புதுச்சேரி

புதுச்சேரி:

தமிழகம், கேரளா, மேற்கு வங்கம், அசாம் உள்ளிட்ட மாநில தேர்தலுடன் புதுவை சட்டமன்றத்துக்கும் தேர்தல் நடைபெற உள்ளது.

புதுவையில் முதல்- அமைச்சர் நாராயணசாமி தலைமையிலான காங்கிரஸ், தி.மு.க. கூட்டணி ஆட்சி நடந்து வருகிறது. வரும் சட்டமன்ற தேர்தலில் காங்கிரஸ் ஆட்சியை அகற்றி கூட்டணி ஆட்சியை உருவாக்க பா.ஜனதா பல்வேறு வியூகம் அமைத்து செயல்பட்டு வருகிறது.

சட்டமன்ற தேர்தல் பணிகளை ஒருங்கிணைக்க கர்நாடகா மாநிலத்தை சேர்ந்த நிர்மல்குமார் சுரானா புதுவை மாநில பா.ஜனதா பொறுப்பாளராக நியமிக்கப்பட்டுள்ளார். புதுவையின் 30 தொகுதிக்கும் கர்நாடக மாநில பிரதிநிதிகள் பொறுப்பாளர்களாக நியமிக்கப்பட்டுள்ளனர்.

கடந்த ஓராண்டாகவே சட்டமன்ற தேர்தலுக்கு பா.ஜனதா தயாராகி வருகிறது. காங்கிரஸ் அரசை கண்டித்து பல்வேறு வகையிலான போராட்டங்களை பா.ஜனதா நடத்தி வருகிறது.

அதோடு பிற கட்சிகளில் செல்வாக்குள்ள வேட்பாளர் கர்நாடக மாநில பிரதிநிதிகளை தங்கள் கட்சியின் பக்கம் இழுப்பதிலும் பா.ஜனதாவினர் ஈடுபட்டுள்ளனர். புதுவையின் பிரதான எதிர்கட்சியான என்.ஆர்.காங்கிரஸ், அ.தி.மு.க.வுடன் கூட்டணி அமைத்து தேர்தலை சந்திக்கவும் பேச்சுவார்த்தை நடந்து வருகிறது.

காங்கிரசில் உள்ள அதிருப்தி அமைச்சர்கள், எம்.எல்.ஏ.க்களை தங்கள் கட்சிக்கு இழுக்க பா.ஜனதா வியூகம் அமைத்துள்ளது. ஒரு அமைச்சர், 5 எம்.எல்.ஏ.க்கள், காங்கிரசின் 10-க்கும் மேற்பட்ட முக்கிய பிரமுகர்கள் பா.ஜனதாவில் இணைய உள்ளதாக தகவல்கள் வெளியாகி வருகிறது.

இந்த பரபரப்பான அரசியல் சூழ்நிலையில் பா.ஜனதாவின் தேசிய தலைவர் ஜே.பி. நட்டா வருகிற 29-ந்தேதி மாலை புதுவை வருகிறார்.

அன்று இரவு புதுவை மாநில பா.ஜனதா நிர்வாகிகளின் ஆலோசனை கூட்டத்தில் பங்கேற்று பேசுகிறார்.

மறுநாள் (30-ந்தேதி) புதுவை கடலூர் சாலையில் உள்ள ரோடியர் மில் திடலில் பா.ஜனதாவின் பொதுக்கூட்டம் நடக்கிறது. இந்த கூட்டத்தில் ஜே.பி.நட்டா சிறப்புரை ஆற்றுகிறார். இதில் காங்கிரசை சேர்ந்த அதிருப்தி எம்.எல்.ஏ.க்கள் மற்றும் முக்கிய பிரமுகர்கள், பல்வேறு கட்சியை சேர்ந்தவர்கள் பா.ஜனதாவில் இணைய உள்ளனர்.

30-ந்தேதி மதுரை வருகிறார். அங்கு 2 நாட்கள் முகாமிடுகிறார். தென் மாவட்ட நிர்வாகிகளுடன் தேர்தல் தொடர்பாக ஆலோசனை நடத்துகிறார்.

