக எரிக்காது. வளர்சிதை மாற்றத்தையும் குழப்பி இறுதியில் உடல் எடை அதிகரிப்புக்கு வழிவகுத்துவிடும்.

எப்போதாவது தாமதமாக உண்ணலாமா?

சில சமயங்களில் வேலை முடிந்து வீட்டுக்கு வர தாமதமாகிவிடும். போக்குவரத்து நெரிசலில் சிக்குவதும் தாமதத்தை ஏற்படுத்திவிடும். அந்த மாதிரியான சூழலில் இரவு உணவை தாமதமாகத்தான் சாப்பிட நேரிடும். அப்போது வழக்கமாக சாப்பிடும் உணவுப்பழக்கத்திற்கு மாறாக சாப்பிடுவது சிறந்தது.

அதாவது வறுத்த புரதம் (கிரில் சிக்கன், பொரித்த மீன்), காய்கறி சாலட், காய்கறி சூப், பருப்பு கலந்த சாலட் உள்ளிட்ட உணவு பொருட்களை உட்கொள்வது சிறந்தது. கொழுப்பு நிறைந்த உணவு பொருட்கள், பீட்சா சாப்பிடுவதை தவிர்க்க வேண்டும்.

சாப்பிட்ட பிறகு சிறிது தூரம் நடைப்பயிற்சி மேற்கொள்வதும் செரிமானத்திற்கும், ரத்த சர்க்கரை அளவை கட்டுப்படுத்தவும் உதவிடும். இரவில் இனிப்பு பதார்த்தங்களை சாப்பிடுவதையும் தவிர்க்க வேண்டும்.

இரவு 7 மணிக்கு சாப்பிட்டால்....

தூங்குவதற்கு முன்பு சீக்கிரமாக அதாவது 7 மணி அளவில் சாப்பிடும்போது அந்த உணவு செரிமானம் செய்வதற்கு உடலுக்கு போதுமான நேரம் கிடைக்கும். கொழுப்பையும் சரி செய்து அதிக கொழுப்பை எரிக்க வாய்ப்பு கிடைக்கும்.

தூங்க ஆரம்பிக்கும்போது செரிமான செயல்பாடு முடிவடைந்துவிடும் என்பதால் உடலுக்கு போதுமான ஓய்வு நேரம் கிடைக்கும். அதனால் இடையூறு இன்றி ஆழ்ந்த தூக்கத்தை பெறலாம்.

தூங்குவதற்குள் செரிமான செயல்பாடு முடிவடைந்துவிடும் என்பதால் வயிறும் வீக்கமின்றி இயல்பாக இருக்கும். நள்ளிரவில் பசி எடுப்பதும் குறையும். இரவு 7 மணியில் இருந்து காலை 7 மணி வரை நீண்ட இடைவெளி கிடைப்பதால் கொழுப்பின் அளவையும் கட்டுக்குள் வைத்துக்கொள்ள முடியும்.

இரவு தாமதமாக சாப்பிடும்போது என்ன நடக்கும்?

இரவு 9 மணிக்கோ அதற்கு பிறகோ சாப்பிடும்போது வளர்சிதை மாற்றம் மெதுவாக நடப்பதற்கு வழிவகுப்பதோடு கூடுதல் பசி உணர்வையும் உருவாக்கி விடும். அதனால் அதிகம் சாப்பிட நேரிடும். சோர்வையும் உணரக்கூடும்.

அதிலும் இரவில் எண்ணெய் சேர்க்கப்பட்ட உணவுகள், கிரீம் வகை உணவுகள், கார்போஹைட்ரேட் நிறைந்த உணவுகளை உட்கொண்டுவிட்டு உடனே தூங்க சென்றால் உடலுக்கு அந்த உணவை ஜீரணிக்க போதிய வாய்ப்பு கிடைப்பதில்லை. செரிமான செயல்பாட்டுக்கு இடையூறை ஏற்படுத்தி தூக்கத்தையும் பாதிக்கும். உடல் எடை அதிகரிப்புக்கும் காரணமாகிவிடும்.