விருதுநகர்

விருதுநகர்:

நகர்ப்புற உள்ளாட்சி தேர்தலில் போட்டியிடும் தி.மு.க. மற்றும் கூட்டணி கட்சி வேட்பாளர்களை ஆதரித்து கனிமொழி எம்.பி. பிரசாரம் செய்து வருகிறார்.

உள்ளாட்சி அமைப்புகளில் தி.மு.க. நல்லாட்சி தரும் என்று முதல்-அமைச்சர் மு.க.ஸ்டாலின் தெரிவித்துள்ளார். சட்டமன்ற தேர்தலில் தி.மு.க. மற்றும் கூட்டணி கட்சிகளுக்கு நீங்கள் வாக்களித்ததால் தற்போது நல்லாட்சி நடக்கிறது. இதே நல்லாட்சி தொடர உள்ளாட்சி தேர்தலில் தி.மு.க. கூட்டணி வேட்பாளர்களை வெற்றிபெற செய்யுங்கள்.

தி.மு.க. சட்டமன்ற தேர்தலின்போது அளித்த வாக்குறுதியின்படி பெண்களுக்கு இலவச பஸ் பயணம், அரசு வேலை வாய்ப்பில் முன்னுரிமை போன்றவற்றை அளித்து வருகிறது. படித்த இளைஞர்கள் வேலைவாய்ப்பை பெற ஒரு லட்சத்து 45 ஆயிரம் கோடி ரூபாய் முதலீட்டில் தொழில் தொடங்க ஏற்பாடுகள் செய்யப்பட்டுள்ளன. விரைவில் அந்த தொழிற்சாலைகள் அமையும் பட்சத்தில் வேலைவாய்ப்பு பெருகும்.

அ.தி.மு.க. ஆட்சி காலத்தில் கொரோனாவால் பாதிக்கப்பட்டவர்களுக்கு ரூ.1000 நிவாரணம் வழங்கினர். அதனை ரூ. 5 ஆயிரமாக வழங்க வேண்டும் என்று தி.மு.க. அப்போது சொன்னது. அதை இப்போது வழங்கி வருகிறது. அதேபோல் தடுப்பூசி முகாம்கள் நடத்தி சாதனை படைத்துள்ளோம்.

உள்ளாட்சி தேர்தலில் போட்டியிடும் அனைத்து வேட்பாளர்களும் முதல்-அமைச்சரின் வேட்பாளர்கள். அவர்கள் உள்ளாட்சி அமைப்புக்கும், மக்களுக்கும் பாலமாக இருந்து தேவையான வசதிகள் கிடைக்க பாடுபடுவார்கள்.

நீட் ரத்து செய்யப்படும் வரை தி.மு.க. அரசு தொடர்ந்து நடவடிக்கை எடுக்கும். இந்த வி‌ஷயத்தில் முதல்-அமைச்சரின் கருத்தை காங்கிரஸ் தலைவர் ராகுல்காந்தி பாராளுமன்றத்தில் குரல் கொடுத்தார். நீட் தேர்வு ரத்து செய்யப்படும் வரை தி.மு.க. தொடர்ந்து போராடும். உள்ளாட்சியில் நல்லாட்சி ஏற்பட தி.மு.க. மற்றும் கூட்டணி கட்சிகளுக்கு அனைவரும் வாக்களியுங்கள்.

சாத்தூர்:

விருதுநகர் மாவட்டம் சாத்தூர் அருகே உள்ள வெங்கடாசலபுரத்தை சேர்ந்தவர் திருமலைராஜ் (வயது 50). இவர் பட்டாசு கடை கட்ட திட்டமிட்டார்.

இதற்காக சாத்தூர் யூனியனுக்குட்பட்ட மேட்டமலை பஞ்சாயத்து அலுவலகத்தில் விண்ணப்பித்தார். தொடர்ந்து வரைபட அனுமதிக்காக ஊராட்சி செயலர் கதிரேசன் (52) என்பவரை தொடர்பு கொண்டார்.

வரைபட அனுமதி கட்டணமாக ரூ.31 ஆயிரம் செலுத்த வேண்டிய நிலையில் கதிரேசன் கூடுதலாக ரூ.20 ஆயிரம் சேர்த்து ரூ.51 ஆயிரம் கேட்டாராம். அந்த பணம் எதற்கு என திருமலைராஜ் கேட்டபோது, மொத்தமாக கொடுத்தால்தான் வரைபட அனுமதி வழங்க முடியும் என கதிரேசன் தெரிவித்துள்ளார்.