புதுச்சேரி:

சாலை பாதுகாப்பு தொடர்பான விழிப்புணர்வு ஏற்படுத்தும் வகையில் சாலை பாதுகாப்பு மாதம் ஆண்டுதோறும் கடைபிடிக்கப்பட்டு வருகிறது. இந்த ஆண்டு சாலை பாதுகாப்பு நிகழ்ச்சி ஒரு மாதம் நடைபெறுகிறது. இது, சாலை பாதுகாப்பு, உயிர் பாதுகாப்பு என்ற தலைப்பில் அடுத்த மாதம் 17-ந்தேதி வரை நடைபெற உள்ளது. இதன் தொடக்க நிகழ்ச்சி சட்டசபை கேபினட் அறையில் நேற்று நடந்தது.

நிகழ்ச்சியில் முதல்-அமைச்சர் நாராயணசாமி கலந்துகொண்டு காணொலி காட்சி மூலம் போக்குவரத்து விழாவினை தொடங்கிவைத்தார். மேலும் சாலை பாதுகாப்பு குறித்த குறுந்தகட்டையும் (சி.டி.) வெளியிட்டார்.

விழாவில் முதல்-அமைச்சர் நாராயணசாமி பேசியதாவது:-

இந்தியாவில் அதிக அளவில் சாலை விபத்துகள் நடக்கின்றன. சாலை விதிகளை கடைபிடிக்காதது, தகுந்த பயிற்சியின்றி வாகனம் ஓட்டுவது போன்றவற்றினால்தான் விபத்துகள் ஏற்படுகின்றன.

புதுவையில் சாலை பாதுகாப்பு குறித்து மக்களிடையே விழிப்புணர்வுகளை ஏற்படுத்தி வருகிறோம். இதில் சில குறைபாடுகள் உள்ளன. குறிப்பாக சிக்னல்களில் விளக்குகள் எரிவதில்லை. இதனால் வாகனங்களை கண்காணிக்க முடியாத நிலை உள்ளது.

காலை வேளைகளில் வழுதாவூர், கிருமாம்பாக்கம், மதகடிப்பட்டு பகுதிகளில் இருந்து அதிக அளவில் வாகனங்களில் மக்கள் வேலை, அலுவலக பணிகள், பள்ளி, கல்லூரிகளுக்காக நகரப்பகுதிக்கு வருகின்றனர். அந்த சமயங்களில் போக்குவரத்து நெரிசல் ஏற்படுகிறது.

குறிப்பாக கடலூர் சாலையில் முருங்கப்பாக்கம் முதல் மரப்பாலம் வரை அதிக அளவில் நெரிசல் ஏற்படுகிறது. சாலையோர ஆக்கிரமிப்புகளே போக்குவரத்து நெரிசலுக்கு காரணம். நமது போலீசாரும் விதிமுறைகளை மீறுபவர்கள் மீது நடவடிக்கை எடுத்து வருகிறார்கள்.

கடந்த 3 ஆண்டுகளுக்கு முன்பு சாலை விபத்தில் இறந்தவர்களின் எண்ணிக்கை 200 ஆக இருந்தது. ஆனால் தற்போது அது 95 ஆக குறைந்துள்ளது. இது இன்னும் குறைக்கப்பட வேண்டும். புதுவை மக்கள் ஹெல்மெட் அணிய வலியுறுத்தி விழிப்புணர்வு ஏற்படுத்தி வருகிறோம்.

அதிவேகமாக செல்பவர்களால் அதிக அளவில் விபத்துகள் ஏற்படுகின்றன. இளைஞர்களும், மாணவர்களும் வேகமாக செல்வதை தவிர்க்க வேண்டும்.

இவ்வாறு முதல்-அமைச்சர் நாராயணசாமி பேசினார்.

நிகழ்ச்சியில் போலீஸ் டி.ஜி.பி. ரன்வீர் சிங் கிறிஸ்ணியா, ஏ.டி.ஜி.பி. ஆனந்த்மோகன், சீனியர் போலீஸ் சூப்பிரண்டு ராகுல் அல்வால், போ க்குவரத்துத்துறை செயலாளர் அசோக்குமார், ஆணையர் சிவக்குமார் உள்பட பலர் கலந்து கொண்டனர்.

புதுச்சேரி:

புதுவை அரசின் சார்பு நிறுவனமான அரசு போக்குவரத்துக்கழகம் (பி.ஆர்.டி.சி.) சார்பில் நகர், கிராமப்புற பகுதிகளுக்கு பல்வேறு வழித்தடங்களில் பஸ்கள் இயக்கப்படுகிறது.

புதுவையிலிருந்து சென்னை, திருப்பதி, பெங்களூரு, நாகர்கோவில், குமுளி, கடலூர், விழுப்புரத்துக்கு பஸ்கள் இயக்கப்பட்டு வருகிறது.

அரசு போக்குவரத்துக்கழக பஸ் வழித்தடங்களை தனியார் மயமாக்குவதாக தகவல் வெளியானது. இதனையடுத்து போக்குவரத்து கழகத்தில் பணிபுரியும் நிரந்தர தொழிலாளர்கள் திடீர் போராட்டத்தில் ஈடுபட்டனர்.

அமைச்சர் ஷாஜகான் பேச்சுவார்த்தை நடத்தி தனியாருக்கு வழித்தடங்கள் வழங்கப்படாது என உறுதியளித்தார். இதனையேற்று போராட்டம் கைவிடப்பட்டது.

இதனிடையே போக்குவரத்துக்கழகத்தில் பணியாற்றும் ஒப்பந்த தொழிலாளர்களும், ஊழியர்களும் தங்களை பணிநிரந்தரம் செய்யக்கோரி கடந்த மாதம் திடீர் வேலைநிறுத்தத்தில் ஈடுபட்டனர். இதனால் புதுவையில் ஓடும் டவுன் பஸ்கள் இயக்கப்படவில்லை. வெளியூர் களுக்கு நிரந்தர தொழிலாளர்கள் மூலம் பஸ்கள் இயக்கப்பட்டது.

ஒரு சில நாட்கள் நடந்த போராட்டத்துக்கு பிறகு தொழிலாளர்கள் பணிக்கு திரும்பினர். பஸ்கள் இயங்க தொடங்கியது. ஆனால் ஒப்பந்த தொழிலாளர்கள் பல்வேறு போராட்டங்களை தொடர்ந்தனர்.

நேற்று முன்தினம் பஸ் நிலையத்தில் பிச்சையெடுக்கும் போராட்டம் நடத்தினர். நேற்று சுதேசி மில் அருகே உண்ணாவிரத போராட்டம் நடத்தினர்.

இந்நிலையில் இன்று அதிகாலை 4 மணியளவில் பஸ்நிலையம் பின்புறம் உள்ள பணிமனையில் ஒப்பந்த தொழிலாளர்கள் ஒன்று கூடினர். அங்கு வாயிலை அடைத்து அமர்ந்தனர். இதனால் பஸ்கள் வெளியே கொண்டு செல்ல முடியவில்லை. போராட்டத்தில் நிரந்தர ஊழியர்கள் பங்கேற்காவிட்டாலும் பஸ்களை வெளியே கொண்டுசெல்ல முடியாததால் பணிக்கு வந்த ஊழியர்கள் அமைதியாக நின்றிருந்தனர்.

இதனால் புதுவையில் நகர பகுதியில் அரசு பஸ்கள் இயங்கவில்லை. பயணிகள் அவதிக்குள்ளாகினர். புதுவையை பொறுத்தவரை தனியார் பஸ்களே அதிகம் என்பதால் பெரிய அளவில் பாதிப்பு இல்லை. தனியார் பஸ்களில் பயணிகள் கூட்டம் அலைமோதியது.

புதுச்சேரி:

கவர்னர் கிரண்பேடி நேற்று கல்வித்துறை இயக்குனர் ருத்ரகவுடு மற்றும் அதிகாரிகளிடம் துறையின் செயல்பாடுகள் குறித்து ஆய்வு நடத்தினார். அப்போது கவர்னர் அளித்த உத்தரவின் பேரில் கல்வித்துறை இயக்குனர் ருத்ரகவுடு, பள்ளி முதல்வர்கள், துணை முதல்வர்கள், தலைமை ஆசிரியர்களிடம் காணொலி காட்சி மூலம் தொடர்பு கொண்டு பேசினார். அப்போது அவர்களிடம், கல்வி சம்பந்தமான மட்டுமல்ல நிர்வாக திறமையை வளர்த்துக்கொள்வதோடு, மாணவர்களுக்கு அவர்களும் ஒரு வகுப்பு நடத்த வேண்டும் என்று அறிவுறுத்தினார். மேலும் அவர் கூறும்போது:-

ஆசிரியர்கள் கல்வி கற்பிக்கும் முறையையும், அவர்கள் சரிவர பாடம் கற்பிக்கிறார்களா என கூர்ந்து கவனித்திட வேண்டும். பள்ளிகளை நல்ல முறையில் இயக்குவதை உறுதி செய்திட வேண்டும். மாணவர்கள் பெற்றோர் கூட்டம் நடத்தி மாணவர்களின் நிலைப்பற்றி ஆராய்ந்து பெற்றோர்கள் கூறும் கருத்துக்களை கேட்டு செயல்படுத்த வேண்டும்.