வரைபட அனுமதிபெற ரூ.20 ஆயிரம் லஞ்சம் கொடுக்க திருமலைராஜ் விரும்பவில்லை. இதுதொடர்பாக அவர் விருதுநகர் லஞ்ச ஒழிப்பு போலீசில் புகார் செய்தார். இதனை தொடர்ந்து போலீசார் திருமலைராஜிடம் ரசாயனம் தடவிய ரூபாய் நோட்டுகளை கொடுத்து அனுப்பினர்.

அதனை வாங்கி கொண்டு திருமலைராஜ், மேட்டமலை பஞ்சாயத்து அலுவலகம் சென்றார். அங்கு செயலர் கதிரேசனை சந்தித்து பணத்தை கொடுத்தார். அவர் பணத்தை பெற்றுக் கொண்ட சிறிது நேரத்தில் விருதுநகர் லஞ்ச ஒழிப்பு போலீஸ் துணை சூப்பிரண்டு ராமச்சந்திரன், இன்ஸ்பெக்டர்கள் பூமிநாதன், பாரதிபிரியா தலைமையிலான போலீஸ் படையினர் அதிரடியாக வந்து சோதனை நடத்தினர்.

ஊராட்சி செயலர் கதிரேசனிடம் விசாரணை நடத்தினர். அவரிடம் வரைபட அனுமதிக்கான ரசீது பணம் ரூ.31 ஆயிரம் மட்டுமே இருந்தது. லஞ்ச பணம் ரூ.20 ஆயிரம் மாயமாகி இருந்தது. இதனால் போலீசார் அதிர்ச்சி அடைந்தனர்.

கதிரேசனின் கைகளில் ரசாயனபொடி இருந்ததால் அவர் பணத்தை பெற்றது உறுதியாக தெரிந்தது. ஆனால் பணம் எங்கே போனது? என்பதில் குழப்பம் ஏற்பட்டது. இந்த நிலையில் அலுவலகம் அருகே உள்ள டீக்கடை மீது போலீசாருக்கு சந்தேகம் ஏற்பட்டது.

அங்கு சோதனை நடத்தியதில் ரூ.20 ஆயிரம் மறைத்து வைத்திருந்தது தெரிய வந்தது. அதனை பறிமுதல் செய்த போலீசார் ஊராட்சி செயலர் கதிரேசனை கைது செய்தனர். அவரிடம் தொடர்ந்து விசாரணை நடைபெற்று வருகிறது.

விருதுநகர்:

விருதுநகர் மாவட்டம் சிவகாசி அருகே உள்ள ஈஞ்ஞாறு கிராமத்தில் நியோ பயர் ஒர்க்ஸ் என்ற பெயரில் பட்டாசு ஆலை செயல்பட்டு வருகிறது. இங்கு சுற்று வட்டார பகுதிகளை சேர்ந்த மக்கள் வேலை பார்த்து வருகின்றனர்.

இன்று காலை வழக்கம் போல் தொழிலாளர்கள் பட்டாசு தயாரிப்பு பணியில் ஈடுபட்டிருந்தனர். இதற்கிடையில் பட்டாசு ஆலையில் மராமத்து பணியும் நடந்து வந்தது.

ராஜபாளையத்தை சேர்ந்த மாரீஸ்வரன் இந்த பணியில் ஈடுபட்டார். அவர் கட்டிட மேற்கூரை பகுதியில் மின்சார வெல்டிங் கொண்டு பணி செய்து கொண்டிருந்தார். அப்போது ஏற்பட்ட தீப்பொறி அந்த அறையில் இருந்த பட்டாசுகளில் பட்டதால் தீ விபத்து ஏற்பட்டது.

இதனை பார்த்ததும் பட்டாசு ஆலையில் பணியில் இருந்த தொழிலாளர்கள் அவசர அவசரமாக வெளியேறினர். சிலர் தீயை அணைக்கும் பணியில் ஈடுபட்டனர். இந்த விபத்தில் மாரீஸ்வரன் லேசான காயம் அடைந்தார்.

தீ விபத்து பற்றிய தகவல் கிடைத்ததும் தீயணைப்பு துறையினர் விரைந்து வந்து தீ மேலும் பரவாமல் தடுத்தனர்.

சிறிய அளவில் விபத்து நடந்ததாலும் அதனை ஊழியர்கள் உடனடியாக பார்த்து விட்டதாலும் அதிர்ஷ்டவசமாக தொழிலாளர்கள் உயிர் தப்பினர்.

விபத்து குறித்து திருத்தங்கல் போலீசார் வழக்குப்பதிவு செய்து விசாரணை நடத்தி வருகின்றனர்.