எதிர்கால படிப்புகள் குறித்து தெளிவற்ற நிலையில் உள்ள மாணவர்களுக்கு, எந்த படிப்புகளை படிக்கலாம் என விளக்கி வழிகாட்டி தன்னம்பிக்கையை உருவாக்க வேண்டும். அவர்களை அதற்கான போட்டி தேர்வு உள்பட அனைத்திற்கும் தயார் செய்திடவும், படித்து உயர் நிலையில் உள்ள முன்னாள் மாணவர்களின் உதவியை நாட வேண்டும். பள்ளி நூலகர்கள் மூலம் மாணவர்களுக்கு அன்றாட செய்தி தாளின் மூலம் பொது அறிவை உண்டாக்குதல் மற்றும் புத்தகம் வாசிப்பு பழக்கத்தை ஏற்படுத்த வேண்டும்.

கல்வி சாராத கலை, ஓவியம், கைவினை, விளையாட்டு மற்றும் இசை போன்ற பயனுள்ள செயல்பாடுகளை மாணவர்களின் விருப்பத்திற்கேற்ப தனித்திறன் ஆசிரியர்களை கொண்டு கற்பிக்க வேண்டும். பள்ளியில் பயன்பாடற்று, வினியோகப்படுத்தப்படாமல் தேங்கி கிடக்கும் பாடநூல்கள், குறிப்பேடுகள், சைக்கிள்கள், சீருடைகள் போன்றவற்றை ஏழை எளிய மாணவர்களுக்கு முன்னுரிமை அடிப்படையில் வழங்க வேண்டும்.

தேசிய மாணவர் படையிலும், தேசிய சேவை திட்டத்திலும் சேர்ந்துள்ள மாணவர்கள் முதலில் தங்கள் பள்ளிகளிலேயே ஒழுக்கம், கட்டுப்பாடு சேவை மற்றும் தூய்மை ஆகியவற்றை கடைபிடிக்க வேண்டும். குடியரசு தினத்தையொட்டி வருகிற 25-ந் தேதி காலை கவர்னர் கிரண்பேடி அரசு பள்ளி மாணவர்களுடன் ‘பொறுப்புள்ள குடிமக்களாக மாணவர்களை வளரச்செய்தல்’ என்ற தலைப்பில் காணொலி காட்சி மூலம் உரையாட உள்ளார். இதற்கான ஏற்பாடுகளை கல்வித்துறை செய்து வருகிறது.

இவ்வாறு அவர் கூறினார்.

காரைக்கால்:

காரைக்கால் நேருநகர் விரிவாக்கத்தில் உள்ள முல்லை நகரை சேர்ந்தவர் செல்வம். இவர் தமிழக பகுதியில் டாக்டராக பணியாற்றி வருகிறார். பொங்கல் பண்டிகையை கொண்டாட குடும்பத்தோடு கடந்த 13-ந்தேதி வெளியூர் சென்றுவிட்டார். நேற்று முன்தினம் அவர் வீடு திரும்பினார்.

அப்போது வீட்டின் வெளிக்கதவின் பூட்டு உடைக்கப்பட்டு திறந்த நிலையில் இருப்பதை கண்டு அதிர்ச்சியடைந்தார். வீட்டுக்குள் சென்று பார்த்தபோது அலமாரியில் வைத்திருந்த ரூ.6 லட்சம் மதிப்பிலான தங்க நகைகள் கொள்ளை போயிருப்பது தெரிய வந்தது.

இதுகுறித்து காரைக்கால் நகர போலீஸ் நிலையத் தில் செல்வம் புகார் செய் தார். அதன்பேரில் காரைக்கால் மாவட்ட சீனியர் போலீஸ் சூப்பிரண்டு நிகரிகா பட் தலைமையில் போலீசார் கொள்ளை நடந்த வீட்டுக்கு சென்று விசாரணை நடத்தினர்.

வீட்டில் ஆள் இல்லாததை நோட்டமிட்ட மர்மநபர்கள் தங்கள் கைவரிசையை காட்டியது தெரியவந்தது. இது குறித்து போலீசார் வழக்குப் பதிவு செய்து டாக்டர் வீட்டில் கொள்ளையடித்து சென்ற மர்மநபர்களை வலைவீசி தேடி வருகின்றனர்.